যাত্রা 28
28
ধর্মগুরুগুনোর্ কাবড়-চুগোর
1তুই ইস্রায়েলীয়গুনো ভিদিরেত্তুন্ তর্ ভেই হারোণ আর তার্ পূঅ নাদব, অবীহূ, ইলীয়াসর আর ঈথামররে তইদু এবাত্যেই হবর্ পাদা। তারা ধর্মগুরু ওইনেই মরে সেবা গুরিবাক্। 2সর্মান আর সাজিবার আজাই তর্ ভেই হারোণত্তে তুই পবিত্র পোজাক্ বানেবে। 3মুই যিদুক্কুন্ কাবিল্ কালিগররে জ্ঞানদানগোজ্যে পবিত্র আত্মালোই পূরোণ গুরি রাগেয়োং, তুই তারারে কোইদে যেনে তারা হারোণত্তে এমন্ একবাবোত্যে পোজাক্ বানান্ যিয়েনে তারে ধর্মগুরু ইজেবে মরে সেবা গুরিবার্ নাঙে যুদো গুরি রাগেব। 4তার্ এই পোজাগ ভিদিরে থেবঅ বুক-ঢাগনি, এফোদ, বারেন্দি উরিবার্ সিলুম্, চেক্ কাবড়র্ ভিদিরেন্দি সিলুম্, খবং আর কমরত্-বানোনি। তর্ ভেই হারোণ আর তার্ পূঅগুনে যেনে ধর্মগুরু ওইনে মরে সেবা গুরি পারন্ সেনত্তে তুই তারাত্তেই পবিত্র পোজাক্ বানেই নেযেবে। 5পোজাক্ বানেবার্ কামত্ তারা সনা আর য়েল্, বিগুনি আর রাঙা রংয়র্ সুদো আর মসীনা সুদো বেবহার্ গুরিবাক্।
এফোদ
6এফোদ্তো (এক বাবোত্যে লাম্বা সিলুম্)বানা পুড়িবোদে সনা আর য়েল্, বেগুনি আর রাঙা রংয়র্ সুদো আর পাগেয়্যে মসীনা সুদোলোই। ইবে অবঅ এক্কো কাবিলোর্ আদর্ কাম্। 7এফোদ কলারানরত্ বানি রাগেবাত্তে দ্বিয়েন্ ফিতে বানেইনে এফোদর্ দ্বিকোণাত্ জোড়া দিয়্যে পুরিবো। 8এফোদ লগে জোড়া লাগেয়্যে কমরত্ বাননিগান্অ এফোদ ধোক্ক্যেন সনা আর য়েল্, বিগুনি আর রাঙা রঙয়র্ সুদো আর পাগেয়্যে মসীনা সুদোলোই বানেই দিয়্যে পুরিবো। 9তুই দ্বিবে বৈদুর্যমণি (এক বাবোত্যে পাত্তর্) নেযেইনে সিগুনো উগুরে ইস্রায়েলর পূঅগুনোর্ নাঙানি লিগি রাগেবে। 10তারার্ জর্ম মজিম পর্ পর্ ছগান্ নাঙ্ এক্কো পাত্তরত্ আর বাগি ছগান্ নাঙ্ অন্য পাত্তরত্ লিগি রাগা পুরিবো। 11-12কালিগরুনে যেধোক্ক্যেন মংগা পাত্তরত্ খোদাই গুরিনে সীলমহর্ বানান্ ঠিগ্ সেধোক্ক্যেন গুরি সেই দ্বিবে পাত্তর উগুরে ইস্রায়েলর্ পূঅগুনোর্ নাঙানি লিগি রাগা পুরিবো। পাত্তর্ দ্বিবে সনার্ জালি উগুরে বোজেইনে এফোদ কলার ফিতেগান লগে বানি দিয়্যে পুরিবো। এই দ্বিবে পাত্তরে লগেপ্রভুর্ মুজুঙোত্ ইস্রায়েলীয়গুনোরে তুলি ধুরিবাক্। লগেপ্রভু যেনে তারা উগুরে খিয়েল রাগায়্ সেনত্যেই হারোণে এই নাঙানি লগেপ্রভুর্ মুজুঙোত্ তার্ দ্বিয়েন কানা উগুরে তুলিনে বুয়োই নেযেব। 13-14সনালোই বানেয়্যে সেই জালি দ্বিয়েন লগে দ্বিয়েন্ শিগোল্ জোড়া দিবে। খাটি সনার দুড়ি ধোক্ক্যেন পাগেনেই সেই শিগোল্ দ্বিয়েন্ বানেই দিয়্যে পুরিবো।
