Amaköri gha Bhatomu 21

Bhawuro ˆaghaye Yerusareemu

1Hano toore tumariri kuraghana na abhagharuka bhayo bha Ebheeso, toghatiira mo‑bhwato bhuyo, tooghaye kimu kimu mbagha tokahika mo‑gheghinga ghe Koosi. Hano bhookiire, tooghaye mo‑gheghinga ke Roota. Korwera hayo, tooghaye wiiki mbagha tokahika mo‑moghya o Bhatara. 2Hayo tokabhöna obhwato obhonde bhuno bhoghutëënya ghuye mo‑mukööwa o Bhoyinike. Mbe, tokabhotiira, tooghaye nabho. 3Hano tokerooche egheghinga ghe Kiibhuro, toghaghetigha eribhaara re bhachuuta, tökëëndërëra mbagha tokahika mo‑mukööwa o Siiriya.

Hano tohikiri mo‑moghya o Tiiro, toghiika mo‑bhwato bhuyo, gho kubha hayo niho ꞉bhaare bhariikeri emerigho ghino gheere‑mu. 4Niho tokarighani na Abhakirisito bha hayo, tokamara chaasiko mohungate toonyi nabho. Abhakirisito bhayo bhakamusasaama Bhawuro gho nchëra e Körö Ahörëëru kubha, ataghe Yerusareemu. 5Koru hangʼu, hano tumariri chaasiko chiyo, toghatanura. Abhakirisito bhoose bha hayo Tiiro bhaghatuhërëëkërëra, abhasubhe na abhakari bhaabho, na abhaana, mbagha anche e moghya uyo bhaghatohiki rubhareka ro nyancha. Hayo haghuhe na anyancha iyo tokahighama, toghasabha Eryobha. 6Tuuche kumara tokaraghana nabho, toghatiira mo‑bhwato, ibho bhaghagharuka mo‑chaaka cheebho.

7Mbe, tookaru hayo Tiiro, tökëëndërëra no orughëndö rwito mbagha tokahika mo‑moghya o Toremayi. Hayo toghakëëri abhahiiri bhiito‑ho, toghiikara nabho orosiko rumu. 8Atabhoori yaache, tookaru hayo, tooghaye mo‑moghya o Kayisaariya. Toghiikara mo‑nyumba e Bhiiribho uno are omweghi o Ngʼana Anchömu e Yesu, naare umu o bhatoorereri mohungate bha bhatomu bhano bhaahwiru iyo Yerusareemu kuhööhi abhaato ebhiinyakurë. 9Bhiiribho uyo naare na abhaakë bhane bhano ꞉bhaare bhakeere kumënya abhasubhe, wiiki mbaare ne ekihaano ghe koruusi obhurööti.

10Hano toore tumariri chaasiko chaaru hayo Kayisaariya, akaacha omurööti umu koru Yuteya, eriina reeche Aghabho.#21:10 Mööhi Amaköri gha Bhatomu 11:27–28. 11Aghabho uyo aghatusëëta, akiimoki omoshibhi o Bhawuro, akiibhöha mo‑maghoro na mo‑mabhökö, akabhugha kubha, “Akörö Ahörëëru nebhughiri kubha, ‘Omwene omoshibhi uno, hangʼu nibhu Abhayahuuti bha Yerusareemu bhakomubhöha gho changuru, na mbakomuhaana mo‑mabhökö gha bhaato bha matöngö.’”

12Mbe, hano tooghwire hangʼu, itu haghirohamu na abhakumi bha hayo Kayisaariya tokamusasaama Bhawuro chwee kubha, ataghe iyo Yerusareemu. 13Amare aghatugharokeri akabhugha, “Ghwake mokorera na kwënda koonyita omukörö? Kana eni niisheriiri kubhöhu, koru ghwitu iyo Yerusareemu gho ghiri e riina re Mutëmi Yesu.” 14Hano torooche kubha Bhawuro taaghototereera, tokamotigha, tokabhugha kubha, “Amiigha gha Mutëmi nigho ghaköru.”

