Nʋnʋlii 16

Pɔɔlʋ yɛ Timotee 'wʋ 'libhï ɔ ‑nyɔɔ 'kä libho nʋ

1Sa'a ‑këë, 'n Pɔɔlʋ yiɛ ‑gwlɩ ‑mimii 'sɔ 'mö ghlɛ, ‑mu a nglɩɛ Dɛɛbö, ‑mu a nglɩɛ Lisiitɩ. ‑Mä Lisiitɩ glɔ 'mö, ‑mä ɔ ghlɩnɩɛ nyɛgbayu ‑bhlʋ ‑ɔ glɩnɩmöä Zezwii a ‑nɔ, ɔ nglɩɛ Timotee. Ɔ ‑da, Zwiiföylikwii ɔ glɩnɩɛ 'n ɔ yi a‑a Zezwii a nɔ 'zʋ, ‑maa ɔ dɩba ɔbhlɩ, Glɛköyi ɔ glɩnɩɛ. 2Timotee a'bhë, Zezwii a ‑nʋa ‑wa ‑wʋä ‑mä Lisiitɩ, wa ‑nyɛ ‑mä Yikoniɔmö a ‑nʋa 'sɔ, wa sɛ tenyii ɔ 'dɩ a dɩ. 3Pɔɔlʋ ghlɛɛ ‑mä, ɔ 'yɩbhä ɔ ‑nyɛ nyɛgbayu 'la 'kä libho nʋ zaa, 'n ɔ yoo 'wʋ 'libhï. ‑Maa ‑mä a bhlɩɩ 'mö a Zwiiföwaa, wa ‑yi sɛ nɩɩ, Timotee a dɩba, Glɛköyi ɔ glɩnɩɛ zaa Timotee 'nɩɛ 'wʋ dɩ‑ɩ. ‑Sɩbhä a za, Pɔɔlʋ lɛ wa nɩ ‑doo 'wʋ. 'N wa yoo 'wʋ ‑dɩ. 4'N wa yiɛ ‑mä a ‑gwlɩ ‑mimii 'mö 'wʋ 'tʋ. Zezwii 'a tietiewaa, wa ‑nyɛ Zeluzalɛɛmö a ‑zɩkpaa a 'yukugänɩwaa 'sɔ, kïbhïï wa ‑dɩ a‑a 'wluu, Pɔɔlʋwa ‑kä ‑mä ‑gwlɩ 'la 'wuë 'mö ghlɛnɩɩ, ‑sɩbhä wa nyɩɛ Zezwii a ‑nʋa ‑wa ‑wʋä ‑mä, 'n wa nyʋä 'dɩ nɩɩ wa nɩ 'zwi 'klʋkpamö klɩpaa. 5Zezwii a ‑nʋa, ‑sɩbhä wa 'tɛmanɩɛ 'yli yɔwʋ 'n wa 'tɛɛnɩɛ tenyii Zezwii dlɩ, sɛɛ zila zɩɛ 'yize, ‑sɩbhä wa zumanɩɛ.

