Amaköri gha Bhatomu 23
23
1Niho Bhawuro akabhoomeri amiisho abhakoro bha riibharacha riyo akabhabhoorera akabhugha, “Oo bhahiiri bhaane, mbagha reero ino neghwiköngʼi chwee kubha no omotema omuchömu, etabha‑ho angʼana ino eghunkörëra chaasoni ambërë e Ryobha.” 2Omuchaama Omokoro Ananiya hano oghwire hangʼu, akabhabhoorera bhano ꞉bhaare bhiimeeriire haghuhe na Bhawuro kubha bhamutëmë orohe mo‑monu.
3Niho Bhawuro akamobhoorera Ananiya uyo akabhugha, “Eryobha ndeghoghutëma iye, uno onyi kinya eribhendo rino rihakuru anyeenyi! Kana nwikeere hano gho ghiri ontenere ekiina kurëngʼaana ne emeghiro, na niiye mwene noghusari emeghiro gho kobhugha kubha, nitëmu orohe!”
4Niho abhaato bhano ꞉bhaare bhiimeeriire rubhareka ro Bhawuro bhakamobhoorera bhakabhugha, “Kana tookorighi chaasoni komotoka Omuchaama Omokoro o Ryobha?” 5Bhawuro akabhagharokeri akabhugha, “Oo abhahiiri bhaane, ntimënyiri kubha iwe n‑Omuchaama Omokoro, gho kubha yandëkuru kubha, ‘Otabha orasiikëra kobhe ighoro e mukangati o bhaato bhaacho.’#23:5 Mööhi Kohoroka 22:28.”
6Hano Bhawuro amënyiri kubha ghate yaabho mbaanyi‑mu Amasatukaayo, na Mabharisaayo, aghatiiri amaraka ghaache mo‑riibharacha riyo, akabhugha, “Inyu abhahiiri bhaane, eni n‑Omubharisaayo neenyi, omoona o Mubharisaayo! Ghano ghaghughëri neteneru ekiina ne emeghiro, n‑gho kubha neghwitëngʼëra kubha, abhaku mbakoryoka.” 7Hano Bhawuro amariri ghosiikëra ghayo, haakabha ne erihakaana ghate e Mabharisaayo na Amasatukaayo, mbagha bhayo ꞉bhaare bhiikomiine hayo, bhaghataana amakinda abhere. 8(Amasatukaayo mbaare bharaanga kubha, abhaku bhataakoryoka, koru bhamarayika na chaakörö chetaanyi‑ho, amare Amabharisaayo ibho mbaghokumi kubha ghayo ghoose niho ghaanyi.)
9Niho haakabha ne eriireghe ikoro chwee ghate e bhakoro bhayo. Abheeghi abhamubha meghiro ghe tiini e Mabharisaayo, bhakiimeerera, bhaghashangʼaana bharabhugha, “Bhotaanyi‑ho bhobhe bhuno torooche kwo mooto uno. Hamwabhe n‑akörö, hamu marayika uno asiikiire nawe!” 10Abhakoro bhayo bha Bhayahuuti bhaghashangʼaana chwee na kurööna, mbagha omontomonkoro o bhaashirikare aghatiina kubha, mbaghotora komusambura Bhawuro ebhetenekateneka. Eghaghëri abhabhoorere abhaashirikare bhaache bhayo kubha, bhaghëndë bhamoruusi‑ho Bhawuro gho changuru ghateghate e Bhayahuuti bhayo, kubha bhamusöhi mo‑ribhancha reebho.
11Orosiko ruyo ruyo obhotiko, Omutëmi akiimeerera rubhareka ro Bhawuro, akamobhoorera akabhugha, “Nwitoore omukörö! Kinya ꞉onduusiiri obhwibhateri hano Yerusareemu, hangʼu hangʼu nokwëndëru onduuseri obhwibhateri mo‑moghya o Ruumi woose.”
