Nʋnʋlii 19

Pɔɔlʋ yɛ ‑mä Efɛɛzɩ mö

1Apolɔsɩ ‑wʋ ‑bhlɛ ‑mä Kolɛɛtɩ glɔ 'mö, ‑lɛ a 'tɛnyɩ 'la 'mö, ‑mä Azii‑bhölɩɩ a pɩɔ 'yli mää ‑gägö ‑wʋä, 'n Pɔɔlʋ yiɛ ‑mä 'wʋ 'tʋ ‑këë, 'n ɔ yiɛ ‑mä Efɛɛzɩ ghlɛ. Ɔ ghlɛɛ ‑mä, 'n ɔ yiɛ ‑mä Zezwii a ‑gänɩwa ‑mumuë a ‑zɩkpa ‑bhlʋ ghlɩnɩ. 2Nɩkpa 'la, 'n Pɔɔlʋ yuëë nimï 'yɩbhä nɩɩ: «‑Zlɩ a ngluä 'wʋ a 'kä Lagɔ ‑gänɩɩ, 'Wugɔmʋʋ 'Wlɩlɩ yeanyɩ bhä ‑gömö ‑a?» Wa lɛ naa: «‑Aaa ‑bhlɛ tɛkäsɛ 'Wugɔmʋʋ 'Wlɩlɩ a wɛlɩ 'nʋ 'lɩlɩlɩ.» 3Pɔɔlʋ lɛ naa: «Zaa, 'wluwɔlʋwlɛ ‑mɛ wa wälaanyɩ bhä 'wlu 'nɩ?» Wa lɛ naa: «Zaa a ‑nɛɛ.» 4Ɔ lɛ naa: «Nɩkpaa ‑wa ngluä 'wʋ wa 'kä 'wa ‑lizokuu kɛ'mö ‑sɛ, 'mö Zaa wɔlʋ a‑a 'wlu. ‑Maa sɛ'ɛ ɔ 'nyɛ a‑a Yizlaɛlɩ a ‑nʋa 'dɩ nɩɩ, ‑ɔ 'kää ‑mä na nimï yii, 'mö wa kää wa 'kä dlɩ 'tɛɛnɩ. Ɔ ‑kä sa'a gbää, Zezwii 'mö ɔ gaaa.» 5Pɔɔlʋ 'nyʋä sa'a 'dɩɩ, 'n wa yiɛ 'ɔ wɛlɩɩ 'wʋ nglu, 'n wa yuëë ‑Alowli Zezwii a 'nglɩ 'mö 'wlu wɔlʋ. 6'N Pɔɔlʋ yuëë kätɩkpö 'wlu 'zʋ, 'n ɔ yiɛ wa 'wlumö bhibhe, 'n 'Wugɔmʋʋ 'Wlɩlɩ yuëë ‑gömö yi. Gbɩ a ‑mi wa'aa ‑yii, 'n wa yiɛ gbä, 'n Lagɔ yuëë 'mö bhïlanɩ. 7Nɩkpa 'la, wa ‑bhli kʋgbä 'sɔ a sɛ.