Lagɔ yɛ ‑mä Tlʋasɩ Pɔɔlʋ 'dɩ 'nyɛnɩ

6Pɔɔlʋ ‑nyɛ Silasɩ 'sɔ, wa möä ‑këë, ‑mä Azii‑bhölɩɩ 'mö, wa 'yɩbhä a nyɩasɛ wa 'kä ‑mä Lagɔ 'a wɛlɩɩ biaa mö, ‑maa 'Wugɔmʋʋ 'Wlɩlɩ lɛ naa, wa tɩ ‑mä mö. Zaa, Flizii‑bhölɩɩ ‑nyɛ Galatii‑bhölɩɩ 'sɔ, 'n wa yiɛ ‑mä yɩ jijo'wʋ ghlɛnɩ. 7Wa möä, wa ghlɛɛ ‑mä Misii‑bhölɩɩ 'möö, wa 'yɩbhä a 'yɛ nyɩasɩ wa 'kä ‑mä Bitinii‑bhölɩɩ 'mö mö, ‑maa Zezwii 'a 'Wugɔmʋʋ 'nuëë 'tɛnyɩ 'nyɛ. 8Zaa, 'n wa yiɛ Misii‑bhölɩɩ 'mö ghlɛnɩ, gïnyɛ yɔwʋ a glɔ ‑bhlʋ wa laa Tlʋasɩ, 'n wa yiɛ ‑mä mö. 9Wa ‑wʋ ‑mä, sabʋsɛ 'n Pɔɔlʋ 'a yilaa yiɛ do. Ɔ lɛ zʋ a sɛ cuu, bhlɩɩ wa laa Masedʋanɩ, ‑mä a nɩkpɛ 'nɩgbö ‑lɛ, ɔ lɛ naa: «Pɔɔlʋ, n bhiamö ‑yayaya, 'tʋ nyuu ‑n 'kä mä'ä Masedʋanɩ yi, ‑n ‑kanyɩ 'wʋ yi.» 10Ɔ 'yiɛ 'ylɩmöö, a‑a yiɛ 'mö 'nʋ nɩɩ, Lagɔ a'bhë mɔɔ nyɩanyɩɛ 'dɩ, nzɩɩ ‑a 'kä ‑mä bhlɩ 'la 'mö mö, ‑a 'kä ‑mä a ‑nʋa 'Mänatɩtɩɩ 'nyɛ. Zaa, a‑a yiɛ 'wlu gïganɩ cuu, ‑a 'kä ‑mä mö.

Pɔɔlʋwa yɛ ‑mä Filiipö glɔ 'mö ghlɛ

11‑Mä Tlʋasɩ, ‑mä ‑a 'libhïnɩɛ batoo 'wʋʋ, gïnyɛlekpë 'käda ‑bhlʋ wa laa Samotlasɩ, a 'klʋ, a‑a yiɛ ‑mä gbɩɩ mö. Zlɩ zɩɛ, ‑a 'bhööä ‑mä, ‑glɔ ‑bhlʋ wa laa Neapolisɩ, a‑a yiɛ ‑mä ghlɛ. 12‑A 'bhööä ‑mä, Masedʋanɩ‑bhölɩɩ 'mö a glɔ ‑bhlʋ wa laa Filiipö, a‑a yiɛ ‑mä ghlɛ. Ghlʋmɛɛwaa mʋa 'sɩbhʋä, mʋa glɩɛ ‑mä. ‑Mä glɔ 'la 'mö, ‑a ‑sɛ ‑mä 'ylɩya. 13‑Gwlɛnɩzlɩɩ ghlɛɛ, a‑a yiɛ ‑mä glɔ 'mö 'wlʋ. A‑a yiɛ ‑mä 'nyudɔlʋ yɔwʋ mö, a‑a yiɛ dɛ ‑bhlʋ ghlɛ. Sɛ ‑a pää dlɩ a dɔ'wʋ, Zwiiföwaa a 'wluyɩbhänɩdɛ‑ɛ. 'Ngwlɩ yɩbhä ‑lɛ 'wlu zaa, a‑a yiɛ sɛ glɩ, a‑a yiɛ ngwlɩ 'la Lagɔwɛlɩɩ 'nyɛ. 14Wa gla'mö a 'nglɔ ‑bhlʋ, ‑glɔɔ wa laa Tiatii ‑mä a 'ylikwiɛ. Lokuzɛlɩ a 'ke ‑bhlʋ ‑yɩ 'tɛɛ tenyii 'pɛlʋʋ, 'mö ɔ pää 'pɛlʋ. Ɔ nglɩɛ Lidii, Zwiiföwaa a saa, ‑sɩbhä ɔ bʋbɔmöä Lagɔ. 'Nglɔ 'la, Pɔɔlʋ ‑wʋ Lagɔ 'a wɛlɩɩ bhïla dɔ'wʋ, 'n Lagɔ a'bhë yiɛ 'ɔ dlɩɩ 'klʋ kälɩ, 'saa Pɔɔlʋ bhïlaa, 'n ɔ yiɛ 'mö 'nʋ. 15'N wa yoo 'wlu wɔlʋ ɔ ‑nyɛ 'ɔ ‑kosu yɔwʋ a ‑nʋa 'sɔ. Wa wɔlɔɔɔ 'wlu 'wëë, ɔ lɛ naa: «'N a ‑kɩɩ ‑tiamö dlɩ 'wʋ ‑kä nɩɩ, n 'tɛɛnɩ ‑Alowli dlɩɩ, a nɩ yi a 'kä ‑lɛ 'na 'ligbë 'mö gʋʋ, 'n ɔ ‑yinyɩɛ 'wlumö mɛ.»

