Amaköri gha Bhatomu 11

Bheetero ˆakabhabhoorera kinya atomuru mo‑matöngö aghande

1Ibheere abhatomu bha Yesu na abhakumi abhande bha iyo Yuteya, bhakooghu kubha abhaato bha matöngö bhoose mbiisheriiri angʼana e Ryobha. 2Mbe, hano Bheetero agharokiri Yerusareemu, Abhayahuuti bhano ꞉bhaare bharamokumi Yesu bhaghasëëma kwingʼunyerangʼunyera 3bharabhugha, “Iye nusöhiri mo‑chaaka che bhaato bha matöngö aghande na kuraaghëra haghirohamu nabho!”

4Niho Bheetero aghasëëma kobhatöngööchëri angʼana keyimu imu kinya bhuno ghoose ꞉ghaarweriire, akabhugha, 5“Orosiko rumu neere mo‑moghya o Yoobha. Hano neere nerasabha Eryobha, nekarighi amarighi. Mo‑marighi ghayo, nekarighi egheghiro kinya omwando mokoro keriikibhu koru mwishaaro ghighööturu chambaara cheeche choose inye. Niho gheghantingʼi gheghiikera rubhareka roone. 6Hano nimööhiri‑mu bhoheene, nekarighi chatyenyi che maghoro ane, chatyenyi chi ibhara na chino chekwingʼuurera chanda, ne ebhinyönyi.

7“Niho nekooghu eriiraka, reramboorera, ‘Bheetero, imeerera! Ughööghë ori!’ 8Nekabhugha, ‘Tiyaanyi, Omutëmi! Ntiimara neri naabha ekiinyakurë ghyokyose kino emeghiro ghe Musa ghebhughiri kubha, ghetaakurëngʼaanera na gheghonchu!’ 9Amaraka koru Mwishaaro ghakamobhoorera wiiki ghakabhugha, ‘Otabhebherekera ebheghiro bhino Eryobha remusiri, kubha m‑bheghonchu.’ 10Angʼana iyo ekarwera ghatato, antenero ebheghiro bhiyo bhyose bheghagharokibhu ighoro mwishaaro.

11“Eriibhagha riyo riyo abhaato bhatato bhano ꞉bhaare bhatomuru koru Kayisaariya bhakahika ambërë e nyumba ino toore toriikara. 12Akörö Ahörëëru ekamboorera kubha nighëndë haghirohamu nabho netabha na kemboori ighoro yaabho. Mbe, neeghaye nabho, ꞉neeghiire haghirohamu na abhahiiri bhiito bhasaasabhe. Hano tusöhiri mo‑nyumba e Korineeriyo, 13aghatobhoorera kebhuno arooche marayika imeeriire mo‑nyumba na kinya marayika uyo ꞉amobhooriire, ‘Otome abhaato bhaghëndë Yoobha, bhamobherekere Simiyooni uno akobherekeru Bheetero ache. 14Iwe naghokuha amangʼana, na gho kohetera amangʼana ghayo iye na abhaato bhoose bha mo‑ka yaacho moghotooribhu.’

15“Hano niisëëmiri ghosiikëra na abhaato bhayo, Akörö Ahörëëru ekabhiikera, kinya bhuure etwikiire ekimbërë.#11:15 Ekimbërë. Naghosiikërëra orosiko ruure ro Bhentekositi. 16Nekahiita angʼana yiire Omutëmi ꞉atobhooriire, ‘Yohana ꞉naabhatiisiri abhaato kwo manche, amare inyu mokubhatiisu gho Körö Ahörëëru.’#11:16 Mööhi Amaköri gha Bhatomu 1:5. 17Ibheere ekihaano kino Eryobha ꞉reetoheere eriibhagha ꞉toomokumiri Omutëmi Yesu Kirisito, nikyo kiyo kiyo rebhaheere bhano. Mbe! Eni n‑niwe neryange Eryobha?”

18Hano Abhayahuuti bhayo bhooghwire ghayo, bhataare na re ghugharokeri. Bhakaritöghösi Eryobha bhakabhugha, “Kana, Eryobha ndebhaheere abhaato bha matöngö aghande omweya o ghotuukuunera amasari ghaabho, kubha bhabhönë obhuhöru bho miishe ghyose!”

Eriikanisa re Antiyokiya ˆreghiitabheru

19Abhakumi bhano bhasanchiri gho kunyaakibhu kurëngʼaana na ghwitu gho Siteebhano, bhakangʼösëra mo‑chaase che Bhoyinike, na Kiibhuro, na mo‑moghya o Antiyokiya. Hoose hano bhaghiire, bhaakabha bhareeghi angʼana e Ryobha kwo Bhayahuuti abheene. 20Amare mo‑moghya uyo o Antiyokiya, mo‑bhaato bhano ꞉bhaangʼösiire iyo, ꞉mbaaruure mo‑se e Kiibhuro na mo‑moghya o Kireene. Ibho bhakeeghi Angʼana Anchömu e Mutëmi Yesu koru kwo bhaato bha matöngö.#11:20 Abhaato bha matöngö. Egheteemoro ekende ngeghotora kubha, Abhayahuuti bhano bhasiikiire Ekeyunaani. 21Obhotoro bho Mutëmi mboore haghirohamu nabho, na abhaato bhaaru chwee bhakamokumi Omutëmi, bhakariigharurera Eryobha.

22Abhaato bha mo‑kanisa e Yerusareemu, hano bhooghwire amangʼana ghayo, bhakamotoma Bharinaabha aghi Antiyokiya. 23Hano ahikiri iyo, akarighi kebhuno aghareeya e Ryobha ebhiitabhiiri abhaato bhayo. Aghachömëru chwee, akabhatoora omukörö bhaköngʼëri komosooka Omutëmi kwo metema gheebho ghyose. 24Bharinaabha naare omooto omuhëënë uno ichoriibhu Akörö Ahörëëru no obhokumi. Ekirëngërë ghekoro ke bhaato kino ꞉keemokumiri Omutëmi Yesu ghëkëëngëra chwee.

25Akamara Bharinaabha aghaye mo‑moghya o Taaso komutabhara Sawuri. 26Hano amobhwine, akamurëëta hayo Antiyokiya. Bhayo bhabhere bhaghiikara na abhaato bha riikanisa kwo mooka moghima, bhaakabha bhareeghi abhaato bhaaru chwee ighoro e Yesu. Hayo Antiyokiya niho abhaghëndi bha Yesu bhasëëmiri kobherekeru Abhakirisito.

27Mo‑chaasiko chiyo chiyo, abharööti nyarebhe koru Yerusareemu bhakaacha Antiyokiya. 28Umu o bhayo, naare arabherekeru Aghabho, akiimeerera mo‑kiina, akaruusi obhurööti gho nchëra e Körö Ahörëëru kubha aghëëcha ihaari neghusöhërëra chaase choose. Aghëëcha iyo ꞉neerweriire hano Kayisaari Kirawutiyo are arakangata. 29Kurëngʼaana no obhurööti bhuyo, abhaghëndi bhaghiishererani omooto woose, kurëngʼaana no obhotoro bhooche, aruusi ghyokyose gho ghiri e Bhakirisito abhaghëndi bhaabho bhano bhamanyiri mo‑mukööwa o Yuteya. 30Bhaghaköra hangʼu, bhakabhaha Bharinaabha na Sawuri omusörörö uyo, kubha bhawohire abheene kwo bhagharuka bha mo‑riikanisa re Yerusareemu.

Currently Selected:

Amaköri gha Bhatomu 11: ntk

Highlight

Copy

Compare