Amaköri gha Bhatomu 22
22
1Bhawuro akabhugha, “Bhahiiri bhaane na bhataata, muntëghëërërë hano neekubha neriitachura ambërë yaanyu!” 2Abhaato bhayo, hano bhooghwire kubha Bhawuro naghosiikëra mo‑ghighambo keebho ghe Kebhuraaniya, bhaghakira kiri, Bhawuro akëëndërëra kobhabhoorera arabhugha, 3“Eni n‑Omuyahuuti neenyi, omwibhoru o moghya o Taaso mo‑mukööwa o Kirikiya, amare ꞉niireriiru hano Yerusareemu. Ghamariyeeri niwe anyeeghiri bhoheene emeghiro ghyose ghino tootighiiru na bhasookoro bhiito. Neere ndiköngʼi chwee kwo Waryobha, kinya na niinyu bhoose moghwiköngʼi reero.
4“Kwo ribhaara re bhaghëndi bha Yesu, neere nerabhanyaaki chwee, abhasubhe na abhakari, neere nerabhaghööta na kobharëkëra mwighërëcha, koru abhande ghate yaabho neekabha nerabhiita. 5Ghayo ˆnekabhabhoorera inyu, koru Omuchaama Omokoro haghirohamu na abhakoro bhaghëndi bhaache bhoose mbaghwishererani nagho. Abhakoro bhayo nibho bhaheere anyaarubha e kobhahirera Abhayahuuti bhaghëndi bhiito bha mo‑moghya o Tamaasiko, gho ghiri nerahika iyo, nebhabhöhë Abhakirisito bha iyo, nebharëëtë hano Yerusareemu, bhateneru ekiina.
6“Mbe, kinya mo‑chaasa ishaasabhe che mwishe, neekabha ˆneghatingʼi kohika hayo Tamaasiko. Hayo hayo obhwero bhuhaari koru Mwishaaro bhokandëngaari chambaara choose.
7“Niho neghagho haase, nekooghu eriiraka reramboorera ‘Oo Sawuri! Oo Sawuri! Ngwake okunyaaki?’ 8Niho nekabhoori, ‘Oo Omutëmi, iye niiye we?’ Aghangarokeri, ‘Eni neeni Yesu o Nasareeti, uno iye okunyaaki.’ 9Abhaghëndi bhaane bhano ꞉tuuköriri orughëndö haghirohamu nabho bhakarighi obhwero bhuyo, amare eriiraka riyo, bhataryoghwire. 10Mbe, eni nekabhoori, ‘Oo Omutëmi, nikörë ke?’ Aghangarokeri, ‘Imeerera! Usöhë Tamaasiko. Hayo niho okobhooreru bhoheene omoremo uno Eryobha rekwënda ukörë.’ 11Kwo riibhagha riyo neekabha ntaakorighi, gho kubha obhwero bhuyo m‑bhuhaari bhoore bhokahukuri amiisho. Ibheere, abhaghëndi bhaane bhaghangööta okubhökö, bhakandahuuna bhakaahiki Tamaasiko.
12“Hayo Tamaasiko naare‑ho omooto umu, eriina reeche Ananiya. Ananiya uyo naare ariiköngʼi chwee ghosooka emeghiro ghiito, wiiki naare araghongibhu na Abhayahuuti bhoose bha iyo kubha n‑omooto omuhöriicho. 13Aghansëëta akiimeerera rubhareka roone, akamboorera ‘Oo omohiiri waane Sawuri, otore korighi wiiki!’ Hayo hayo amiisho ghaane ghakarighi wiiki, nekamumööhërëri.
14“Akamboorera, ‘Eryobha re bhasookoro bhiito ndekwahwire, gho ghiri umënyë amiigha ghaache, na wirigheri Yesu uno anyi omuhëënë ambërë yaache, na koritëghëërëra eriiraka reeche omwene. 15Ghoose ghano orooche na ghano woghwire, nookubha orabhabhoorera abhaato bhoose, gho kubha nookubha omwibhateri waache. 16Ibheere neke oghughanya? Imeerera! Ubhatiisu, usabhe Eryobha reghotoori, rekwabhërë amasari ghaacho.’
