প্রেরিত্ 8
8
1শৌলে সিধু স্তিফানর খুনর্ পক্ষে কধা কর্।
অত্যেচারর্ কারনে বিশ্বেজিগুনোর ছিদি পড়ানা
সেদিন্যে যিরূশালেমর খ্রীষ্টীয় মণ্ডলীর মানুচ্চুনো উগুরে অমকদ অত্যেচার অলঅ। সিয়েন্দোই দিপাধেয়্যেগুন বাদে বাদবাগি বেক্ বিশ্বেজিগুন যিহূদিয়া আর শমরিয়া রেজ্যর্ বেক্ জাগানিত্ ছিদি পড়িলাক্। 2কয়েক্কো গোজেন ভক্ত মান্জ্যে স্তিফানরে গোর্ দিলাক্ আর তাত্যে অমকদ দুন্দুক্ খেলাক্। 3মাত্তর্ শৌলে সেই মন্ডলীবোরে ভস্ত গুরিবাত্তে ঘরে ঘরে যেইনে সেই মন্ডলীর মরদ্ আর মিলেগুনোরে টানি আনিনে জেলোত্ দিয়্যে ধল্ল।
শমরিয়াত্ ফিলিপোর প্রচার
4যে বিশ্বেজিগুন ছিদি পোজ্যন্ তারা চেরোকিত্ত্যেদি যেইনে খ্রীষ্টর গম্ হবরর্ কধাগান প্রচার গরা ধল্লাক্। 5সে অক্তত্ ফিলিপে শমরিয়া রেজ্যর্ এক্কান্ শঅরত্ যেইনে মশীহ পৌইদ্যেনে প্রচার গল্ল। 6মানুচ্চুনে তা কধানি শুনিনে আর তে যেদক্কানি আমক্ অবার্ কাম্ গোজ্যে সিয়েনি দেগিনে তা কধানি মন দিইনে শুনিলাক্। 7ভালোক্ জন ভিদিরেত্তুন্ ভান্ন্যেই আত্মাবো রঅ ছাড়িনে নিগিলি গেলঅ আর ভালোক্কুন্ বেশৎ রুগি আর লেং গম্ অলাক্। 8সেক্কে সে শঅর মানুচ্চুনে অমকদ হুজি অলাক্।
9সে শঅরত্ শিমোন নাঙে এক্কো মানুচ্ ভালোক্ দিন ধুরিনে যাদু দেগার্। সিয়েনিলোই শমরিয়ার বেক্ মানুচ্চুনে আমক্ ওইয়োন্। 10তে নিজোরে এক্কো আলাদা মানুচ্ বিলিনে দাবী গত্ত, আর থাগোইয়্যে-নাঢা বেক্কুনে তা কধালোই কান পাঢিদাক্। মান্জ্যে কদাক্, “গোজেনর্ যে খেমতাগানরে মহৎ খেমতা কুয়ো অয় এ মানুচ্চো সেই খেমতাবলা।” 11মানুচ্চুনে তা কধা মজিম চুলিদাক্, কিয়া ভালোক্ দিন ধুরিনে তে তার যাদু দেগেইনে তারারে আমক্ বানেয়্যে। 12মাত্তর্ ফিলিপে যেক্কে গোজেনর্ রেজ্য আর যীশু খ্রীষ্ট পৌইদ্যেনে গম্ হবর্ প্রচার গুরিলো সেক্কে মানুচ্চুনে তা কধালোই বিশ্বেজ্ গুরিলাক্ আর মরদ আহ্ মিলেগুনে বাপ্তিষ্ম লুয়ো ধুরিলাক্। 13সেই শিমোনেয়ো বিশ্বেজ্ গুরিনে বাপ্তিষ্ম লল, আর তে ফিলিপ পিযে পিযে বেক্ জাগানিত্ গেলঅ আর চিহ্নো কাম্ আহ্ দাঙর্ দাঙর্ আমক্ অবার কামানি দেগিনে আমক্ অলঅ।
