Revelation 21
21
CHAPTIR TWENTY‐ANE.
A New Heeven and a New Yirth. The bonnie Bride oʼ Christ, wiʼ aʼ her pearlins and her jewels.
1And I saw a New Heeven and a New Yirth; for the first Heeven and the first Yirth war gane‐by; and sea was thar nane.
2And the holie city, “New Jerusalem,” saw I comin doon frae God oot oʼ Heeven, made ready as a bride buskit for her bridegroom.
3And I heard a soondin voice oot oʼ Heeven, sayin, “Lo! Godʼs dwallin is wiʼ men, and he sal bide wiʼ them; and they sal be his folk, and God his ain sel sal be wiʼ them!
4“And he sal dicht aʼ tears frae their een; and Death sal be nae mair; nor dool, nor ootcry, nor pain sal be ony mair: for aʼ the auld things are gane‐by!”
5And he that sat on the Thron, said, “Lo! I mak aʼ things ower again!” And he says to me, “Write; for thir words are leal and true!”
6And he said to me, “It has come to be! I am the Alpha and the Omega, the forefront and the endin! I to ilka drouthie ane wull gie oʼ the waal‐ee oʼ the Watir‐oʼ‐Life, freely.
7“He that prevails has aʼ things for his heritage; and I sal be to him a God, and he sal be to me a bairn.
8“But as to the dauntit anes, and the unbelievin, and the abominable, and blude‐shedders, and lecherers, and eidol‐worshippers, and aʼ leears, their pairt is in the loch that lowes wiʼ fire and brunstane, whilk is the second death.”
9And thar cam oot ane oʼ the seeven Angels that had the seeven flagons fuʼ oʼ the seeven last plagues and spak wiʼ me, sayin, “Come awaʼ! I wull schaw ye the Bride, the wife oʼ the Lamb!”
10And he bure me awaʼ iʼ the Spirit to a mountain great and heigh, and airtit my een to the citie, the holie Jerusalem, loutin doon oot oʼ Heeven frae God;
11Haein the glorie oʼ God; and her glintin was like to a stane maist precious, as a jasper‐stane, clear as crystal;
12Haein a waʼ great and heigh; and had twalʼ ports, and at the ports twalʼ Angels: and names putten thar‐on, whilk are the names oʼ the twalʼ tribes oʼ Israʼl.
13Eastward, thrie ports; and northward thrie ports; and soothward thrie ports; and wastward thrie ports.
14And the city waʼs had twalʼ fundations; and upoʼ them twalʼ names, oʼ the twalʼ Apostles oʼ the Lamb.
15And he that spak to me had a wand oʼ gowd, that he micht measur the citie, and her portals and her waʼ.
16And the citie lies four‐square, and the lenth is as muckle as the breidth. And he measurʼt the citie wiʼ the wand, up to twalʼ thoosand furlongs: her lenth, and breidth in heicht aʼ marrow thegither.
17And he measurʼt her waʼ a hunner and forty‐fowr half‐airms oʼ a manʼs measur; that is, the Angelʼs.
18And the biggin oʼ the waʼ was jasper; and the citie pure gowd, like shinin gless,
19And the fundations oʼ the waʼ oʼ the citie wiʼ ilka precious stane war buskit. The first fundation, jasper; the second, sapphire; the third, chalcedonie; the fourth, emerant;
20The fifth, sardonix; the saxth, cornelian; the seeventh, gowd‐stane; the auchth, beryl; the ninth, topaz: the tenth, chrysoprasie; the eleeventh, hyacinth; the twalʼth, amethyst.
21And the twalʼ yetts war twalʼ pearls; ilka allenar yett ae pearl; and the causey oʼ the citie was gowd, like shinin gless.
22And Temple saw I nane thar‐in; for the Lord God Almichty and the Lamb are her temple!
23And the citie isna wantin for the sun, nor yet for the mune, that they soud be shinin inʼt; for the glorie oʼ God is her licht, and the Lamb is the lamp oʼt.
24And aʼ folk sal gang by the licht oʼt; and aʼ the kings oʼ the yirth bring their glorie intilʼt.
25And aʼ the day lang the yetts are wide unsteekit; for nae #21:25 Nae nicht ower the holie citie; and naething that nicht and mirkness signify — sorrow, nor dool, nor pain.nicht faʼs thar!
26And they sal bring the glorie and treasur oʼ the nations intilʼt.
27And in naegate sal enter intilʼt ocht that defiles, nor ane that dis abomination, or is a leear; but thae wha are putten‐doon iʼ the Lambʼs Buik‐oʼ‐Life.
Currently Selected:
Revelation 21: SCO1904
Highlight
Copy
Compare
Share
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