17“Nekamara neghagharuka Yerusareemu. Hano neere nerasabha Eryobha Mwisëngërö, nekarighi amarighi. 18Mo‑marighi ghayo, nekarighi Omutëmi aramboorera arabhugha, ‘Ukörë bhwango oru Yerusareemu, gho kubha obhwibhateri bhuno okubha oraruusi ighoro yaane, abhaato bha moghya uno bhataakobhokumi.’
19“Eni nekaanga nekamugharokeri, ‘Oo Omutëmi, abhaato bhano mbeeche bhoheene kubha, neere neraheta mo‑masinaghooghi ghaabho nerabhaghööta bhano bhaghoghokumi! Bhoose bhano neere neratëmëërana nabho, neekabha nerabhabhöha, na kobharööna chwee. 20Koru hano bhaare bharamwita omwibhateri waacho Siteebhano, eni woose neere niisheriiri kubha itu. ꞉Niimeeriire haghuhe, na ghochonga amaghööti gha bhaare ꞉bhaare bharamwita.’ 21Nawe Omutëmi aghangarokeri, ‘Nooghi, gho kubha neghoghotoma oghi kurë mo‑bhaato bha matöngö.’”
22Amangʼana ghayo gha Bhawuro, abhaato bhayo mbaare bharaghatëghëërëra bhoheene. Amare hano asiikiire ghayo amarereriiri, hayo hayo bhaghasëëma ghuköra eriireghe bharabhugha, “Omooto uno taakwëndëru mo‑se! Taakurëngʼaanera obhuhöru!” 23Abhaato bhayo bhakëëndërëra ghuköra riireghe ino bharahonga amaghööti ghaabho. Wiiki bhaakabha bharamusa orotu ighoro. 24Hayo hayo omontomonkoro uyo o bhaashirikare akabhabhoorera abhaashirikare bhaache kubha bhamusöhi Bhawuro mo‑rwakyo roobho, na bhamutëmë emicharicho, kubha abhabhoorere kino ghighëriri abhaato bhayo bhamukörërë riireghe. 25Hano abhaashirikare bhayo ꞉bhaare bharamubhöha Bhawuro gho ghiri bhamutëmë emicharicho, akamobhoori omokoro waabho uno are imeeriire hayo akabhugha, “Kana emeghiro gheenyu ngeghwishereri komutëma Omoruumi, akeere ataamara ateneru ekiina?”
26Omokoro uyo hano oghwire hangʼu, aghaye akamobhoorera omontomonkoro waabho, “Omooto uyo, kana n‑Omoruumi! Mbe! Kana neke okwënda ghuköra?” 27Hayo hayo omontomonkoro waabho uyo akahika o‑Bhawuro, akamobhoori, “Nomboorere, iye n‑Omoruumi onyi?” Bhawuro akamugharokeri akabhugha, “Hee.” 28Omontomonkoro uyo akabhugha, “Eni nibheere Omoruumi gho koruusi ebheghiro bhyaru chwee.” Bhawuro akamugharokeri akabhugha, “Eni n‑Omoruumi neenyi o kwibhoru.”
29Hayo hayo abhaashirikare bhayo ꞉bhaare bharëënda bhamutëmë Bhawuro bhakamotigha. Omontomonkoro waabho uyo woose aghatiina chwee kooghu kubha Bhawuro n‑Omoruumi, gho kubha naare amariri komubhöha ne eminyörörö.
Bhawuro ˆakahiru ambërë e riibharacha
30Omokoro o bhaashirikare ꞉nëëndiri amënyë obhuhëënë kino ghighëriri Bhawuro asëmu na Abhayahuuti bhayo. Mbe, hano bhookiire akamusaasura Bhawuro, akahatëka kubha abhakoro bha bhachaama bhiikomane haghirohamu ne eriibharacha eriikoro re Bhayahuuti. Akamara akamurëëta Bhawuro, akamwimeereri ambërë yaabho.