14যিরূশালেমর প্রচারক্কুনে যেক্কে শুনিলাক্, শমরিয়ার মানুচ্চুনে গোজেনর কধা বিশ্বেজ্ গোজ্জ্যন্ সেক্কে তারা পিতর আর যোহনরে সেই মানুচ্চুনো ইধু পাধেলাক্। 15পিতর আর যোহনে এইনে তারাত্যে তবনা গুরিলাক্ যেন তারা পবিত্র আত্মাগান্ পান্, 16কিয়া সেক্কেয়ো তারা উগুরে পবিত্র আত্মাগান্ ন-এজে; বানা প্রভু যীশুর নাঙে তারার্ বাপ্তিষ্ম ওইয়্যে। 17সেক্কে পিতর আর যোহনে তারা উগুরে আঢ্তানি থলাক্, আর তারা পবিত্র আত্মাগান পেলাক্।
18যেক্কে শিমোনে দেগিলো, দিপাধেয়্যে প্রচারক্কুনোর আঢ্তানি থনার্ মাধ্যমে পবিত্র আত্মাগানরে দিয়্যে অলঅ সেক্কে তে তারা ইধু টেঙা আনিনে কলঅ, 19“মরেয়ো এ খেমতাগান দুয়ো যেন মুইয়ো কার উগুরে আঢ্তানি রাগেলে তে পবিত্র আত্মাগান পায়।”
20সেক্কে পিতরে তারে কলঅ, “তঅ টেঙাগুন্ তঅ সমারে ভস্ত ওক্, কিয়া তুই মনে গোজ্জ্যস্ গোজেনর দান টেঙালোই কিনে যায়। 21আমা এ কামত্ তর্ কনঅ ভাগ বা অধিকার নেই, কিয়া গোজেনর্ চোগেদি তঅ মনান্ ঠিগ্ নয়। 22এ ভান্ন্যেয়ত্তুন্ তুই তর্ মনান্ ফিরে আর প্রভু ইধু তবনা গর্; সালে তঅ মনর্ এই ভান্ন্যেই চিন্তেগান অয়ত তে খেমায়ো গুরি পারে। 23মুই দেগঙর্, তঅ মনান্ লুভে ভরা আর তুই পাপ ইধু বন্দী ওই আঘচ্।”
24সেক্কে শিমোনে কলঅ, “তুমি প্রভু ইধু মত্যেই তবনা গরঅ যেন তুমি যিয়েন কোইয়ো সিয়েন মঅ উগুরে ন-ঘদে।”
25ইয়েন পরেদি পিতর আর যোহনে প্রভু পৌইদ্যেনে সাক্ষি দিয়্যে আর তা কধানি ফগদাং গুরিনে যিরূশালেমত্ ফিরি গেলাক্। যেবার্ পধত্ তারা শমরীয়গুনোর ভালোক্কানি আদামত্ গম্ হবর্ ফগদাং গুরিলাক্।
ফিলিপ আর ইথিয়পিয়া দেজর্ রাজার-চাগরুন
26এক দিন্ন্যে প্রভুর এক্কো দূত্ ফিলিপরে কলঅ, “উঠ্, দোগিণেদি যে পধ্তান যিরূশালেমত্তুন্ গাজা শঅর ইন্দি যেয়্যে সে পধ্তান ইন্দি যাহ্।” পধ্তান এলঅ ধূল্যেচর ভিদিরে। 27সেক্কে ফিলিপে সিন্দি গেলঅ। পধত্ ইথিয়পিয়া দেজর্ এক্কো বিশেষ রাজার চাগর সমারে তার দেগা অলঅ। সেই চাগর্বো এলঅ গুজোং। ইথিয়পিয়ার কান্দাকী রাণীর ধন-রত্নর দেগাশুনো গুরিবার ভারান্ এলঅ এ মানুচ্চো উগুরে। গোজেনর উবোসনা গুরিবাত্তে সেই চাগর্বো যিরূশালেমত্ যেয়্যে। 28ঘরত্ ফিরিবার্ পধত্ তে রথ্তানত্ বৈইনে ভাববাদী যিশাইয়র্ বোইবো পড়ের্। 29সেক্কে পবিত্র আত্মাগানে ফিলিপরে কলঅ, “সে রথ্তান কুরে যাহ্ আর সিয়েন সমারে সমারে যাহ্।”
30সেক্কে ফিলিপে ধাবা যেইনে সেই রথ্তান কুরে গেলঅ আর শুনিলো মানুচ্চো ভাববাদী যিশাইয়র্ বোইবো পড়ের্। ফিলিপে তারে পুযোর্ গুরিলো, তুই যিয়েন্ পড়র্ সিয়েন্ কি বুঝি পারর্?