বুগ-ঢাগনি
15মর্ উগুমানি জানিবাত্তে বুগ-ঢাগনি বানেই নেযা পুরিবো। ইয়েন্ অবঅ এক্কান্ কাবিল্ আঢর্ কাম্। এফোদ ধোক্ক্যেন ইয়েন্অ বানেই দিয়্যে পুরিবো সনা আর য়েল্, বিগুনি আর রাঙা রঙয়র্ সুদো আর পাগেয়্যে মসীনা সুদোলোই। 16ইয়েন অবঅ লাম্বান্দি আধা আত্ আর পাদাজ্যেন্দি আধা আত্ এক্কান চের্কুন্যে দ্বিভাজ্ গোজ্যে কাবড়্। 17ইয়েন উগুরেন্দি চের্ সুর্ দামী পাত্তর্ বজা পুরিবো। পত্তম সুরোত্ থেবঅ সার্দীয়মণি, পীতমণি আর পান্না; 18দ্বিলম্বর সুরোত্ চুনি, নীলকান্তমণি আর হীরা; 19তিন লম্বর সুরোত্ গোমেদ, অকীকমণি আর পদ্মরাগ; 20চের্ লম্বর সুরোত্ পোখরাজ, বৈদূর্যমণি আর সূর্যকান্তমণি। পাত্তরুন্ সনার্ জালি উগুরে বজা পুরিবো। 21ইস্রায়েলর্ বারবো পূঅত্তে বেক্কুনে বারবো পাত্তর্ থেবাক্। সিগুনোর্ পত্তি বারবো গুট্টির্ এক্কান গুরি নাঙ্ খোদাই গোজ্যে থেবঅ, যেধোক্ক্যেন গুরি সীলমহর্ খোদাই গরা অয়।
22“এই বুগ্-ঢাগনিত্যে খাটি সনা দুড়ি ধোক্ক্যেন পাগেইনে দ্বিয়েন শিগোল্ বানা পুরিবো।” 23সনার্ দ্বিবে হেবা বানেইনে বুগ-ঢাগনিয়ান উগুরে দ্বিকোণাত্ লাগেই দিবা, 24আর শিগোল দ্বিয়েন্ সেই হেবা দ্বিবে লগে বেড়েই দিবা। 25এফোদ মুজুঙেদি কলার ফিতেগান উগুরে সনার্ যে জালিগানি থেবঅ সেই জালিগানি লগে শিগলর্ অন্য কট্টাবো আক্সোই দিবা। 26সিগুন্ বাদেয়ো আরঅ দ্বিবে সনার্ হেবা বানেইনে বুগ-ঢাগনিগানর্ অন্য দ্বিবে কোণাত্ লাগেবা। এই দ্বিবে থেবঅ এফোদ ইদু বুগ-ঢাগনিগানর্ তলাত্। 27সিয়েনি বাদেয়ো আরঅ দ্বিবে সনার্ হেবা বানেইনে এফোদ কলার ফিতেগানর্ সোজা তলেন্দি এফোদ কমর্ বাননির্ ঠিগ্ উগুরেন্দি যে সিলেনিগান থেবঅ সিয়েন কুরে লাগেই দিবা। 28সে পরেদি বুগ-ঢাগনিগানর্ তলে যে হেবাবো থেবঅ সিবের্ লগে কমর্ বাননির্ হেবাবো য়েল্ দুড়িলোই বানি দিবা। সেক্কে বুগ-ঢাগনিগান এফোদ উগুরেত্তুন্ সুরি ন-যেবঅ।
29পবিত্র জাগানত্ চোমেবার্ অক্তত্ হারোণে মর্ উগুমানি জানিবাত্তেই এই বুগ-ঢাগনিগান উগুরে লেখ্যে ইস্রায়েলর্ পূঅগুনোর্ নাঙানি বুগোত্ গুরি বুয়োই নেযেব। এই বুগ্-ঢাগনিয়ান আমিঝে লগেপ্রভুর্ মুজুঙোত্ তারারে তুলি ধুরিবো। 30বুগ্-ঢাগনিগানর্ ভাজঅ ভিদিরে থবে উরীম আর তুম্মীম। সেক্কে হারোণে যেক্কে লগেপ্রভুর্ মুজুঙোত্ আঝিল্ অবঅ সেক্কে সিয়েনি তার্ বুগোত্ থেবঅ। সেক্কে হারোণে লগেপ্রভুর মুজুঙোত্ আমিঝে ইস্রায়েলীয়গুনোত্তেই মর্ উগুমানি জানিবার্ উপায় ইজেবে তার্ বুগোত্ রাগেব।
ধর্মগুরুগুনোর্ অন্য কাবড়-চুগোরানি