Currently Selected:
Amaköri gha Bhatomu 22: ntk
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved
Amaköri gha Bhatomu 22
22
1Bhawuro akabhugha, “Bhahiiri bhaane na bhataata, muntëghëërërë hano neekubha neriitachura ambërë yaanyu!” 2Abhaato bhayo, hano bhooghwire kubha Bhawuro naghosiikëra mo‑ghighambo keebho ghe Kebhuraaniya, bhaghakira kiri, Bhawuro akëëndërëra kobhabhoorera arabhugha, 3“Eni n‑Omuyahuuti neenyi, omwibhoru o moghya o Taaso mo‑mukööwa o Kirikiya, amare ꞉niireriiru hano Yerusareemu. Ghamariyeeri niwe anyeeghiri bhoheene emeghiro ghyose ghino tootighiiru na bhasookoro bhiito. Neere ndiköngʼi chwee kwo Waryobha, kinya na niinyu bhoose moghwiköngʼi reero.
4“Kwo ribhaara re bhaghëndi bha Yesu, neere nerabhanyaaki chwee, abhasubhe na abhakari, neere nerabhaghööta na kobharëkëra mwighërëcha, koru abhande ghate yaabho neekabha nerabhiita. 5Ghayo ˆnekabhabhoorera inyu, koru Omuchaama Omokoro haghirohamu na abhakoro bhaghëndi bhaache bhoose mbaghwishererani nagho. Abhakoro bhayo nibho bhaheere anyaarubha e kobhahirera Abhayahuuti bhaghëndi bhiito bha mo‑moghya o Tamaasiko, gho ghiri nerahika iyo, nebhabhöhë Abhakirisito bha iyo, nebharëëtë hano Yerusareemu, bhateneru ekiina.
6“Mbe, kinya mo‑chaasa ishaasabhe che mwishe, neekabha ˆneghatingʼi kohika hayo Tamaasiko. Hayo hayo obhwero bhuhaari koru Mwishaaro bhokandëngaari chambaara choose.
7“Niho neghagho haase, nekooghu eriiraka reramboorera ‘Oo Sawuri! Oo Sawuri! Ngwake okunyaaki?’ 8Niho nekabhoori, ‘Oo Omutëmi, iye niiye we?’ Aghangarokeri, ‘Eni neeni Yesu o Nasareeti, uno iye okunyaaki.’ 9Abhaghëndi bhaane bhano ꞉tuuköriri orughëndö haghirohamu nabho bhakarighi obhwero bhuyo, amare eriiraka riyo, bhataryoghwire. 10Mbe, eni nekabhoori, ‘Oo Omutëmi, nikörë ke?’ Aghangarokeri, ‘Imeerera! Usöhë Tamaasiko. Hayo niho okobhooreru bhoheene omoremo uno Eryobha rekwënda ukörë.’ 11Kwo riibhagha riyo neekabha ntaakorighi, gho kubha obhwero bhuyo m‑bhuhaari bhoore bhokahukuri amiisho. Ibheere, abhaghëndi bhaane bhaghangööta okubhökö, bhakandahuuna bhakaahiki Tamaasiko.
12“Hayo Tamaasiko naare‑ho omooto umu, eriina reeche Ananiya. Ananiya uyo naare ariiköngʼi chwee ghosooka emeghiro ghiito, wiiki naare araghongibhu na Abhayahuuti bhoose bha iyo kubha n‑omooto omuhöriicho. 13Aghansëëta akiimeerera rubhareka roone, akamboorera ‘Oo omohiiri waane Sawuri, otore korighi wiiki!’ Hayo hayo amiisho ghaane ghakarighi wiiki, nekamumööhërëri.
14“Akamboorera, ‘Eryobha re bhasookoro bhiito ndekwahwire, gho ghiri umënyë amiigha ghaache, na wirigheri Yesu uno anyi omuhëënë ambërë yaache, na koritëghëërëra eriiraka reeche omwene. 15Ghoose ghano orooche na ghano woghwire, nookubha orabhabhoorera abhaato bhoose, gho kubha nookubha omwibhateri waache. 16Ibheere neke oghughanya? Imeerera! Ubhatiisu, usabhe Eryobha reghotoori, rekwabhërë amasari ghaacho.’
