2 Tesaloniikö a ‑nʋa 3

A nɩ bhibhe ‑aa 'wlumö Lagɔ

1‑Atʋayuënyɩ, wɛlɩɩ ‑a 'kää 'gbë 'bhlenɩɩ, miɛ nɩɩ: A nɩ bhibhemö ‑aa 'wlumö ‑Alowli, nzɩɩ 'ɔ 'Mänatɩtɩɩ 'käa ‑pa saa 'wuë mlɩmanɩ, sɛ yɩ kää a dɔ'wʋ 'klʋkpamöö, nɩkpa 'wuë a dɔ'wʋ yɩ 'kä ‑sɩbhä 'klʋkpamö ‑kämö. 2Miɛ abhlɩ, ‑maa a'bhï a ‑yi sɛ nɩɩ, nɩkpaa 'wuë mʋa 'nɩɛ ‑sɩbhä 'wʋ nglu wa 'kɩ dlɩ'wʋ ‑kä. Zaa, a nɩ bhibheo'ɛ, nzɩɩ nɩkpazokuu ‑wa kää 'kpʋkpʋdila 'mlɩɩ, ɔ ‑kanyuë ngli ‑sɛ.

3Yɩ 'wuë 'mö a dɔ'wʋ, ‑Alowli Lagɔ 'ɔ sɛ ɔ yɛɛ gbä 'wë, ‑sɩbhä ɔ zʋä klɩpaa zaa, ɔ yi gbä a yi 'yli yɔwʋ 'tɛmanɩ. Ɔ yeanyɩ Sataa 'a 'mötɛɛnɔɔ ngli ‑sɛ. 4Lagɔ a'bhë mɔɔ kää 'nglɩ, a‑a kanyɩɛ dlɩ 'wʋ nɩɩ, dɩɩ ‑a zʋanyɩɛ 'möö, a zwi ‑tiamö 'klʋkpamö, a yi 'kwädlɩ ‑sɩbhä 'klʋkpamö zʋ 'yize. 5Sɛ'ɛ ‑a bhibheoo a 'wlumö nɩɩ, ɔ nɩ zlɔmanɩ 'a dlɩpäsaa 'wuë 'mö, nzɩɩ ɔ ‑wawʋ 'kanyɩ 'kwädlɩ dlɩ zɛmö ‑wʋ, sɛɛ Kliisɩ ‑kpanɩɛ dlɩ 'möö, a 'kä ‑sɩbhä dlɩ 'mö ‑kpanɩmö.

A nɩ nʋ libho

6‑Atʋayuënyɩ, ‑Alowli Zezwii Kliisɩ a 'nglɩ 'mö, wlumö ‑a köbhänanyɩɛ nɩɩ: Abhʋa Zezwii a ‑nʋa, a gla'mö a nɩkpaa ‑waa 'zʋä wɛlɩɩ ‑a 'cɩanyɩɛ 'klʋkpamö, ‑waa ngluä libhonʋgbʋʋ, a nɩ 'dionuë gwë. 7Sɛ a 'kää nɛmö a 'kä ‑a'a gbäpöö ‑gänɩɩ, a'bhï a ‑yi ‑sɩbhä. A ‑yi sɛ nɩɩ, dɛ ‑a ‑wʋ a‑a ‑mä a jijo'wʋʋ, swɩ wʋ ‑aaa a pönɩ. 8‑Aaa a nɩɩ, a gla'mö a nɩkpɛ ‑bhlʋ a'bhë nɩ lianyɩ 'fʋ nʋ. ‑Maa ‑a tɩa a gla'mö a nɩkpɛ a ‑ngowlu 'mö ‑wʋ a za, ɛ yi zlɩgä oo, ɛ yi sabʋ oo, tenyii ‑a nʋ a‑a libho. 9'Lɩlɩlɩ a dɔ'wʋ, a kä a a ‑kanyɩ lia, ‑maa a‑a nɩ ‑kä sa'a ‑mä a jijo'wʋ libho nʋʋ, ‑a 'kanyɩ 'ylimö tulanɩ nɩɩ, a kä a 'kä libho nʋ, nza ‑a 'zʋä ‑sɩbhä. Zaa, a nɩ ‑gänɩ ‑a'a gbäpöö. 10Sɛ'ɛ n gbää nɩɩ, dɛ ‑a ‑wʋ a‑a ‑mä a jijo'wʋʋ, sɛ'ɛ ‑a 'nyanyɩ a‑a 'dɩ nɩɩ: ‑Ɔ 'nɩ libhonʋgbʋ ngluu, ɔ nɩ tɩ li.

11Nyɩasɛ ‑a 'nanyɩɛ dɛ'ɛ wɛlɩkïbhë nɩ 'wʋ ligbanɩ, ‑maa ‑a yɛ 'nʋ nɩɩ, ‑mä a gla'mö, ‑mumuë ‑wʋ ‑mä, ‑tlɩ wa ‑tlɩɛ, wa'a nglu libhonʋgbʋ, wa 'kä wanyɩ wa 'bhɩa a gbɩɩ 'mö 'pä a 'yize a libhoo 'mö wa kää. 12‑Lɛ a nɩkpa 'la mö ‑a zʋä dɛ'ɛ 'dɩ 'mö. ‑Alowli Zezwii Kliisɩ a 'nglɩ 'mö, dɩ ‑a nyʋä nɩɩ: Wa nɩ nʋ 'kwädlɩ libho, wanyɩgäsɛ wa 'kä wanyɩ ‑su.

13‑Atʋayuënyɩ, a 'wuë, ‑li a ‑li a nʋnʋ dɔ'wʋ, swɩ nɩ tanyɩ 'kwädlɩ yɔwʋ 'kunɩ. 14'Dɩmözʋwɛlɩɩ 'wuë ‑a 'zʋä mä'ä 'bɔgʋ nɩ 'möö, a gla'mö a nɩkpɛ ‑mɔɔ 'ni 'klʋkpamö zʋʋ, a nɩ köbhɔɔ 'yli, a 'kɔ gwë 'dionɩ, zʋ 'kɔ 'wʋ yinɩ. 15A ‑kä ‑sɩbhä 'zʋ dɔ'wʋ ‑wʋʋ, a nɩ to ‑gblɩ, ‑maa a nɩ ligboo ‑daayu a sɛ.

Wɛlɩɩ Pɔɔlʋ 'bhlenɩɛ 'gbëë

16‑Atʋayuënyɩ, ‑Alowli Lagɔ 'tɩɩglɩglɛɛ 'wuë 'bhöönɩɛ 'möö, 'ɔ nɩ 'nyanyɩ 'kwädlɩ 'tɩɩglɩglɛ. A 'wuë, ɔ ‑nyɛ abhʋa nɩ ‑bhlinɩ 'wʋ.

17‑Amö Pɔɔlʋ, a 'wuë n bhälanyɩ. Bhälɩwɛlɩkïbhë nɩ, na'bhë 'na kätɩkpaa 'mö n 'cɛlɩnaa 'mö. 'Na 'cɛlɩcɛlɩsaa, sɛ wa ‑kä 'ylɩmö 'n wa yɩbhlɩnɩɛ 'na 'bɔgwɩɩ 'wuë n pää, ‑sɩbhä ma‑a.

18A 'wuë ‑Alowli Zezwii Kliisɩ nɩ 'panyɩ 'nyu!

Learn More About BdG2

2 Tesaloniikö a ‑nʋa 3

Popular Bible Verses from 2 Tesaloniikö a ‑nʋa 3

Popular Bible Verses from
2 Tesaloniikö a ‑nʋa 3