Abharuumi 8

Abhakumi mbaghukangatu na Akörö Ahörëëru

1Mbe, ibheere Eryobha retaakobharööna abhaato bhano bhaghöötiine na Kirisito Yesu. 2Gho nchëra e ghughöötana na Kirisito Yesu, changuru che Körö Ahörëëru chino chekurëëta obhuhöru bho miishe ghyose, ncheghontoori koruusibhu koru mo‑kibhöhö ke masari, kubha netighe ghukangatu na changuru che masari no oroko. 3Emeghiro ghe Musa ghetaare na changuru che ghototoora huuru, gho ghiri e simoka yiito e masari. Amare emeghiro ghiyo kino ghetaatoriri ghuköra, Eryobha ꞉ndiiköriri. ꞉Ndeetomiri Omoona waache omwene chiri, ache ghokwito mo‑se ino, anyi omooto kinya itu bhano toonyi na amasari, kubha abhe eriruusi gho ghiri e masari ghiito. Gho nchëra iyo, rekamutëma anchagho gho ghiri e masari gha bhaato. 4Eryobha ꞉ndiiköriri hangʼu, kubha amangʼana ghoose gha bhuhëënë ghano ghakwëndëru mo‑meghiro ghahikeeranu na Yesu gho ghiri yiito. Itu ntoghukangatu na Akörö Ahörëëru, na totaaghukangatu wiiki na simoka yiito e masari. 5Abhaato bhano bhaghukangatu na simoka yaabho e masari, obhongo bhoobho mbosiighiri ghuköra amasari. Amare bhano bhaghukangatu na Akörö Ahörëëru, obhongo bhoobho mbosiighiri ghuköra amaköri ghano ghakoyetegheri Akörö Ahörëëru. 6Abhaato bhano amiihëëbhö ghaabho ghaghukangatu na simoka yaabho e masari, mbakubhöna oroko ro miishe ghyose. Amare abhaato bhano amiihëëbhö ghaabho ghahaakangatu na Akörö Ahörëëru, mbakubhöna obhuhöru no omurëmbë. 7Abhaato bhano bhaghukangatu na simoka yaabho e masari, bhayo n‑abhabhisa bha Ryobha. Bhataaghughööta emeghiro gheeche, bhataaghotora ghoghighööta. 8Gho ghayo, abhaato bhano bhaghukangatu na simoka yaabho e masari, bhataaghotora korichömëri Eryobha.

9Amare ibheere, inyu motaaghukangatu na simoka yaanyu e masari, amare moghukangatu na Akörö e Ryobha, gho kubha neghwikara moose yaanyu. Omooto wowoose uno ataanyi na Akörö e Kirisito,#8:9 Akörö e Kirisito niyo Akörö e Ryobha, hamu Akörö Ahörëëru. uyo taanyi omooto o Kirisito. 10Ibheere, Kirisito naghwikara moose yaanyu. Gho ghayo, koru aribha emebhere gheenyu gheeghoku kurëngʼaana na amasari, Akörö Ahörëëru nekobhaha obhuhöru, gho kubha Eryobha ndebhabhariire kubha abhaato bhano bhaanyi no obhuhëënë ambërë yaache. 11Akörö Ahörëëru ino eghwikara moose yaanyu, niyo Akörö e Ryobha ino emoryokiri Kirisito Yesu koru mo‑bhaku. Gho ghayo, Eryobha ndeghoghiha obhuhöru emebhere gheenyu ghino ghehaaku, gho changuru che Körö Ahörëëru ino eghwikara moose yaanyu.

12Gho ghayo, abhahiiri bhaane, itu teekwëndëru tumanye gho ghukangatu na simoka yiito e masari. 13Aribha moramanya gho ghukangatu na simoka e masari, mooghoku. Amare, moraanga kimu gho changuru che Körö Ahörëëru ghuköra amangʼana ghano simoka yaanyu e masari ekwënda mukörë, mokumanya emiishe ghyose.#8:13 Mööhi Abhagharatiya 6:8.