Pɔɔlʋwa yɛ ‑mä Efɛɛzɩ Zezwii a ‑nʋa a zɩkpa sɛ 'gïla

8‑Mi'la 'plɩɛ 'wëë, ‑mä Efɛɛzɩ a Zwiiföwaa 'a Lagɔbuduu 'mö, ‑sɩbhä Pɔɔlʋ mömönɩɛ ‑mä 'wʋ 'yize, 'n ɔ bhïlanɩɛ ‑mä 'pɩwʋ mää Lagɔ 'kämanɩɛ a wɛlɩɩ. Sa'a ‑këë 'cwɩ ta. Ɔ ‑kɩɩ bhïla dɔ'wʋ ‑wʋʋ, ɔ'ɔɔ Zwiiföwaa a 'yila ‑gu, ‑maa gbëaa ɔ bhïliɛ wa 'kɩ sasɛ 'mö 'nʋ. 9‑Maa ‑sɩbhä yɩ ‑wʋ 'mö, Zwiiföwaa a gla'mö a ‑mumuë, 'wa dilaa 'mö wa 'tumanɩɛ 'mö, wa'aa wɛlɩ 'la 'wʋ nglu. Zezwii 'a 'yioo a wɛlɩɩ, Pɔɔlʋ ‑kɩɩ bhïla dɔ'wʋ ‑wʋʋ, nɩkpabhë a 'yila 'klʋ, nɛpɔ wa nɛpwɩɛ. ‑Sɩbhä a za, 'n Pɔɔlʋ ‑nyɛ Zezwii 'a ‑gänɩwa ‑muë'la yiɛ wa dɛ 'plɩ. Nɩkpɛ ‑bhlʋ wa laa Tilanwisɩ 'a ‑sukubuduu 'mö, 'n ɔ ‑nyʋä yiɛ ‑mä mö. Sɛɛ zila zɩɛ, 'n ɔ 'cɩanuëë ‑mä Lagɔ 'a wɛlɩɩ. 10Pɔɔlʋ 'zʋ sa'a ‑këë 'ylʋbö 'sɔ. ‑Sɩbhä a za, ‑mä Azii‑bhölɩɩ 'mö a ‑nʋa, ‑wa glɩnɩɛ Zwiiföwaa oo, ‑waaa Zwiiföwa glɩnɩ oo, wa 'wuë, wa 'nʋ Zezwii 'a wɛlɩɩ.

Sevaa 'a yuëa a wɛlɩɩ

11‑Lɛ a 'tɛnyɩ 'la 'mö, zɩzɛli 'kädɩɩ Lagɔ bhɛnɩɛ Pɔɔlʋ 'möö, yɩ'ɩɛ ‑sɩbhä a sɛ ‑wʋ. 12Yɩ za, nɩkpa ‑mumuë a'bhë, wa libhï 'wa 'klʋsɩɔnɩyʋkwiea 'wʋ, ɛ ‑kä'ɛ 'möpälali, 'mö wa ngwaa Pɔɔlʋ a kuu yɔwʋ, 'wë 'n wa sɩbhɩɛ 'wa guzuwaa, 'n wa yɛmanɩɛ. ‑Wa kää zuzukuzoku ‑gömöö, 'n yɩ 'bhuëë ‑gömö. 13‑Maa Zwiiföwa ‑mumuë ‑wʋmö a 'yɛ wabhlɩ ‑lɛ. ‑Gwlɩɩ 'mö wa nɛmöä ‑gömö, 'n wa kpëtiɛ nɩkpa zuzukuzoku ‑gömö. Wa ‑kɩɩ ‑sɩbhä kpëtie yii, Zezwii 'mö wa ‑dɩmöä 'nglɩ. 'N wa nʋä bhʋlʋbhlʋ, Zezwii ‑ɔnyɩ 'tɩtɩ Pɔɔlʋ biaa, ɔ 'nglɩ 'mö, ‑nmö n nyɛɛ 'dɩ, 'bhöö ‑sɩkaa nɩkpɛ nɩ ‑gömö. 14Zwiiföwaa a Lagɔbʋbɔnyɔ 'kɔdɔ ‑bhlʋ wa laa Sevaa, ɔ yuëë, wa ‑bhli ngbi'sɔ, mʋa zʋä ‑sɩbhä. 15‑Maa 'ylɩ ‑bhlʋ 'mö wa gbää sa'aa, zuzukwëzokwëa, 'n a yiɛ nɩkpɛɛ 'mö bhïlanɩ, a lɛ naa: «Ɛ ‑kä Zezwii mɔɔ, n ‑yoo, n ‑yi'ɛ ‑mɔ wa la Pɔɔlʋ, ‑maa abhʋa abhlɩ, ‑muë a glɩnɩ bhä?» 16Nɩkpɛɛ ‑ɔ kää zuzukwëzokwëa ‑gömöö, wa ngbi'sɔ ‑kpɔ, 'n ɔ ‑nyʋä yiɛ köbhänɩ, 'n ɔ yuëë wa 'wuë 'lɩbhä tlɩtlɩsɛ. Wa ‑dlu 'jɩ, wa dɩ‑ɩ wlu 'n wa yiɛ ‑mä ‑budu 'mö 'wlʋ, ‑bʋ, 'n wa yiɛ futo. 17‑Mä Efɛɛzɩ a nɩkpaa 'wuë, Zwiiföwaa ‑nyɛ ‑waaa Zwiiföwa glɩnɩ 'sɔ, 'n wa yiɛ ‑lɛ a wɛlɩ 'la 'nʋ. Wa 'nwiɛ, 'n nganɔ yuëë 'wʋ yinɩ, 'n wa yiɛ ‑Alowli Zezwii 'a nglɩɩ 'ghlimanɩ.

