2 Corinthians 7
7
CHAPTIR SEEVEN.
Sorrow that brings forth joy. Titus faund the Corinthians true and leal.
1Haein than thir promises, belovʼd anes, lat us mak oorsels free frae uncleanness oʼ flesh and saul, makin holiness perfete iʼ the fear oʼ God.
2Gie us a place in yere hearts! We wrangʼd nane, we corruptit nane, we defraudit nane!
3I am‐na sayin this to wyte ye; for, as I hae said afore, ye are in oor hearts to leeve and dee wiʼ you.
4An unco freedom oʼ speech hae I tʼye; unco boastin hae I oʼ ye: I am fuʼ oʼ comfort, I am unco filled wiʼ joy in aʼ oor troubles.
5For eʼen whan we cam intil Macedonia, oor flesh had nae rest, but in aʼ ways war we in a tulzie: ootwardlie fechts; inwardlie switherins.
6But he wha comforts the humble anes, comfortit us, eʼen God; by the comin oʼ Titus.
7And no allenar by his comin, but by the comfort whaur‐by he was comfortit on yere accoont, whan tellin us oʼ yere fain desire, yere lamentation, yere zeal for me; sae that I rejoiced the mair.
8For, gin eʼen I made ye wae wiʼ the letter, I am‐na regrettin, thoʼ I did regret; for I see that yon letter made ye wae — eʼen gin it was but an ʼoor.
9But noo I am blythe — no that ye war made wae, but that ye war made wae to repentance; for ye war made wae accordin to God, that ye micht hae damage frae us in naething.
10For dool accordin to God works repentance to salvation; no to be regrettit. But the dool oʼ the warldʼs‐kind works oot death.
11For behauld! this vera thing — the makin wae accordin to God: what unco tentiness it wrocht in ye; what judgin oʼ yer sels; what sair indignation, what fear, what fain desire, what zeal, what repayin! In aʼ things ye hae schawn yersels to be pure in this maitter.
12And sae, eʼen gin I wrate tʼye, it wasna for his sake that did the wrang, nor for his sake wha dreeʼd the wrang, but that oor care on yere behauf micht be made kent tʼye, in Godʼs sicht.
13And on this accoont we hae been comfortit; but mair — we did rejoice uncolie iʼ the joy oʼ Titus, that his heart was refreshʼt by ye aʼ.
14Sae, gin I hae boastit onywise oʼ you to him, I wasna made to be shamed; but as we tellʼt ye aʼ things truly, sae oor boastin afore Titus was seen to be true.
15And his tender‐love is aʼ the mair toward ye, whan he caʼs to mind the obedience oʼ ye aʼ, and hoo wiʼ fear and trimlin ye received him.
16I joy than that in aʼ things I can lippen ye.
Currently Selected:
2 Corinthians 7: SCO1904
Highlight
Share
Copy
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
