দানিয়েল 7
7
চের্বো য়েমান পৌইদ্যেনে দানিয়েলর স্ববন্
1-2বাবিল রাজা বেল্শৎসরর রাজাগিরির্ পত্তম্ বজরত্ দানিয়েলে বিচ্চোনত্ পড়িনে ভালোক্কানি স্ববন্ দেগিলো আর তা স্ববনর্ সাপ্তাবোর্ বেপারান্ তে এধোক্ক্যেনগুরি লিগিলো: রেদোত্ স্ববন ভিদিরে মুই দেগিলুং, আগাজর্ চেরান বোইয়্যেরে বড়্ সাগরানরে উলোত্ পালত্ গরের্। 3সেই সাগরানত্তুন্ চের্বো বিরেট্ য়েমান উদি এলাক্; সিগুন এক এক্কো এক এক বাবোত্যে এলাক্। 4পৌইল্যাবো এলঅ সিংহ ধোক্ক্যেন আর তার সাড়াল্যে চিলো ধোক্ক্যেন ডুয়ো এলঅ। রিনি চাদে চাদে তার ডুয়ো দ্বিয়েন ছিনি দিয়্যে অলঅ আর তারে মাদিত্তুন্ উগুরে তুলো অলঅ। সেক্কে সিবে মান্জ্য ধোক্ক্যেন দ্বিয়েন টেঙোই থিয়্যেল আর তারে মান্জ্যর মন দিয়্যে অলঅ।
5সে পরেদি মুই দ্বিলম্বর য়েমান্নো দেগিলুং। সিবে রিনি চাদে এলদে ভালুগো ধোক্ক্যেন্। তার এক কিত্তেত্তুন্ অন্য কিত্তেদি অজল্ এলঅ আর তা মুয়ো ভিদিরে ডাগ আড়র্ তিন্নো আড়্ এলঅ। তারে কুয়ো অলঅ, তুই যেইনে পেদা টিং টিং গুরি য়েরা হাঃ।
6সে পরেদি মুই রিনি চেইনে আর এক্কো য়েমান দেগিলুং। সিবে রিনি চাদে হোক্যে বাঘ ধোক্ক্যেন্ এলঅ। তা পিদোত্ পেগো ডুয়ো ধোক্ক্যেন চেরান ডুয়ো এলঅ। এ য়েমান্নোর চের্বো মাঢা এলঅ আর তারে কাবিদ্যঙগিরি গুরিবার খেমতা দিয়্যে অলঅ।
7রেদোত্ মর্ সেই স্ববনত্ মুই চের্ লম্বর য়েমান্নো দেগিলুং। সিবে অলদে দর্গরেপারা, দর্ লাগেয়্যে আর অমকদ বোলী। তার দাঙর্ দাঙর্ লুয়োর্ দাত্ এলাক্। তা শিগের্বোরে তে কট্টা গুরি গিলি ফেলেল আর যিয়েন বাগি রলঅ সিয়েন টেঙোই উরিলো। ইবে আগ য়েমান্নোত্তুন্ যুদো এলঅ আর তার দোশ্চুয়ো শিং এলাক্। 8মুই যেক্কে সেই শিঙুনোরে রিনি চাঙর্ সেক্কে আর এক্কো চিগোন্ শিং সিগুনোর সংমোধ্যে উদিলো; তা মুজুঙোত্ আগ শিঙুনো ভিদিরেত্তুন্ তিন্নো উগুরে ফেলা অলঅ। এ শিঙোর্ মান্জ্য চোগো ধোক্ক্যেন চোগ এলাক্ আর এক্কান মু এলঅ যিয়েনে বাড়্বো গুরি কধা কর্।
9পরেদি মুই দেগিলুং কয়েক্কান সিংহাসন রাগা অলঅ আর অমকদ বুড়ো এক্কো তা সিংহাসনানত্ বুজিলো। তা কাবড়-চুগোড়ানি বরফ ধোক্ক্যেন ধুব্ আর তা মাঢাবো চুলানি ধুব্ কেজ ধোক্ক্যেন। তার সিংগাসনান্ আর সিংহাসনর চাক্কাগুন যেন আগুনো ধোক্ক্যেন জ্বলের্। 10তা মুজুঙোত্তুন্ এক্কান আগুনো গাঙ্ নিগিলিনে বেঈ যার্। আজার্ আজার্ মান্জ্যে তারে সেবা গত্তন্; লাখ্ লাখ্ মানুচ্ তা মুজুঙোত্ থিয়্যেই এলাক্। বিচের্ আরাম্ভ অলঅ আর বোইয়ুন খুলো অলঅ।
11মুই দেগিলুং উই শিঙো সেক্কেও বাড়্বো গুরিনে কধা কর্। সেই য়েমান্নোরে যেদক্কন সং কাবি ফেলা ন-অলঅ সেদক্কন সং মুই রিনি চেই রলুং। তা কিয়্যেগান ভস্ত গুরিনে জ্বোল্জোল্যে আগুনোত্ ফেলেই দিয়্যে অলঅ। 12অন্য য়েমানুনোত্তুন্ খেমতা নেযা অলঅ মাত্তর্ ঠিগ্ গোজ্যে সময় তারারে বাঁজিবাত্তে দিয়্যে অলঅ।
