NAMBAR 7
7
Hruaitu Pawl Pekchanhmi
1Moses nih puan biakinn cu a dirter dih i a thilri vialte he chiti a thuh i a thianter hna i biakṭheng le a umkheng vialte zong chiti a thuh i a thianter dih hna ni ah, 2relmi chung i a ummi Israel hruaitu hna, phun khat chung i lu a si ciomi hna, hrin khat chung i hruaitu a si ciomi hna nih cun pekchanhnak an tuah i 3an pekchanhnak cu Bawipa hmaiah an ratpi, khuh ngeimi leng paruk le cawtum hleihnih, hruaitu pahnih caah leng khat lengmang, cun pakhat caah cawtum pakhat lengmang; mah hna cu puan biakinn hmaiah an pekchanh hna. 4Cun Bawipa nih Moses cu, 5“Annih sinin mah hna hi cohlang hna, tonnak thlam rianṭuannak caah khan hman an si nakhnga, cun Levi mi kha pe hna, anmah le an rianṭuanning cio khan,” tiah a ti. 6Cu caah Moses nih leng le cawtum cu a lak hna i Levi mi kha a pek hna. 7Gershon fapa hna kha leng pahnih le cawtum pali a pek hna, an rianṭuanning bantukin; 8cun leng pali le cawtum pariat cu Merari fapa kha a pek hna, tlangbawi Aaron fapa Ithamar zohkhenhnak tang i an rianṭuanning in. 9Sihmanhsehlaw Kohath fapa cu zeihmanh a pe hna lo, zeicahtiah annih cu thil thiang, liang i put awk a simi hna zohkhenh kha thiah an si. 10Cun hruaitu hna nih cun biakṭheng thianternak ca i pekchanhnak cu an pek, chiti thuh a si ni ah cun; cun hruaitu hna nih cun an pekchanhnak cu biakṭheng hmaiah an pek. 11Cun Bawipa nih Moses sinah, “Annih nih an pekchanhnak cu an pek awk an si, ni khat ah hruaitu pakhat lengmang nih, biakṭheng pekchanhnak caah,” tiah a ti.
12A ni hmasa bik ah a pekchanhmi thil a pemi cu Amminadab fapa Nahshon, Judah hrin, kha a si; 13a pekchanhmi thil cu mah hi an si, ngun kheng pakhat shekel 130 a ritmi, ngun pakan kuar pakhat shekel 70 a ritmi, hmunthiang shekel ningin; an pahnih in changvut thawinak ca i chiti cawhmi changvut dip a khat veve in; 14cun sui pakan pakhat shekel 10 a ritmi, zihmui a khatte in, 15khangh thawinak ca i cawtum no pakhat, tuukawng pakhat, tuufa a pa kum khat a timi pakhat; 16sual thawinak ca i meheh a pa pakhat; 17cun daihnak pekchanhnak thawinak ca i cawtum pahnih, tuukawng panga, meheh a pa panga le tuufa a pa kum khat a timi panga. Mah hihi Amminadab fapa Nahshon i a pekchanhmi cu a si.
18Ni hnihnak ni ah Issakhar a hruaitu hna Zuar fapa Nethanel nih pekchanhnak a tuah; 19a pekchanhnak ca i a pekmi cu mah hi an si, ngun kheng pakhat shekel 130 a ritmi, ngun pakan kuar pakhat shekel 70 a ritmi, hmunthiang shekel ningin, changvut thawinak ca i chiti he cawhmi changvut dip a khat veve in; 20sui pakan pakhat shekel 10 a ritmi, zihmui a khatte in; 21khangh thawinak ca i cawtum no pakhat, tuukawng pakhat, tuufa a pa kum khat a timi pakhat; 22sual thawinak ca i meheh a pa pakhat; 23cun daihnak pekchanhnak thawinak ca i cawtum pahnih, tuukawng panga, meheh a pa panga, le tuufa a pa kum khat a timi panga. Mah hihi Zuar fapa Nethanel pekchanhmi cu a si.
24Ni thumnak ni ah Zebulun mi hna hruaitu Helon fapa Eliab cu a si: 25a pekchanhmi cu mah hi an si, ngun kheng pakhat shekel 130 a ritmi, ngun pakan kuar pakhat shekel 70 a ritmi, hmunthiang shekel ningin, an pahnih in changvut thawinak ca i chiti he cawhmi changvut dip a khat veve in; 26sui pakan shekel 10 a ritmi, zihmui a khatte in; 27khangh thawinak ca i cawtum no pakhat, tuukawng pakhat, tuufa a pa kum khat a timi pakhat; 28sual thawinak ca i meheh a pa pakhat; 29cun daihnak pekchanhnak thawinak ca i cawtum pahnih, tuukawng panga, meheh a pa panga le tuufa a pa kum khat a timi panga. Mah hihi Helon fapa Eliab pekchanhmi cu a si.
