Philippians 4
4
CHAPTIR FOWR.
Gude advisement, wiʼ his pairtin commendation.
1And sae, my brethren, belovʼd and mickle‐langed‐for, my rejoicin, sae staun siccar iʼ the Lord, my beloved!
2Euodia I entreat, and Syntyche I entreat, that ye be oʼ ae mind, iʼ the Lord.
3And I entreat ye as weel, leal yoke‐fellow, be ye helpin thae weemen wha, in truth, helpit me iʼ the labor oʼ the Gude‐word; wiʼ Clement too, and my ither marrows, whase names are iʼ the Buik oʼ Life.
4Be glad iʼ the Lord aye; and again I say, “Be glad!”
5Lat yere reasonableness be kent to aʼ men: the Lord is at haun.
6For naething be ye trauchlʼt iʼ yere minds; but in aʼ things by prayer and supplication, wiʼ gean oʼ thanks, lat yere needs be made kent to God.
7And the peace oʼ God that is aboon aʼ oor thocht, sal keep yere hearts and yere thochts in Christ Jesus.
8And for the lave, brethren, #4:8 Take ye tent, hoo faith wull aye mak itsel kent by gude warks! Coud ony ane keep step wiʼ sic things, wha hadna first keepit step wiʼ Christ?As mony things as are leal, as mony things as are honorable, as mony things as are just, as mony things as are pure, as mony things as are bonnie, as mony things as are oʼ gude repute; gin thare be ony virtue whatsoeʼer, gin thar be ony praise, tak ye accoont oʼ thir things.
9Whatna things ye baith learned and gat, and heard and saw, in me, do ye the same: and the God oʼ peace sal be wiʼye.
10But I was made to be unco blythe iʼ the Lord, that noo iʼ the end, yere care for me blossomʼd again: thoʼ in truth ye war carin, but wantit opportunity.
11No that I was in need, am I speakin; for I ken, hoosoeʼer I am, to be content.
12I ken baith hoo to be brocht laigh, and I ken hoo to hae mair nor eneuch: in aʼ ways, and in aʼ things hae I been instruckit, baith to be fuʼ and to hungʼer, baith to hae ower‐and‐aboon, and to want.
13I can do aʼ things, by him wha strenthens me!
14Nane‐the‐less, ye did weel, in haein a co‐stewardship wiʼ me in the distress.
15Noo ye Philippians ken, that iʼ the beginnin oʼ the Gude‐word, whan I gaed oot frae Macedonia, no eʼen ae kirk had fellowship wiʼ me, iʼ the maitter oʼ giean and takin, but ye only.
16For eʼen in Thessalonica, ye sent, ance and again, till my need.
17No that I seek eftir a gift: but I seek eftir the frute that is to increase to yere accoont.
18But I hae rowth oʼ aʼ things, and mair nor eneuch; I hae been filled, haein frae Epaphroditus the things frae you, a sweet odor, and acceptable offeran, weel‐pleasin tae God.
19But my God wull mak up for ye ilka need, conform to the riches oʼ his glorie in Christ Jesus.
20Noo to oor God and Faither be glorie, for evir and for evir. Amen!
21Salute ye every saunt in Christ Jesus. The brethren that are wiʼ me salute ye.
22Aʼ the saunts salute ye; in especial they oʼ Cesarʼs hoosehauld.
23The tender‐love oʼ the Lord Jesus Christ be wiʼ yere spirit!
Currently Selected:
Philippians 4: SCO1904
Highlight
Share
Copy
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
