PHUNGTHLUKBIA 30
30
Agur Bia
1Massa khuami Jakeh fapa
Agur bia:
Hi pa bia cu hitin a si:
Ka re a thei tuk, maw Pathian, ka re
a thei tuk i ka ba tuk cang;
2Holh thiam lomi saram men ka si ko,
minung hmanh ka si lo;
minung nih hngalhthiamnak
an ngeihmi hi ka ngei lo.
3Fimnak hi ka cawng bal lo i
A Thiang Mi sinin hngalhnak
zeihmanh ka hmu bal lo.
4Van ah khin ahodah a hung kai i
a ṭum ṭhan?
Aho nih dah a kut chungah thli kha
a hum hna?
Aho nih dah ti kha a puan in
a fun hna?
Aho nih dah vawlei cu a ramri kha
a ser hna?
A min cu ahodah a si i a fapa min cu
ahodah a si?
Na hngalh ahcun chim tuah.
5Pathian nih biakamnak a sermi
paohpaoh cu biatak a si tiah
a fiang cang;
amah chung i aa dormi hna caah cun
amah cu phaw a si.
6A bia zeihmanh chap hlah,
an sik sual lai i
lihchim na sinak kha
a lang sual lai.
7Thil pahnih kan hal, ka thih hlanah
pe loin ka um sawh hna hlah:
8Lihchim le hrokhrawl cu ka sinin
lamhlapi ah ṭhial ko hna;
Chamhbaunak siseh, rumnak siseh,
ka pe hlah;
ka ca i a herhmi rawl in ka cawm ko.
9Zeicahtiah tam tuk ka ngeih ahcun
kan hlawt sual lai i, “Bawipa cu
aho hen dah a si?” ka ti
sual lai;
ka si a fah ahcun ka fir sual lai i
ka Pathian min cu ka thurhhnawmh
sual lai.
10Sinum cu a bawipa sinah
congoih hlah,
chiat an serh sual lai i mawh
na phor sual lai.
11An pale kha chiat a serh i an nule kha
a thangṭhat lomi an um tawn,
12Anmah an i hmuhnak ah cun
a thiang i,
an fihnunnak aa thianh ṭung lomi
an um fawn;
13A ṭha hringhran i aa ruatmi zong
an um, aize, a ṭha tuk hringhran
ah khin pei an i ruah cu!
14Sifakmi kha ṭam dih awkah le
chambaumi kha ei dih awkah,
a ha vainam a si i a khabe ah
kawngthun aa bunhmi an um.
15Cangvat nih fanu pahnih a ngeih hna;
pakhat nih, “Ka pe,” a ti i
a dang pakhat nih, “Ka pe,” tiah
a ti ve.
thil pathum cim hngal lo an um;
thil pali “A za cang” a ti
bal lomi an um:
16Cu hna cu Sheol le a cingmi
chul le a ti a hal zungzalmi
vawlei le
“A za cang,” a ti bal lomi mei an si.
17a pa kha a nihsawh i a nu kha
a tar tikah zei ah a rel lomi cu,
a mit kha nelrawn langak nih
an khoih lai i langta nih an ei lai.
18Ka caah khuaruahhar tuk a simi thil
pathum an um;
Ka hngalh khawh lomi thil pali an si:
19Cu hna cu van i a zuangmi mupi lam,
lung cung i a kalmi rul lam,
rili cung i a kalmi sangphawlawng
lam le pa nih ngaknu he an kalnak
lam an si.
20Zumh awk tlak lomi nupi lam cu mah
hihi a si:
a ei i vaibar lote bangin, “Thil sual
zeihmanh ka tuah lo,” a ti.
21Thil pathum ruangah vawlei hi
a ther tawn;
thil pali hna hi, in khawh lomi an si:
22Cu hna cu sal siangpahrang ah
a can le
Mihrut a duhduh in ei awk a hmuh le
23Duh lomi nu nih va a ngeih le
Sinum nu nih a bawinu ro a co
hi an si.
24Thil hme tete pali vawlei cungah
hin an um,
Sihmanhsehlaw cu hna cu,
a fim bikmi nak hmanh in
an fim deuh:
25Cu hna cu hihi an si:
Hngerhte, a ṭhawngmi an si lo na i
an rawl ṭhal caan i aa khonmi;
26Saveh, a der ngaimi a si ko na i
lungkua chung i a inn a sami;
27Khaubawk, siangpahrang ngei a si lo
na i a rualrual in a kalmi;
28Ṭekral, kut in tlaih khawh a si ko na i
siangpahrang inn ah khua a sami.
29Hi thil pathum hna hi an kephau ah
rumra an ngei,
Hi thil pali hna hi an kal ah rumra
an ngei:
30Saram lak i a ṭhawng bik chiandeih,
zeihmanh a ṭih lomi,
31I zum ngaiin aa chawkmi arhli,
mehehtum le a mi hna hmai i
aa chawkmi siangpahrang.
32Na rak hruh i na rak i porhlawt i holh
fihnung a rak duhmi na si ahcun,
na lei cu i sum.
33Zeicahtiah hnuk hang cu cawh
lengmang ahcun a khal i
hnar cu thongh ahcun thisen a chuak,
Cu bantukin thinhunnak cu chuahter
lengmang ahcun rem lonak a chuak.
Currently Selected:
PHUNGTHLUKBIA 30: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
