SALM 10
10
Luat Halnak Thlacam
1Maw Bawipa, zeicahdah lamhla tuk
ah na um?
Zeicahdah harnak caan ah
naa thuh?
2Miṭhalo cu an ruam a kai i
misifak kha an hrem hna;
anmah nih an chiahmi rap ah khan
i foih hna seh.
3Miṭhalo nih a duhnak ṭhalo kha
aa porhlaw i
hakkaumi nih Bawipa kha
a vawlhpamh i a hlawt.
4A ruam a kai caah miṭhalo nih cun
aa thawh i,
“Pathian nih cun dan a ka tat lai lo,
ka duhnak ṭhalo kha a zeihmanh
a poi lem lai lo,” a ti.
Miṭhalopa nih a ruahmi cu
cucu a si.
5A rianṭuannak ah a hlawh a tling.
Pathian biaceihning kha
a hngalthiam lo;
a ral kha a nih in a nihsawh hna.
6Amah le amah cu,
“Ka sung bal lai lo;
harnak ka tong bal lai lo,” aa ti.
7A bia cu chiatserhnak le lih le hronak
in a khat;
huat awk bia le bia ṭhalo chim ah
khan a khul a rang. #Rom 3.14
8Khuate ah khan aa thup riangmang i
a sual lomi kha a nawn hna.
Thah a duhmi kha aa ngiat hna i;
9chiandeih bantukin a bawh hna,
a rap in a foih hna i a kalpi hna.
10Vanchiapa cu a ril ko,
miṭhawngpa nih a thah.
11Miṭhalopa nih cun aa thawh i,
“Pathian cu a zeihmanh a poi lai lo,
a mit aa chinh i a ka hmu bal lai lo,” a ti.
12Maw Bawipa ra law ka khamh tuah!
Hremmi kha philh sawh hna hlah,
Pathian.
13Zeitindah miṭhalo hna nih cun
Pathian cu zeirello in
an um khawh lai i?
“Dan a kan tat bal lai lo,” an ti khawh lai?
14Nang nih cun na hmuh ko hna;
temhinnak le ngaihchiatnak
a ingmi cu na hngalh ko hna i
bawmh awkah naa tim zungzal ko.
Bawmhnak a herhmi kha
na bawmh zungzal hna caah
vanchiami nih nangmah kha
an in fuh.
15Miṭhalo le misual cu an ṭhawnnak
kha hrawk hna law
an ṭhat lonak ruangah khan
tling khitkhet in dantat hna.
16 Bawipa cu zungzal in zungzal tiang
siangpahrang a si i
a ram chung hin lawkihmi cu
an lo lai.
17 Bawipa, minauta cu an thlacamnak
kha na ngaihpiak hna i
lungṭhawnnak na pek hna.
18Hremmi hna le ngakṭah cu
an aunak kha na theihpiak hna i
anmah lei ṭanh in bia na ceih,
cucaah a thi khomi minung nih hin
thil ṭihnung kha an umter ti lai lo.
Currently Selected:
SALM 10: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