18'N nɩkpa ‑muë nglu a‑a 'wʋ wa 'kä Zezwii dlɩ 'tɛɛnɩ a gla'mö a ‑nʋä a ‑bɛ yiɛ yi, 'wa ‑lizokuu wa nʋ a‑a, nɩkpabhë a 'yila 'klʋ, 'n wa yiɛ ‑lɛ yɩ 'bï ‑sɛnɩ. 19Wa gla'mö a ‑nʋä a ‑bɛ, wa glɩnɩ a‑a ‑damilanʋwaa, 'wa 'bɔgwɩɩ wa yɩlɩ a‑a 'mö 'n wa nʋ a‑a 'wa ‑damilaa, yɩ 'wuë 'n wa ‑nyɩɩ yiɛ yi, nɩkpabhë a 'yila 'klʋ 'n wa yiɛ ‑lɛ sianɩ. ‑Lɛ a 'bɔgwɩ 'la, moni yɩ ‑lowluwaa pɩɩɩ a‑a 'möö, wa ‑kɛɛ zɛlɩɩ, wa lɛ yɩ li mininywɩɩ kʋgbä. 20Sa'a ‑sɩbhä ‑Alowli 'a wɛlɩɩ mlɩmanɩɛ saa 'wuë 'n wa yiɛ yɩ 'mötɛɛnɔɔ 'ylɩmö.

