Ghlɔɔmö a ‑nʋa 16

Pɔɔlʋ yɛ ‑mä Ghlɔɔmö a ‑nʋa bhälɩ

1‑Aa nglʋdaayu Febee, Zezwii a ‑nʋa a ‑zɩkpaa ‑a ‑wʋä ‑mä Saklee, ‑ɔ glɩnɩɛ a 'yliwʋnglɔɔ, ɔ za n panyɩɛ ‑bɛlɩ nɩɩ, 2ɔ ‑kä ‑mä a mä'a ghlɛɛ, sɛɛ Zezwii a ‑nʋa kää wa 'kä pälaplanɩɩ, a nɩ pälɔɔ ‑sɩbhä. 'Saa‑gbʋʋ ‑kɔɔ plɛnɩ ‑kë, a nɩ kwänɔɔ 'kwädlɩ. Ɔ'bhë dɛ ɔ ‑wʋä da'a, ɔ yɛ nɩkpa a ‑bɛ kwänɩ, na'bhë ‑amö ɔ kwänɩɛ tenyii.

3Plisilɩ ‑nyɛ ɔ 'luwli Akilasɩ 'sɔ, n ‑nyɛɛ nʋ a‑a Zezwii Kliisɩ 'a libhoo, n bhäluë. 4Wa 'sɔ ‑kpɔ, wa ‑kaa 'kwie ngli ‑sɛ a za, 'wa 'pɩwʋ 'mö wa ‑sɛɛ dlɩɩ. 'Wa ‑li a ‑li a za, n bhäluë ‑këë. Na 'yize ‑amöö 'nuëë bhälɩ, ‑maa ‑waaa Zwiiföwa glɩnɩ a bhlɩɩ 'wuë ‑gömö, Zezwii a ‑nʋa ‑wa ‑wʋä ‑mä, mʋa bhälɩmuëë. 5Zezwii a ‑nʋa ‑wa yɩbhää ‑mä 'wa 'ligbëa 'mö 'wluu, n bhäluë. Na 'tua Epayinɛtɩ, ‑mä Azii‑bhölɩɩ 'wuë 'mö a tɛkänɩkpɛ ‑ɔ ngluä Kliisɩ 'a wɛlɩɩ 'wʋʋ, n bhälɔ. 6Malii ‑ɔ yɔlɔɔ tenyii a 'wlumö, n bhälɔ. 7N bhälɩ na 'bhɩa Adlonikwisɩ ‑nyɛ Zwiniasɩ 'sɔ, n ‑nyɛɛ ‑wʋ a‑a ‑mä ‑jie 'mö, ‑wa glɩnɩɛ Zezwii a tietiewa a ‑muëë kää 'nglɩ ‑gömöö, ‑wa 'zʋä Zezwii a ‑nʋä na za tɛɛ a'bhëë, n bhäluë. 8Apliatusɩ ‑ɔ ‑kaaa ‑Alowli Zezwii a za tenyii dlɩsɛɛ, n bhälɔ. 9Wlubɛɛ ‑ɔ kwänɩnyɩɛ ‑mä Kliisɩ 'a libhoo 'möö, ɔ ‑nyɛ na 'tua Sɩtakisɩ 'sɔ, n bhäluë. 10Apɛlɛsɩ, ‑mä yɔlɔylʋ 'mö, ‑ɔ tulanɩɛ 'ɔ sɛ ɔ 'tɛɛnɩɛ tenyii Kliisɩ dlɩ 'ylimöö, n bhälɔ. N bhälɩ Alitobulɩ a 'ligbë 'mö a ‑nʋa. 11N bhälɩ na 'bhiyii Elodiɔɔ. N bhälɩ Nasisɩ 'a 'ligbë 'mö a ‑nʋa 'wuë ‑wa ‑gänɩɛ Zezwii. 12Tlifɛnɩ ‑nyɛ Tlifɔsɩ 'sɔ ‑wa yɔlɔɔ tenyii ‑Alowli Zezwii 'a libhoo a za‑a, n bhäluë. N bhälɩ'ɛ Pɛlɩsidɩ ‑ɔ ‑kaaa tenyii dlɩsɛ, ‑ɔ yɔlɔmö'ɛɛ ‑Alowli Zezwii 'a libhoo a za‑a. 13Ghlufusɩ ‑ɔ glɩnɩɛ Zezwii a libhonʋnyɔ a ‑nɔ a ‑nɔɔ, n bhälɔ. Ɔ ‑da ‑ɔ glɩnɩmö'ɛɛ na ‑da a ‑mɔmɔɔ, n bhälɔ. 14Asɛklitɩ mɔ, Flegɔɔ mɔ, Ɛlɩmɛsɩ mɔ, Patlobasɩ mɔ, Ɛlɩmasɩ mɔ, 'n Zezwii a ‑nʋä ‑muë'la wa ‑nyɛɛ glɩnɩɛ 'wʋ muë, wa 'wuë, n bhäluë. 15Filolɔgö ‑nyɛ Zwilii 'sɔ muë, Nelee ‑nyɛ ɔ nglʋdaayu 'sɔ muë, 'n Ɔlɛpasɩ, wa ‑nyɛ Zezwii a ‑nʋä ‑muë'la wa ‑nyɛɛ glɩnɩɛ 'wʋ 'sɔ, wa 'wuë, n bhälɩmuë.

16A 'wuë, a nɩ gbönɩgbönɩ dlɩ ‑wanɩwanɩsɛ. Kliisɩ a ‑nʋa a ‑zɩkpöö 'wuë, wa lɛ wa bhälanyɩ.