15Tokamara tokabhöhëri emerigho ghiito, toghasëëma orughëndö kwërëkëra Yerusareemu. 16Abhakirisito abhande bha hayo Kayisaariya bhaghatuhërëëkërëra mbagha bhaghatohiki mo‑nyumba e Munasooni, hano tookubha toriikara. Munasooni uyo naare omooto o gheghinga ghe Kiibhuro, wiiki naare umu o Bhakirisito a bhambërë.

Bhawuro ˆaghasöha Yerusareemu

17Hano tohikiri Yerusareemu, abhahiiri bhiito bha hayo bhaghatughënëhi gho ghuchömëru chwee. 18Atabhoori yaache, tooghaye na Bhawuro komukëëri Yakobho, na abhagharuka bhoose bha riikanisa mbaare hayo. 19Bhawuro achekumara kobhakëëri, akabhabhoorera amangʼana ghoose ghano Eryobha reere riköriri mo‑bhaato bha matöngö gho kohetera amahöki ghaache, ke rimu rimu.

20Hano bhooghwire ghayo, bhakareghongi Eryobha, bhakamobhoorera Bhawuro bhakabhugha, “Oo mohiiri wiito, ˆokarighi kinya ebheku ne ebheku bhe Bhayahuuti bhamokumiri Yesu. Bhano bhoose mbaghwiköngʼi chwee ghughööta emeghiro. 21Amare mbabhooriiru kubha, nokobheeghi Abhayahuuti bhoose bhano bhaghwikara mo‑chaase echende kubha, bhatabha bharatereera emeghiro ghiyo. Wiiki nobharëkiri kubha bhatabha bharasaara abhaana bhaabho, koru ghutambana chaasughara cheebho che Kiyahuuti. 22Mahëënë abhaato bhayo mbakooghu kubha numariri kohika hano. Ibheere tukörë bhu?

23“Gho ghayo, ukörë kinya bhuure toghokobhoorera. Ghate yiito hano mbaanyi‑ho abhasubhe bhane bhano bhatooriri eriiraheri ambërë e Ryobha. 24Mbe, mughöötane nabho moghi momusu haghirohamu. Ghyokyose kino bhakwënda bharehe, ubhe niiye okobharehera, bharamara bhangʼööbhë emitu#21:24 Bhangʼööbhë emitu. Abhayahuuti, hano ꞉bhaare bharatoorera Eryobha eriiraheri, bharamara koriköra, mbaare bharangʼööbha omutu kwërëki kubha mbarihikeriini. gheebho. Gho ghayo, abhaato bhoose mbakumënya hëënë kubha, ghoose ghano ꞉ghaasiikiiru ighoro yaacho, taanyi gha hëënë, na mbakumënya kubha, iye woose nokwëndërëra ghosooka emeghiro. 25Kwo ribhaara re bhaato bha matöngö bhano bhamokumiri Yesu, ntobhaandëkiire kinya bhuure tooteniri ekiina kubha, bhatarë ebhiinyakurë bhino bhiköruru kubha bheghonchu gho kuhëërana chasanaamu, na bhatarë amasaahë, koru chaanyama che chatyenyi chino chinyëëturu, na bhataköra obhutaari.”

26Hano bhookiire, Bhawuro akabhahira abhasubhe bhayo bhane, akamusu haghirohamu nabho. Akamara aghasöha mwibhancha re Risëngërö, gho ghiri abharaghaneri abhaato bhayo orosiko runo bhakohikeerani komusu koobho, na kinya ekwëndëru koruusi amaruusi gho kira mooto.

