Amaköri gha Bhatomu 18

Bhawuro ˆaghaye mo‑moghya o Korinto

1Amangʼana ghayo ghaache koheta, Bhawuro akaru hayo Atene, aghaye mo‑moghya o Korinto. 2Iyo aghatëmëërana no Omuyahuuti umu, eriina reeche Akiira, omwibhoru o mo‑mukööwa o Bhonto. Akiira uyo haghirohamu na mukaache Bhirisira, mo‑chaasiko chiyo chiyo mbaare bharuure mo‑moghya o Ruumi mo‑se e Itaariya, gho kubha Kayisaari Kirawutiyo naare abhughiri kubha Abhayahuuti bhoose bhahëëbhu koru mo‑moghya uyo. Niho Bhawuro aghaye kobhakëëri Akiira na mukaache. 3Mbe, gho kubha Bhawuro naare araköra omoremo o ghotuma amahëëma kinya ibho, niho aghiikara mo‑ka yaabho bhaakabha bharahöki haghirohamu. 4Chaasiko choose che Riikane, Bhawuro ꞉naasöhiri mo‑risinaghooghi re Bhayahuuti, akabha arabhoorani nabho ighoro e Yesu. Naare arasaki kobharuta Abhayahuuti haghirohamu na abhaato bha matöngö aghande, kubha bhoose bhamokumi Yesu.

5Hano Siira na Timotewo ꞉bhaare bhahikiri hayo, koru Maketoniya, Bhawuro aghasëëma kuhökëri eriibhagha reeche ryose kweghi Abhayahuuti angʼana e Ryobha, arabhabhoorera kubha Yesu niwe Kirisito. 6Abhayahuuti bhayo bhaghasëëma komwanga na komotoka. Eghaghëri aghakongʼoota amaghööti#18:6 Ghokongʼoota amaghööti neere ërëërëki kubha taanyi ni isörö gho ghayo, abhabhooriire. ghaache ambërë yaabho, arabhabhoorera, “Amasaahë ghaanyu ngaakubha ighoro yaanyu inyu bheene! Eni teenyi‑ho ngʼana ino nekobhooribhu ighoro yaanyu korwera ibheere, neekubha neraghe mo‑bhaato bha matöngö aghande.”

7Mbe, Bhawuro akaru hayo, aghaye aghiikara mo‑nyumba e Tiito Yusito, ino ere rubhareka ro risinaghooghi. Omooto uyo naare araresooka Eryobha. 8Omokoro o risinaghooghi riyo, eriina reeche Kirisibho, woose akamokumi Omutëmi, haghirohamu na abhaato bhoose bha mo‑ka yaache. Abhakorinto abhande bhaaru bhano ꞉bhooghwire amangʼana gha Bhawuro, bhoose bhaghakumi, bhakabhatiisu.

9Orosiko rumu obhotiko Omutëmi akamobhoorera Bhawuro mo‑marighi akabhugha, “Otatiina, wëndërërë hangʼu hangʼu kuraghani. Otaku omukörö, 10gho kubha eni neenyi haghirohamu na niiye, wiiki taanyi‑ho mooto iyo uno aghoghoturi kubha akunyahaare. Mo‑moghya uno neenyi na abhaato bhaaru bhano bhakuucha ghokoone.” 11Mbe, Bhawuro akamara omooka umu ne emyëri esaasabhe anyi hayo Korinto, areeghi angʼana e Ryobha ghate yaabho.

12Hano Ghariyo are omukangati o mukööwa o Akaaya, Abhayahuuti bhaaru bhakamusöhërëra Bhawuro. Bhakamurëëta ambërë e ghetumbe ghe ghotenera kiina, 13bhakamusëma bharabhugha, “Omooto uno nakobhabhoorera abhaato kubha, bhasëngërë Eryobha gho nchëra ayende ino itu totiishereriiru ne emeghiro ghiito.”

