প্রেরিত্ 19
19
ইফিষ শঅরত্ পৌল
1-2আপল্লো যেক্কে করিন্থত্ এলঅ সেক্কে পৌলে এশিয়া রেজ্যর্ সংমধ্যেন্দি ইফিষত্ লুমিলো। সিধু তে কয়েক্কো শিচ্চ্যরে দেগা পেইনে তারারে পুযোর্ গুরিলো “তুমি যেক্কে প্রভু যীশু উগুরে বিশ্বেজ্ গোজ্জ্য সেক্কে কি পবিত্র আত্মাগান্ পেইয়ো?”
তারা তারে কলাক্, “পবিত্র আত্মাগান্ যে আঘে সে কধাগান্ আমি ন-শুনিই?”
3সেক্কে পৌলে কলঅ, “সালে তুমি কন্ বাপ্তিষ্ম পেইয়ো?”
তারা কলাক্, “যোহনর্ বাপ্তিষ্ম।” 4পৌলে কলঅ, “পাপত্তুন্ মন ফিরেইনে যে বাপ্তিষ্ম লনা, সিয়েনই এলঅ যোহনর্ বাপ্তিষ্ম। যোহনে মানুচ্চুনোরে কোইয়্যেদে, তা পরেদি যিবে এজের্ তা উগুরে, অত্তাৎ যীশু উগুরে বিশ্বেজ্ গরা পড়িবো।”
5এ কধাগান শুনিনে সেই শিচ্চ্যগুনে প্রভু যীশুর্ নাঙে বাপ্তিষ্ম ললাক্। 6সেক্কে পৌলে তারা উগুরে আঢ্তানি থলে পরেদি তারা উগুরে পবিত্র আত্মাগান্ এলঅ, আর তারা নানান্ ভাষায় কধা কুয়ো ধুরিলাক্ আর ভাববাদী ইজেবে গোজেনর্ কধা কুয়ো ধুরিলাক্। 7সেই শিচ্চ্যগুনে জনেদি প্রায় বারজন এলাক্।
8ইয়েনর্ পরেদি পৌলে সমাজ-ঘরত্ গেলঅ আর তিন মাস সং জদবদে সাহচ্ গুরিনে কধা কলঅ। গোজেন রেজ্য পৌইদ্যেনে তে যুক্তি-তর্কলোই মানুচ্চুনোরে বিশ্বেজ্ গুরিবার চেষ্টা গরা ধুরিলো। 9মাত্তর্ তারাত্তুন্ কয়েকজনর্ মনানি দরঅ ওই যেয়্যে বিলি তারা বিশ্বেজ্ গুরিবাত্তে ন-চেলাক্ আর বেক্কুনো মুজুঙোত্ যীশুর্ পধঅ পৌইদ্যেনে বোউত্ বদ্নাঙ্ গরা ধুরিলাক্। সেক্কে পৌলে তারারে ফেলেইনে গেলগোই। তে শিচ্চ্যগুনোরে সমারে নেযেইনে তুরান্ন নাঙে এক্কো মাষ্টরর্ বক্রৃতা দিবার-ঘরত্ যেইনে পত্তিদিন যুক্তি-তর্কলোই কধা কুয়ো ধুরিলো। 10দ্বিবজর এবাবোত্যেগুরি বিদি গেলঅ। সেক্কে যে যিহূদী আর গ্রীক্কুনে এশিয়া রেজ্যত্ থেদাক্ তারা বেক্কুনে প্রভুর্ কধা শুনিলাক্।
11গোজেনে পৌল মাধ্যমে জদবদে আমক্ আমক্ কাম গরা ধুরিলো। 12তার্ বেবহার গোজ্জ্যে গাম্ছা আর কিয়্যের্ কাবড়ান্ পিড়েল্ল্যেগুনো ইধু নেযেলে পরেদি তারার্ পিড়েগানি গম্ ওই যেদঅ আর ভান্ন্যেই আত্মাগুনেয়ো ছাড়ি যেদাক্।
13কয়েক্কো যিহূদী ভান্ন্যেই আত্মা ধাবেইনে বেড়েদাক্। প্রভু যীশুর্ নাঙ্ বেবহার গুরিনে তারা ভান্ন্যেই আত্মায় পেইয়্যে মানুচ্চুনোরে গম্ গুরিবাত্তে চেষ্টা গরা ধুরিলাক্। তারা কদাক্, “পৌলে যিবে পৌইদ্যেনে ফগদাং গরে সেই যীশুর্ নাঙে মুই তমারে নিগিলি যেবার্ উগুম দোঙর্।”
