২ শমূয়েল 3
3
1শৌল আর দায়ূদো সৈন্যদল ভিদিরে ভালোক্ দিন সং যুদ্ধো অলঅ। দায়ূদে বোলী ওই উদিলো আর শৌল সৈন্যদলুনে বল্পোজ্যে ওই পোজ্যন্।
2হিব্রোণত্ থাগদে সলাত্ দায়ূদোর কয়েক্কো পূঅর জর্ম ওইয়োন। দায়ূদো দাঙর্ পূঅবোর্ নাঙান্ অম্নোন; তে অলদে যিষ্রিয়েলর অহীনোয়মর পূঅ। 3তার দ্বিলম্বর পূঅবোর্ নাঙান্ কিলাব; তে অলদে কর্মিলোর নাবলর্ রানিমিলে অবীগলর পূঅ। তিন লম্বর পূঅবোর্ নাঙান্ অবশালোম; তে অলদে গশূরোর্ রাজা তল্ময়র ঝি মাখার পূঅ। 4চের্ লম্বর পূঅবোর্ নাঙান্ আদোনিয়; তে অলদে হগীতোর পূঅ। পাচ্ লম্বর পূঅবোর্ নাঙান্ শফটিয়; তে অলদে অবীটলর পূঅ। 5ছঅ লম্বর পূঅবোর্ নাঙান্ যিত্রিয়ম; তে অলদে দায়ূদোর মোগ্ ইগ্লার পূঅ। দায়ূদোর এ বেক্ পূঅগুন জর্ম ওইয়োন্ হিব্রোণত।
দায়ূদো ইদু অব্নের
6শৌল আহ্ দায়ূদো সৈন্যদল ভিদিরে যেক্কে যুদ্ধো চলের্ সেক্কে শৌল মানুচ্চুনো ভিদিরে অব্নের নিজোরে দরমর গুরি তুল্যে। 7রিস্পা নাঙে শৌলর এক্কো দ্বিতীয় ঘর মোক্ এলঅ। তে অলদে অয়ার ঝি। একদিন্যে ঈশ্বোশৎ অব্নেররে কলঅ, “তুই মঅ বাপ্পোর্ দ্বিতীয় ঘর মোক্কোর্ লগে কিত্তে ঘুম যেইয়োচ্?”
8ঈশ্বোশতর কধানি শুনিনে অব্নের অমকদ রাগ গুরিনে কলঅ, মুই কি যিহূদা পক্ষেন্দি কুগুরোর্ মাধা? এচ্চ্যে সং মুই তঅ বাপ্পো শৌল গিরিবো উগুরে আর তা কুদুম্মো আর সমাজ্যেগুনো উগুরে বিশ্বেজ্ গোজ্যং। মুই তরে দায়ূদো আঢত্ তুলি ন-দুয়োং। ইয়েনর্ পরেন্দিয়ো তুই সে মিলেবো পৌইদ্যেনে মরে দুষি গোজ্যস! 9-10দায়ূদো ইদু লগেপ্রভু শমক্ হেইনে এগেম্ গোজ্যেদে সেবাবোত্যে গুরিনে যুনি মুই কাম্ ন-গরং, অত্তাৎ শৌলর বংশত্তুন্ রেজ্য লোইনে দানত্তুন্ বের্-শেবা সং ইস্রায়েল আর যিহূদা উগুরে দায়ূদোর সিংহাসনান্ থিদেবর্ ন-গরং সালে গোজেনে যেনে অব্নেররে সাজা দে আর সিয়েন জদবদে দে। 11ঈশ্বোশৎ অব্নেররে আর এক্কান কধায়ো কদে সাহস ন-গুরিলো, কিত্তেই তে তারে দোরেল।
12ইয়েনর্ পরেন্দি অব্নের নিজোর পক্ষত্তুন্ দায়ূদো ইদু মানুচ্ পাধেইনে তারে এ কধাগান কলঅ, “এ দেজ্চান কার্? তুই মঅ লগে এক্কো চুক্তি গর্। মুই বেক্ ইস্রায়েলীয়গুনোরে তর্ পক্ষেন্দি অানিবাত্তে তরে বল্ দিম্।”
13দায়ূদে কলঅ, “অাচ্চা, মুই তঅ লগে এক্কান্ চুক্তি গুরিম, মাত্তর্ তইদু মর্ এক্কান শর্ত আঘে। তুই যেক্কে আরঅ মইদু এবে সেক্কে শৌল ঝি মীখলরে ন-নেযেইনে মঅ মুজুঙোত্ ন-এবে।” 14সে পরেন্দি দায়ূদে শৌলর পূঅ ঈশ্বোশত ইদু মানুচ্ পাদেইনে এ দাবিগান জানেল, “মঅ মোক্ মীখলরে দে। মুই পলেষ্টীয়গুনোর একশঅ চুনুগুলোর্ মুজুঙেন্দি চামানি দাভা দিইনে তারে লোইয়োং।”
15সেক্কে ঈশ্বোশতর উগুমে মীখলর নেক্কো লয়িশোর পূঅ পল্টিয়েল ইত্তুন্ মীখলরে আনা অলঅ। 16তা নেক্কো গোদা পথ্তান্ কানি কানি তা পুনে পুনে বহুরীম সং গেলঅ। সেক্কে অব্নের তারে কলঅ, “তুই ঘরত্ ফিরি যাহ্।” তে সেক্কে ঘরত্ ফিরি গেলঅ।
17ইয়েনর্ আগেন্দি অব্নের ইস্রায়েলর বুড়ো নেতাগুনো ইদু কোইয়্যেদে, “আগেন্দি তুমি দায়ূদোরে তমার রাজা ইজেবে চেইয়ো। 18ইক্কিনে সিয়েন গর্। লগেপ্রভু দায়ূদো পৌইদ্যেনে এগেম্ গোজ্যেদে, তে তার্ চাগর্ দায়ূদোরে দিইনে পলেষ্টীয়গুনোর আঢত্তুন্ আর তারার বেক্ শত্রুগুনোর্ আঢত্তুন্ তার্ মানুচ্ ইস্রায়েলীয়গুনোরে উদ্ধোর্ গুরিবো।”
19অব্নের বিন্যামীনীয়গুনোর সমারেয়ো কধা কলঅ। ইয়েনি বাদেয়ো তে ইস্রায়েল আর বিন্যামীন-গুট্টির বেক্ মানুচ্চুনে যিয়েনি গুরিবাত্তে চান্ সিয়েনি বেক্কানি দায়ূদোরে জানেবাত্তে হিব্রোণত্ গেলঅ। 20অব্নের তা সমারে কুড়িজন মানুচ্ নেযেইনে যেক্কে হিব্রোণত্ দায়ূদো ইদু লুমিলো সেক্কে তার্ আর তা মানুচ্চুনোত্তে দায়ূদে এক্কো হানার বেবস্থা গুরিলো। 21যেরেন্দি অব্নের দায়ূদোরে কলঅ, “ইস্রায়েলীয়গুনে বেক্কুনে যেনে তঅ সমারে এক্কান চুক্তিত্ এজন্ আর তুই তহ্ মনেমনজক্কা তারার্ বেক্কুনো উগুরে রাজাগিরি গুরি পারচ্ সেনত্যেই মহ্ গিরোজ্ মহারাজা ইদু তারারে এগত্তর্ গুরিবাত্তে মরে ইক্কিনে যেবাত্তে দে।” এ কধানি শুনিনে দায়ূদে অব্নেররে যেবাত্তে দিলো আর অব্নের সুগে শান্দিয়্যে গেলগোই।
অবনেরর মরাণা
22ঠিগ্ সে সলাবোত্ দায়ূদো মানুচ্চুনে আহ্ যোয়াবে শত্রুগুনোরে আক্রমণ গরানা থুম্ গুরিনে সয়-সাগোজ্যে লুদেয়্যে মাল্লোই ফিরি এলাক্। সেক্কে অব্নের হিব্রোণত্ দায়ূদো ইদু ন-এলঅ, কিত্যে দায়ূদে তারে বিদেয় গুরি দিয়্যে আর তে দোলেদালে গেলগোই। 23যোয়াবে আর তা লগে সৈন্যগুনে ফিরি এজানার্ পরেন্দি মানুচ্চুনে যোয়াবরে কলাক্, নেরের পূঅবো অব্নের রাজার ইদু এচ্চ্যে আর রাজা তারে বিদেয় গুরি দিয়্যে আর তে দোলেদালে গেলগোই।
24যোয়াবে সেক্কে রাজা ইদু যেইনে কলঅ, “ইয়েন তুই কি গুরিলে? অব্নের দঅ তইদু এচ্চ্যে, তুই কিত্তে তারে যেবাত্তে দিলে? তে ইক্কিনে যেয়েগোই। 25তুই দঅ নেরের পূঅ অব্নেররে চিনোজ্; তে তঅ লগে ছলনা গুরিনে তঅ হবর্ নিবাত্তে আর তুই কি গরর্ ন-গরর্ সিয়েনি জানিবাত্তে এচ্চ্যে।”