14Bhoose bhano bhaghukangatu na Akörö e Ryobha, bhayo nibho abhaana bha Ryobha. 15Eryobha retabhaheere Akörö Ahörëëru kubha mubhe abhasësë na kobhaköra moretiine wiiki, amare ndebhaheere Akörö Ahörëëru kubha mubhe abhaana bhaache. Gho Körö ntokorebherekera Eryobha “Abha,” egheteemoro keeche “Taata.” 16Akörö iyo ayeene nekuhëënëhi mo‑metema ghiito kubha, itu n‑abhaana bha Ryobha toonyi. 17Mbe, aribha itu n‑abhaana bha Ryobha toonyi, ntubheere abhaghabhi bhaache. Ntoghosongʼaana aghabho yiito haghirohamu na Kirisito. Amare kino ghekwëndëru ghokwito ibheere n‑kubha, tusange anyaako haghirohamu na Kirisito, kubha na niitu tusange haghirohamu nawe mo‑bhokumi bhooche obhokoro.

Eryobha ndekobhaghongi abhaana bhaache

18Anyaako yiito e riibhagha rino ri ibheere, eni nekorighi kubha taanyi egheghiro, nerayirëngʼaani no obhokumi obhokoro bhuno Eryobha rekuucha kwërëki ghokwito kwo riibhagha rino rekuucha. 19Ebheghiro bhyose bhino ꞉bhiitëëmuru, mbeghughanya kwo miigha chwee eriibhagha rino Eryobha rekuucha kwërëkani abhaana bhaache. 20Ebheghiro bhyose bhino ꞉bhiitëëmuru, mbiihiimuru kubha bhebhe. Taanyi kubha ebhyene mbyëndiri kubha hangʼu, amare n‑kinya bhuno Eryobha eryene ryëndiri.#8:20 Mööhi Simoka 3:17. Koru hangʼu, ndeenyi‑ho eriitëngʼërö, 21gho kubha mbeghotooribhu koru mo‑kibhöhö ghe ghusarëka no oroko. Hayo niho bhekuhaabhu obhohuuru bho bhokumi obhokoro bhuno Eryobha rekobhaha abhaana bhaache.

22Ntweche kubha, mbagha ibheere, ebheghiro bhyose bhino ꞉bhiitëëmuru mbekubhabhara kwo bhororo, kinya obhosongo bho mukari uno akwibhora. 23Wiiki, taanyi kubha n‑ebheghiro hangʼu hangʼu bhino bhekubhabhara, amare koru na niitu bhano tuhaabhuru Akörö Ahörëëru kubha tusame amachömu aghamu ghano tokuhaabhu, koru itu ntokubhabhara mo‑metema ghiito. Ntokubhabhara, gho kubha ntoghughanya chwee eriibhagha rino Eryobha reghotohikeerani kubha abhaana bhaache. Hayo niho Eryobha reghototingori gho ghotuha emebhere emihë. 24Eriitëngʼërö riyo, ntoonyi naryo korwera hano Eryobha retotooriri. Amare aribha toghwitëngʼëra egheghiro kino toghotora ghokerighi, riyo taanyi eriitëngʼërö. Kana, n‑niwe aghwitëngʼëra kuhaabhu egheghiro kino anyi nakyo? 25Amare toriitëngʼëra kuhaabhu egheghiro kino totaaghotora ghokerighi, niho toghoghumereri ghughanya, totaaghoku omukörö.

26Haghirohamu na ghayo, Akörö Ahörëëru niyo eghotusakeri mo‑bhutöbhu bhwito. Itu toteeche korisabha Eryobha kebhuno ekwëndëru, amare Akörö Ahörëëru ayeene niyo eghotusabhera kwo Ryobha kwo riiraka re macheeche ghano ghataaghotora ghughambu. 27Eryobha niryo rehiisuncha ghoose ghano ghaanyi mo‑metema ghiito, niryo ryeche amiihëëbhö gha Körö Ahörëëru, gho kubha Akörö iyo nekobhasabhera abhatööbhiyu bha Ryobha kinya bhuno Eryobha resiighiri.

28Ntweche kubha, mo‑ghoose Eryobha ndehaabhakörëra amachömu abhaato bhoose bhano bharesiighiri,#8:28 Eryobha ndehaabhakörëra amachömu abhaato bhoose bhano bharesiighiri. Egheteemoro ekende ngeghotora kubha, Amangʼana ghoose ngakurëëta amachömu kwo bhaato bhoose bhano bharesiighiri Eryobha, hamu Eryobha ndehaaköra amangʼana ghoose gho kurëëta amachömu kwo bhaato bhoose bhano bharesiighiri. bhano rebhabherekiire kurëngʼaana na amënda ghaache. 29Eryobha ꞉ndiimënyiri abhaato bhaache korwera hano ase ere ekeere ghutëëmu. Bhayo nibho Eryobha ꞉ryaahwire korwera kare bhabhe kinya Omoona waache Yesu Kirisito. ꞉Ndiiköriri hangʼu kubha Omoona waache abhe omutange ghate e bhahiiri bhaaru. 30Mbe, bhayo reere ryahwire, nibho bhano ꞉reebherekiire, na bhano ꞉reebherekiire, nibho bhano ꞉riibhariire kubha mbaanyi no obhuhëënë, na bhano ꞉riibhariire kubha mbaanyi no obhuhëënë, nibho bhano ꞉riiraghiire kubha ndekobhaha obhokumi obhokoro.

Abhakumi bhataaghotora ghutaanibhu no obhosiighi bho Ryobha

31Mbe, tobhughe ke ibheere ighoro e mangʼana ghayo? Aribha Eryobha reenyi eribhaara riito, n‑niwe uno aghotora ghotokinda? 32Eryobha retaamoroochiire ebheghongi Omoona waache omwene, amare ꞉ndeemoruusiri kubha aku gho ghiri yiito bhoose. Gho ghayo, aribha ꞉reemoruusiri Omoona waache gho ghiri yiito, hëënë koru orubhango rooche ndeghotoruuseri kohetera ghokooche! 33N‑niwe uno aghotora ghusëma abhaahöru bha Ryobha? Taanyi‑ho, gho kubha Eryobha eryene niryo rebhabhariire kubha m‑bha hëënë. 34Wiiki taanyi‑ho uno aghotora kobhatenera ekiina kubha m‑bha masari moonyi, gho kubha Kirisito Yesu, niwe akuure na koryoka koru mo‑bhaku. Wiiki niikeere eribhaara re kwiro re Ryobha, niwe aghotusabhera.

35N‑egheghiro ke kino gheghotora ghotutaani no obhosiighi bho Kirisito? Ghetaanyi‑ho! Koru nangabha toonyi mo‑nyaako inkoro, hamu amacheeche, na ntonganyaakibhu, hamu ntongatëmu na anchëra, ntongasuuheru amaghööti, na ntongatingʼi kobhori obhuhöru, hamu ghwitu, Kirisito nakwëndërëra ghotosiigha. 36N‑kinya bhuno Amandëkö Amatööbhiyu ghakobhugha kubha,

“Chaasiko choose ntokorighani no oroko,

gho kubha ntoghokuhökëri iye.

Ntoghukörëru kinya changʼöndu

chino chekohiru ghosinchu.”#8:36 Mööhi Sabhuri 44:22.

37Amare nangabha ghayo ghoose ghaghotubhöna, itu ntokeere toonyi no obhokindi bhokoro, gho kubha Kirisito natosiighiri. 38Nyeeche kwo bhuhëënë kubha ghetaanyi‑ho egheghiro kino gheghotora ghotutaani no obhosiighi bho Ryobha ghokwito. Taanyi oroko hamu obhuhöru, taanyi bhamarayika hamu bhano bhaanyi na changuru Mwishaaro. Koru amangʼana ghano ghakorwera kwi ibheere hamu mo‑riibhagha rino rekuucha, taanyi kwo bhano bhaanyi no obhotoro, 39hamu ghyokyose kino keenyi Mwishaaro hamu nyaari hamu ebhetyenyi bhe changuru, bhetaaghotora ghotutaani no obhosiighi bho Ryobha bhuno bhoonyi bho miishe ghyose. Obhosiighi bhuyo mbohunywiru ghokwito gho kohetera Kirisito Yesu, Omutëmi wiito.

Currently Selected:

Abharuumi 8: ntk

Highlight

Copy

Compare