SALM 75
75
Pathian Cu Biaceihtu A Si
Asaf Hla
1Nangmah cu kan in thangṭhat,
Maw Pathian, nangmah cu
kan in thangṭhat.
Zeitluk in dah na lianhngan kha
kan thanh i
khuaruahharmi thil na tuahmi kha
kan chim.
2Pathian nih, “Biaceihnak dingah
caan ka khiah cang i
aa buaktlak tein ka ceih hna lai.
3Vawlei le a cung i a ummi minung
vialte hi lo dih hna hmanh seh law
vawlei hram cu fek tein
ka umter lai.
4Miruamkai kha i porhlaw hlah u
ka ti hna i
miṭhalo kha nan lung puam hlah u,
ka ti hna;
5i leksuai ti hlah u ka ti hna i
i fak len ti hlah u ka ti hna,” a ti.
6Biaceihnak hi nichuahlei in siseh
nitlaklei in siseh a ra lo,
chaklei in siseh thlanglei in siseh
a ra lo;
7bia a ceihtu cu Pathian a si i
a cheu kha a ṭhumh hna i a cheu
kha a cawi hna,
8 Bawipa nih a kut in hrai pakhat aa put,
cu hrai cu zu hrim, a ṭhawng
ngaingaimi in a khat,
a thlet i miṭhalo vialte kha
a dinter hna,
a ne zongin an khawn dih.
9Sihmanhsehlaw kei cu Jakob Pathian
kong chim kha ka bang lai lo i
amah thangṭhatnak hla sak zong
kha ka ngol bal lai lo.
10Miṭhalo mi hna ṭhawnnak cu
a hrawh lai,
sihmanhsehlaw miding mi
ṭhawnnak kha cu a karh chin lai.
Currently Selected:
SALM 75: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