26ইয়েন কোইনে যোয়াবে দায়ূদো ইত্তুন্ নিগিলি যেইনে অব্নেররে তোগেবাত্তে মানুচ্ পাদেল। তারা সিরা নাঙে এক্কো কূয়োর্ কায়-কুরেত্তুন্ তারে ফিরেই আনিলাক্। মাত্তর্ দায়ূদে এদক্কানি ন-জানিদো। 27অব্নের হিব্রোণত্ ফিরি এজানার্ পরেন্দি যোয়াবে তা লগে গুমুরো কধা কবার্ ছলনা গুরিনে শঅরর্ গেদো ভিদিরে নেযেল। সে পরেন্দি তা বুগুদ গুদো মারিনে তারে মারে ফেলেল। এধোক্ক্যেন গুরিনে তে তা ভেই অসাহেলর লো ঝরানার্ হেনাবো সুজিলো। 28-30যোয়াব আর তা ভেই অবীশয় অব্নেররে মারে ফেলেল, কিত্যে তে তারার্ ভেই অসাহেলরে গিবিয়োনর যুদ্ধোত্ মারে ফেলেয়্যে।
পরেন্দি দায়ূদে সে হবরান্ পেইনে কলদে, “নেরের পূঅ অব্নেরর লো ঝড়ানার্ পৌইদ্যেনে মুই আর মঅ রেজ্যগানে লগেপ্রভুর মুুজুঙোত্ উমরত্তে নিদ্দুজী। যোয়াব আর তা বাবর্ গুট্টিগুনে বেক্কুনে যেনে সে লো-গানির দায়ী অন্। যোয়াবর গুট্টিত্ আমিঝে যেন কেউ না কেউ চুনুগুলোবোর স্রাব বা চামঅ পিড়েত্ ভুগোন, কেউ লুদিক্কোই ভর্ দিইনে আদন, কেউ খুন অন বা কেউ খানার অভাবে দুখ্ পান।”
31ইয়েনর্ পরেন্দি দায়ূদ যোয়াব আর তা সমারে বেক্ মানুচ্চুনোরে কলাক্, “তুমি যার্ যার্ কাবড়ানি ফাদিনে বস্তাফাদা উরো আর আবিলেচ্ গত্তে গত্তে অব্নেরর্ মরাকিয়্যেগানর্ আগলত্যা আগলত্যা আঢঅ।” মরাকিয়্যেগান বুয়োই নেযেবার খাট্তানর পুনে পুনে রাজা দায়ূদে নিজেয়ো আঢিলো। 32অব্নেররে হিব্রোণত্ গোর্ দিয়্যে অলঅ। অব্নেরর গোরান কায়কুরে রাজা গুজুরি গুজুরি কানা ধুরিলো, আহ্ মানুচ্চুনেয়ো বেক্কুনে কানা ধুরিলাক্।
33রাজা সেক্কে অব্নেরর পৌইদ্যেনে আবিলেচর্ এ গান্নো গেলঅ:
“ভুল্ মান্জ্য ধোক্কেন্ কিত্তেই মুরিলে অব্নের?
34তর্ দঅ আঢ্তানি বান্যে ন-এলঅ,
তর্ টেঙত্ শিগল্অ ন-এলঅ।
পাজি মানুচ্চুনোর আঢত্ যেবাত্যেগুরি মানুচ্ মরন,
সেবাবোত্যে গুরি দঅ তুই মুরি গেলে।”
এ কধানি শুনিনে মানুচ্চুনে আরঅ অব্নেরত্তে কানা ধুরিলাক্। 35বেলান্ থাগদে থাগদে যেনে দায়ূদে কিজু হায় সেনত্তে মানুচ্চুনে তারে কোজোলী গরা ধুরিলাক্; মাত্তর্ দায়ূদে শমক্ হেইনে কলঅ, “বেলান্ ডুবিবার আগেন্দি যুনি মুই পিদে বা অন্য কিজু হাং সালে গোজেনে যেনে মরে সাজা দে আর সিয়েন জদবদে গুরি দে।”
36বেক্ মানুচ্চুনে ইয়েনি দেগিনে হুজি অলাক্। ঘেচ্ছেকগুরি, রাজা যিয়েনি যিয়েনি গুরিলো সিয়েনিলোই তারা হুজি অলাক্। 37সেদিন্যে দায়ূদো লগে মানুচ্চুনে আর ইস্রায়েলীয়গুনে বেক্কুনে হবর্ পেলাক, নেরের পূঅ অব্নেররে মারে ফেলানার পৌইদ্যেনে রাজার কনঅ আত্ ন-এলঅ।
38রাজা তা মানুচ্চুনোরে কলঅ, “তুমি কি হবর্ ন-পঅ, এচ্চ্যে ইস্রায়েল দেজর্ এক্কো দাঙর্ নেতা মুরি গেলঅ? 39রাজা ইজেবে মরে অভিষেগ্ গরা অলেয়ো এচ্চ্যে মুই বল্পোজ্যে আর সরূয়ার পূয়োগুনোরে মুই দোঙেই ন-পারঙ্। লগেপ্রভু যেনে অন্যেয় গুরিয়্যেগুনোরে অন্যেয়র্ কাম মজিম সাজা দে।”
Copyright © 2021 Bangladesh Bible Society