Wa yɛ Pɔɔlʋ ‑nyɛ Silasɩ 'sɔ ‑jie 'mö 'pä

16‑Mä Filiipö, sɛ'ɛ 'ylɩ ‑bhlʋ 'mö, ‑a ‑wʋ ‑mä Lagɔbudu 'mö mö dɔ'wʋ, 'n 'nglɔ ‑bhlʋ ‑yinyɩɛ gbanɩɛ yi. Nglɔ 'la zuzukwëzokwë ɔ kää ‑gömö, ma‑a kää 'nglɩ 'n ɔ yɩbhää 'wʋ. ‑Maa ganglɔ ɔ glɩnɩɛ zaa, ɔ ‑kä 'wʋ 'yɩbhää, ɔ 'bhidɩbawa ghlɩnɔ moni a ‑bɛ 'mö. 17‑A bhïloo yɛ'möö, ɔ ‑wʋ 'mö 'kpa dɔ'wʋ, 'n ɔ ‑yinyɩɛ 'bɩwʋ bhlinɩ. Ɔ lɛ naa: «Nɩkpa nɩ Lagɔtapɛ a libho wa nʋä. Sɛ a 'kää 'zʋ a 'kä 'pʋʋ, ‑sɩbhä a 'dɩ wa yeanyɩɛ 'nyɛɛ.» 18Ɔ 'zʋnɩ sa'a 'ylɩ a ‑bɛ 'mö. Sa'a ‑këë, 'n dlɩ'mökpanɔ yia'aa Pɔɔlʋ 'mö bhɩɛ, 'n ɔ yiɛ nglɔɔ 'yi gö, ɔ lɛ naa: «Zuzukwëzokwë nɩmä, ‑nmöö ‑wʋä nglɔ nɩ ‑gömöö, ‑nmö n nyɛɛ dɛ'ɛ 'dɩ, Zezwii Kliisɩ a 'nglɩ 'mö, 'bhoo ‑sɩkaa ‑gömö.» Pɔɔlʋ gbää sa'a cuu, 'n zuzukwëzokwëa yiɛ nglɔɔ ‑gömö 'bhöö. 19‑Maa ɔ 'bhidɩbawa 'yiɛ 'ylɩmö nɩɩ, wa 'naa 'kɔa'a ‑lu 'mö ghlɩnɩɩ, 'n wa yiɛ Pɔɔlʋ ‑nyɛ Silasɩ 'sɔ 'wʋ gbulo, ‑mä 'du 'mö, ‑gɔmlɩwa a 'yila 'klʋ 'n wa yuëë ‑mä kwä. 20Wa ‑nyʋä ghlɛɛ ‑mä ‑zijlituwa 'la ‑wa glɩnɩɛ Ghlʋmɛɛwaa a 'yila 'klʋʋ, wa lɛ naa: «Nɩkpa nɩ, ‑glɔnyimawaa. Zwiiföwa wa glɩnɩɛ zaa, 21'wa ‑lii wa 'cɩaa, yɩ'ɩɛ nɛnɩ ‑abhʋa Ghlʋmɛɛwaa a dɔ'wʋ, yɩ ‑nyɛ ‑a'bhigbʋʋ 'nɩɛ yɔwʋ mönɩ.» 22Wa gbää sa'aa, nɩkpaa ‑wa suä ‑lɛ, 'n wa yi'ɛɛ wabhlɩ Pɔɔlʋwa ‑gömö bhïlanɩmö. Zaa, ‑zijlituwaa lɛ naa, wa nɩ ‑sɛ Pɔɔlʋwa ‑banɩ 'mö wa 'kʋä ‑kplɩya 'mö 'sɛlɩnɩ. 23Wa 'sɛluëë ‑këë, ‑n wa yuëë ‑jie 'mö 'pä, 'n wa yiɛ ‑jiebudu a ‑kʋkʋnyɔɔ 'dɩ 'nyɛ nɩɩ, ɔ nɩ ‑kuë sasɛ. 24Wa nyɔɔ sa'aa dɩɩ, 'n ɔ yiɛ Pɔɔlʋwa 'wʋ 'libhï ‑mä ‑jiebuduu 'mlɩ, ‑mä 'yuku a 'kïbhë 'tikëyi 'mö, 'n ɔ yuëë ‑mä 'pä, 'n ɔ yuëë 'gbu 'mö 'zʋ.

25Sabʋsɛ, zlɩ a jijo'wʋ a sɛ, Pɔɔlʋ ‑nyɛ Silasɩ 'sɔ, wa bhlɩ wa 'ghlimanɩ Lagɔ 'a 'nglɩ, ‑jiewa ‑muë'la ‑pʋnuë 'yukwli. 26Cuu, 'n dʋdʋ yiɛ tenyii tɩtlɛnɩ, 'n ‑jiebuduu a'bhë yiɛ 'mö zizo, 'n ‑gbïlii 'wuë yiɛ këlio, gogwii ‑jiewaa ‑gwanɩ a‑a, 'n yɩ yiɛ do. 27‑Jiebuduu a ‑kʋkʋnyɔɔ, 'n ɔ yiɛ gɔlɔ, ɔ lɛ zʋ a sɛ'ɛ, ‑gbïlii 'wuë ‑kälɩ. Ɔ ‑tɔnɩ ‑jiewaa 'wuë yɛ futo zaa, 'n ɔ yiɛ 'ɔ ‑gbälɛɛ 'ba 'mö ‑sɛ ɔ 'kä ɔnyɩ 'lɩbhä. 28Ɔ 'zʋa sa'aa, 'n Pɔɔlʋ yiɛ 'mö 'kpa, ɔ lɛ: «Tɩa ‑nanyɩ ‑lizoku 'wlu nʋ, ‑maa ‑a 'wuë ‑a ‑wʋa mä'ä.» 29Ɔ gbää sa'aa, ‑buduu a ‑kʋkʋnyɔɔ 'n ɔ yiɛ 'wapɛ 'yɩbhä, ‑budukïbhëa 'mö mää Pɔɔlʋwa ‑wʋä, 'n ɔ yiɛ ‑mä plɛ gbëlibha. Ɔ 'wuë nganɔ, ɔ ‑wʋ tɩtlɛnɩ dɔ'wʋ, 'n ɔ yiɛ ‑lɛ wa dlɩ 'mö ‑kokomïladigbï glu 'pä. 30Ɔ ‑sɔɔ 'wʋ, 'n ɔ ‑nyʋä yiɛ ‑mä 'wlʋ. Ɔ lɛ naa: «‑Atʋwanyɩ, n 'kä 'pʋ a dɔ'wʋ, sɛ n 'kä bhä 'zʋ 'nɩ?» 31Wa lɛ naa: «'Tɛɛnɩ ‑Alowli Zezwii dlɩ. ‑N ‑kɔɔ dlɩ 'tɛɛnɩɩ, ‑n yi Lagɔ 'a 'pʋpʋɛ ghlɩ, ‑n ‑nyɛ ‑na'a ‑kosuu yɔwʋ a ‑nʋa 'wuë 'sɔ.» 32-34Wa 'nyɔɔ sa'a 'dɩ 'wëë, ‑lɛ a 'tɛnyɩ 'la ‑bhʋlʋ ‑kpɔ 'mö 'n ɔ ‑nyʋä yiɛ ‑mä 'ɔ 'ligbë 'mö mö, ɔ ‑nyɛ 'ɔ ‑kosuu yɔwʋ a ‑nʋa 'wuë 'sɔ, 'n Pɔɔlʋwa yuëë Lagɔ 'a wɛlɩɩ 'nyɛ. Ɔ 'libhïä Pɔɔlʋwa 'wʋʋ 'n ɔ yiɛ wa yɔwʋ a jɩɩ glʋ 'tɩɩ. Ɔ guluëë 'wëë, 'n wa yoo 'wlu wɔlʋ, ɔ ‑nyɛ ɔ ‑nʋa wuë 'sɔ. Pɔɔlʋwa wɔluëë 'wlu 'wëë, 'n ɔ yuëë lile 'nyɛ. ‑Maa nɩkpɛ 'la, ɔ ‑nyɛ ɔ ‑nʋa 'wuë 'sɔ, sɛ wa yɩbhlɩnɩɛ Lagɔ a za, wa 'wuë 'mäna a 'yize. 35Zlɩ zɩɛ, 'n ‑gɔmlɩwaa yiɛ ‑jiebudukʋnyɔɔ nɩkpa 'wʋ tie nɩɩ, ɔ nɩ ‑sɛ Pɔɔlʋ ‑nyɛ Silasɩ 'sɔ ‑jie 'mö, wa 'kä mö. 36'N ɔ yiɛ ‑sɩbhä Pɔɔlʋwa 'dɩ 'nyɛ nɩɩ: «‑Zijlituwaa lɛ n nɩ 'tatinaanyɩ 'yi zaa, a nɩ ‑sɔ 'wʋ, a 'kä ‑pälɛpälɛ mö.» 37Ɔ gbää sa'aa, nɩkpa ‑wa ‑lɛmöä tɩtɩɩ, 'n Pɔɔlʋ yuëë 'dɩ 'nyɛ nɩɩ: «Wa'aa sasɛ ‑a'a wɛlɩɩ 'ylɩmö 'n wa ‑yinyɩɛ ‑kplɩya 'mö 'sɛlɩnɩ nɩkpabhë a 'yila 'klʋ. 'N ‑maa Ghlʋmɛɛwaa ‑a glɩnɩmöä. 'N wa ‑yinyɩɛ ‑jie 'mö 'pä, ‑sɩkaa a dɔ'wʋ wa yɩbhä bhä wa ‑kanyɩ 'wi 'mö ‑jie 'mö ‑sɛ ‑a? ‑A 'naa 'kɩɛ 'ylɩmö, wa'bhï wa nɩ yi, wa ‑kanyɩ ‑mä ‑sɛ.» 38'N nɩkpaa yiɛ ‑zijlituwaa 'dɩ kwä. ‑Maa ‑zijlituwaa 'nʋä nɩɩ, Pɔɔlʋwa, ‑lɔ 'mö a dɔ'wʋ Ghlʋmɛɛwaa wa glɩnɩmöä, 'n nganɔ yuëë 'wʋ yinɩ, 39'n wa yuëë yɔwʋ bhibhee yi, 'n wa yuëë ‑jie 'mö ‑sɛ, wa lɛ naa: «A ‑yaya, a wɛlɩ nɛnɩ, ‑maa ‑a bhianyɩ, a nɩ 'bhöö mä'ä glɔ 'mö.» 40Pɔɔlʋ ‑nyɛ Silasɩ 'sɔ, wa 'wlʋä ‑mä ‑jie 'möö, ‑mä Lidii a mä'a 'n wa yiɛ ‑mä mö. 'N wa yiɛ Zezwii a ‑nʋa ‑mä ghlɩ, 'n wa yuëë swɩ nyɛmʋ 'mö 'pä. 'Wë, 'n wa yiɛ 'wʋ ‑sɔ 'n wa yiɛ mö.

Currently Selected:

Nʋnʋlii 16: bet

Highlight

Copy

Compare