SALM 90
90
BU LINAK
(Slm 90 in 106 tiang)
Pathian le Minung Kong
Moses Thlacamnak
1Maw Bawipa, nangmah cu kan inn
na si zungzal!
2Tlang an sem hlan le vawlei kha
na ser hlan in nangmah cu zungzal in,
hramthawknak zong um lo
donghnak zong um loin
Pathian na si.
3Minung cu an rak sining ah khan
kir ṭhan u na ti hna,
vawlei ah na canter ṭhan hna.
4Kum thong khat hi nang caah cun
ni khat bantuk a si;
a dih cangmi nizan bantuk kha
a si ko,
zan khat chung i suimilam caan
tawite pakhat bantuk khi a si ko. #2Pet 3.8
5Tilian bantukin minung cu
na fenh hna;
zan mang bantuk men an si ko.
6Zinglei ah a hung keo i a hung ṭhang i
a par i zanlei ah cun a carmi
belh bantuk men an si ko.
7Na thinhunnak nih a kangh in
a kan kangh i
na thinlinhnak nih kan thin
a kan phanter.
8Kan sualnak cu na hmaiah
na chiah hna,
a thli tein kan sualnak cu
na hmuh dih ko hna.
9Na thinhunnak nih kan chan
a kan tawiter;
kan nunnak cu fifik bantuk men in
donghnak a phan.
10Kan chan cu kum sawm sarih a si ko,
kan thazang a ṭhawn deuh le
sawm riat a si;
cu hmanh ah retheihnak le harnak
lawng kha kan ing,
kan nunnak cu a dih zau i kan lo.
11Na thinhunnak hmual cu aho nih dah
fiang ngaingai in an hngalh?
Na thinlinhnak nih zei bantuk thil
ṭihnung dah a chuahter khawh
ti kha aho nih dah an hngalh?
12Kan nunnak hi zeitluk in dah a tawi ti
kha kan hngalhter law
cuticun kan fim deuh lai.
13 Bawipa, zei can dah kan cungah
lung ṭhul loin na um lai?
Na sal hna kan cungah hin
zaangfahnak ngei ko.
14Zing fate in a fekmi na dawtnak in
kan khahter,
cuticun hla kan sa lai i kan nun
chung vialte kan i lawm lai.
15Harnak kan in lio caan le kum
chungah
kan cungah na rak tluntermi
ngaihchiatnak zat khan
atu cu lunglawmhnak kan pe tuah.
16Kannih na sal rual hi khuaruahharmi
thil na tuahmi cu
kan hmuhter law kan tefa hna nih
a liannganmi na ṭhawnnak cu
hmu ve hna seh.
17 Bawipa kan Pathian, kan cungah
na thluachuahnak cu um seh law
kan thil timi kip ah khua awng
kan pemhter ko!
Kan thil timi kip ah khua awng
kan pemhter ko!
Currently Selected:
SALM 90: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