Ekiina ghe komwita Bhawuro
12Hano bhookiire, Abhayahuuti abhande bhaghaköra ekiina kebhe ighoro e Bhawuro. Bhaghatoora eriiraheri kubha, bhataakuraaghëra na bhataakunyo egheghiro ghyokyose mbagha bhamwite Bhawuro. 13Bhayo bhaköriri ekiina kiyo, mbaare bharakera abhaato miröngö ene. 14Mbe, bhakabhasëëta abhakoro bha bhachaama na abhagharuka bha Bhayahuuti, bhakabhabhoorera, “Nturahiiri kubha, totaaghusama ghyokyose, mbagha tomwite Bhawuro. 15Mbe, gho ghayo, inyu haghirohamu na abhakoro abhaghëndi bhaanyu momusabhe omontomonkoro o bhaashirikare abharëëtërë Bhawuro. Mwiköri kinya mokwënda kumënya bhoheene amangʼana ghano asëmiiru, na niitu ntookubha tobhumiire mo‑nchëra, kubha hano akoheta tomwite, akeere kohika hano.”
16Amare omoona mwiho o Bhawuro akabha oghwire amangʼana ghayo! Eghaghëri aghi mwibhancha riyo re bhaashirikare komobhoorera nyinarome. 17Niho Bhawuro akamobherekera omokoro umu o bhaashirikare bhayo, akamobhoorera akabhugha, “Nomohire omobhureni uno kwo montomonkoro waanyu, gho kubha naanyi na angʼana ekomobhoorera.”
18Omoshirikare uyo akamohira omobhureni uyo kwo montomonkoro waabho, akamobhoorera, “Omubhöhu wuure Bhawuro namberekiire, aghansabha kubha nekurëëtërë omobhureni uno, ango naanyi na angʼana e ghokobhoorera.”
19Omontomonkoro uyo o bhaashirikare akamughööta omobhureni uyo okubhökö, akamohira rubhareka hasuuhu, akamobhoori, “N‑angʼana ke onyi nayo okwënda komboorera?” 20Omobhureni uyo akamugharokeri akabhugha, “Abhayahuuti mbaköriri ekiina kubha, tabhoori mbaghoghusabha obharëëtërë Bhawuro ambërë e riibharacha reebho eriikoro. Mbaghokongʼiina kubha mbakwënda kumënya amangʼana ghano asëmiiru. 21Ibheere iye otabhiisherereri, gho kubha, mbaanyi‑ho Abhayahuuti ghokera miröngö ene mbakomobhuumara Bhawuro mo‑nchëra, hano akubha araheta bhamwite. Mbarahiiri kubha, mbagha ghoku bhataakuraaghëra koru kunyo, aribha bhakeere komwita Bhawuro. Ibheere mbiisëëmiri, mbaghughanya eriisabhi reebho obhiisherereri.” 22Niho omontomonkoro uyo o bhaashirikare akamobhoorera omobhureni uyo akabhugha, “Otabhoorera omooto wowoose kubha, nombooriire angʼana ino!” Omontomonkoro uyo akamotigha aghaye.
Bhawuro ˆakahiru kwo mukangati Bheriki
23Akamara omontomonkoro uyo o bhaashirikare akabhabherekera abhakoro bhabhere bhano bhaanyi haase yaache, akabhabhoorera, “Musëëmë abhaashirikare amaghana abhere bhano bhaaghuye kwo maghoro, haghirohamu na abhande miröngö mohungate bhano bhaaghuye gho chabharaasi, na abhande amaghana abhere bhano bhaaghuye bhaanyi na amatimo. Bhoose bhayo mbaakoru hano mo‑chaasa ishato che bhotiko, gho ghiri bhaghëndë mo‑moghya o Kayisaariya. 24Bhawuro woose ahaabhu abharaasi yaache, momohire bhoheene mbagha kwo mukangati Bheriki.”
25Omontomonkoro uyo o bhaashirikare akaandëka na anyaarubha ino ekobhugha kubha,
26“Iye omosooku omukangati Bheriki, eni Kirawutiyo Risiya neghoghukëëri.