31এফোদর্ তলেদি যে লাম্বা সিলুম্মো থেবঅ সিবে পুরো বেক্কান্ য়েল্ সুদোলোই বানেই নেযেবে। 32মাদাবো ভোরেবাত্তেই সিবের্ সংমোধ্যেগান খুলো থেবঅ। এই খুলো জাগায়ান্ যেনে পাদি ন-যায় সেনত্তে সিয়েনর্ চেরোকিত্তে ডাগেন্দি বুনিনে দরঅ গুরি দিয়্যে পুরিবো। 33য়েল্, বিগুনি আর রাঙা রঙয়র্ সুদোলোই ডালিম ফল ধোক্ক্যেন বানেইনে এই সিলুম্মোর্ তলেদি কাজানর্ চেরোকিত্তে দুলেই দিবে। সিগুনোর্ ফাগে ফাগে দিবে সনার্ ঘন্টা। 34তলেন্দি বেক্ কাজাগান ধুরি থেবঅ এক্কো গুরি ডালিম ফল্ আর এক্কো গুরি ঘন্টা। 35লগেপ্রভুরে সেবা গুরিবার্ অক্তত্ হারোণে এই পোজাক্কানি উরিবো। তে যেক্কে পবিত্র জাগানত্ লগেপ্রভুর্ মুজুঙোত্ যেবঅ আর সিয়োত্তুন্ নিগিলি এবঅ সেক্কে এই ঘন্টাগুনোর রগুন্ শুনো যেবঅ আর সেক্কে তার্ জীংকানিগান্ রোক্ষে পেবঅ।
36এক্কান খাটি সনার্ পাত বানেইনে সিয়েন উগুরে সীলমহর্ খোদাই গরেদে ধোক্ক্যেন গুরি এই কধানি লিগি নেযেবে; লগেপ্রভুর্ নাঙে যুদো গুরি রাগানা। 37সেই পাত্তান্ খবঙানর্ মুজুঙেন্দি থেবঅ আর য়েল্ দুড়িলোই সিয়েন্ বান্যে থেবঅ। 38ইয়েন থেবদে হারোণর্ কবালান উগুরে। যেদক্কানি পবিত্র জিনিস ইস্রায়েলীয়গুনে উৎসর্ব গুরিবাত্তেই আনিবাক্ সিয়েনির্ বেক্ দুষ-ভুলোর্ ভারান্ হারোণ উগুরে। লগেপ্রভু যেনে সিয়েনি গুজি লয়্ সেনত্তে হারোণ কবাল উগুরে এই সনার্ পাত্তান্ আমিঝে থেবঅ।
39ধর্মগুরুবোর্ ভিদিরেদি সিলুম্মো বানা পুড়িবোদে মসীনা সুদোর্ চেক্ কাবড়লোই আর খবঙান্ বানেবেদে সেই এক্কুই সুদোলোই। কমরত্-বাননিগান্ অবদে এক্ বাবোত্যে নক্শা গোজ্যে জিনিস।
40সর্মান আর সাজিবার্ আজাই তুই হারোণর্ পূঅগুনোত্তেয়ো সিলুম, কমরত্-বানোনি আর মাদাত্ তোক্কে বানেই লবে। 41তর্ ভেই হারোণ আর তার্ পূঅগুনোর্ এই বেক্ পোজাক্কানি পিনেই দিইনে তুই তারারে তেল্লোই অভিষেক গুরিনে ধর্মগুরু ইজেবে বোজেই দিবে। লগেপ্রভুর্ নাঙে তুই তারারে ফারক্ গুরি নেযেবে যেনে তারা ধর্মগুরু ওইনে মরে সেবা গুরি পারন। 42কমরত্তুন্ ধুরি দামানা সং ঢাগিবাত্তেই মসীনা কাবড়র্ জাংগি বানেই নেযেবে। 43হারোণ আর তার্ পূঅগুনে যেক্কে মিলন-তাম্বুলত চোমেবাক্ বা পবিত্র জাগার্ ডালিপূজোত্ সেবা কাম্ গুরিবাত্যে উজেই যেবাক্ সেক্কে তারা এই জাংগিগুন্ পিনিবাক্। সেক্কে তারা দুষ্নেইয়্যে গুরি থেবাক্ আর মারা ন-পুড়িবাক্। হারোণ আর তার্ বংশধরুনোত্তে ইয়েনই অবঅ এক্কান জিংকানিবর্ সুদোম।
Currently Selected:
যাত্রা 28: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
