দানিয়েল 5
5
দেবালত্ লেগানা
1এক সময় রাজা বেল্শৎসরে তার এক আজার্ আজল্ মানুচ্চুনোত্তে এক্কো দাঙর্ হানা দিলো আর তে তারা সমারে আংগুর-রস খার্। 2আংগুর-রস খাদে খাদে বেল্শৎসরে উগুম দিলো, তা মা বাব্পো নবূখদ্নিৎসরে যিরূশালেমর উবোসনা-ঘরত্তুন্ যিদুক্কুন সনা আর রূবোর লদা আন্যে সিগুন যেনে আনা অয় সেনত্যে রাজা, তার আজল্ মানুচ্চুনে, তা মোগ্কুনে আর তার্ যেরেদি ঘর মোগ্কুনে সে লদাগুনোত্ গুরিনে আংগুর-রস হেই পারন্। 3সেক্কে গোজেন ঘরত্তুন্ যিদুক্কুন সনার লদা আনা ওইয়্যে সিগুন আনিলে পরেদি রাজা, তার আজল্ মানুচ্চুনে, তা মোগ্কুনে আর তার যেরেদি ঘর মোগ্কুনে সিগুন্দোই আংগুর-রস হেলাক্। 4তারা আংগুর-রস খাদে খাদে সনা, রূবো, পিদোল্, লুয়ো, তক্তা আর পাত্তর্লোই বানেয়্যে দেব-দেবেদাগুনোরে বাঈনী গরা ধুরিলাক্।
5সেক্কে অাদিক্ক্যেন্গুরি মান্জ্যর এক্কান আত্ এইনে রাজঘর ভিদিরে চেরাগ টগ কায়-কুরে দেবাল উগুরে লেগা ধুরিলো। লেগিবার অক্তত্ রাজা সে আঢ্তান দেগিলো। 6তা মুয়োন কালা ওই গেলঅ আর তে এদক্ দোরেলদে যে, তা কমরত্ ধুরিলো আর আঢুগিলেগুন গির্গিরে ধুরিলাক্। 7সেক্কে রাজা রঅ ছাড়ি ছাড়ি ডাগিনে ভূদো ওঝা, জ্যোতিষী আর গোণোক্ক্যেগুনোরে আনিবাত্তে কলঅ। তে বাবিলর সেই সল্লাদিয়্যেগুনোরে কোইয়্যেদে, “যে কনজনে এই লেগাগান মাদেইনে সিয়েনর ভেদ্তান্ মরে কোই দি পারিবো তারে বিগুনো কাবড় উরেই দিয়্যে অবঅ আর গত্তনাবোত্ সনার নেগেলেচ্ দিয়্যে অবঅ আর তারে রেজ্যর তিনজন রাজা ভিদিরে একজনর্ পোজিশন্ দিয়্যে অবঅ ।”
8রাজার সেই বেক সল্লাদিয়্যেগুনে ভিদিরে এলাক্, মাত্তর্ তারা সেই লেগানি পড়ি বা রাজারে সিয়েনর ভেদ্তান্ কোই দি ন-পারিলাক্। 9সেক্কে রাজা বেল্শৎসরে আরঅ দোরেল আহ্ তা মুয়োন আরঅ রাঙা-কালা মু অলঅ। তার আজল্ মানুচ্চুনে আমক্ ওই গেলাক্।
10রাজা আর তার আজল্ মানুচ্চুনোর কধা শুনিনে রাজার মাবো সেই হেবার্ ঘরানত্ এইনে কলঅ, “ও মহারাজ, তুই উমরত্যে বাঁজি থাগ্। তুই ন-দোরেচ্, তর্ মুয়োন এদক্ সুদোমু অবাত্তে ন-দিবে। 11তঅ রেজ্যগান ভিদিরে এক্কো মানুচ্ আঘে যিবে ভিদিরে পবিত্র এমন কিজু আঘে যিয়েনি এ পিত্থিমীর নয়। তঅ আজু নবূখদ্নিৎসর সময়োত্ সেই মানুচ্চুনো ভিদিরে বুঝিবার খেমতা, বুদ্ধি আর দেবেদাগুনো ধোক্ক্যেন জ্ঞান দেগা যেইয়্যে। তঅ আজু রাজা নবূখদ্নিৎসরে তারে যাদুকর, ভূদো ওঝা, জ্যোতিষী আর গোণোক্ক্যেগুনোর আজল্ ইজেবে নেযেয়্যে। 12তে দানিয়েল নাঙে এ মানুচ্চোরে বেল্টশৎসর বিলি ডাগিদো। তা ভিদিরে অমকদ গুণ, জ্ঞান, বুদ্ধি, স্ববনর্ ভেদ্তানি কোই দিবার খেমতা, গুমুরো কধানি ভাঙি দেনা আর আঘাত্যে ভেজালানি জোব্ দিবার খেমতা দেগা যেইয়্যে। তুই দানিয়েলরে ডাগিনেই আন্; এ লেগাগানর ভেদ্তান্ তেয়ই তরে কোই দিবো।”