14তারাত্তুন্ স্কিবা নাঙে এক্কো যিহূদী আজল্ ধর্মগুরুর্ সাত্তো পুয়ো সেবাবোত্যে গুরিদাক্। 15একবার্ যেক্কে তারা সেবাবোত্যে গোজ্জ্যন্ সেক্কে ভান্ন্যেই আত্মাবো তারারে কলঅ, “মুই যীশুরেয়ো চিনোং, পৌলরেয়ো চিনোং, মাত্তর্ তুমি কন্না?” 16যে মানুচ্চোরে ভান্ন্যেই আত্মায় পেইয়্যে তে সেক্কে সেই সাতজন্ উগুরে ফাল্ল্যেনে পড়িলো আর তারারে বেক্কুনোরে এমন্ গুরিনে আঘাত্ গুরিলো যে, তারা কিয়্যেত্ ঘা ঘা ওইনে লাংদা-বাংদা অবস্থায় সেই ঘরত্তুন্ ধেই গেলাক্।
17এ হবরান্ যেক্কে ইফিষত্ বজত্তি গুরিয়্যে যিহূদী আর গ্রীক্কুনে জানি পারিলাক্ সেক্কে তারা বেক্কুনে অমকদ দোরেলাক্, আর প্রভু যীশু নাঙানর্ জদবদে বাঈনী অলঅ। 18যিগুনে প্রভু যীশু উগুরে বিশ্বেজ্ গোজ্জ্যন্ এবাবোত্যে বোউত্ মানুচ্ সেক্কে এইনে খুলোমেলাগুরি তারার্ ভান্ন্যেই কাম পৌইদ্যেনে স্বিগের্ গুরিলাক্। 19যিগুনে যাদুর্ খারা দেগেদাক্ তারাত্তুন্ ভালোকজনে তারার্ বোই-পুস্তক্ এক সমারে এগত্তর্ গুরিনে বেক্কুনো মুজুঙোত্ সিগুন পুড়ি দিলাক্। বোইয়ুনোর দাম ইজেব্ গুরিনে দেগা গেলঅ পঞ্চাশ আজার্ দীনার্। 20প্রভুর কধানি এবাবোত্যেগুরি ছিদি পড়িলো আর তা খেমতাগান মানুচ্চুনো মনত্ আরঅ বেশ্ গুরিনে কাম্ গরা ধোল্ল্য।
21এ বেক্কানি ঘুদিবার পরেদি পৌলে ঠিগ্ গুরিলো তে ম্যাসিডোনিয়া আর আখায়া ওইনে যিরূশালেমত্ যেবঅ। তে কলঅ, “যিরূশালেমত্ যেবার্ পরেদি মত্তুন্ রোম শঅরত্অ যাহ্ পরিবো।” 22পরেদি তে তীমথিয় আর ইরাস্ত নাঙে তার্ দ্বিজন বল্ দিয়্যেরে ম্যাসিডোনিয়াত্ পাধেই দিলো, আর ইন্দি তে আরঅ কয়েক দিন এশিয়া রেজ্যত্ থেলঅ।
ইফিষত্ যাগুলুগ্
23সেলক্কে যীশুর্ পধ্তান পৌইদ্যেনে অমকদ যাগুলুগ্ আরাম্ভ অলঅ। 24দীমীত্রিয় নাঙে এক্কো সনা বাইন্ন্যা দেবী আর্তেমিসর মন্দিরো ধোক্ক্যেন্ চিগোন চিগোন রূবোর্ মন্দির্ বানেদ। ইয়েনত্ মিস্ত্রিগুনোর্ ভারী লাভ্ অদঅ। 25দীমীত্রিয় সেই মিস্ত্রিগুনোরে আর তারা ধোক্ক্যেন্ অন্য কালিগরুনোরে এক জাগাত্ ডাগিনে কলঅ, “ভেইলগ্, তুমি দঅ কোই পারঅ, এ বেবসালোই আমার আয় বেশ্ গম্ অয়। 26মাত্তর্ তুমি দেগর্ আর শুনোর্ যে, পৌল নাঙে সে মানুচ্চো আমারে এই ইফিষত্ আর কদঅ গেলে প্রায় গোদা এশিয়া রেজ্যর্ বোউত্ মান্জ্যরে বিশ্বেজ্ গোরেনেই তারারে ভুল্ পধেদি নেযেয়্যে। তে কয়দ্যে, আঢে বানেইয়্যে দেব-দেবীগুন কিচ্চু নয়। 27ইয়েনত্ বানা যে আমার বেবসার সুনাং যেবঅ সিয়েন নয়, মাত্তর্ মহান দেবী আর্তেমিসর মন্দির-অ মিঝে ওই যেবঅ। আর এশিয়া রেজ্যর্ বেক্ মানুচ্চুনে, এমন্ কি, জগদর্ বেক্কুনে যে দেবীর উবোসনা গরন্ তে নিজেয়ো মহান ন-থেবঅ।”
