Ghlɔɔmö a ‑nʋa 15

‑Na 'lilɛ a ‑li a ‑li a gbʋ nɩ plɛnɩmö

1‑Aa dlɩ'wʋkänɔɔ ‑nyɔnʋä, a‑a nɩ kwänɩ ‑wanyɩɩ dlɩ'wʋkänɔɔ 'nɩɛ ‑nyɔnʋ 'wa 'gblukuu. A‑a nɩ tɩ ‑yɩ nɛnɩnyɩɛ dlɩ yɔwʋ a 'yize sɛ tɛlɩ. 2‑Maa ‑a 'wuë, bhʋlʋbhlʋ, 'saa glɩnɩɛ ‑a'bhɩa a ‑li a ‑li, 'saa 'bhuëë 'mäna 'wʋ mö ‑a nɩ tɛlɩ sɛ, wa 'kä 'yli yɔwʋ 'tɛmanɩ ‑mä dlɩ'wʋkänɔɔ 'mö, wa 'käa 'yukusɛ mö. 3Kliisɩ a'bhë, 'saa nɛnɔɔ dlɩ yɔwʋ a gbʋ mʋʋ 'nɔɔ a ‑plɛnɩ. Sɛ'ɛ yɩ 'cɛlɩ a‑a ‑mä Lagɔbɔgʋʋ 'mö nɩɩ: ‑Atʋ Lagɔ, ‑wa ziamöä ‑dii, ‑amö wa ziaa ‑di.#15.3 Soomö 69.10. 4‑Atʋayuënyɩ, 'saa 'wuë cɛlɩɛ ‑mä Lagɔbɔgʋʋ 'möö, bhla'mö wa 'celi a‑a abhlɩ, ‑maa ‑aa za yɩ cɛlɩɛ ‑mä yɩ ‑kanyɩ sʋlʋnɩ, yɩ ‑kanyɩ swɩ nyɛmʋ 'mö 'pä, dɛ a kää sɛ ‑a 'kä ‑lɛ kɛ nyɔnʋ, ‑aa dila 'kä 'wʋ 'tɛɛ ‑këë, ‑a 'kä ‑mä 'gbë 'wʋ ghlɛ. 5Lagɔ a'bhë, ɔ 'yize mɔɔ bhɛnɩɛ ɔ 'kanyɩ swɩ nyɛmʋ 'mö 'pä, dɛ a kää sɛ a 'kä ‑lɛ kɛ nyɔnʋ. Zaa, 'mö n bhibhee a 'wlumö, a 'wuë a 'kä ‑tiamö 'wʋ ‑wʋnɩ, a 'kä 'gämö Zezwii Kliisɩ 'a saa nɛmö, 6a 'wuë, nuë ‑bhlʋ 'mö, a 'kä ‑Alowli Zezwii Kliisɩ a dɩba Lagɔ a 'nglɩ 'ghlimanɩ a gbʋʋ, mʋʋ nɩ plɛnanyɩ.

Nɩkpa 'wuë a za Kliisɩ yiɛ

7Sɛɛ Kliisɩ ngulanyɩɛ 'wʋʋ, a nɩ nglunglunɩ ‑sɩbhä 'wʋ, nzɩɩ a 'kä Lagɔ a 'nglɩ 'ghlimanɩ. 8‑Tiamö n nyanyɩɛ 'dɩ nɩɩ, Kliisɩ, mɔɔ 'zʋä Zwiiföwaa a 'yliwʋnyɔ, ɔ 'kʋä 'ylimö tulanɩ nɩɩ Lagɔ 'nɩ bhïla wɛlɩ 'wë ɔ 'kɩ nimï ‑sɛ. Zaa, wɛlɩɩ 'wuë ɔ 'nyɛ a‑a wa dɩbawa 'kädɩɩ, ‑mä ɔ 'mö, ‑mä yɩ 'wlʋnɩɛ 'yli. 9Miɛ abhlɩ, ‑maa ‑waaa Zwiiföwaa glɩnɩɩ, sɛɛ Lagɔ 'pää Kliisɩ a za wa ngäzɩdlɩɩ, wa 'kä ‑sɩbhä a za ɔ 'nglɩ 'ghlimanɩ, nza ɔ yimö'ɛɛ. Sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ:

‑Atʋ Lagɔ, ‑mä 'bhlɩbhëa 'wuë jijo'wʋ,

n yi ‑mä ‑na'a nglɩɩ 'ghlimanɩ.