27Omooto uno naghööturu na Abhayahuuti, bhakëënda kubha bhamwite. Hano nimënyiri kubha n‑Omoruumi, nekahira abhaashirikare bhaane hano anyi, nekamotoori. 28Nëkëënda kumënya kino Abhayahuuti bhayo bhamusëmiire, eghaghëri nemohire ambërë e riibharacha reebho eriikoro. 29Nekarighi kubha naghusëmu kwo mangʼana ghano ghaanyi ighoro e meghiro gheebho. Mo‑ghano asëmuru nagho, teenyi‑ho angʼana yoyoose ino engaghëriri aku, koru kubhöhu. 30Hano nebhooriiru kubha nkeenyi‑ho ekiina kebhe ighoro yaache, eghaghëri nikörë bhwango nemurëëtë iyo ghokoocho. Nekabhabhoorera abhasëmi bhaache kubha iyo niho bhamusëmërë.”
31Niho abhaashirikare bhayo bhakamwimoki Bhawuro kinya bhuure ꞉bhaabhooriiru, bhakamohira obhotiko bhuyo bhuyo mbagha mo‑moghya o Antibhaatiri. 32Hano bhookiire, abhaashirikare bhano ꞉bhaare bharaghënda ro maghoro bhaghagharuka mo‑ribhancha reebho, bhakabhatigha abhaghëndi bhaabho bhano ꞉bhaare na chabharaasi bhamohire Bhawuro. 33Hano abhaghëndi bhaabho bhayo bhahikiri mo‑moghya o Kayisaariya, bhakamuha mukangati uyo anyaarubha, bhakamuhaana na Bhawuro. 34Hano amariri ghusöma anyaarubha iyo, akabhabhoori, “Omooto uno n‑o se ke?” Hano bhamobhooriire kubha Bhawuro n‑o mo‑mukööwa o Kirikiya, 35akamobhoorera Bhawuro akabhugha, “Amangʼana ghaacho, neghoghatëghëërëra hano abhasëmi bhaacho bhakohika hano.” Mbe, omukangati uyo akahatëka kubha Bhawuro achongu mwighërëcha rino reenyi mo‑nyumba e ghitëmi ino ꞉yaabhëkuru na Herote Omokoro.
Currently Selected:
Amaköri gha Bhatomu 23: ntk
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved
Amaköri gha Bhatomu 23
23
1Niho Bhawuro akabhoomeri amiisho abhakoro bha riibharacha riyo akabhabhoorera akabhugha, “Oo bhahiiri bhaane, mbagha reero ino neghwiköngʼi chwee kubha no omotema omuchömu, etabha‑ho angʼana ino eghunkörëra chaasoni ambërë e Ryobha.” 2Omuchaama Omokoro Ananiya hano oghwire hangʼu, akabhabhoorera bhano ꞉bhaare bhiimeeriire haghuhe na Bhawuro kubha bhamutëmë orohe mo‑monu.
3Niho Bhawuro akamobhoorera Ananiya uyo akabhugha, “Eryobha ndeghoghutëma iye, uno onyi kinya eribhendo rino rihakuru anyeenyi! Kana nwikeere hano gho ghiri ontenere ekiina kurëngʼaana ne emeghiro, na niiye mwene noghusari emeghiro gho kobhugha kubha, nitëmu orohe!”
4Niho abhaato bhano ꞉bhaare bhiimeeriire rubhareka ro Bhawuro bhakamobhoorera bhakabhugha, “Kana tookorighi chaasoni komotoka Omuchaama Omokoro o Ryobha?” 5Bhawuro akabhagharokeri akabhugha, “Oo abhahiiri bhaane, ntimënyiri kubha iwe n‑Omuchaama Omokoro, gho kubha yandëkuru kubha, ‘Otabha orasiikëra kobhe ighoro e mukangati o bhaato bhaacho.’#23:5 Mööhi Kohoroka 22:28.”