13রেদোত্ মর্ সেই স্ববনত্ মুই রিনি চেইনে মান্জ্যপুয়ো ধোক্ক্যেন একজনরে আগাজ মেঘ ভিদিরে এত্তে দেগিলুং। তে সেই বুড়ো মানুচ্চো ইধু উজেই গেলে পরেদি তারে তা মুজুঙোত্ নেযা অলঅ। 14সেই মান্জ্যপুয়োবোরে শাজন্, সর্মান আর রাজাগিরি গুরিবার খেমতা দিয়্যে অলঅ যেন বেক্ জাদ্তুনোর, দেজর্ আর ভাযার মানুচ্চুনে তারে সেবা গরন্। তার রাজাগিরি উমরর্; সিয়েন থুম্ ন-অবঅ আর তার রেজ্যগান কনদিন্অ ভস্ত ন-অবঅ।
স্ববনর্ ভেদ্তান্
15সেক্কে মুই দানিয়েলর্ স্ববনানত্ মনত্ দুঘ পেলুং আর মুই যিয়েনি যিয়েনি দেখ্যং সিয়েনি মরে কাঙেলেত্যেত্ ফেলেল। 16যিগুনে সিয়েনত্ থিয়্যেই এলাক্ মুই তারার্ একজন ইধু উজেই যেইনে এ বেক্কানির্ ভেদ্তান্ পুযোর্ গুরিলুং। সেক্কে তে মরে এ কধাগান কোইনে সেই বেক্কানির ভেদ্তান্ বুঝেই দিলো, 17উই চের্বো দাঙর্ য়েমান অলঅ পিত্থিমীর চেরান রেজ্য। 18মাত্তর্ শেজদি দাঙর্ গোজেনর মানুচ্চুনে শাজন্ পেইনে উমরত্যে, অয়, উমরত্যে রাজাগিরি গুরিবাক্।
19সেক্কে মুই সেই চের্ লম্বর্ য়েমান্নোর ভেদ্তান্ জানিবাত্তে চেলুং। ইবে সেই য়েমান যিবে অন্যগুনোত্তুন্ যুদো আর দর্গরেপারা এলঅ, যিবের্ লুয়োর্ দাত্ আর পিদোলর্ নখ এলঅ, যে য়েমান্নো তা শিগেরবোরে কট্টা কট্টা গুরি গিলি ফেলেয়্যে আর বাদ বাদবাগিগান টেঙোই উজ্যে। 20তা মাঢাত্ দোশ্চো শিং পৌইদ্যেনে আর অন্য যে শিঙো উঠ্যে, যিবের মুজুঙোত্ তিন্নো শিং পড়ি যেইয়্যে, যিবের্ চোগ আর বাড়্বো গোজ্যে মু এলঅ আর যিবে অন্যগুনোত্তুন্ দাঙর্ ওই উঠ্যে, সেই শিঙুনো পৌইদ্যেনে জানিবাত্তে চেলুং। 21সে পরেদি মুই দেগিলুং সেই শিঙো গোজেন মানুচ্চুনো বিরুদ্ধে যুদ্ধো গুরিনে তারারে ওদেই দের্, 22যেদক্কন সং সেই বুড়োবো এইনে দাঙর্ গোজেনর মানুচ্চুনোর তপ্পে রায় ন-দিলো। ইয়েনর্ পরেত্তুন্ ধুরি গোজেনর মানুচ্চুনে রাজাগিরি গরা ধুরিলাক্।
23সে পরেদি তে মরে এবাবোত্যেগুরি ভাঙি দিলো, চের্ লম্বর্ য়েমান্নো অলঅ পিত্থিমীর চের্ লম্বর্ রেজ্যগান। সিয়েন অন্য রেজ্যগানিত্তুন্ যুদো অবঅ আর গোদা পিত্থিমীগানরে মাড়িনে কট্টা কট্টা গুরি গিলিবো। 24সেই দোশ্চো শিং অলঅ দশজন রাজা যিগুনে এ রেজ্যত্ রাজাগিরি গুরিবাক্। তারার পরেদি আর এক্কো রাজা উদিবো, তে আগ রাজাগুনোত্তুন্ অন্যবাবোত্যে অবঅ; তে তিনজন রাজারে ওদেই দিবো। 25দাঙর্ গোজেন বিরুদ্ধে তে কধা কবঅ আর তা মানুচ্চুনো উগুরে অত্যেচার গুরিবো। সে ঠিগ্ গোজ্যে দিনুন্ আর রীদি-সুদোম বুদুলিবার চেট্ট্যা গুরিবো। গোজেনর সেই মানুচ্চুনোরে সাড়ে তিন বজরত্তে তা আঢত্ তুলি দিয়্যে অবঅ। 26মাত্তর্ পরেদি তার বিচের্ গরা অবঅ আর তার্ খেমতাগান তাত্তুন্ নেযা অবঅ, আর সিয়েন উমরত্তে পুরোপুরি ভস্ত গরা অবঅ। 27সে পরেদি রাজাগিরি, শাজন্ আর পিত্থিমীর বেক্ রেজ্যগানির খেমতা দাঙর্ গোজেনর মানুচ্চুনো আঢত্ তুলি দিয়্যে অবঅ। তারার্ রেজ্যগান অবঅ উমরর্ আর বেক্ রাজাগুনে তারারে সেবা গুরিবাক্ আর তারার্ বাধ্য অবাক্।
28“ইয়েনত্ সেই স্ববনর বেপারান থুম্। মুই দানিয়েল মর্ এই বেক্ চিন্তেগানিত্তে এদক্ দোরেয়োং যে, মর্ মুয়োন অন্যবাবোত্যে ওই গেলঅ, মাত্তর্ স্ববনর্ বেপারান মুই মনত্ গাদেই রাগেলুং, কাররে ন-কলুং।”
Currently Selected:
দানিয়েল 7: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