‑Na'a ‑li a ‑li a za n ‑yimö 'mö bhlɩnɩ. # 15.9 2 Samiɛlɩ 22.50; Soomö 18.50.

10Sɛ'ɛ yɩ cɛlɩ'ɛɛ ‑mä nɩɩ:

Abhʋa 'nɩɛ Zwiiföwa glɩnɩɩ,

a ‑nyɛ ngëyii Lagɔ ‑sɛɛ ‑lɛ 'mö a ‑nʋa 'sɔ,

a nɩ nʋnɩ 'gämö 'mäna. # 15.10 Detlenɔɔmö 32.43.

11Sɛ'ɛ yɩ cɛlɩmö'ɛɛ ‑mä nɩɩ:

Dʋdɔkpäta ‑gömö a nɩkpanyɩ,

a 'wuë, a nɩ 'ghlimanɩ Lagɔ a 'nglɩ.

'Bhlɩbhëa 'wuë nɩ bhlɩnɔɔ. # 15.11 Soomö 117.1.

12Ezayii, sɛ'ɛ ɔ gbä'ɛɛ ɔbhlɩ nɩɩ:

Daviidɩ a dɩba Yizayii,

ɔ 'yu a 'yu yi mä'ä ‑aa jijo'wʋ 'wlʋ,

ɔ 'kä 'bhlɩbhëa 'wuë ‑gömö 'kämanɩ.

Ngäya 'wuë yo dlɩ 'tɛɛnɩ. # 15.12 Ezayii 11.10.

13Lagɔ, dlɩ'wʋtɛɛnɔ 'bhöönɩɛ 'möö, sɛ a 'tɛɛnɔɔ dlɩ a za, ɔ nɩ yie ‑mä a dila zɛmö 'mäna ‑nyɛ 'tɩɩglɩglɛ 'sɔ 'wʋ. Nzɩɩ, 'Wugɔmʋʋ 'Wlɩlɩ a 'mötɛɛnɔ 'mö, 'a dlɩ'wʋtɛɛnɔɔ 'kä 'kwädlɩ zumanɩ.