Pɔɔlʋ a za Efɛɛzɩ a ‑glɔɔ yɛ glu 'bhöö

21‑Mi'la 'plɩɛ 'wëë, Pɔɔlʋ lɛ naa: «Masedʋanɩ‑bhölɩɩ ‑nyɛ Akayii‑bhölɩɩ 'sɔ 'mö, ‑mä n 'kää 'wʋ 'tʋ, n 'kä Zeluzalɛɛmö mö. ‑Maa n ‑kä ‑mä 'bhöö, n yi Ghlɔɔmö mö klɩpaa.» 22'Ɔ ‑gänɩwaa a gla'mö a ‑nʋä 'sɔ, Timotee mɔ 'n ‑mɔmɔɔ ‑bhlʋ wa laa Elaatɩ, wa 'sɔ ‑kpɔ 'n ɔ yuëë ‑mä Masedʋanɩ‑bhölɩɩ 'mö 'yuku 'pïla, ɔ'bhë 'n ɔ yiɛ ‑bhlɛ ‑mä Azii‑bhölɩɩ 'mö tʋʋ. 23‑Lɛ a 'tɛnyɩ 'la 'mö, ‑mä Efɛɛzɩ, ‑Alowli 'a 'yioo a wɛlɩɩ a za, 'n ‑jiji a 'kädɩ yiɛ ‑mä gbä. 24‑Sikabhlɛnyɔ ‑bhlʋ wa laa Demetliusɩ, ɔ ‑kä 'ɔ lɛyaa bhlɛɛ, ‑lagɔ Efɛɛzɩ a ‑nʋa bʋbɔ a‑a, wʋ nglɔɔ, 'mö wa laa Atemisɩ, wʋ ‑buduu wa bʋbɔnuä 'mö a 'wlʋna, 'mö ɔ bhlɛɛ ‑bïdi 'tikïyie 'wʋ, ɔ ‑nyɛ 'ɔ libhonʋwaa 'sɔ, 'mö wa pää 'pɛlʋ 'n wa ghlɩɛ moni a ‑bɛ. 25Nɩkpɛ 'la, 'n ɔ yiɛ 'ɔ libhonʋwaa ‑nyɛ nɩkpa ‑mumuë ‑wa nʋmöä libho 'la 'sɔ 'wlu 'yɩbha, 'n ɔ yuëë 'dɩ 'nyɛ, ɔ lɛ naa: «‑A'bhɩanyɩ, a'bhï a ‑yi sɛ nɩɩ, ‑a'a libhoo ‑a nʋä, wʋ za ‑a wʋlʋä. 26‑Maa nɩkpɛɛ wa laa da'a Pɔɔlʋ, 'ɔ wɛlɩɩ ɔ biaa, a'bhï a kɩ 'nʋmö. Sɛ'ɛ ɔ nʋä nɩɩ, ‑lagwɩɩ nɩkpɛ bhɛnɩɛ kä'möö, ɛ'ɛ ‑bhö ‑tiamö a Lagɔ mɔ, ‑maa nyɩasɛliɛ. ‑Lɛ a wɛlɩ 'la ɔ kɩ nɩkpa a ‑bɛ 'wlumö nyimanɩ. Ɛ'ɛ ‑bhö mä'ä Efɛɛzɩ a 'yize, ‑maa Azii‑bhölɩɩ 'wuë 'mö a nɩkpa a ‑bɛ, mʋa kɩɛ ‑sɩbhä dlɩ 'wʋ. 27Wɛlɩ 'la, sɛ yɩ ‑wʋä da'a gbɔlɔnɩ dɔ'wʋʋ, ‑a'a libhoo 'mö yɩ 'kää nyima. Ɛ'ɛ ‑bhö'ɛ ‑a'a libhoo a 'yize a za, ‑maa ‑a'a ‑lagɔ 'kɔdʋ Atemisɩ, wʋ ‑budu 'kɔdʋʋ a'bhë, 'mö yɩ 'kää 'nglɩ ‑gömö ‑sɛ. ‑Sɩbhä a dɔ'wʋ, ‑a'a ‑lagɔ Azii‑bhölɩɩ 'mö a ‑nʋa ‑nyɛ 'bhlɩbhëa 'wuë 'sɔ ‑wʋä bʋbɔ dɔ'wʋʋ, wʋ 'ghïlinɔɔ mʋʋ 'kää 'yli bhɩɛ.» 28Demetliusɩ gbää sa'a cuu, wa 'wuë 'n yɩ yuëë dlɩ yɔwʋ sumanɩ 'n wa yiɛ 'mö 'kpa, wa lɛ: «Efɛɛzɩ a ‑lagɔ Atemisɩ, mʋʋ 'ghïliɛ aa, mʋʋ 'ghïliɛ aa, mʋʋ 'ghïliɛ aa!» 29'N ‑lɛ a ‑jiji 'la yiɛ ‑glɔɔ glu ‑sɛ. ‑Glɔɔ doo gluu, Masedʋanɩ a nɩkpa 'sɔ ‑wa ‑nyɛ Pɔɔlʋ ‑bhlinɩ a‑a 'wʋʋ, ‑mɔ a nglɩɛ Gayusɩ ‑mɔ a nglɩɛ Alitaakö 'n wa yuëë 'wʋ gbulo, wa ‑susunuë 'wlumö, 'n wa ‑nyʋä yiɛ ‑mä 'du 'mö mö. 30Pɔɔlʋ 'nwiɛ, ɔ lɛ ɔ 'kä ‑mä mö, ɔ 'kä nɩkpaa a dila pïpa. ‑Maa Zezwii 'a ‑gänɩwaa lɛ ɔ nɩ tɩ ‑mä mö. 31Azii‑bhölɩɩ 'mö a 'kämanɩwa ‑mumuë a'bhï, ‑wa glɩnɩɛ Pɔɔlʋ a bhɛyaa, 'n wa yoo nɩkpa 'wʋ tie nɩɩ, ɔ nɩ tɩ ‑mä 'du 'mö mö. 32‑Lɛ a 'tɛnyɩ 'la 'mö, 'saa 'plɩɛ ‑mä 'du 'mö 'wʋʋ, yɩ'ɩa'a 'wlu ‑nyɛ gwë 'sɔ kä. ‑Muë ‑kä 'mö 'kpa, wa nʋ 'wa sɛ, ‑muë ‑kä 'mö 'kpa wa nʋ 'wa sɛ. Wa gla'mö a ‑mumuë a ‑bɛ a'bhë 'fʋ wa ‑wʋmöa'aa wabhlɩ ‑mä ‑bʋbʋ 'mö, wa'a 'saa‑gbʋʋ gbɔɔ ‑yi. 33Nɩkpɛ ‑bhlʋ 'mö wa laa Alɛzaadlɩ, Zwiiföwaa mʋa 'zoo ‑mä wa 'yuku ɔ 'kä wa 'wlumö bhïla. Nɩkpɛ 'la mɔɔ möä ‑mä ‑bʋbʋ 'mö a ‑nʋa ‑mumuë nimï 'yɩbhää, 'n wa yoo ‑jiji a zɛmö sʋlʋnɩ 'wë 'n ɔ yia'aa ‑lɛ 'plɩ ɔ 'kä 'mö ‑sɛnɩ. Ɔ 'plɩɛ ‑lɛ, 'n ɔ yiɛ sɔ ghäyɩ 'pä ɔ 'käa bhïla. 34‑Maa nɩkpa a ‑bʋbʋʋ yɩbhlɩnɩɛ sɛ nɩɩ Zwiiföyi ɔ glɩnɩɛ, wa 'wuë 'n wa yiɛ 'mö 'kpa, wa lɛ: «Efɛɛzɩ a ‑lagɔ Atemisɩ mʋʋ 'ghïliɛ aa, mʋʋ 'ghïli aa, mʋʋ 'ghïliɛ aa!» Wa ‑wʋ sa'a 'gämö nʋnɩ dɔ'wʋ ‑këë, 'gïle 'sɔ a sɛ. 35Wa 'kpa sa'a 'mö ‑këë, ‑mä a ‑gɔmla 'kɔdɔ ‑bhlʋ, 'n ɔ yia'aa yi, 'n ɔ yuëë dɛpö, ɔ lɛ naa: «Efɛɛzɩ a nɩkpanyɩ, ‑lagɔ 'kɔdʋ Atemisɩ, 'wʋ ‑buduu, mä'ä wʋ ‑wʋä ‑a 'bhele, ‑abhʋaa ‑kuuä. Wʋ ‑glɛklʋʋ a'bhë ‑wʋ 'bhööä ‑mä ghäyɩ 'n wʋ yiɛ kwlii, ‑abhʋaa bʋbʋä. Nɩkpɛ a ‑mɔɔ 'nɩa'a sɛ ‑yi ɔ'ɔɔ ‑bhölɩ. 36‑Bɛ 'niɛ 'mö kpɛnɩ. Zaa, a nɩ 'zʋ vlɩɩ, ‑maa a nɩ tɩ ‑ɔɔ'nɛɛnɩli nʋ. 37Nɩkpa nɩ 'sɔ ‑kpɔ a ‑susunɩɛ 'wlumö 'n a ‑nyʋä yiɛ dɛ'ɛ yii, ‑mä ‑a'a Lagɔbuduu 'mö, wa'aa ‑mä ‑lu ‑sɛ, ‑a'a Lagɔ a'bhë, wa 'nuä'ɛ ‑bhlɛ käböwɛlɩ bhïlanɩ. 38‑Maa Demetlusɩ, ɔ ‑nyɛ 'ɔ libhonʋwaa 'sɔ, wa ‑kä nɩkpɛ a 'kïbhë 'mlɩ ‑kä, ‑gɔmla ‑wʋ mä'ä, ‑zijliplɛzlɩ ‑bhölɩ, zaa wa kä wa 'kä 'klɛɛ mö. 39Wɛlɩ ‑mimii ‑kä'ɛ ‑lɛ ‑wʋ, ‑gɔmlɩwaa yi ‑glɔlowluwaa wäzɩ, wa 'yila 'klʋ, yɩ yi ‑lɛ bhïlonɩ. 40‑Maa 'saa a nʋä zɩ'ɛ dɛ'ɛ, yɩ 'nglɩ 'mö, a 'nɩ 'wʋ 'zʋzʋnɩ ‑gɔmlɩwaa ‑wa ‑wʋä ‑mä Ghlɔɔmö, wa ‑yinyɩa gbɩnyimawa 'mö 'wʋ 'libhï. Sɛ'ɛ n gbää nɩɩ, 'a ‑jiji 'wuë a 'bhööä da'a ‑sɛɛɛ, yɩ gla'mö, 'kïbhë a ‑maa 'kä ‑mä 'mö zlɔnɩɩ, n 'naa 'wʋ yɩlɩ, yɩ 'wuë yɩ'ɩɛ nɛnɩ 'lɩlɩlɩ. 41Zaa, a nɩ mö 'ligbï 'mö.» 'N wa yiɛ yɔwʋ ‑sɛnɩ.

Currently Selected:

Nʋnʋlii 19: bet

Highlight

Copy

Compare