আমোষ 8
8
এক কাল্লোং পাগানা ফল
1প্রভু লগেপ্রভু মরে আর এক্কান দর্শন দেগেল। মুই দেগিলুং, এক কাল্লোং পাগানা ফল। 2তে পুযোর্ গুরিলো, “আমোষ, তুই কি দেগর্?”
জোবত্ মুই কলুং, “এক কাল্লোং পাগানা ফল।”
সেক্কে লগেপ্রভু মরে কলঅ, “মঅ মানুচ্ ইস্রায়েলর সময় শেষ ওই যেইয়্যে; মুই আর তারারে রেহাই ন-দিম। 3সেদিন্যে রাজঘরত্ গান বদলে এই আবিলেচ্চান অবঅ, ‘বোউত্, বোউত্ মরাকিয়্যে; সিয়েনি বেক্ জাগানি ইধু লুঙি মারিনে ফেলা ওইয়্যে। জুড়ো অ।’ ”
4তুমি যিগুনে অভাবীগুনোর টেঙোই মাড়র্ আর নাঢাগুনোরে শেজ্ গুরি দুয়োর্, তুমি শুনো। 5তুমি কত্তে, “কক্ক্যে আঙোস্যেগান্ যেবগোই যেনে আমি শোজ্যনি বিজি পারিই? কক্ক্যে জিরেবার দিন্নো থুম্ অবঅ যেনে আমি বাজারত্ গম্ বেজি পারিই? আমি মাবেদে আড়িবো চিগোন গুরিবোং, দাম্ বাড়েবং, ঠগাইদ্যে পাল্লাবো বেবহার গুরিবোং, 6রূবোলোই নাঢা মান্জ্যরে আর এক জড়া জদালোই অভাবীরে কিনি নেযেম আর ঝান্দালোই ফেলে দিয়্যে গমুন্ তারা ইধু বেজি দিম।”
7লগেপ্রভু, যিবে যাকোবর্ বাঈনী গুরিবার, তে শমক্ হেইনে কোইয়্যেদে, “তারা যিয়েনি গোজ্যন সিয়েনি কনদিন্অ মুই ভুলি ন-যেইম্। 8ইয়েনত্তে কি দেজ্চান গির্নগিরেব? সিয়েন ভিদিরে বজত্তি গুরিয়্যে বেক্কুনে কি আবিলেচ্ ন-গুরিবাক্? পুরো দেজ্চান মিসরর্ য়্যাল্ গাঙ ধোক্ক্যেন ফুলি উদিনে অশান্ত অবঅ আর সে পরেদি লামিবো।”
9প্রভু লগেপ্রভু কত্তে, “সেদিন্যে দিবুজ্যে অক্তত্ মুই বেলানরে ঢুবেই দিম আর দিনোত্ পিত্থিমীগানরে আন্ধার্ গুরি দিম। 10মুই তমার্ পরব্পুন দুঘে আর বেক্ গানুন্ আবিলেচ্ গরে পারা বুদুলি দিম। মুই তমারে বেক্কুনোরে বস্তা ফাদা পিনেম্ আর মাঢাগুনোত্ টাক্ গুরি দিম। মুই সেই সময়ানরে বানা এক্কো গুরি পুয়োর্ মরণর্ আবিলেজর্ সময় ধোক্ক্যেন গুরিম আর সিয়েন থুম্ সং চলিবো অমকদ দুঘে।”
11প্রভু লগেপ্রভু কত্তে, “এবাবোত্যে বেক্ দিনুন্ এজের্ যেক্কে মুই দেজ ভিদিরে ভাদরাদ্ পাদেম। সিবে হানার্ ভাদরাদ্ বা পানি তিরেজ নয় মাত্তর্ লগেপ্রভুর কধা শুনিবার রাদ্। 12মান্জ্যে লগেপ্রভুর কধা শুনিবাত্তে পূগেত্তুন্ ধুরি পোজিমেদি আর উত্তোরেত্তুন্ ধুরি দোগিণেদি যাদে যাদে ঘুরি বেড়েবাক্, মাত্তর্ সিয়েন ন-পেবাক্। 13সেদিন্যে দোল্ দোল্ গাবুজ্যে মিলেগুনে আর বোলী গাবুজ্যেগুনে সেই কধানির্ তিরেজে জ্ঞান আরেবাক্। 14যিগুনে শমরিয়ার মূত্তিবো নাঙে শমক্ হেইনে কন্, ‘ও দান, তর্ জেদা দেবেদাবোর নাঙে,’ বা কন্, ‘বের্-শেবার জেদা দেবেদাবোর নাঙে,’ তারা পড়ি যেবাক্, আর কনদিন্অ ন-উদিবাক্।”
Currently Selected:
আমোষ 8: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