31সেই চাগর্বো কলঅ, “কেঅ বুঝেই ন-দিলে কেধোক্ক্যেন্ গুরি বুঝি পারিম্?” তে ফিলিপরে রথ্তানত্ উদিনে তা কায়-কুরে ববাত্তে কোজোলি গুরিলো। 32সেই চাগর্বো পবিত্র বোইবোর্ যে ভাগ্কান পড়ের্ সিয়েন অলঅ:
জবাই গুরিবাত্যে যেবাবোত্যে গুরি ভেড়া নেযা অয়,
সেবাবোত্যে তারে নেযা অলঅ।
কেশ্চানি আজুরি দিয়্যেবো মুজুঙোত্ ভেড়া ছবুয়ো যেবাবোত্যে গুরি অলর্ গুরি থায়,
সেবাবোত্যে গুরি তে মুয়োন্ ন-খুলিলো।
33তে অগমান্ অলঅ,
তা উগুরে ন্যায় বিচের গরা ন-অয়।
তা গুট্টির্ কধা কনা সম্ভব নয়,
কিয়া তা জিংকানিগান এ পিত্থিমীত্তুন্ নেযা ওইয়্যে।
34সেই চাগর্বো ফিলিপরে কলঅ, “কধে চাং, ভাববাদীবো কা পৌইদ্যেনে এ কধাগান কোইয়্যে? নিজো পৌইদ্যেনে, না অন্য কারঅ পৌইদ্যেনে?” 35সেক্কে ফিলিপে পবিত্র বোইবোর্ সিয়েনত্তুন্ আরাম্ভ গুরিনে তা ইধু যীশু পৌইদ্যেনে গম্ হবরান্ ফগদাং গুরিলো।
36-37পধেদি যাদে যাদে তারা এমন্ এক্কান জাগাত্ এলাক্ যিয়েনত্ পানি এলঅ। সেক্কে সেই চাগর্বো কলঅ, “এইয়্যে চঅ, ইয়েনত্ পানি আঘে; মর্ বাপ্তিষ্ম লবার্ মানা আঘে নাহি?” 38তে রথ্তান থামেবাত্যে কলঅ। সে পরেদি ফিলিপ আর সেই চাগর্বো পানিত্ লামিলাক্ আর ফিলিপে তারে বাপ্তিষ্ম দিলো। 39যেক্কে তারা পানিত্তুন্ উদি এলাক্ সেক্কে প্রভুর আত্মাগানে আদিক্ক্যে গুরি ফিলিপরে নেযেল। সেই চাগর্বো আর তারে ন-দেগিলো। সেক্কে তে ফুত্তি গত্তে গত্তে ঘর পধেদি গেলঅ। 40মাত্তর্ ফিলিপরে অস্দোদ শঅরত্ দেগা গেলঅ। তে আদামে আদামে গম্ হবর্ ফগদাং গত্তে গত্তে যেরেদি কৈসরিয়াত্ গেলঅ।
Currently Selected:
প্রেরিত্ 8: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