6Hano Bhawuro amënyiri kubha ghate yaabho mbaanyi‑mu Amasatukaayo, na Mabharisaayo, aghatiiri amaraka ghaache mo‑riibharacha riyo, akabhugha, “Inyu abhahiiri bhaane, eni n‑Omubharisaayo neenyi, omoona o Mubharisaayo! Ghano ghaghughëri neteneru ekiina ne emeghiro, n‑gho kubha neghwitëngʼëra kubha, abhaku mbakoryoka.” 7Hano Bhawuro amariri ghosiikëra ghayo, haakabha ne erihakaana ghate e Mabharisaayo na Amasatukaayo, mbagha bhayo ꞉bhaare bhiikomiine hayo, bhaghataana amakinda abhere. 8(Amasatukaayo mbaare bharaanga kubha, abhaku bhataakoryoka, koru bhamarayika na chaakörö chetaanyi‑ho, amare Amabharisaayo ibho mbaghokumi kubha ghayo ghoose niho ghaanyi.)
9Niho haakabha ne eriireghe ikoro chwee ghate e bhakoro bhayo. Abheeghi abhamubha meghiro ghe tiini e Mabharisaayo, bhakiimeerera, bhaghashangʼaana bharabhugha, “Bhotaanyi‑ho bhobhe bhuno torooche kwo mooto uno. Hamwabhe n‑akörö, hamu marayika uno asiikiire nawe!” 10Abhakoro bhayo bha Bhayahuuti bhaghashangʼaana chwee na kurööna, mbagha omontomonkoro o bhaashirikare aghatiina kubha, mbaghotora komusambura Bhawuro ebhetenekateneka. Eghaghëri abhabhoorere abhaashirikare bhaache bhayo kubha, bhaghëndë bhamoruusi‑ho Bhawuro gho changuru ghateghate e Bhayahuuti bhayo, kubha bhamusöhi mo‑ribhancha reebho.
11Orosiko ruyo ruyo obhotiko, Omutëmi akiimeerera rubhareka ro Bhawuro, akamobhoorera akabhugha, “Nwitoore omukörö! Kinya ꞉onduusiiri obhwibhateri hano Yerusareemu, hangʼu hangʼu nokwëndëru onduuseri obhwibhateri mo‑moghya o Ruumi woose.”
Ekiina ghe komwita Bhawuro
12Hano bhookiire, Abhayahuuti abhande bhaghaköra ekiina kebhe ighoro e Bhawuro. Bhaghatoora eriiraheri kubha, bhataakuraaghëra na bhataakunyo egheghiro ghyokyose mbagha bhamwite Bhawuro. 13Bhayo bhaköriri ekiina kiyo, mbaare bharakera abhaato miröngö ene. 14Mbe, bhakabhasëëta abhakoro bha bhachaama na abhagharuka bha Bhayahuuti, bhakabhabhoorera, “Nturahiiri kubha, totaaghusama ghyokyose, mbagha tomwite Bhawuro. 15Mbe, gho ghayo, inyu haghirohamu na abhakoro abhaghëndi bhaanyu momusabhe omontomonkoro o bhaashirikare abharëëtërë Bhawuro. Mwiköri kinya mokwënda kumënya bhoheene amangʼana ghano asëmiiru, na niitu ntookubha tobhumiire mo‑nchëra, kubha hano akoheta tomwite, akeere kohika hano.”
16Amare omoona mwiho o Bhawuro akabha oghwire amangʼana ghayo! Eghaghëri aghi mwibhancha riyo re bhaashirikare komobhoorera nyinarome. 17Niho Bhawuro akamobherekera omokoro umu o bhaashirikare bhayo, akamobhoorera akabhugha, “Nomohire omobhureni uno kwo montomonkoro waanyu, gho kubha naanyi na angʼana ekomobhoorera.”
18Omoshirikare uyo akamohira omobhureni uyo kwo montomonkoro waabho, akamobhoorera, “Omubhöhu wuure Bhawuro namberekiire, aghansabha kubha nekurëëtërë omobhureni uno, ango naanyi na angʼana e ghokobhoorera.”
