দানিয়েল 9
9
দানিয়েলর তবনা
1-2মাদীয় অহশ্বেরশের পুয়ো দারিয়াবসরে বাবিল রেজ্যর্ রাজা গরা ওইয়্যে। তার্ রাজাগিরির্ পত্তম বজরত্ মুই দানিয়েল ভাববাদী যিরমিয়রে দিয়্যে লগেপ্রভুর কধা মজিম্ বোইবোত্তুন্ বুঝি পারিলুং যে, যিরূশালেমান সত্তুর্ বজর ভস্ত ওইনে পড়ি থেবঅ। 3সেনত্তে মুই উবোস্ থেইনে, বস্তা পাদা পিনিনে আর ছেই মিগিনেই কোজোলী আর আওজে প্রভু গোজেন ইধু তবনা গুরিলুং।
4মর্ গোজেন লগেপ্রভু ইধু মুই তবনা গুরিলুং আর পাপ স্বিগের্ গুরিনে কলুং, ও প্রভু, তুয়ই দাঙর্ আর ভক্তিবলা দর্ লাগেয়্যে গোজেন। যিগুনে তরে কোচ্পান আর তঅ উগুমানি পালান্ তারাত্তে তুই তর্ শেজ্ ন-ওইয়্যে কোচ্পানার বেবস্থা রোক্ষ্যে গুরি থাচ্। 5আমি পাপ গোজ্যেই, অন্যেয় গোজ্যেই। আমি ভান্ন্যেই কাম্ গোজ্যেই, উল্লোমি গোজ্যেই। আমি তর্ উগুম আর সুদোম পদত্তুন্ সুরি যেইয়্যেই। 6আমা রাজাগুনোর, নেতাগুনোর, পূরোণি মানুচ্চুনোর আর দেজর্ বেক মানুচ্চুনো ইধু তর্ চাগর ভাববাদীগুনে তর্ দিয়্যে যে কধানি কোইয়্যে সিয়েনি আমি ন-শুনিই।
7ও প্রভু, তুই ন্যায়বলা, মাত্তর্ এচ্চ্যে সং আমি অগমানে নাঢা যেইয়্যেই। যিহূদার মানুচ্চুনে, যিরূশালেমর আদাম্মেগুনে আর যিদুক্কুন ইস্রায়েলীয়রে তঅ উগুরে অবিশ্বেজর্ কারনে তুই নানান্ দেজত্ ছিদি দুয়োচ্ তারা বেক্কুনে অগমানে নাঢা যেইয়্যে আঘন্। 8ও লগেপ্রভু, আমা রাজাগুন, নেতাগুন, পুরোণি মানুচ্চুন আর আমি অগমানে পৌল্যেই আঘিই, কিত্যে আমি তঅ বিরুদ্ধে পাপ গোজ্যেই। 9আমা প্রভু গোজেন দোয়্যেলু আর খেমাবলা, যুনিয়ো আমি তঅ বিরুদ্ধে উল্লোমী গোজ্যেই। 10আমি আমা গোজেন লগেপ্রভুর কধালোই বাধ্য ন-ওই; তর্ চাগর্ ভাববাদীগুনোর মাধ্যমে তর্ দিয়্যে উগুমানি আমি ন-পালেই। 11ইস্রায়েলীয়গুন বেক্কুনে তর্ উগুম অমান্য গুরিনে তঅ পদত্তুন্ সুরি যেইয়োন; তারা তঅ কধা ন-শুনোন্। সেনত্তে তর্ চাগর্ মোশির সুদোমত্ লেখ্যে যে অভিশাবর্ কধা তুই শমক্ হেইনে কোইয়োচ্ সিয়েনি আমা উগুরে ঢালি দিয়্যে ওইয়্যে, কিত্যেই আমি তঅ বিরুদ্ধে পাপ গোজ্যেই। 12আমার আর আমার শাজন্গুরিয়্যেগুনোর্ বিরুদ্ধে তুই যে কধানি কোইয়োচ্ সিয়েনি পূরোণ গুরিবাত্তে তুই আমা উগুরে দাঙর্ দযা আন্যচ্। যিরূশালেম উগুরে যিয়েনি গরা ওইয়্যে গোদা পিত্থিমীত্ আর কনজাগাত্ সেবাবোত্যে গরা ন-অয়। 13মোশির সুদোমত্ যেবাবোত্যে লেগা আঘে সেবাবোত্যেগুরি এই বেক্ দযানি আমা উগুরে এইচ্চ্যে, তো আমি আমা পাপত্তুন্ ফিরিনে আমা গোজেন লগেপ্রভুর দোয়্যে পেবার চেট্ট্যা ন-গরন্; তর্ সত্য উগুরে আমি মনযোগী ন-ওই। 14সেনত্তে ও লগেপ্রভু, তুই দযা যুক্কোল্ গুরি রাগেয়োচ্ যেন সিয়েন ইক্কিনে আমা উগুরে পাধেই দি পারচ্, কিয়া আমা গোজেন লগেপ্রভু বেক্ কামানিত্ ন্যায়বলা; তো আমি তঅ কধা ন-শুনিই।
15ইক্কিনে ও আমার প্রভু গোজেন, তুই খেমতাবলা আঢ্তোই তঅ মানুচ্চুনোরে মিসরত্তুন্ নিগিলেই আনিনে সুনাঙ্ পেইয়োচ্, আর সিয়েন এইচ্চ্যে সং আঘে। আমি পাপ গোজ্যেই, ভান্ন্যেই কাম গোজ্যেই। 16ও প্রভু, তর্ ন্যায্যতা মজিম তর্ শঅর্, অত্তাৎ তর্ সুদ্ধো-সাংগ মুড়ো যিরূশালেমত্তুন্ তর্ অমকদ অহুজিগান আর রাগ্কান দূর্ গুরি দে। আমা পাপ্পানিত্তে আর আমা পূরোণি মানুচ্চুনোর অন্যেয়ত্তে আমা চেরোকিত্তে মানুচ্চুনো ইধু যিরূশালেম আর তঅ মানুচ্চুনে ঈচ্ গরেদে মানুচ্ ওইয়োন।
17“ইক্কিনে, ও আমা গোজেন, তঅ চাগরুনোর তবনা আর কোজোলী শুন। ও প্রভু, তর্ সুনাঙান্ রোক্ষ্যেত্তে ভস্ত ওই যেইয়্যে তর্ ঘর উগুরে তুই দোয়্যের্ চোগেদি রিনি চাহ্। 18ও মর্ গোজেন, তুই কান্ দে, শুন; তঅ চোগ্কুন খুল্ আর যে শঅরান তঅ নাঙে চিনেজানা সিয়েনর ভস্ত অনা একপল্লা চাহ্। আমা নিজো গুণে নয় বরং তর্ দাঙর্ দোয়্যেত্তে আমি তইদু কোজোলী গুরির্। 19ও প্রভু, শুন। ও প্রভু, খেমা গর্। ও প্রভু, মনযোগ দে, কিজু গর্। ও মর্ গোজেন, তর্ সুনাঙান্ রোক্ষ্যে গুরিবাত্তে আর দেরি ন-গুরিচ্, কিত্যে তর্ শঅরান আর তঅ মানুচ্চুন তঅ নাঙেই চিনেজানা।”
সত্তুর্ গুণ সাত বজর্
20এবাবোত্যেগুরি মুই তবনা গুরিলুং, মর্ আর মর্ জাতি ইস্রায়েলীয়গুনোর পাপ স্বীগের্ গুরিলুং আর মর্ গোজেন লগেপ্রভু ইধু তার সুদ্ধো-সাংগ মুড়োবোত্তে কোজোলী গুরিলুং। 21মুই সেক্কেয়ো তবনা গরঙর্ এমন সময়োত্ আগ দর্শনত্ মুই যিবেরে দেখ্যং সেই গাব্রিয়েল দূতে সাজোন্যে উৎসর্বর সময়োত্ জোরে উরিনে মইদু এলঅ। 22তে মরে বুঝেইনে কলঅ, দানিয়েল, মুই ইক্কিনে তরে বুঝিবার খেমতা আর বুদ্ধি দিবাত্তে এচ্চ্যং। 23তুই তবনা আরাম্ভ গত্তে ন-গত্তে গোজেনে সিয়েনর জোব্ দিলো, আর সিয়েন মুই তরে জানেবাত্তে এচ্চ্যং, কিয়া তে তরে অমকদ কোচ্পেদঅ। সেনত্তে এ হবরান পৌইদ্যেনে তুই চিদে গুরি চাহ্ আর দর্শনান্ বুঝি লঅ।
24তর্ মানুচ্চুনোত্তে আর তর্ সুদ্ধো-সাংগ শঅরত্তে সত্তুর্ গুণ সাত বজর ঠিগ্ গরা ওইয়্যে। সেই সময়ো ভিদিরে ভান্ন্যেয়ানি বন্ধ গরা অবঅ, অন্যেয়র্ থুম্ অবঅ, পাপ নাঢি দিয়্যে অবঅ, উমরত্যে ন্যায্যতা থিদেবর্ গরা অবঅ, দর্শন আর আগাম্ বাণী পূরোণ গরা অবঅ আর দাঙর্ সুদ্ধো-সাংগ জাগানরে অভিষেগ্ গরা অবঅ।
25“তুই জানি লঅ আর বুঝি লঅ, যিরূশালেমরে আরঅ ঠিগ্ গুরিবার আর বানেবার উগুম ফগদাং অনাত্তুন্ ধুরি আরাম্ভ গুরিনে সেই মশীহর, অত্তাৎ শাজন্গুরিয়্যেবোর এযানা সং সাত গুণ সাত বজর্ আর বাষট্টি গুণ সাত বজর অবঅ। শঅর-চক্করুন আর শঅর রোক্ষ্যের্ বেবস্থা আরঅ নূয়ো গুরিনে বানা অবঅ আর সিয়েন গরা অবঅ দুঘো সময়োত্। 26বাষট্টি গুণ সাত বজর্ পরেদি মশীহরে মারে ফেলা অবঅ আর তার্ কিচ্ছু ন-থেবঅ। অন্য এক্কো শাজন্গুরিয়্যে এবঅ আর তা মানুচ্চুনে এইনে শঅরর্ আর উবোসনা-ঘরান ভস্ত গুরিবো। শেজদি পানিবান সময় এবঅ, যেরেদি যুদ্ধো চলিবো আর ভস্তর্ পর ভস্ত ঠিগ্ গুরি রাগা আঘে। 27সাত বজরত্তে বোউত্ মান্জ্য লগে সেই শজন্গুরিয়্যেবো মিলে-মিলি গুরিবো, মাত্তর্ সাত বজরর্ সংমোধ্যে তে য়েমান আর শোজ্য উৎসর্ব গরানা বন্ধ গুরি দিবো। সেই ভস্তগুরিয়্যেবো উগুরে ঠিগ্ গোজ্যে সাজা পুরোপুরিভাবে ঢালি ন-দেনা সং উবোসনা-ঘর ভিদিরে যে সর্বনাশা ঘিনেইদ্যে জিনিস্ রাগেবে।”
Currently Selected:
দানিয়েল 9: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