30Ni linak ni ah cun Reuben mi hruaitu Shedeur fapa Elizur kha a si: 31a pekchanhmi cu mah hi an si, ngun kheng pakhat shekel 130 a ritmi, ngun pakan kuar pakhat shekel 70 a ritmi, hmunthiang shekel ningin, an pahnih in changvut thawinak ca i chiti he cawhmi changvut dip a khat veve in, 32sui pakan pakhat, shekel 10 a ritmi, zihmui a khatte in; 33khangh thawinak ca i cawtum no pakhat, tuukawng pakhat, tuufa a pa kum khat a timi pakhat, 34sual thawinak ca i meheh a pa pakhat; 35cun daihnak pekchanhnak thawinak ca i cawtum pahnih, tuukawng panga, meheh a pa panga le tuufa a pa kum khat a timi panga. Mah hihi Shedeur fapa Elizur i a pekchanhmi cu a si.
36Ni nganak ni ah cun Simeon mi hna a hruaitu Zurishaddai fapa Shelumiel a si: 37a pekchanhmi cu mah hi an si, ngun kheng pakhat shekel 130 a ritmi, ngun pakan kuar pakhat shekel 70 a ritmi, hmunthiang shekel ningin, an pahnih in changvut thawinak ca i chiti cawhmi changvut dip a khat veve in; 38sui pakan pakhat shekel 10 a ritmi, zihmui a khat tein; 39khangh thawinak ca i cawtum no pakhat, tuukawng pakhat, tuufa a pa kum khat a timi pakhat; 40sual thawinak ca i meheh a pa pakhat; 41cun daihnak pekchanhnak thawinak ca i cawtum pahnih, tuukawng panga, meheh a pa panga le tuufa a pa kum khat a timi panga. Mah hihi Zurishaddai fapa Shelumiel pekchanhmi cu a si.
42Ni ruknak ni ah Gad mi a hruaitu hna Deuel fapa Eliasaf a si: 43a pekchanhmi cu, ngun kheng pakhat shekel 130 a ritmi, ngun pakan kuar pakhat, shekel 70 a ritmi, hmunthiang shekel ningin, an pahnih in changvut thawinak ca i chiti he cawhmi changvut dip a khat veve in; 44sui pakan pakhat shekel 10 a ritmi, zihmui a khat tein; 45khangh thawinak ca i cawtum no pakhat, tuukawng pakhat, tuufa a pa kum khat a timi pakhat; 46sual thawinak ca i meheh a pa pakhat; 47cun daihnak pekchanhnak thawinak ca i cawtum pahnih, tuukawng panga, meheh a pa panga, le tuufa a pa kum khat a timi panga. Mah hihi Deuel fapa Eliasaf pekchanhmi cu a si.
48Ni sarihnak ni ah Efraim mi a hruaitu hna Ammihud fapa Elishama a si: 49a pekchanhmi cu mah hi an si, ngun kheng pakhat shekel 130 a ritmi, ngun pakan kuar pakhat shekel 70 a ritmi, hmunthiang shekel ningin, an pahnih in changvut thawinak ca i chiti he cawhmi, changvut dip a khat veve in; 50sui pakan pakhat, shekel 10 a ritmi, zihmui a khat tein; 51khangh thawinak ca i cawtum no pakhat, tuukawng pakhat, tuufa a pa kum khat a timi pakhat; 52sual thawinak ca i meheh a pa pakhat; 53cun daihnak pekchanhnak thawinak ca i cawtum pahnih, tuukawng panga, meheh a pa panga le tuufa a pa kum khat a timi panga. Mah hihi Ammihud fapa Elishama pekchanhmi cu a si.
54Ni riatnak ni ah Manasseh mi a hruaitu hna Pedahzur fapa Gamaliel a si: 55a pekchanhmi cu mah hi an si, ngun kheng pakhat shekel 130 a ritmi, ngun pakan kuar pakhat shekel 70 a ritmi, hmunthiang shekel ningin, an pahnih in changvut thawinak ca i chiti he cawhmi changvut dip a khat veve in; 56sui pakan pakhat shekel 10 a ritmi, zihmui a khat tein; 57khangh thawinak ca i cawtum no pakhat, tuukawng pakhat, tuufa a pa kum khat a timi pakhat; 58sual thawinak ca i meheh a pa pakhat; 59cun daihnak pekchanhnak thawinak ca i cawtum pahnih, tuukawng panga, meheh a pa panga le tuufa a pa kum khat a timi panga. Mah hihi Pedahzur fapa Gamaliel pekchanhmi cu a si.