14Hano Bhawuro ëndiri ghosiikëra, Ghariyo akabhabhoorera Abhayahuuti bhayo akabhugha, “Inyu Abhayahuuti aribha mongamusëmiri omooto uno kwo riisari, hamu kwo bhobhe, niho nengabhatëghëëriire. 15Mbe, gho kubha mokuhakaana kwo mangʼana hangʼu, na kwo mariina, na kwo meghiro gheenyu, moghamare inyu bheene. Eni nteekwënda kubha omoteni o kiina o mangʼana ghano.” 16Hayo hayo Ghariyo akahatëka kubha bhahëëbhu hayo ambërë e ghetumbe keeche ghe ghotenera ekiina. 17Niho bhayo bhoose bhakamusöhërëra Sositene, omokoro o risinaghooghi, bhaghasëëma komutëma ebhekundi hayo hayo ambërë e ghetumbe ghe ghotenera ekiina. Ghayo ꞉bhaaköriri hayo, Ghariyo taghateereeriri.

Bhawuro ˆaghagharuka mo‑moghya o Antiyokiya

18Bhawuro akëëndërëra ghwikara chaasiko echende chaaru hayo mo‑moghya o Korinto. Akamara akabharagha Abhakirisito abhaghëndi bhaache, aghaye mo‑moghya o Kenkireya, akangʼööbha omutu waache#18:18 Akangʼööbha omutu waache. Abhayahuuti, hano ꞉bhaare bharatoorera Eryobha eriiraheri, bharamara koriköra, mbaare bharangʼööbha omutu kwërëki kubha mbarihikeriini. kwërëki eriiraheri rino are atooriri. Bhakamara iwe haghirohamu na Bhirisira na Akiira bhaghatiira mo‑bhwato bho ghuye mo‑mukööwa o Siiriya. 19Hano bhahikiri mo‑moghya o Ebheeso, Bhawuro bhaghataana na Bhirisira na Akiira. Iwe aghasöha mo‑risinaghooghi re Bhayahuuti, akabha arasiikëra nabho Angʼana Anchömu. 20Abhayahuuti bhayo bhakamusabha Bhawuro kubha ëngërë chaasiko che ghwikara nabho, amare tiisheriiri. 21Hano are araraghana nabho akabhabhoorera, “Neghugharuka hano, Eryobha rerasiigha.” Niho akaru hayo Ebheeso no obhwato.

22Hano Bhawuro ahikiri mo‑moghya o Kayisaariya, aghatiira ghuye Yerusareemu, ghukëëri abhaato bha riikanisa. Akamara aghaye mo‑moghya o Antiyokiya. 23Hano amariri chaasiko insuuhu, akaru hayo akaheta mo‑mikööwa ghe Gharatiya, na Bhirighiya, akabha arabhatoora omukörö abhaghëndi bhoose.

Abhooro iyo Ebheeso na Korinto

24Kwo riibhagha riyo mo‑moghya uyo o Ebheeso, akahika‑ho Omuyahuuti umu, eriina reeche Abhooro, omwibhoru o mo‑moghya o Arekisantiriya. Abhooro uyo naare musubhesubhe chwee gho ghosiikëra, naare eche chwee ghaare ghaanyi mo‑Mandëkö Amatööbhiyu. 25Omooto uyo naare eghiibhu anchëra e Mutëmi. Woose naare ariiköngʼi kwo mukörö waache kweghi abhaato obhuhëënë ighoro e Yesu. Nangabha kwo ribhaara re bhubhatiiso, naare eche ighoro e bhubhatiiso bho Yohana obhwene. 26Abhooro aghasöha mo‑risinaghooghi re Bhayahuuti, aghasëëma kweghi‑mu Angʼana Anchömu e Yesu kwo bhosubhesubhe. Bhirisira na Akiira, hano bhooghwire ameeghi ghayo gha Abhooro, bhakamohira mo‑ka yaabho, bhakamwërëkërëri angʼana e Ryobha kwo bhuchömu, kinya enyi.

27Akamara Abhooro akëënda ghuye mo‑mukööwa o Akaaya. Abhakirisito abhaghëndi bhaache bhakamwisherereri, bhakabhaandëkëra abhaghëndi bhaabho bha iyo anyaarubha kubha bhamughënëhi bhoheene. Hano ahikiri iyo, akabhatoori chwee bhano ꞉bhaare bharamokumi Yesu gho ghareeya e Ryobha. 28Abhooro naare arabhakinda Abhayahuuti ambërë e bhaato kwo bhosubhesubhe, gho köbhëërëki bhoheene mo‑Mandëkö Amatööbhiyu kubha Yesu niwe Kirisito.

Currently Selected:

Amaköri gha Bhatomu 18: ntk

Highlight

Copy

Compare