SALM 73
73
BU THUMNAK
(Slm 73 in 89 tiang)
Asaf Hla
1Pathian hi Israel mi hna cungah
a ṭha taktak ko,
lung thiang a ngeimi hna cungah
a ṭha taktak ko.
2Sihmanhsehlaw kei cu ka rak tlu
dengmang,
ka rak nal dengmang;
3zeicahtiah miṭhalo hna an huncho
kha ka hmuh i
an i porhlawt kha ka theih tikah
cu nih cun ka nah a ka chuahter.
4Annih cu fahnak zeihmanh an ing lo,
an ngan a dam i an ṭhawng.
5Midang bantukin harnak zeihmanh
an tong lo,
midang bantukin temhinnak
zeihmanh an hmu lo.
6Cucaah cun ruamkai kha ṭhi bantukin
an i oih i
puarthau cu puan bantukin an i aih;
7An mit pawt lellul pipi in an um i
an lungthin cu ṭhat lonak
khuaruahnak in a khat.
8Midang kha zeihmanh ah
an rel hna lo i
thil ṭhalo lawng kha an ceih.
An ruam a kai i zeitindah midang kha
kan hrem khawh hna lai ti lawng
kha an ceih.
9Vancung i a ummi Pathian kha
an thangchiat i
vawleicung i a ummi minung kha
an duhduh in an ti hna.
10Cucaah cun Pathian mi hmanh nih
an merhnawh hna i
an chimmi paoh kha an zumh dih.
11An i thawh i, “Pathian nih cun
a hngal lai lo,
Cungnung Bik nih cun a hmu lem lai lo,” an ti.
12Miṭhalo mi cu hi bantuk hi an si ko.
Thil tampi an ngei i an ngei chin luaimai.
13A si kun ahcun, thiang tein
nun kaa zuam i
ka kut in sualnak tuah lo kaa sum hi
pakpalawng maw a si ko lai?
14Pathian, chun nitlak in harnak
na ka inter i
zing fate in dan na ka tat.
15Cu bantuk bia cu rak chim ning law
na mi hna cungah rawitu
ka rak si ṭung hnga.
16Cucaah cun hihi hngalh a har tuk
ko nain,
hngalh awkah kaa zuam;
17na biakinn chung i ka luh tik ceo ah
miṭhalo hna cungah zeidah
a tlung lai ti kha ka hngalh.
18Lam nal ah na chiah taktak hna i
rawhralnak chungah na tlakter hna.
19Chikkhatte ah an rawk i
an donghnak cu
ṭihnung ngaingai a si.
20 Bawipa, annih cu zanmang bantuk
an si,
na hun i hlauh tikah annih cu
an lo colh.
21Ka cekne tiangin a ka runh i ka thin
a ka khenh tikah;
22Ka hrut i zeihmanh ka hngalthiam
lo; na cung i ka umtuning cu
saram umtuning bantuk a si.
23Asinain nangmah sin ṭhiamṭhiam
ah khan ka um i
ka kut in na ka hruai.
24Ka kalnak dingah khan lungthin
na ka cheuh i
a donghnak ah cun upatnak he
na ka cohlan lai.
25Vancung ah khin nangmah hlei in
ahodah ka ngeih?
Nangmah kan ngeih cang caah vawlei
ah hin zeidah ka herhmi a um?
26Ka pum le ka ruahnak cu zorchuk hna
hmanh seh law
Pathian kha ka thazang a si;
amah lawnglawng kha
ka herhmi cu a si ko.
27Nangmah an hlawmi cu an thi
hrimhrim lai,
nangmah cungah zumhawktlak in
a um lomi cu na hrawh hna lai.
28Sihmanhsehlaw kei ca tu ah cun,
Pathian pawng um le,
Bawipa Pathian chungah i dor le
a tuahmi thil thanh hi
a va nuam hringhran dah!
Currently Selected:
SALM 73: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