13সেক্কে দানিয়েলরে রাজা ইধু আনা অলঅ, আর রাজা তারে কলঅ, “তুই কি সেই দানিয়েল যিবেরে মঅ আজু যিহূদা দেজত্তুন্ বন্দী গুরি আন্যে? 14মুই শুন্যং তঅ ভিদিরে এমন কিজু আঘে যিয়েনি এ পিত্থিমীর নয়, আর তঅ ভিদিরে বুঝিবার খেমতা, বুদ্ধি আর বিশেষ জ্ঞান আঘে। 15এই লেগাগান পড়িনে মরে ভেদ্তান্ কোই দিবাত্তে গুণবলা আর সল্লাদিয়্যেগুনোরে মইদু আনা ওইয়্যে, মাত্তর্ তারা ইয়েনর্ ভেদ্তান্ কোই ন-পারন্। 16ইক্কিনে মুই শুনিলুং যে, তুই গুমুরো বিষয়র্ ভেদ্তান্ কোই দিদে আর দরমর সমস্যার সমাধান দি পারচ্। তুই যুনি এ লেগাগান পড়িনে মরে সিয়েনর ভেদ্তান্ কোই দি পারচ্ সালে তরে বিগুনো রঙ কাবড় উরো অবঅ আর গত্তনাত্ সনার নেগেলেচ্ দিয়্যে অবঅ আর তুই এই রেজ্যর্ তিনজন রাজা ভিদিরে একজনর পোজিশন্ পেবে।”
17সেক্কে দানিয়েলে জোবত্ রাজারে কলঅ, তঅ বক্শিজ্চান তর্ থোক্ বা সিয়েনি তুই অন্য কাররে দিচ। মাত্তর্ মুই মহারাজ ইধু লেগাগান পড়িম আর সিয়েনর ভেদ্তান্ তারে কোম্। 18ও মহারাজ, দাঙর্ গোজেনে তঅ আজু নবূখদ্নিৎসররে রেজ্য, খেমতা, বাঈনীপানা আর সয়-সাগোজ্যে দিয়্যে। 19তারে সেই খেমতা দিইনে বেক্ জাদ্তুনোর্, দেজর আর ভাষার মানুচ্চুনে তা মুজুঙোত্ দরে গির্গিরেদাক। তে যিবেরে আওজ্ তারে মারে ফেলেদ, যিবেরে আওজ্ তারে জেদা রাগেদ, যিবেরে আওজ্ তারে দাঙর্ পধত্ তুলিদো আর যিবেরে আওজ্ তারে তলেদি লামেই দিদো। 20মাত্তর্ যেক্কে তা মনান্ বাড়্বো আর অহংকারে দরমর ওই উদিলো সেক্কে তারে তা সিংহাসনত্তুন্ লামেই দিয়্যে অলঅ আর তা সর্মানান নেযা অলঅ। 21তারে মান্জ্য ইত্তুন ধাবেই দিইনে এক্কো য়েমান খাচ্চ্যত্ দিয়্যে অলঅ। যেদক্ বিলোন সং তে মানি ন-নেযেল, দাঙর্ গোজেনে মান্জ্য রেজ্যগানি উগুরে কাবিদ্যঙ্গিরি গরে আর যিবেরে আওজ্ তারে সেই বেক্ রেজ্যগানি উগুরে বজায় সেদক্ দিন সং তে ঝার্বো গাধাগুনো লগে বজত্তি গুরিদো আর গোরু ধোক্ক্যেন ঘাস খেদ আর আগাজ শিরোপানিয়ে ভিজিদো।
22মাত্তর্ ও বেল্শৎসর, তুই তা নাদিন্; তুই বেক্কানি হবর্ পেইনেয়ো নিজোরে চিগোন্ নঅ গরচ্। 23সিয়েনর বদলে তুই নিজোরে স্বর্গর্ প্রভুর বিরুদ্ধে থিয়্যেয়োচ। গোজেন ঘরত্তুন আন্যে পিলেগুন তুই আনিবাত্যে বাজেই দুয়োচ্ আর তুই, তর্ আজল্ মানুচ্চুন, তঅ মোগ্কুনে আর যেরেদি ঘর মোগ্কুনে সিগুন্দোই আংগুর-রস হেইয়োন। তুই রূবো, সনা, পিদোল, লুয়ো, তক্তা আর পাত্তর্লোই বানেয়্যে যে দেবেদাগুনে ন-দেগন, ন-শুনোন্ আর ন-বুঝোন্ তারারে নাঙ্ গিনোদন। মাত্তর্ তুই গোজেনরে বাঈনী ন-গরচ্, যিবে আঢত্ আঘে তঅ জিংকানিগান আর তর্ বেক পথ্তানি। 24সেনত্তে তে সেই আঢ্তান পাধেইনে এ কধাগান লেগেয়্যে।
25“সে লেগাগান অলঅ ইয়েন: ‘মিনে মিনে তকেল উপারসীন।’ 26সেই কধাগানর্ ভেদ্তান্ অলঅ: মিনে, অত্তাৎ গুণেদে-গোজেনে তর্ রাজাগিরির্ দিনুন গুণ্যে আর সিগুন শেজ্ গোজ্যে। 27তকেল, অত্তাৎ মাবানা-পাল্লালোই তরে মাবা ওইয়্যে আর তুই কম্ ওইয়োস্। 28উপারসীন, অত্তাৎ ভাগ গরানা-তঅ রেজ্যগান ভাগ গুরিনে মাদীয় আর পারসীককুনোরে দিয়্যে ওইয়্যে।”
29সেক্কে বেল্শৎসরর উগুমে দানিয়েলরে বিগুনো রংয়র্ কাবড় উরেই দিয়্যে অলঅ আর তা গত্তনাবোত্ সনার্ নেগেলেচ্ পিনে অলঅ। তারে রেজ্যর্ তিনজন রাজা ভিদিরে একজনর্ পোজিশন দিবার কধা ফগদাং গরা অলঅ।
30সেই রেদোত্ বাবিলীয়গুনোর রাজা বেল্শৎসররে মারে ফেলা অলঅ, 31আর মাদীয় দারিয়াবসে বাষট্টি বজর্ বয়জত্ রেজ্যর্ ভারান্ গুজি ললঅ।
Currently Selected:
দানিয়েল 5: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