19Omontomonkoro uyo o bhaashirikare akamughööta omobhureni uyo okubhökö, akamohira rubhareka hasuuhu, akamobhoori, “N‑angʼana ke onyi nayo okwënda komboorera?” 20Omobhureni uyo akamugharokeri akabhugha, “Abhayahuuti mbaköriri ekiina kubha, tabhoori mbaghoghusabha obharëëtërë Bhawuro ambërë e riibharacha reebho eriikoro. Mbaghokongʼiina kubha mbakwënda kumënya amangʼana ghano asëmiiru. 21Ibheere iye otabhiisherereri, gho kubha, mbaanyi‑ho Abhayahuuti ghokera miröngö ene mbakomobhuumara Bhawuro mo‑nchëra, hano akubha araheta bhamwite. Mbarahiiri kubha, mbagha ghoku bhataakuraaghëra koru kunyo, aribha bhakeere komwita Bhawuro. Ibheere mbiisëëmiri, mbaghughanya eriisabhi reebho obhiisherereri.” 22Niho omontomonkoro uyo o bhaashirikare akamobhoorera omobhureni uyo akabhugha, “Otabhoorera omooto wowoose kubha, nombooriire angʼana ino!” Omontomonkoro uyo akamotigha aghaye.
Bhawuro ˆakahiru kwo mukangati Bheriki
23Akamara omontomonkoro uyo o bhaashirikare akabhabherekera abhakoro bhabhere bhano bhaanyi haase yaache, akabhabhoorera, “Musëëmë abhaashirikare amaghana abhere bhano bhaaghuye kwo maghoro, haghirohamu na abhande miröngö mohungate bhano bhaaghuye gho chabharaasi, na abhande amaghana abhere bhano bhaaghuye bhaanyi na amatimo. Bhoose bhayo mbaakoru hano mo‑chaasa ishato che bhotiko, gho ghiri bhaghëndë mo‑moghya o Kayisaariya. 24Bhawuro woose ahaabhu abharaasi yaache, momohire bhoheene mbagha kwo mukangati Bheriki.”
25Omontomonkoro uyo o bhaashirikare akaandëka na anyaarubha ino ekobhugha kubha,
26“Iye omosooku omukangati Bheriki, eni Kirawutiyo Risiya neghoghukëëri.
27Omooto uno naghööturu na Abhayahuuti, bhakëënda kubha bhamwite. Hano nimënyiri kubha n‑Omoruumi, nekahira abhaashirikare bhaane hano anyi, nekamotoori. 28Nëkëënda kumënya kino Abhayahuuti bhayo bhamusëmiire, eghaghëri nemohire ambërë e riibharacha reebho eriikoro. 29Nekarighi kubha naghusëmu kwo mangʼana ghano ghaanyi ighoro e meghiro gheebho. Mo‑ghano asëmuru nagho, teenyi‑ho angʼana yoyoose ino engaghëriri aku, koru kubhöhu. 30Hano nebhooriiru kubha nkeenyi‑ho ekiina kebhe ighoro yaache, eghaghëri nikörë bhwango nemurëëtë iyo ghokoocho. Nekabhabhoorera abhasëmi bhaache kubha iyo niho bhamusëmërë.”
31Niho abhaashirikare bhayo bhakamwimoki Bhawuro kinya bhuure ꞉bhaabhooriiru, bhakamohira obhotiko bhuyo bhuyo mbagha mo‑moghya o Antibhaatiri. 32Hano bhookiire, abhaashirikare bhano ꞉bhaare bharaghënda ro maghoro bhaghagharuka mo‑ribhancha reebho, bhakabhatigha abhaghëndi bhaabho bhano ꞉bhaare na chabharaasi bhamohire Bhawuro. 33Hano abhaghëndi bhaabho bhayo bhahikiri mo‑moghya o Kayisaariya, bhakamuha mukangati uyo anyaarubha, bhakamuhaana na Bhawuro. 34Hano amariri ghusöma anyaarubha iyo, akabhabhoori, “Omooto uno n‑o se ke?” Hano bhamobhooriire kubha Bhawuro n‑o mo‑mukööwa o Kirikiya, 35akamobhoorera Bhawuro akabhugha, “Amangʼana ghaacho, neghoghatëghëërëra hano abhasëmi bhaacho bhakohika hano.” Mbe, omukangati uyo akahatëka kubha Bhawuro achongu mwighërëcha rino reenyi mo‑nyumba e ghitëmi ino ꞉yaabhëkuru na Herote Omokoro.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved