২ শমূয়েল 6
6
সাক্ষ্য-সুন্দুক্কো যিরূশালেমত্ আনা অলঅ
1দায়ূদে আরঅ ইস্রায়েলীয়গুনো ভিদিরেত্তুন্ তিরিশ আজার বেঈ-লোইয়্যে মান্জ্যরে এগত্তর্ গুরিলো। 2দায়ূদ আহ্ তার বেক্ মানুচ্চুনে গোজেনর সুন্দুক্কো বালি-যিহূদাত্তুন্ যিরূশালেমত্ নেযেবাত্তে বালি-যিহূদাত্তুন্ আঢা মারিলাক্। এ সুন্দুক্কো বেক্কুনোত্তুন্ খেমতাবান লগেপ্রভুর নাঙে বেক্কুনে চিনোন্, কিত্যে লগেপ্রভু সে সুন্দুক্কো উগুরে দ্বিবে করূবোর্ সংমধ্যে থায়। 3গোজেনর সে সুন্দুক্কো তারা মুড়োবো উগুরে অবীনাদবর ঘরত্তুন্ নিগিলেনে এক্কান নূয়ো গাড়ি উগুরে বোজেলাক্। উষ আর অহিয়ো নাঙে অবীনাদবর দ্বিবে পূঅ অাদি অাদি সে নূয়া গাড়িগানরে নেযাদন্। 4গাড়িগান উগুরে এলদে গোজেনর সেই সুন্দুক্কো আর অহিয়ো তা আগে আগে আঢের্। 5দায়ূদ আর ইস্রায়েল জাদর্ বেক্ মানুচ্চুনে লগেপ্রভুর মুজুঙোত্ দেবদারু তক্তার বানেয়্যে বেক্ যন্ত্রগানি আর সুরবাহার, বীণা, খঞ্জনী, ঝুম্ঝুমি আর করতাল বাজেইনে ফুত্তি গত্তন্।
6নাখোনর খামারর্ ইদু এজানার পরেন্দি গোরু দ্বিবে আযার্ হেলাক্; সেক্কে উষ আত্ বাড়েইনে গোজেনর্ সুন্দুক্কো ধুরিলো। 7উষর এ ভোক্তিনেইয়্যে কামানিত্তে তা উগুরে লগেপ্রভু রাগে জুলি উদিলো। সেনত্তে লগেপ্রভু তারে আঘাত গুরিলো, আর সেক্কে তে লগেপ্রভুর সুন্দুক্কোর্ কায়-কুরে মুরি গেলঅ।
8উষোর উগুরে লগেপ্রভুর এ রাগ্কান দেগিনে দায়ূদে বেজার্ অলঅ। এজঅ সে জাগায়ানরে কুয়ো অদ পেরস-উষ। 9দায়ূদে সেদিন্যে লগেপ্রভুরে অমকদ দোরেল। তে কলঅ, “লগেপ্রভুর সুন্দুক্কো সালে কিঙিরিনে মইদু আনা যেবঅ?” 10লগেপ্রভুর সুন্দুক্কো তে দায়ূদ-শঅরত্ নিজোর কায়-কুরে অানিবাত্তে রাজী ন-অলঅ। তে সিবে নেযেইনে গাতীয় ওবেদ-ইদোমর ঘরত্ রাগেল। 11গাতীয় ওবেদ-ইদোমর ঘরত্ লগেপ্রভুর সুন্দুক্কো তিন মাস রলঅ। সেক্কে লগেপ্রভু তারে আর তা ঘরর্ বেক্কুনোরে বর্ দিলো।
12রাজা দায়ূদে শুনিলোদে গোজেনর্ সুন্দুক্কো ওবেদ-ইদোমর ঘরত্ থানার কারনে লগেপ্রভু তা ঘরর্ বেক্কুনোরে আহ্ তার্ বেক্কানিত্ বর্ দিয়্যে। সেক্কে দায়ূদে যেইনে ওবেদ-ইদোমর ঘরত্তুন্ ফুত্তি গত্তে গত্তে গোজেনর্ সুন্দুক্কো দায়ূদ-শঅরত্ নেযেল। 13যিগুনে লগেপ্রভুর সুন্দুক্কো বুয়োই নেযাদন্ তারা ছয় পোইদে উজেই যাদে ন-যাদে দায়ূদে এক্কো বলদ গোরু আর এক্কো পক্তামক্তা গোরু ছঅ উৎসর্ব গুরিলো। 14দায়ূদে মসীনার এফোদতো উরিনে লগেপ্রভুর মুজুঙোত্ বলপড়ে সং নাজা ধুরিলো। 15এধোক্ক্যেনগুরি দায়ূদ আহ্ ইস্রায়েলীয়গুনে বেক্কুনে হুজিয়ে রঅ ছারদে ছারদে আর তূরী বাজাদে বাজাদে লগেপ্রভুর সুন্দুক্কো অানিলাক্।
16লগেপ্রভুর সুন্দুক্কো যেক্কে দায়ূদ-শঅরত্ এইনে লুমিলো সেক্কে শৌলর ঝি মীখলে জানালান্দি সিবে চেইয়্যে। লগেপ্রভুর মুজুঙোত্ রাজা দায়ূদোরে ফাল্যেদে আর নাজদে দেগিনে তে মনে মনে তারে ইস্ গুরিলো।
17লগেপ্রভুর সুন্দুক্কো আনিনে মানুচ্চুনে সিবে দায়ূদোর বানেই-রাগেয়্যে তাম্বুলো ভিদিরে এক্কান জাগাত্ রাগেলাক্। দায়ূদে সেক্কে লগেপ্রভুর নাঙে পুজ্যে আর উদোলোলি-উৎসর্বর অনুষ্টান গুরিলো। 18পুজ্যে আহ্ উদোলোলি-উৎসর্বর অনুষ্টানান্ থুম্ গুরিনে দায়ূদ বেগত্তুন খেমতাবান্ লগেপ্রভুর নাঙে মানুচ্চুনোরে বর্ দিলো। 19সে পরেন্দি তে বেক্ মানুচ্চুনোরে, অত্তাৎ এচ্ছোন্দে ইস্রায়েলীয়গুনোর বেক্ মরদ আর মিলেগুনোরে এক্কানত্ ধরে পিদে, এক দমা য়েরা আর এক বাজোন্ কিশমিশ দিলো। সে পরেন্দি বেক্কুনে তারার্ নিজোর্ নিজোর্ ঘরত্ ফিরি গেলাক্।
20ইয়েনর্ পরেন্দি দায়ূদে তা নিজো ঘরর্ মানুচ্চুনোরে বর্ দিবাত্তে যেক্কে ফিরি এলঅ সেক্কে শৌল ঝি মিখলে তারে আগ্বারেই নেযেবাত্তে নিগিলি এলঅ আর কলদে, “ইস্রায়েল দেজ রাজাবো এচ্চ্যে নিজোরে কেধোক্ক্যেন সর্মানিত গুরিলো! তে বজং মান্জ্য ধোক্ক্যেন্ সাধারন মানুচ্চুনোর চাগরানীগুনোর্ মুজুঙোত্ কাবড়-চুগোড়ানি খুলি ফেলেল।”
21দায়ূদে মীখলরে কলঅ, “লগেপ্রভুর মুজুঙোত্ মুই সিয়েনি গোজ্যং। তে তাহ্ মানুচ্চুনোর উগুরে, অত্তাৎ ইস্রায়েলীয়গুনো উগুরে শাজন্গুরিয়্যে ইজেবে নেযেবাত্তে তঅ বাপ্পো বা তা ঘরর্ কাররে বেঈ ন-লোইনে মরে বেঈ লোইয়্যে। সেনত্তেই লগেপ্রভুর মজুঙোত্ মুই ফুত্তি গুরিম্। 22মুই নিজোরে ইত্তুনো বেশ্ আরঅ তলে ফেলেম্ আর নিজো ইদু নিজে আরঅ চিগোন্ ওম্। মাত্তর্ তুই যে চাগরানীগুনোর কধা কলে তারা মরে সর্মানর চোগেন্দি চেবাক্।”
23শৌল ঝি মীখলর মরণ সং তার কনঅ ঝি-পূঅ ন-অলাক্।
Copyright © 2021 Bangladesh Bible Society