Bhawuro ˆaghaghöötu

27Chaasiko mohungate che komusu hano cheere chirariire ghosira, Abhayahuuti abhamu bhano bharuure mo‑mukööwa o Asiya bhakamorighi Bhawuro mwibhancha re Risëngërö. Bhakabhaseeghereri abhaato bhano ꞉bhaare hayo bhakamughööta. 28Bhaghaköra eriireghe bharabhugha, “Abhiisiraeri bhaghëndi bhiito, mototoori! Kana omooto uno niwe are areeghi abhaato bhoose bha ahaghiro hoose kubha bhabhe bharatutaraaha, bharataraaha ne emeghiro, koru ne Erisëngërö rino. Wiiki ghokera ghayo, nahaghonchiri ahaghiro hano ahatööbhiyu gho ghusöhi‑mu abhaato bha matöngö aghande.” 29Kino ꞉ghiighëriri bhabhughe hangʼu n‑kubha, mbaare bhamorooche Bhawuro hayo Yerusareemu, anyi haghirohamu na Torobhiimo omooto o Ebheeso. Bhakiihëëbha kubha namusöhiri Torobhiimo Mwisëngërö.

30Anyööri eghasancha mo‑moghya uyo woose o Yerusareemu. Abhaato bhakaacha koru chambaara choose bhakamusöhërëra Bhawuro bhakamughööta, bhakamohoroki anche e Erisëngërö. Hayo hayo charwighe che Erisëngërö cheghiigharu gho changuru. 31Hano abhaato bhayo ꞉bhaare bharëënda komwita Bhawuro, amangʼana ghakamohikera omontomonkoro o bhaashirikare bha Keruumi kubha, omoghya woose o Yerusareemu wichwire anyööri. 32Hayo hayo akiimoki abhaashirikare bhaache haghirohamu na abhakoro abhande bha bhaashirikare, bhaaghaye bharahe mo‑bhaato bhayo. Abhaato bhayo hano bhabharooche abhaashirikare bhayo bhaanyi haghirohamu no omontomonkoro waabho uyo, bhaghatigha komurööna Bhawuro.

33Omontomonkoro uyo o bhaashirikare aghiishuka, akamughööta Bhawuro, akahatëka kubha abhöhu eminyörörö ebhere. Akamara akabhoori, “Uno n‑niwe? Wiiki neke asariri?” 34Hayo hayo abhaato bhayo bhaghasëëma ghuköra eriireghe, abhande bharabhugha hangʼu na abhande hangʼu. Eriireghe riyo reghaghëri omontomonkoro uyo o bhaashirikare atamënya ghano gharweriire. Akahatëka kubha, Bhawuro ahiru mo‑rwakyo ro bhaashirikare. 35Hano Bhawuro are mo‑changachi che riibhancha riyo, abhaato bhayo bhakamukararera chwee, eghaghëri abhaashirikare bhayo bhamughëghë ighoro ighoro gho ghiri bhamotoori. 36Koru hangʼu, erikinda re bhaato bhano ꞉bhaare bharamoru anyuma Bhawuro, bhakëëndërëra ghuköra eriireghe bharabhugha, “Momwite!”

Bhawuro ˆaghiitachura ambërë e Bhayahuuti

37Hano abhaashirikare bhayo ꞉bhaare bharamusöhi mo‑ribhancha reebho, Bhawuro akamobhoori omontomonkoro waabho uyo akabhugha, “Kana neghwisherereru nekobhoorere angʼana?” Akamugharokeri akabhugha, “Kana iye weeche ghosiikëra Ekeyunaani? 38Kana iye taanyi Omomiisiri uno arëëtiri anyööri hano ghano matiko, no okabhakangata abhiiti ebheku bhine (4,000) ghuye mwibhara?” 39Bhawuro akamugharokeri, “Eni m‑Muyahuuti neenyi, omwibhoru o moghya uno umënyëkiine bhoheene o Taaso mo‑mukööwa o Kirikiya. ˆNeghaghusasaama onyisherereri nesiikërë na abhaato bhano.” 40Hano omontomonkoro uyo o bhaashirikare amwishereriiri, Bhawuro akiimeerera mo‑ngachi iyo, akabhahongera abhaato bhayo okubhökö kubha bhakireerani. Hano bhoose bhakiriri, aghasëëma ghosiikëra nabho mo‑ghighambo keebho ghe Kebhuraaniya.

Currently Selected:

Amaköri gha Bhatomu 21: ntk

Highlight

Copy

Compare