'Saa Pɔɔlʋ yɩbhää ɔ 'kä nʋʋ

14‑Atʋayuënyɩ, na'bhë n ‑yi sɛ nɩɩ, anyɩgäsɛ sɛɛ ‑gää kɛ, a zʋ ‑sɩbhä 'tɩɩ, a ‑yi sasɛ Lagɔ 'a wɛlɩɩ, a'bhï a bhɛnɩ a 'kä 'dɩ 'mö zʋzʋnɩ. 15‑Sɩbhä yɩ ‑wʋ 'mö, ‑maa 'na 'bɔgʋʋ n 'cɛlanyɩɛ dɛ'ɛ 'wʋʋ, wʋ kïbhï ‑mimii 'mö a dɔ'wʋ, n 'nanyɩɛ wɛlɩ 'yli zizanɩ, ‑maa gbëaa n 'nyanyɩɛ 'dɩ, 'saa a ‑yi a‑a 'kɩ 'mö n ligbananyɩɛ 'wʋ. 'Fʋ n'n‑ä ‑sɩbhä 'cɛlɩ, ‑maa Lagɔ na ngäzɩdlɩ ɔ 'pää. 16Sɛ'ɛ n gbää nɩɩ, Lagɔ mɔɔ ‑saaa ‑lɛ n 'kä Zezwii Kliisɩ a libhonʋnyɔ glɩnɩ, nzɩɩ, ‑waaa Zwiiföwa glɩnɩ n 'kä ‑mä wa jijo'wʋ 'ɔ 'Mänatɩtɩɩ bia. ‑Lɛ a libho 'la n nʋä, Lagɔbʋbɔnyɔ a libho a sɛ wʋ ‑wʋä. Nyɩasɛ n'n‑ä ‑sɩbhä gbä, ‑maa 'na sɛ n yɩbhää 'bhlɩbhëa 'wuë a dɔ'wʋʋ, ‑sɩbhä ma‑a nɩɩ: 'Wugɔmʋʋ 'Wlɩlɩ nɩ 'zuë Lagɔ a 'yize a ‑nʋä 'wʋ, nzɩɩ wa 'kä bʋbɔnɩlu a ‑muu nɛnɩɛ Lagɔ dlɩ yɔwʋ a sɛ ‑wʋ. 17Lagɔ 'a libhoo n ‑wʋä dɛ'ɛ nʋ dɔ'wʋʋ, n bhɛnɩ n 'kä ‑mä wʋ 'mö nanyɩ 'ghlimanɩ sɛ n ‑glɛɛ Zezwii Kliisɩ 'wʋ a za. 18N'n‑ä n 'kä ‑mimii bhïla 'n ɛ 'nɩ ‑bhö ɔ ghlɛnɩɩɛ 'mö a libhoo ɔ nʋä a 'yize mu. Mɔɔ kää 'nglɩ, ‑waaa Zwiiföwa glɩnɩ 'n wa yiɛ 'wʋ nglu wa 'kä Lagɔ 'a wɛlɩɩ 'klʋkpamö zʋ. 'Na bhïlawɛlɩɩ ‑nyɛ 'na nʋnʋlii 'sɔ, 'mö ɔ ghlɛnɩɛ 'mö 'n ɔ yiɛ ‑lɛ a libho 'la nʋ. 19'Wugɔmʋʋ 'Wlɩlɩ 'a 'mötɛɛnɔɔ 'mö ɔ zʋʋʋä ‑gömö, zɩzɛli 'kädɩ ‑yɩ tulanɩɛ 'ylimö nɩɩ, Lagɔ mɔɔ tieaaa, 'n n yiɛ nʋ. Kliisɩ 'a 'Mänatɩtɩɩ, sa'a ‑sɩbhä n biiiɛ. Tɛɛnɩ ‑mä Zeluzalɛɛmö ‑këë, bhlɩɩ wa laa Yililii yɔwʋ, ‑n 'kä ‑mä ghlɛ, ‑mä a ‑gwlɩɩ 'wuë ‑gömö, 'n n yiɛ ‑mä mlɩmanɩ. 20‑Maa n ‑wʋä sa'a 'Mänatɩtɩɩ bia dɔ'wʋʋ, ‑gwlɩɩ 'mö mää wa'aa ‑bhlɛ tɛkäsɛ Kliisɩ a 'nglɩ 'nʋʋ, yɩ 'yize a gbʋʋ mʋʋ plɛnɩɩɛ, ‑mä n kwɩɛ. 'Fʋ n'n‑ä ‑sɩbhä 'zʋ, ‑maa n'n‑ä 'yɩbhä wa 'kä nɩɩ: libhoo ‑mɔmɔɔ tɛɛ 'wëë, 'mö n kwää 'yukusɛ nʋ. 21Lagɔbɔgʋʋ 'mö a 'kïbhë ‑bhlʋ ‑a 'cɛlɩɛ ‑mä, sɛ a gbää, ‑sɩbhä n 'zʋä. Sɛ'ɛ a nʋä nɩɩ:

‑Muë wa'aa a ‑bhlɛ ɔ 'dɩ 'nyɛɛ, mʋa 'kɔɔ 'ylɩmö.

‑Waaa a‑a ‑bhlɛ 'ɔ wɛlɩɩ 'nʋʋ, mʋa 'kɩɛ 'mö 'nʋ. # 15.21 Ezayii 52.15.

Pɔɔlʋ lɛ ɔ yia'a ‑pa ‑mä Ghlɔɔmö mö

22‑Atʋayuënyɩ, libho 'la mʋʋ 'nɩ nyɩaa 'kwädlɩ 'tɛnyɩ n 'kä ‑mä a mä'a yi. 23‑Sɩkaa a dɔ'wʋ, pɩɔ ‑mu nɩ 'yli mä n ‑wʋä a libhoo yɛ zɛmö bhlɩɛ. Sɛ n yɩbhä n 'kanyɩ 'wʋ plɛɛ yi a 'ylʋbö yɛ 'mö gwälɛ. 24Sɛ'ɛ n nʋä 'kwädlɩ nɩɩ, ‑zlɩ n ‑kä ‑mä Ɛsɩpanyɩ‑bhölɩɩ 'mö mö dɔ'wʋ ‑wʋʋ, n yeanyɩ 'wʋ ghlɛnɩ, nzɩɩ n ‑kaanyɩ 'ylɩya yɔwʋ ‑sɛ, n ‑kä a 'tʋ ‑sɛ 'wëë, a ‑kaa kwänɩ n 'kä ‑mä bhlɩ 'la 'mö mö.

