Amaköri gha Bhatomu 1

1Omosiighani Tewobhiro, mo‑ghitabhu keene e kimbërë,#1:1 Eghitabhu keene e kimbërë n‑eghitabhu ke Ruuka. ꞉neekwandëkiire ighoro e mangʼana ghoose ghano Yesu ꞉aköriri na kweghi, korwera hano asëëmiri emeremo gheeche, 2mbagha orosiko runo aghëghuru ghuye Mwishaaro. Hano are akeere ghughëghu, akabhaha abhatomu bhaache bhano are ahwire, amëërëkërëri gho nchëra e Körö Ahörëëru, ighoro e meremo ghino bhaghuköra. 3Kwo riibhagha re chaasiko miröngö ene achekumara koryoka, akabha ariyëërëkani kwo bhatomu bhaache mara kaaru, kubha bhakumi iwe m‑muhöru. Wiiki akabha arabheeghi amangʼana ighoro e bhutëmi bho Ryobha.

4Orosiko rumu, hano Yesu atëmëriine haghirohamu na abhatomu bhaache, akabharaghereri akabhugha, “Motaru mo‑moghya o Yerusareemu, mwikare‑mu, mbagha hano mokuhaabhu Akörö ino Taata ꞉abharaghiire inyu, kinya bhuno neere nebhabhooriire. 5Yohana ꞉naabhatiisiri abhaato kwo manche, amare gho chaasiko insuuhu chino chekuucha, inyu mokubhatiisu gho Körö Ahörëëru.”#1:5 Mööhi Mataayo 3:11; Maariko 1:4–8; Ruuka 3:16.

Yesu ˆaghaghëghu ghuye Mwishaaro

6Mbe, eriibhagha abhatomu bhayo ꞉bhaare haghirohamu na Yesu, bhakamobhoori, “Omutëmi, eriibhagha rino niryo okobhagharokeri Abhiisiraeri obhutëmi bhoobho?”#1:6 Eribhoori rino ꞉bhaabhooriri Yesu ndekwërëki kubha, ibho mbaare bhariitëngʼëra kubha, Kirisito nakuucha gho ghiri e kobhatoori koru mo‑bhukangati bho Keruumi. 7Akabhagharokeri akabhugha, “Emiishe na amabhagha gha mangʼana ghayo, inyu motaakwëndëru ghoghamënya, gho kubha n‑Taata omwene kwo bhotoro bhooche niwe eche nyingake ghakorwera. 8Amare, mokuhaabhu changuru hano Akörö Ahörëëru ekuucha ghokoonyu, mookubha abhiibhateri bhaane mo‑moghya o Yerusareemu na ahaghiro ahande hoose ha Yuteya, na Samaariya, mbagha mo‑se yoose.”

9Hano Yesu amariri kobhabhoorera abhatomu bhaache ghayo, bhoose bhaakabha bharamumööhërëri, hayo hayo aghaghëghu ghuye Mwishaaro. Erishaaro rekamobhisa, bhataamorooche wiiki. 10Hano bhaare bhagharameriiri mwishaaro, hayo hayo abhaato bhabhere bhakiimeerera haghuhe nabho bhabheekiri amaghööti ameero chayi! 11Bhakabhabhoorera bhakabhugha, “Inyu abhaato bha Ghariraaya, ngwake mwimeeriire hano ino mugharameriiri Mwishaaro? Yesu uno aghëghuru koru ghokoonyu ghuye Mwishaaro, nakuucha wiiki, kinya bhuno momorooche araghe.”

Matiya ˆakaahoru kubha omotomu

12Niho abhatomu bhayo bhaakaru mo‑gheghoro kino ghekobherekeru egheghoro ke Miseyituuni, bhaghagharuka Yerusareemu. Neere kinya orughëndö ro kiromeeta imu hangʼu kohika hayo. 13Bhaghasöha mo‑moghya, bhaaghaye bhaghatiira mo‑kenyumba ki irëngö kino ꞉bhaare bhariikara abhatomu bhayo. Abhatomu bhayo nibho bhano,

Bheetero, na Yohana, na Yakobho, na Andereya,

na Bhiiribho, na Tomaso,

na Bhatoromaayo, na Mataayo,

na Yakobho mwërëëti o Arubhaayo,

na Simiyooni uno are o mo‑bhoyo bho Bhasërötë,#1:13 Abhasërötë n‑eriina re Keyunaani rino ꞉bhaabharokiri abhaato bhano ꞉bhaarööniri eriihë re bhohuuru koru mo‑bhukangati bho Bharuumi.

na Yuuta mwërëëti o Yakobho.

