ZEFANIAH 3
3
1Mihrem a hmangmi Jerusalem
khuapi, mirimnam khua,
a cungah ningzahnak tlung ko seh.
2Ralrinnak peknak aw kha
zeihmanh a ngaihmi a um lo,
Chimhhrinnak kha zeihmanh a lung
ah aa kenmi a um lo;
Bawipa kha aa bochan lo i a Pathian
kha a fuh lo.
3A chung i bawi hna cu chiandeih
a huk lengmangmi an si,
A biaceihtu bawi hna cu zinglei tiang
a ngang kho lomi cenghngia an si,
4A profet hna cu mihrokhrawl,
profet taktak a si lomi an si,
A tlangbawi hna nih hmunthiang kha
an thurhhnawmh i phung kha
an duhnak leiah an merh.
5Sihmanhsehlaw a chung i a ummi
Bawipa cu a ding i ṭhat lonak kha
zeihmanh a tuah lo;
Zing fate in pel lo tein khuadei kate
ah a biakhiahnak kha
a langhter zungzal.
Asinain miding lo hna nih cun
ṭhat lonak kha an tuah lengmang
ko i ningzah zong zeihmanh
an hngal lo.
6Miphun cu ka hloh cang hna,
an khuapi cu ka hrawh hna i
an kulhnak vampang hna le
innsang hna cu an tlu dih.
An khualak lam hna cu ahohmanh
an i chawh ti lonak
thetse ram ah ka ser cang.
An khuapi cu an rawk cang,
chuahtak an si cang,
mi an um ti lo.
7Ka cawnpiaknak vialte kha a hngalh
ṭhan lai ti ruahchannak in,
“A ṭih cu ka ṭih ko law
kan chimhhrinnak cu
na lung chungah i ken ko,” ka ti.
Sihmanhsehlaw hmasa nak hmanh
khan ṭhat lonak tuah kha
an duh deuh;
tuante khan an tho i ṭhat lonak
tuah awkah khan an i chawk.
Miphun Hna Dantatnak le Lungthlennak
8Cun Bawipa nih,
“Ka hngak tuah, miphun
hna sual ka phawt hna ni kha,
hngak tuah.
Miphun hna le siangpahrang hna
kha ka thinhunnak toih awkah
ka lung kaa thlek cang.
Vawlei hi a dihlak in
ka thinhunnak mei nih
a kangh lai.
9Khi tikah mi vialte kha hmur thiang
ka pek hna lai i
Bawipa min cu an auh lai i
lungkhat tein a rian an ṭuan lai.
10Ethiopia tiva hna ralchan i
aa ṭhekmi hna lakin ka sinah
zaangfahnak hal in
thla a cammi hna nih khan,
ka sinah an laksawng kha
an rak ka put lai.
A Taangmi A Chiah Hna
11Khi ni ah cun ka mi hna cu,
Keimah dohnak caah nan rak tuahmi
thil ruangah khan nan ning
a zak ti lai lo; zeicahtiah
nan mi aa porhlawmi le
a ruam a kaimi vialte hna kha
nan lakin ka ṭhial dih hna lai i
ka tlang thiang cungah hin
ruamkai in nan um ti lai lo.
12Cuka ah cun nunnem le toidormi kha
ka umter hna lai i
Bawipa min ah cun himnak
an kawl lai i
ka sinah bawmhnak hal awkah
a ra duhmi an si lai.
13Israel mi chungin a tangmi hna nih
khan ahohmanh nih ṭhat lonak
an tuah lai lo,
lih zong an chim lai lo,
hlennak bia kha an hmur in
a chuak ti lai lo.
Cun dai tein ramhring lakah khan
an tlong lai i
ahohmanh nih thinphang in
an umter ti hna lai lo. #Biat 14.5
Lunglawmhnak Hla
14Zion fanu, lunglawmhnak in au tuah,
Israel, teinak au in au tuah;
Jerusalem fanu, i lawm law
na lungthin dihlak in i lawm tuah.
15 Bawipa nih nangmah an dohtu hna kha
an ṭhawlpiak cang i
Na ral kha a dawi cang hna;
Bawipa Israel siangpahrang cu
nan lakah a um i
Rawhralnak kha na ṭih awk zeihmanh
a um ti lo.
16Khi ni ah cun mah hihi Jerusalem sin
chim ding bia cu a si lai:
Na thinphang hlah, Maw Zion, na kut
tha kha dorhter hna hlah.
17 Bawipa na Pathian cu, nangmah kha
him tein umter awkah na chungah
ralkap bantukin a um ko;
Na cungah a lung aa lawm lai i
a tha a nuam lai;
A dawtnak cu an hmuhter ṭhan lai;
Hlanlio bantuk khan na cungah
lunglawmhnak au thawng he
aa lawm lai.
18Nganfak in na ṭahnak kha
ka lakpiak lai i
Harnak na inmi ruangah cun nihsawh
serhsatnak kha na ing ti lai lo.
19Khi caan a phak tikah, zohhmanh,
Nangmah an hremtu vialte hna kha
keimah nih ka tongh hna lai.
A beimi kha ka chanh hna lai i
a ṭhekmi kha ka pumh hna lai;
Ka mi hna cu hmasa i zawmhtaih
an rak sinak ram paohpaoh ah
khan thangṭhatnak le
minthannak ka hmuhter
ṭhan hna lai.
20Kan pumh hna caan a phak tikah
cun inn ah kan tlunpi hna lai.
Nan vanṭhatnak kha kan pek ṭhan
hna tikah,
Vawleicung mi vialte sinah
minthannak le thangṭhatnak kha
kan hmuhter ṭhan hna lai i
cucu nan mit in nan hmuh lai.
Hi bia a chimtu hi Bawipa a si.
Currently Selected:
ZEFANIAH 3: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