25‑Maa ‑sɩkaa a dɔ'wʋ, ‑mä Zeluzalɛɛmö ‑mä n ‑wʋä mö dɔ'wʋ, Zezwii a ‑nʋa ‑wa ‑wʋä ‑mä, wa 'saa n ‑suä, n 'kʋänyɩ yowʋ 'nyɛ. 26Zezwii a ‑nʋa ‑wa ‑wʋä mä'ä Akayii‑bhölɩɩ 'mö muë, ‑wa ‑wʋä ‑mä Masedʋanɩ‑bhölɩɩ 'mö muë, mʋa nʋä nɩɩ, wa yi ‑mä Zeluzalɛɛmö a ‑nʋa a gla'mö a 'pʋäwa a za moni 'wʋ 'päpänɩ. 27‑Tiamö abhlɩ, wanyɩgäsɛ mʋa gbää wa 'kä ‑sɩbhä 'zʋ, ‑maa 'lɩlɩlɩ a dɔ'wʋ, wa kä a 'kɩ wa 'kä ‑sɩbhä 'zʋ. Ɛ'ɛ ‑bhö nyɩasɛ, ‑maa Zeluzalɛɛmö a Zwiiföwaa, 'wa ‑li a ‑li Lagɔ 'nyʋää, mʋa ngluä 'wʋ 'n wa yiɛ nɩkpaa 'wuë 'nyɛ. Zaa, ‑sɩkaa a dɔ'wʋ, ‑waaa Zwiiföwa glɩnɩɩ, mä'ä dʋdʋ 'wʋ a ‑lii Lagɔ 'nyʋä'ɛɛ wabhlɩɩ, wa kä'ɛ wa 'kʋänyɩ 'nyɛmö, wa 'kʋä ‑sɩbhä 'wʋ yi. 28Zaa, n ‑kä wɛlɩ 'la zɛmö bhɩɛ n ‑kʋä wa moni yowʋ 'nyɛ 'wëë, 'n n 'käa'aa ‑mä 'a mä'a 'wʋ 'tʋ, n 'kä ‑mä Ɛsɩpanyɩ mö. 29N ‑yi sɛ nɩɩ, n ‑kä ‑mä a jijo'wʋ yie yii, Zezwii Kliisɩ ‑yii 'ɔ 'nyupälɩɩ 'wuë ‑gömö zʋ, nzɩɩ yɩ 'kanyɩ 'wʋ ghlɛmö.

30‑Atʋayuënyɩ, ‑bɛlɩ n panyɩɛ, ‑Alowli Zezwii Kliisɩ a 'nglɩ 'mö 'n ‑Wawʋʋ Lagɔ 'a 'Wugɔmʋʋ zʋanyɩɛ dila zɛmö a za, a nɩ bhibhe na za Lagɔ, ‑maa tʋ 'mö n ‑wʋä. 31A nɩ bhibhe nzɩɩ, Zwidee‑bhölɩɩ 'mö a ‑nʋa ‑waaa Zezwii 'a wɛlɩɩ dlɩ 'wʋ ‑kää, Lagɔ ‑ka'muë ngli ‑sɛ. A nɩ bhibhemö'ɛ nzɩɩ, Zezwii a ‑nʋa ‑wa ‑wʋä ‑mä Zeluzalɛɛmö, n ‑kʋä moni 'la yɔwʋ 'nyɛɛ, yɩ 'kʋä 'mäna 'wʋ ‑bhö. 32‑Lɛ a dɔ'wʋ, Lagɔ ‑kä nglu n ‑kä ‑mä 'a mä'a yii, 'mäna ‑yii tenyii 'mlɩ ‑wʋ, n yeanyɩ 'ylɩya yɔwʋ ‑sɛ n yi nyɛpɛ.

33Lagɔ, 'tɩɩglɩglɛ 'wuë 'bhöönɩɛ 'möö, a 'wuë ɔ nɩ ‑soanyɩ 'kwädlɩ. ‑Amɛɛ!

Currently Selected:

Ghlɔɔmö a ‑nʋa 15: bet

Highlight

Copy

Compare

Want to have your highlights saved across all your devices? Sign up or sign in

Learn More About BdG2