২ থিষলনীকীয় 3
3
তবনা গুরিবাত্যে কোজোলি
1শেজদি কং ভেই-বোনলগ্, আমাত্যে তবনা গরঅ যেন প্রভুর কধানি তমা ইধু যেবাবোত্যেগুরি যাদিমাদি ছিদি পোজ্জ্যে সেবাবোত্যেগুরি সিয়েনি ছিদি পড়ানাত্ আর বাঈনী পানাত্ থায়। 2আরঅ তবনা গোজ্জ্য যেন আমি বিবেক্ নেইয়্যে আর শদান মানুচ্চুনো আঢত্তুন্ রোক্ষ্যে পেই, কিয়া বেক্ মানুচ্চুনোর্ যে বিশ্বেজ্চান আঘে সিয়েন নয়। 3মাত্তর্ প্রভু বিশ্বেজ্বলা; তেয়ই তমারে থির্ রাগেব আর শদান আঢত্তুন্ তমারে রোক্ষ্যে গুরিবো। 4প্রভু সমারে এগত্তর্ বিলিনে তমা পৌইদ্যেনে আমার্ এ বিশ্বেজ্চান আঘে, আমি তমারে যে উগুমানি দিয়্যেই সেবাবোত্যেগুরি তুমি কাম্ গরর্ আর গরানাত্অ থেবা। 5প্রভু যেন তমার মনানি গোজেনর্ কোচ্পানার পধেদি আর খ্রীষ্টর্ ধৈজ্জ্যর্ পধেদি চালেই নেযায়।
আল্সি গরানার্ বিরুদ্ধে
6ভেইলগ্, আমা প্রভু যীশু খ্রীষ্টর্ নাঙে আমি তমারে এ উগুমান দির্-যুনি কনঅ ভেই আল্সি গুরিনে কাদায় আর আমাত্তুন্ তুমি যে শিক্ষ্যেগানি পেয়ো সিয়েনি ন-পালায়, সালে তুমি তা সমারে ন-মিল্ল্য। 7কেধোক্ক্যেন গুরিনে আমা ধোক্ক্যেন চলানা উচিত সিয়েন তুমি নিজেই কোই পারঅ। তমা ইধু থেবার সময়োত্ আমি আল্সি গুরিনে ন-চুলিই, 8দাম ন-দিইনে কারঅ হানা ন-হেই। আমি দিন-রেত্ কাম আর কষ্ট গোজ্জ্যেই যেনে আমি তমার কারঅ কাঙেলেত্যে ন-ওই। 9তমাত্তুন্ সাহায্য লবার অধিকার যে আমার নেই সিয়েন নয়, মাত্তর্ তুমি যেন আমা ধোক্ক্যেন ওইনে চলঅ সেনত্যে আমি এবাবোত্যে গুরি কাম্ গুরিনে তমারে দেগেয়্যেই। 10তমা ইধু থেবার অক্তত্ আমি তমারে উগুম দিইনে কোইয়্যেদে, কেঅ যুনি কাম গুরিবাত্যে ন-চায় সালে তে যেন ন-খায়। 11আমি শুনির্, তমা ভিদিরে কেঅ কেঅ আল্সি গুরি চলদন্ আর এক্কুবারে কাম ন-গত্তন্, বরং অন্য পৌইদ্যেনে খিজেখিচ্চ্যে গত্তন্। 12আমা প্রভু যীশু খ্রীষ্টর্ ওইনে আমি এবাবোত্যে মানুচ্চুনোরে উগুম আর উপদেচ্ দির্, তারা যেন অলর্ গুরি কাম্ গুরিনে নিজোর্ হানা নিজে জগার গরন্।
13ভেই-বোনলগ্, গম কামত্ অরান্ ন-ওয়ো। 14এ চিধিগান ভিদিরে লেগা আমা কধানি যুনি কেঅ ন-মানন্ সালে সেই মানুচ্চোরে চিনি রাগঅ। তা সমারে ন-মিল্ল্য যাতে তে লাজ্ পায়। 15মাত্তর্ তারে শত্রু বিলিনেয়ো মনে ন-গোজ্জ্য, বরং ভেই ইজেবে তারে উজিয়ার্ গরঅ।
শেচ্ কধা
16শান্তিদিয়্যে প্রভু নিজে নিত্য তমারে শান্তি দান গোরোক্। প্রভু তমার বেক্কুনো সমারে থোক্।
17এ পাত্তুরু তুরু জানানার্ কধাগান মুই পৌল নিজো আঢে লেগঙর্। ইয়েনই মর্ পত্তি চিধির্ চিহ্নো; মুই এবাবোত্যে গুরি লিগি থাং।
18আমা প্রভু যীশু খ্রীষ্টর্ দোয়্যেগান্ তমা বেক্কুনো সমারে থোক্।
Copyright © 2021 Bangladesh Bible Society