17“Nekamara neghagharuka Yerusareemu. Hano neere nerasabha Eryobha Mwisëngërö, nekarighi amarighi. 18Mo‑marighi ghayo, nekarighi Omutëmi aramboorera arabhugha, ‘Ukörë bhwango oru Yerusareemu, gho kubha obhwibhateri bhuno okubha oraruusi ighoro yaane, abhaato bha moghya uno bhataakobhokumi.’
19“Eni nekaanga nekamugharokeri, ‘Oo Omutëmi, abhaato bhano mbeeche bhoheene kubha, neere neraheta mo‑masinaghooghi ghaabho nerabhaghööta bhano bhaghoghokumi! Bhoose bhano neere neratëmëërana nabho, neekabha nerabhabhöha, na kobharööna chwee. 20Koru hano bhaare bharamwita omwibhateri waacho Siteebhano, eni woose neere niisheriiri kubha itu. ꞉Niimeeriire haghuhe, na ghochonga amaghööti gha bhaare ꞉bhaare bharamwita.’ 21Nawe Omutëmi aghangarokeri, ‘Nooghi, gho kubha neghoghotoma oghi kurë mo‑bhaato bha matöngö.’”
22Amangʼana ghayo gha Bhawuro, abhaato bhayo mbaare bharaghatëghëërëra bhoheene. Amare hano asiikiire ghayo amarereriiri, hayo hayo bhaghasëëma ghuköra eriireghe bharabhugha, “Omooto uno taakwëndëru mo‑se! Taakurëngʼaanera obhuhöru!” 23Abhaato bhayo bhakëëndërëra ghuköra riireghe ino bharahonga amaghööti ghaabho. Wiiki bhaakabha bharamusa orotu ighoro. 24Hayo hayo omontomonkoro uyo o bhaashirikare akabhabhoorera abhaashirikare bhaache kubha bhamusöhi Bhawuro mo‑rwakyo roobho, na bhamutëmë emicharicho, kubha abhabhoorere kino ghighëriri abhaato bhayo bhamukörërë riireghe. 25Hano abhaashirikare bhayo ꞉bhaare bharamubhöha Bhawuro gho ghiri bhamutëmë emicharicho, akamobhoori omokoro waabho uno are imeeriire hayo akabhugha, “Kana emeghiro gheenyu ngeghwishereri komutëma Omoruumi, akeere ataamara ateneru ekiina?”
26Omokoro uyo hano oghwire hangʼu, aghaye akamobhoorera omontomonkoro waabho, “Omooto uyo, kana n‑Omoruumi! Mbe! Kana neke okwënda ghuköra?” 27Hayo hayo omontomonkoro waabho uyo akahika o‑Bhawuro, akamobhoori, “Nomboorere, iye n‑Omoruumi onyi?” Bhawuro akamugharokeri akabhugha, “Hee.” 28Omontomonkoro uyo akabhugha, “Eni nibheere Omoruumi gho koruusi ebheghiro bhyaru chwee.” Bhawuro akamugharokeri akabhugha, “Eni n‑Omoruumi neenyi o kwibhoru.”
29Hayo hayo abhaashirikare bhayo ꞉bhaare bharëënda bhamutëmë Bhawuro bhakamotigha. Omontomonkoro waabho uyo woose aghatiina chwee kooghu kubha Bhawuro n‑Omoruumi, gho kubha naare amariri komubhöha ne eminyörörö.
Bhawuro ˆakahiru ambërë e riibharacha
30Omokoro o bhaashirikare ꞉nëëndiri amënyë obhuhëënë kino ghighëriri Bhawuro asëmu na Abhayahuuti bhayo. Mbe, hano bhookiire akamusaasura Bhawuro, akahatëka kubha abhakoro bha bhachaama bhiikomane haghirohamu ne eriibharacha eriikoro re Bhayahuuti. Akamara akamurëëta Bhawuro, akamwimeereri ambërë yaabho.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved