2 Corinthians 11
11
CHAPTIR ELEEVEN.
The Corinthians soud hae studden‐up for Paul; but seein they lichtlied him and his message, he had eʼen to tak his ain pairt. It isna boastin to speak the truth!
1I wad that ye coud thole me in a wee fulishness: indeed ye are tholin me.
2For I am jealous ower ye wiʼ the jealousy oʼ God: for I espoused ye to ae husband, that I micht gie ye ower as a pure maiden to Christ.
3But I fear least in onywise, eʼen as the serpent beguiled Eve wiʼ his craft, sae yere minds soud be airtit awa frae the aefauldness and purity that are for Christ.
4For gin ane comin brings ye anither Jesus, wham we brocht‐na, or ye receive anither Spirit wham ye hae‐na received, or anither Gude‐word that ye hae‐na welcomed — ye micht weel#11:4 Some render it “me.” But we tak the sense to be, that gin some ane could bring them a better Saviour and a better salvation than Paul had brocht, they wad do weel to tak it. thole him.
5For I reckon to hae come nane short oʼ the maist pre‐eminent Apostles.
6But, gin I war#11:6 Learned and eloquent as a Jew, but provincial and rustic iʼ the classic cities oʼ Greece. plain in my speech, yet no wantin in lear! but in aʼ ways we made it kent in aʼ things to you.
7Or, did I do wrang in loutin doon mysel that ye micht be heizʼt up, in giean to ye the Gude‐word for nocht?
8I took frae ither kirks, takin fees frae them that I soud serʼ you.
9And bein wiʼ you, and wantin, I wasna a burden tae ony man; for my lack the brethren frae Macedonia made up. And in aʼ things I keepit mysel frae bein a burden, and sae wull I keep mysel!
10Eʼen as the truth oʼ Christ is in me, iʼ this boastin I sanna be stoppit in aʼ the land oʼ Greece!
11Whaurfor? for that I loʼe‐ye‐na? God kens better!
12But, as I am doin, I wull do, that I may sned aff occasion frae thae wha seek for occasion; that in what they glorie they be fund eʼen as we are.
13For sic men are fause apostles, deceitfuʼ workers, cheengin theirsels intil Apostles oʼ Christ.
14And nae ferlie, for Sautan his sel is cheengin his sel intil an Angel oʼ licht.
15Nae unco ferlie, than, gin his servants, too, are cheengin theirsels as servants oʼ richtousness: whase end sal be eʼen as their warks are.
16And mair: lat nae ane tak me to be glaikit; but eʼen sae, as a glaikit ane bid me come ben, that I too may boast mysel a wee.
17What I am sayin I am‐na sayin eftir the Lord; but as in havers, in this confidence oʼ boastin.
18Sinʼ mony boast theirsels iʼ the flesh, I wull boast as weel.
19For ye thole fules withoot murmurin, bein wyss yersels.
20For ye thole ane wha is makin bondmen oʼ ye — wha is devoorin ye, wha is reivin frae ye — wha is magnifyin his sel — wha is baffin ye on the face.
21I speak by way oʼ lichtliean, as gin we war feckless. But whaur ony ane is bauld (I am speakin in a haverin way) I am bauld too!
22“Hebrews” are they? I as weel! “Israʼlites” are they? I as weel!
23“Servitors oʼ Christ” are they? (As ane daft I am talkin,) I eʼen mair! In toils mair abundant; in imprisonments muckle mair abundant; in stripes ayont coontin; in deaths aft.
24Frae Jews, fyve times did I hae the “forty‐save‐ane.”
25Thrice was I cloured wiʼ rods; ance staned; thrice ship‐wrackʼt; a day and a nicht hae I spent iʼ the deep:
26In journeyins aft; in perils oʼ rivers; in perils oʼ robbers; in perils frae my ain folk; in perils ʼmang fremʼd folk; in perils iʼ the citie; in perils iʼ the desert; in perils iʼ the sea; in perils ʼmang fause brethren.
27In labor and distress; in watchins aft; in hungʼer and drouth; in fastins aft; in cauld and nakitness.
28And forby the things left oot, that whilk comes on me day by day — to tent aʼ the Kirks.
29Wha is weak, and am‐na I? Wha is bein snared, and am‐na I burnin?
30Gin ane maun boast, oʼ the things I am weak in wull I boast.
31The God and Faither oʼ the Lord Jesus — he wha is blessed for aye — kens that I speak‐na fausely.
32In Damascus, the native Governor ʼneath Aretas the king, was gairdin the citie oʼ the Damascenes to grip me.
33And throwe a winnock was I loutit doon in a creel#11:33 Tak ye tent hoo Paul, eftir aʼ his toils and dangers, ends wiʼ this oʼ bein smugglʼt throwe the waʼ oʼ the citie, and loutit doon in a creel, as gin it was the bitterest degradation oʼ his life! Fair faʼ the honest hauns that held the tow! maist like they war weemen! by the waʼ, and escapit his hauns.
Currently Selected:
2 Corinthians 11: SCO1904
Highlight
Share
Copy
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