14Bhano bhoose mbaare bhiikomiine kwo mukörö umu ghusabha Eryobha, haghirohamu na Mariyamu nyina Yesu, na abhakari abhande, na bhaömööbhö Yesu.

15Eriibhagha riyo, abhaghëndi bha Yesu bhano ꞉bhaare bhiikomiine muyo mbaare, eriighana rimu na miröngö ebhere. Niho Bheetero akiimeerera ghateghate yaabho, 16akabhabhoorera akabhugha, “Bhahiiri bhaane, amangʼana ghano ghaandëkuru mo‑Mandëkö Amatööbhiyu ighoro e Yuuta uno ꞉ahiriri abhaato bhamughöötë Yesu, ꞉ngëëndiiru ghaköru. Amangʼana ghayo ꞉ngaasiikiiru na Akörö Ahörëëru kohetera kwo mutëmi Tawuti. 17Yuuta naare omotomu mughëndi wiito, ntuhaabhuru emeremo ghino haghirohamu nawe.”

18(Yuuta ꞉naaghoriri omoghondo gho chambiiri chino ꞉ahaabhuru kurëngʼaana na angʼana yaache ambe ino ꞉aköriri. Muyo nimu ꞉aghweriire kebhuuma, eghaateka anda, ne ebhyanda bhyose bhekahomoka anche.#1:18 Mööhi Mataayo 27:3–8. 19Abhiikari bhoose bha Yerusareemu bhaghaghamënya amangʼana ghayo. Ibheere omoghondo uyo bhakaworoka eriina mo‑ghighambo keebho#1:19 Mo‑ghighambo keebho. Eghighambo keebho nkeere Kiyaraamu, eghighambo ke Bhayahuuti. re Hakeri Tama, egheteemoro keeche Omoghondo o Masaahë.)

20Mbe, Bheetero akëëndërëra kobhugha, “Mo‑ghitabhu ghe Sabhuri ngaandëkuru amangʼana ighoro e Yuuta kubha,

‘Aka yaache ibhe eritöngö,

wiiki, atabha‑ho mooto uno aghusaagha‑mu.’#1:20a Mööhi Sabhuri 69:25.

“Wiiki yandëkuru,

‘Omoremo waache o bhotomu,

ahaabhu omooto owonde.’#1:20b Mööhi Sabhuri 109:8.

21“Gho ghayo, nekwëndëru ahuru omooto owonde uno ꞉tuughöötiine nawe eriibhagha ryose rino Omutëmi Yesu are haghirohamu na niitu, 22korwera hano Yesu abhatiisuru na Yohana, mbagha eriibhagha rino aghëghuru ghuye Mwishaaro. Uno akwahöru, nakwëndëru tughöötane nawe tobhabhoorere abhaato ighoro e koryoka kwo Yesu.”

23Ibheere bhaghatara amariina gha bhaato bhabhere. O mumbërë naare Yusubhu uno are arabherekeru Bharisaabha, wiiki naare ne eriina erende re Yusito. No o kabhere, naare arabherekeru Matiya. 24Hano bhamariri, bhakarisabha Eryobha bharabhugha, “Omutëmi, iye niiye oghyeche emetema ghe bhaato bhoose. Ibheere, ntoghusabha otwërëki n‑niwe ghate e bhano bhabhere uno wahwire. 25Omooto uyo okwahura, imoki omweya o bhotomu bhuno ꞉bhootighuru na Yuuta, uno akuure na ghuye ahaghiro hano hamurëngʼaaniire.” 26Bhakamara bhaghatëma akuura, akuura ekamoghwera Matiya, aghatëmëëranibhu na abhatomu bhaare abhande ikomi na umwa.

Currently Selected:

Amaköri gha Bhatomu 1: ntk

Highlight

Copy

Compare