28এ কধাগান্ শুনিনে সেই মানুচ্চুনে রাগে জুলি উদিলাক্ আর রঅ ছাড়িনে কুয়ো ধুরিলাক্, “ইফিষীয়গুনোর আর্তেমিস দেবীবো মহান।” 29আর দেগদে ন-দেগদে গোদা শঅরান্ যাগুলুগে ভুরি গেলঅ। গাইয় আর আরিষ্টার্খ নাঙে ম্যাসিডোনিয়ার যে দ্বিজন মানুচ্ সেক্কে পৌল সমারে যাদন্ মানুচ্চুনে তারারে ধুরিলাক্ আর বেক্কুনে একসমারে তেম্মাঙত্ গেলাক্। 30পৌল ভীড়ো মুজুঙোত্ যেবাত্তে চেলঅ মাত্তর্ শিচ্চ্যগুনে তারে যেবাত্তে ন-দিলাক্। 31সেই রেজ্যর্ কয়েক্কো রাজার্ চাগর্ পৌলর দাংগু এলাক্। তারায়ো পৌলরে হবর্ পাধেইনে ভারী গুরি কোজোলি গুরিলাক্ যেন তে দজা মুজুঙোত্ গুরিনে সেই তেম্মাঙত্ ন-যায়।
32ইয়েন ভিদিরে তেম্মাঙত্ জোল্ বাঁজিলো। কয়েক্কো মানুচ্ এক্কান কধা কোইনে রঅ ছাড়িলাক্, আরঅ কয়েক্কো মানুচ্ অন্য কধা কোইনে রঅ ছাড়িলাক্। বেশ্ ভাগ মান্জ্যে কোই ন-পারিদাক্ কিত্ত্যেই তারা সেই তেম্মাঙত্ এচ্চ্যন্। 33যিহূদীগুনে আলেক্সান্দররে মুজুঙোত্ ঠিলি দিলে পরেদি কয়েক্কো মান্জ্যে তারে কোই দিলাক্ কি কুয়ো পরিবো। সেক্কে আলেক্সান্দরে মানুচ্চুনো মুজুঙোত্ নিজো পক্ষে কধা কবাত্যে আঢ ইজিরেলোই মানুচ্চুনোরে জুরো গুরিবাত্তে চেষ্টা গুরিলো। 34মাত্তর্ মানুচ্চুনে যেক্কে কোই পারিলাক্, আলেক্সান্দরে যিহূদী সেক্কে বেক্কুনে একসমারে প্রায় দ্বিঘন্টা সং ইয়েন কোইনে রঅ ছাড়িলাক্, “ইফিষীয়গুনোর আর্তেমিস দেবীই মহান।”
35যেরেদি শঅরর্ এক্কো বিশেষ সরকারী মান্জ্যে মানুচ্চুনোরে জুরো গুরিনেই কলঅ, “ইফিষীয় মানুচ্চুন, এ কধাগান্ বেক্কুনে কোই পারন্, মহান আর্তেমিস দেবীর মন্দিরোত্ আর আগাজত্তুন্ তার্ যে মূত্তিবো পোজ্জ্যে তার রোক্ষ্যে গুরিয়্যে অলঅ ইফিষ শঅরান্। 36এ সত্য কধাগান্ যেক্কে অস্বীগের্ গরা ন-যায় সেক্কে বেদমা ধোক্ক্যেন্ কাম্ ন-গুরিনে তমার্ জুরো গুরি থানা উচিত। 37যুনিয়ো এ মানুচ্চুনে আমা মন্দিরুনোত্তুন্ চুর্-অ ন-গরন্ আর আমা দেবীবোরে নিন্দেয়ো ন-গরন, তো এ মানুচ্চুনোরে তুমি ইধু আন্ন্য। 38যুনি দীমীত্রিয় আর তার্ সমাজ্জ্যে-মিস্ত্রিগুনে কারঅ বিরুদ্ধে কনঅ কধা কবার্ চান্ সালে কোদোট্অ খুলো আঘে আর শাসন গুরিয়্যেগুনেয়ো সিধু আঘন্। তারা সিধু মগদ্দমা গুরি পারন্। 39মাত্তর্ তুমি যুনি আরঅ বেশ্ কিজু কবাত্তে চঅ সালে তেম্মাঙত্ সিয়েনর্ মিট্মাট্ গরা পুড়িবো। 40এইচ্চ্যে ঘটনাত্ দাংগা-হাংগামা বাজেবাত্যে আমা উগুরে দুষ্ পুড়িবার দরান্ আঘে। যুনি সিয়েন্অ অয় সালে আমি এ যাগুলুগোর্ কনঅ কারণ দেগেই ন-পারিবোং, কিয়া এ যাগুলুগোর্ কনঅ কারণ নেই।” 41ইয়েন কোইনে তে তেম্মাঙান্ ভাঙি দিলো।
Currently Selected:
প্রেরিত্ 19: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