'Dɩmözʋwɛlɩɩ Pɔɔlʋ 'bhlenɩɛ 'gbëë

17‑Atʋayuënyɩ, 'dɩ 'mö n zʋanyɩɛ dɛ'ɛ nɩɩ, a nɩ 'nɛmanɩ nɩkpaa ‑wa lɛmöä ‑mä Zezwii a ‑nʋa jijo'wʋ 'ylimösɛnɔɔ 'wʋ, Lagɔ 'a wɛlɩɩ wa 'nyanyɩ a‑a 'wë, nɩkpaa ‑wa kpɛniɛ 'mö, ‑wa nyimanyɩɛ sa'a 'wlumöö, A nɩ 'dionuë gwë a'bhë. 18'Fʋ n'n‑ä ‑sɩbhä gbä, ‑maa sa'a a nɩkpa 'la, ‑Alowli Kliisɩ a libho wa'aa nʋ. ‑Maa wanyɩ a nɩkploku a yieyiegbʋʋ plɛnuëë. Nɩkpaa ‑waa 'nɛmanɩɛ ‑lizoku 'wʋʋ, 'mö wa tliɛ 'wa ‑bhlalu ngli 'n wa duluëë. 19'A sɛ a zʋä Lagɔ 'a wɛlɩɩ 'klʋkpamö a dɩɩ, saa 'wuë wa sɩ ‑sɩbhä. Zaa, 'mäna 'wʋ a ‑bhööä. Miɛ abhlɩ, ‑maa 'saa nɛnɩɛ Lagɔ dlɩ yɔwʋ a dɔ'wʋ, n yɩbhä nɩɩ, 'a 'nɛɛnɔɔ nɩ zumanɩ 'kwädlɩ 'yize, a 'kɩ nʋ, ‑lizokuu a kii 'wuë a nɩ 'dionii gwë. 20Lagɔ 'tɩɩglɩglɛ 'wuë 'bhöönɩɛ 'möö, ɔ'bhë, ɔ yia'a ‑pa Sataa 'wʋ 'titli 'lɩlɩlɩ, nzɩɩ ɔ 'kanyɔ kplɩzɩmö 'zʋ.

‑Alowli Zezwii nɩ 'panyɩ 'nyu.

21Timotee n ‑nyɛɛ 'sɔ ‑a nʋä Lagɔ 'a libhoo, ɔ lɛ ɔ bhälanyɩ. Na 'bhɩa Lukiusɩ ‑nyɛ Zazɔɔ 'sɔ, Sosipatɛɛ kökä, wa lɛ wa bhälanyɩ.

22‑Amö Tɛlɩtwisɩ, ‑amöö cɛlɩɛ dɛ'ɛ 'ɔ 'bɔgʋʋ, n bhälɩmanyɩ ‑Alowli Zezwii a 'nglɩ 'mö. 23Gayusɩ, ‑ɔnyɩɩ 'ligbë 'mö n glɩɛ, Zezwii a ‑nʋa 'wuë ‑wa ‑wʋä mä'ä ‑ɔnyɩ dɛ wa yɩbhää 'wluu, ɔ lɛ ɔ bhälanyɩ. Elaatɩ ‑ɔ glɩnɩɛ mä'ä glɔ 'mö a 'wʋkwïlanɩnyɔɔ, ɔ ‑nyɛ ‑aa ‑daayu Katusɩ 'sɔ, wa lɛ wa bhälɩmanyɩ.

[24‑Alowli Zezwii, ɔ nɩ 'panyɩ a 'wuë 'nyu. ‑Amɛɛ!]

A‑a nɩ 'ghlimanɩ Lagɔ a 'nglɩ

25‑Atʋayuënyɩ, a‑a nɩ 'ghlimanɩ Lagɔ a 'nglɩ. Mɔɔ bhɛnɩɛ ɔ 'kanyɩ ‑mä 'ɔ dlɩ'wʋkänɔɔ 'mö glu nyɔna. 'Mänatɩtɩ n biaa, n 'nyanyɩɛ, ‑yɩ bhïlaa Zezwii Kliisɩ a dɛɛ, ‑sɩbhä yɩ gbää. 'Mänatɩtɩ 'la 'mö, wɛlɩ a ‑mii glɩnɩɛ gbëaa, ‑yɩ zizaa a‑a 'kwädlɩkwädlɩnɩɩ, ‑mä yɩ këlionɩɛ 'klʋ. 26Lagɔ a bhla'mö a 'möbhïlanɩwaa, yɩ dɛ wa 'cɛlɩ a‑a. ‑Maa ‑sɩkaa a dɔ'wʋ, wɛlɩ 'la wa 'cɛlɩ a‑a, Zezwii 'a 'Mänatɩtɩɩ, mɩɩ kää 'nglɩ 'n yɩ zɛmö yia'aa 'klʋ këlio. Lagɔ ‑ɔɔ bhɩɛ 'wʋ, 'ɔ sɛ ɔ gbää yɩ nɩ 'plɩ 'wʋʋ, ‑sɩbhä ma‑a 'wlʋnɩɛ 'yli, 'ɔ ‑tiamö a wɛlɩ 'la, 'n yɩ yiɛ 'bhlɩbhë ‑gömö a nɩkpa 'wuë kɛ 'klʋ këlionɩ, nzɩɩ wa 'kɩ 'klʋkpamö zʋ.

27Lagɔ 'nɛɛnɔɔ 'wuë 'bhöönɩɛ 'möö, Zezwii Kliisɩ a 'nglɩ 'mö, ɔ 'nglɩ nɩ 'ghlimanɩ 'kwädlɩkwädlɩnɩ 'yize. ‑Amɛɛ!

Currently Selected:

Ghlɔɔmö a ‑nʋa 16: bet

Highlight

Copy

Compare

Want to have your highlights saved across all your devices? Sign up or sign in

Learn More About BdG2