PHUNGCHIMTU 1
1
Nunnak Hi Pakpalawng Men A Si
1David fapa, Jerusalem i a ummi
siangpahrang Phungchimtu bia:
2Pakpalawng lawngte, pakpalawng
lawngte!
Zeizong vialte hi pakpalawng
an si ko, tiah Phungchimtu nih a ti.
3Minung nih hin nilin lak le khuasa
lak i a ṭuanmi rian hin zeidah
a miak a hmuh?
4Chan khat cu a liam, a dang chan khat
a hung chuak ve,
sihmanhsehlaw vawlei cu a sining
ṭhiamṭhiam khan a hmun
zungzal ko.
5Ni cu a chuah kel in a chuak
ṭhiamṭhiam ko, a tlakning in
a tla ṭhiamṭhiam ko;
A chuahnak hmun ah khan a hram in
i thawk ṭhan awkah a kir ṭhan
lengmang ko.
6Thli cu thlanglei ah a vung hrang,
cun chaklei ah a hun i let ṭhan;
aa kual lengmang i aa thawknak
ah khan a kir ṭhan.
7Tiva vialte cu rili chungah an vung
luang, sihmanhsehlaw rili cu
a khat hlei lo; ti cu tiva an i thawknak
ah khan a kir ṭhan i a hram in
aa thawk ṭhan ko.
8Zeizong vialte hi thadi le zaangbang
an si dih, holh in chim khawh
hmanh an si lo;
mi nih hin hmuh hi cim ti a ngei lo i
hna nih hin theih hi khim ti
a ngei ve lo.
9A rak si cangmi kha a si ṭhan ko lai,
tuah lengmangmi hi tuah lai dingmi
cu a si fawn ko lai;
vawlei cungah hin zeihmanh a thar
a um lo.
10“Zohhmanh, mah hihi a thar a si,”
an ti;
sihmanhsehlaw cucu hlanpi ah,
kan chuah hlanpi ah a rak um diam
cangmi a si.
11Hlanlio thil kha ahohmanh nih
an hngal camcin hna lo,
cun hmailei ah atu le cu caan karlak i
thil a um dingmi zong hi ahohmanh
nih an hngal camcin hna lai lo.
Phungchimtu Nih A Hmuh A Tonmi
12Phungchimtu keimah hi Jerusalem khua ah Israel mi hna siangpahrang ka rak si. 13Vanrang toiah mi nih an tuahmi thil vialte hi ka hneksak hna lai i a sullam hngalh kaa zuam hna lai. Pathian nih minung kan cungah thil a kan khinhmi hi a nuam lo ngaimi a si ko. 14Vawlei cung i an tuahmi thil vialte hi ka hmuh dih, an dihlak in pakpalawng men a si ko, thlitu dawi bantuk men khi an si ko.
15A kawimi cu na dinter kho lai lo,
a um lomi cu rel khawh a si lo.
16Keimah le keimah cu, “Mingan ka si cang, keimah hlan i Jerusalem a rak uktu hna nakkhan a let tam piin ka fim deuh. Fimnak le hngalhnak hi zeidah an si, ti kha ka hngalh hna,” ka ti. #1Sia 4.29-31 17Cun fimnak le hruhnak, thil hngalhthiam khawh lonak le hngalh thiam khawhnak an i dannak hi hngalh kaa zuam hrimhrim lai, ka ti. Sihmanhsehlaw cucu ka caah thlitu dawi tluk ceo kha a rak si ko ti cu ka hngalh ṭhan.
18Zeicahtiah fimnak cu a tam
deuh paoh ah
lungretheihnak tam deuh ngeih
a si ve ko,
Cun thil tam deuh hngalh paoh ah
tam deuh temhinnak hmuh a si
ve fawn ko.
Currently Selected:
PHUNGCHIMTU 1: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006