Amaköri gha Bhatomu 12

Yakobho ˆaghiitu na Bheetero ˆaghaghöötu

1Mo‑chaasiko chiyo, omutëmi Herote Aghiribha aghasëëma kobhanyaaki abhaato abhamu bha riikanisa. 2Akahatëka kubha, Yakobho#12:2 Yakobho, mwërëëti o Sebhetaayo, naare umu o bhaanabheegha bha Yesu ikomi na bhabhere. Mööhi Ruuka 5:10. ömööbhö Yohana itu gho kinyamiino. 3Hano arooche angʼana iyo ˆekabhategheri Abhayahuuti, akahatëka Bheetero aghöötu. Amangʼana ghayo ngarweriire eriibhagha re nyangi e mighaate ghino ghetaaghotooreru eghetondori. 4Achekumara komughööta Bheetero, Herote aghatomani atooru mwighërëcha. Akamuhaana mo‑makinda ane gha bhaashirikare bhane bhane, kubha bhamochonge bhoheene. Herote naare arëënda anyangi e Bhaasaka eramara koheta, amotenere ekiina ambërë e bhaato. 5Mbe, Bheetero bhakamotoora mwighërëcha, amare abhaato bha riikanisa bhaghiiköngʼi ghusabha Eryobha gho ghiri yaache.

Marayika ˆakamoruusi Bheetero mwighërëcha

6Ibheere obhotiko bho kobhookera orosiko runo Herote are ëndiri komotenera ekiina, Bheetero naare amisiri mwighërëcha, abhöhuru ne eminyörörö ebhere haghirohamu na abhaashirikare bhabhere bhamotooriri ghateghate. Anche e ghisëku ke nyumba iyo abhaashirikare abhande mbaare bharamochonga.

7Hayo hayo marayika o Mutëmi akiimeerera mo‑kenyumba kino Bheetero are. Obhwero bhokarëngaari mo‑kenyumba kyose. Marayika uyo akamtëmatëma Bheetero mo‑chambaru akamobhooki, akamobhoorera, “Bhooka bhwango!” Hayo hayo eminyörörö ghino ꞉bhaare bhamubhöhiri Bheetero mo‑mabhökö gheeghagho haase.

8Ibheere marayika uyo akamobhoorera, “Inata changibho cheecho, obheeke ne ebhekwera bheecho.” Bheetero aghaköra hangʼu, akamara marayika akamobhoorera, “Wiibhishi ne erighööti reecho, untambane!” 9Bheetero akamtambana marayika akahoroka anche e nyumba iyo e bhabhöhu. Bheetero iwe naare ariihëëbha kubha mo‑marighi anyi, taamënyiri kubha amangʼana ghayo, ngaare gha hëënë! 10Bheetero na marayika uyo bhakabhaheteera abhachongi a bhambërë, na bha kabhere, bhakahika mo‑kehita ghe kyoma ghe ghusöhëra mo‑moghya. Ekehita kiyo gheghiishookora ekyene, bhakahoroka anche. Bhaakabha bharaghëndani mo‑nchëra imu, hayo hayo marayika uyo akamotigha Bheetero.

11Niho Bheetero akamënya kubha, ghoose ghano ghamorweriire ngaare gha hëënë, akabhugha, “Ibheere ˆnekamënya m‑mahëënë kubha Omutëmi niwe antomiire marayika waache, kubha antoori koru mo‑mabhökö gha Herote na konduusi mo‑mabhe ghoose ghano Abhayahuuti bhëëndiri ghunkörëra.”

12Hano Bheetero amënyiri ghayo, aghaye kimu kimu awaache Mariyamu, nyina Yohana uno are arabherekeru Maariko. Mo‑nyumba iyo abhakumi bhaaru mbaare bhiikomiine‑mu bhararisabha Eryobha. 13Bheetero aghaköngʼööta eghisëku mo‑kehita ghe nche. Omuukë umu omutamishi, eriina reeche Roota, akaacha komwighorera. 14Omuukë uyo hano amënyiri eriiraka n‑de Bheetero, aghachömëru chwee, koru akeebhu komwighorera aghagharuka arahe mo‑nyumba. Akabhabhoorera bhoose, “Bheetero niimeeriire anche mo‑kehita!”

15Ibheere ibho bhakamobhoorera, “Iye numariri ghusari omutu!” Amare omuukë uyo akahënërëra kobhugha kubha m‑mahëënë nyoghwire amaraka gha Bheetero, niho bhakamobhoorera, “Hamwabhe uyo m‑marayika waache.” 16Eriibhagha riyo Bheetero naare arëëndërëra ghuköngʼööta eghisëku. Hano bhiighwire orwighe, bhakabhöna mahëënë niwe, bhakahagha chwee. 17Bheetero akabhahongera okubhökö bhakire, akabhabhoorera kebhuno Omutëmi amoruusiri mwighërëcha. Wiiki akabhugha, “Amangʼana ghano, momobhoorere Yakobho#12:17 Yakobho naare ömööbhö Yesu. Mööhi Amaköri gha Bhatomu 15:13, 21:18; Abhagharatiya 1:19. na abhahiiri bhiito abhande.” Akamara Bheetero akaru hayo, aghaye ahaghiro ahande.

18Hano bhookiire, abhaashirikare bhaare ꞉bhaare mwighërëcha bhaakabha na ahaho inkoro, bhakabhoorani bharabhugha, “Bheetero hayi aghiire?” 19Herote akahatëka bhamutabhare, amare bhataatoriri komubhöna. Ibheere akahatëka abhachongi bhayo bhabhooribhu, akamara akaruusi eriihatëkö kubha bhiitu. Hano amariri Herote akaru mo‑mukööwa o Yuteya, aghaye mo‑moghya o Kayisaariya, aghiikara iyo.

Omutëmi Herote ˆaghaku

20Herote naare abhakarariire chwee abhaato bha meghya ghe Tiiro na Sitooni. Ibheere abhaato bha meghya ghiyo ebhere, bhaghaghöötana haghirohamu bhaghatoma abhaato kwo Herote, kubha bhamusabhe omurëmbë, gho kubha emeghya ghiyo ngeere gherabhöna ebhiinyakurë koru mo‑se yaache. Abhaato bhayo bhaghiishererani na Bhuraasito, uno are omwimeerereri o nyumba e mutëmi Herote.

21Orosiko runo Herote are ahwire korighani na abhaato bhayo, akabheeka eriishaghi reeche re ghitëmi, aghiikara mo‑ghetumbe keeche, aghasiikëra ambërë e bhaato. 22Hayo hayo abhaato bhayo bhaghasëëma ghuköra eriireghe bharabhugha, “Rino taanyi eriiraka re mooto! N‑eriiraka re musambu!” 23Mbe, gho kubha Herote taheere Eryobha obhokumi obhokoro bhuyo, hayo hayo marayika o Mutëmi akamutëma Herote kwo bhoshaagha bho koreebhu na chanchöka che mo‑nda, aghaku.

24Angʼana e Ryobha ëkëëndërëra ghusancha mo‑bhaato, na abhaato bhaaru bhaghakumi. 25Bharinaabha na Sawuri bhoose, hano bhamariri omoremo waabho o kobhatoori abhakumi, bhaghagharuka koru Yerusareemu#12:25 Mööhi Amaköri gha Bhatomu 11:29–30. bhakamwimoki na Yohana uno are arabherekeru Maariko.

Currently Selected:

Amaköri gha Bhatomu 12: ntk

Highlight

Copy

Compare