60Ni kuanak ni ah Benjamin mi a hruaitu hna Gideoni fapa Abidan a si: 61a pekchanhmi cu mah hi an si, ngun kheng pakhat shekel 130 a ritmi, ngun pakan kuar pakhat shekel 70 a ritmi, hmunthiang shekel ningin, an pahnih in changvut thawinak ca i chiti he cawhmi changvut dip a khat veve in; 62sui pakan pakhat shekel 10 a ritmi, zihmui a khat tein; 63khangh thawinak ca i cawtum no pakhat, tuukawng pakhat, tuufa a pa kum khat a timi pakhat; 64sual thawinak ca i meheh a pa pakhat; 65cun daihnak pekchanhnak thawinak ca i cawtum pahnih, tuukawng panga, meheh a pa panga le tuufa a pa kum khat a timi panga. Mah hihi Gideoni fapa Abidan i a pekchanhmi cu a si.
66Ni hranak ni ah Dan mi a hruaitu hna Ammishaddai fapa Ahiezer a si: 67a pekchanhmi cu mah hi an si, ngun kheng pakhat shekel 130 a ritmi, ngun pakan kuar pakhat shekel 70 a ritmi, hmunthiang shekel ningin, an pahnih in changvut thawinak ca i chiti he cawhmi changvut dip a khat veve in; 68sui pakan pakhat shekel 10 a ritmi, zihmui a khat tein; 69khangh thawinak ca i cawtum no pakhat, tuukawng pakhat, tuufa a pa kum khat a timi pakhat; 70sual thawinak ca i meheh a pa pakhat; 71cun daihnak pekchanhnak thawinak ca i cawtum pahnih, tuukawng panga, meheh a pa panga le tuufa a pa kum khat a timi panga. Mah hihi Ammishaddai fapa Ahiezer pekchanhmi cu a si.
72Ni hleikhatnak ni ah Asher mi a hruaitu hna Okhran fapa Pagiel a si: 73a pekchanhmi cu mah hi an si, ngun kheng pakhat shekel 130 a ritmi, ngun pakan kuar pakhat shekel 70 a ritmi, hmunthiang shekel ningin, an pahnih in changvut thawinak ca i chiti he cawhmi changvut dip a khat veve in; 74sui pakan pakhat shekel 10 a ritmi, zihmui a khat tein; 75khangh thawinak ca i cawtum no pakhat, tuukawng pakhat, tuufa a pa kum khat a timi pakhat; 76sual thawinak ca i meheh a pa pakhat; 77cun daihnak pekchanhnak thawinak ca i cawtum pahnih, tuukawng panga, meheh a pa panga le tuufa a pa kum khat a timi panga. Mah hihi Okhran fapa Pagiel pekchanhmi cu a si.
78Ni hleihnihnak ni ah, Naftali mi a hruaitu hna Enan fapa Ahira a si: 79amah pekchanhmi cu mah hi an si, ngun kheng pakhat shekel 130 a ritmi, ngun pakan kuar pakhat shekel 70 a ritmi, hmunthiang shekel ningin, an pahnih in changvut thawinak ca i chiti he cawhmi changvut dip a khat veve in; 80sui pakan pakhat shekel 10 a ritmi, zihmui a khatte in; 81khangh thawinak ca i cawtum no pakhat, tuukawng pakhat, tuufa a pa kum khat a timi pakhat; 82sual thawinak ca i meheh a pa pakhat; 83cun daihnak pekchanhnak thawinak ca i cawtum pahnih, tuukawng panga, meheh a pa panga le tuufa a pa kum khat a timi panga. Mah hihi Enan fapa Ahira pekchanhmi cu a si.
84Biakṭheng cu chiti thuh a si ni ah, Israel mi hruaitu hna sinin biakṭheng ca i pekchanhmi thil cu mah hihi a si: ngun kheng hleihnih, ngun pakan kuar hleihnih, sui pakan hleihnih, 85ngun kheng cu shekel 130 cio an rit, pakan kuar cu shekel 70 cio, umkheng chung ngun vialte cu shekel 2,400, hmunthiang shekel ningin, a si, 86sui pakan hleihnih hna kha, zihmui a khat cio ah, pakhat ah shekel 10 cio, hmunthiang shekel ningin, pakan chung i sui vialte cu shekel 120 a si; 87khangh thawinak ca i ṭilva vialte kha cawtum hleihnih, tuukawng hleihnih, tuufa a pa kum khat a timi hleihnih, an changvut thawinak cio he; cun meheh a pa hleihnih, sual thawinak caah; 88cun daihnak pekchanhnak thawinak ca i ṭilva vialte cawtum 24, tuukawng 60, meheh a pa 60, tuufa a pa kum khat a timi 60. Mah hihi biakṭheng ca i pekchanhmi thil cu a si, chiti thuh a si hnuah khan.
89Cun Moses nih tonnak thlam chungah Bawipa he i chawnh awk i a luh tikah khan biahngalhternak kuang cung i a ummi velngeihnak ṭhutdan cung khan, cherubim pahnih hna karlak khan amah a run chawntu aw cu a theih i cuticun amah cu a run chawnh.
Haka Bible © Bible Society of Myanmar, 1978.