ইষ্টের 4
4
মর্দখয়ে ইষ্টেরর্ সাহায্য চেলঅ
1পুরো হবরান্ জানি পারিনে মর্দখয় উজ্যে কাবড়ান্ ফাদিনে বস্তা ফাদা উরিলো আর ছেই গুলিনে শঅর ভিদিরে যেইনে রঅ ছাড়ি ছাড়ি অমকদ কানা ধুরিলো। 2এধোক্কেন্ গুরিনে তে রাজঘরর্ গেট্টো সং গেলঅ মাত্তর্ ভিদিরে সোমেই ন-পারিলো, কিত্যে বস্তা ফাদা উরিনে কারত্তুন্ ভিদিরে সুমিবার্ উগুম্ ন-এলঅ। 3পত্তি চাগালাত্ যিয়েনত্ রাজার কধাগান আর উগুমান লুমিলো সিয়েনত্ যিহূদীগুনো ভিদিরে আবিলেচ্, উবোস্, কানাকুদি আর বিলেপ্ গরা ধুরিলাক্। কয়েকজনে বস্তা ফাদা উরিনে ছেইয়ো উগুরে পড়িলাক্।
4ইষ্টেরর্ চাগরানীগুনে আর ইজিরেগুনে এইনে যেক্কেনে তারে মর্দখয়র হবর্ দিলাক্ সেক্কেনে তা মনানত্ অমকদ দুঃখো অলঅ। বস্তা ফাদার বদলে উরিবাত্তে তে মর্দখয়রে কাবড় পাধেই দিলো মাত্তর্ তে সিয়েনি ন-নেযেল। 5সেক্কে ইষ্টেরে রাজার নেযেয়্যে তার্ সেবাগুরিয়্যে ইজিরে হথকরে ডাগিনে পাদেল আর মর্দখয়র কি ওইয়্যে আর কিত্তে ওইয়্যে সিয়েন্ তাত্তুন্ জানি এবাত্তে উগুম দিলো।
6সেক্কে হথকে রাজঘরর্ গেদো মুজুঙেন্দি শঅর্-সংমোধ্যে মর্দখয়র ইদু গেলঅ। 7সেক্কে মর্দখয়ে তা উগুরে যিয়েনি ঘোট্যে আর যিহূদীগুনোরে ভস্ত গুরিবাত্তে হামনে যিদুক্কুন্ টেঙা রাজ-ভান্ডালত্ দিবার শমক্ খেইয়্যে সিয়েনি বেক্কানি হথকরে কলঅ। 8শূশনত্ দিয়্যে যিহূদীগুনোরে ভস্ত গুরিবার যে রাজ-উগুম দিয়্যে ওইয়্যে মর্দখয় সিয়েনর্ নকল কপিবো হথকরে দিলো, যেনে তে সিয়েন্ ইষ্টেররে দেগেই পারে আর বেপারান্ বুঝেই পারে। ইষ্টেরে যেনে রাজার মুজুঙোত্ যেইনে তা মানুচ্চুনোত্তেই কোজোলি গরে সে কধাগান ইষ্টেররে কবাত্তে মর্দখয় হথকরে কলঅ।
9হথকে ফিরি যেইনে মর্দখয়ে যিয়েনি কোইয়্যে সিয়েনি ইষ্টেররে জানেল। 10সেক্কে ইষ্টেরে মর্দখয়রে এ কধাগান কবাত্তে হথকরে উগুম দিলো, 11“রাজার বেক্ কামগুরিয়্যেগুনে আর রাজার অধীনোত্ বেক্ চাগালার্ মানুচ্চুনে হবর্ পান্, কনঅ মরদ বা মিলে রাজার ডাগনি ন-পেইনে যুনি ভিদিরে দরবারত্ তাইদু যান্ সালে তাত্তেই বানা এক্কান্ আইন আঘে-সিয়েন অলদে তার্ মরণ। মাত্তর্ যে মানুচ্চো উগুরে রাজা সোনার রাজলুদিক্ বাবেই দিবো বানা তা পরাণান্ বাঁজিবো। মাত্তর্ গত ত্রিশ দিনো ভিদিরে রাজার ইদু যেবাত্তে মরে ডাগা ন-অয়।”
12ইষ্টেরর্ বেক্ কধানি মর্দখয়রে জানা অলঅ। 13মর্দখয় ইষ্টেররে এ কধাগান কোই পাদেল, “এ কধাগান মনে ন-গুরিচ্, রাজার ঘরত্ আগচ্ বিলিনে পুরো যিহূদীগুনো ভিদিরে বানা গায় গায় তুয়ই রোক্ষ্যে পেবে। 14মাত্তর্ এ সময়োত্ যুনি তুই জুরো গুরি থাচ্ সালে অন্য কিত্যেত্তুন্ যিহূদীগুনে সাহায্য আর উদ্ধোর্ পেবাক্, মাত্তর্ তুইয়োদ মুরিবে আর তঅ বাবর্ বংশগুনেয়ো শেজ্ ওই যেবাক্। কিজেনি অয়ত এধোক্কেন্ সময়ত্তেই তুই রাণীর পধ্থান্ পেইয়োচ্।”
15সেক্কেনে ইষ্টেরে মর্দখয়রে এ জোব্পান পাধেই দিলো, 16“তুই যেইনে শূশনত্ থেইয়্যে বেক্ যিহূদীগুনোরে এগত্তর্ গর্ আর মত্তেই বেক্কুনে উবোস্ থাদোক্। তুমি তিন দিন সং রেদোত্ বা দিনোত্ কনঅ কিচ্ছু হানা-দানা ন-গুরিবা। তুমি যেধোক্কেন্ উবোস থেবা সেধোক্কেন্ মুই আর মর্ চাগরানীগুনেয়ো উবোস্ থেবাক্। সে পরেন্দি যুনিয়ো সিয়েন্ সুদোমর্ উল্লোমি অয় তো মুই রাজার ইদু যেম্। সেক্কে যুনি মত্তুন্ মরা পড়েদে অয় মুই মুরিম্।”
17সেক্কে মর্দখয় যেইনে ইষ্টেরর্ বেক্ উগুমানি মজিম্ কাম্ গুরিলো।
Copyright © 2021 Bangladesh Bible Society