NAHUM 2
2
Nineveh Cu A Ral Nih An Tei
1Na kulhnak ralhau i ralvennak
hrawhnak ding caah
ralhau chimhnak kha chiahhnawh
na si cang,
Na ralhau kha veng hna.
Lam kha hei zoh law tuk awk i tim.
Na thazang dihlak in chuah.
2(Bawipa nih Jakob sunparnak le
Israel rumra cu a pek ṭhan lio a si;
ramhtu nih khan an rak ramh hna i
an nge kha an rak phet dih ko nain).
3An ralkap hna phaw cu a sen in
an sen,
An ralkap hna cu a sen lawng tein
an i thuam;
An rangleng hna cu artlang in
an chiah hna tikah meizik
bantuk an si.
4Raltuknak rang hna nih cun a bubu in
khualipi cu an hun nam lulhmalh;
Khua pawngri ah cun pakhat le
pakhat kha an i eng,
Meifar tom lekmi bantuk khi an si;
5An hruitu hna nih khan an ralṭhatnak
kha an langhter,
Nimtlau bantukin a kenkip ah
a choi in an choi;
Khulrang in vampang ah khan
an hei tli i
raltuknak phaw kha
an va chon hna.
6Tiva luannak phihnak kha an phongh
hna i siangpahrang inn cu a tlu.
7Siangpahrangnu kha an tlaih i
A sal ngaknu hna cu an kalpi hna i
ṭhuro bangin hram lengmang in
an ṭang kha an i cum;
8Cun Nineveh cu tidil bantuk ah
a cang,
A velchum i a ummi ti a zor
lengmangmi bantuk kha
a si cang.
“Dir tuah, dir tuah,” tiah an au,
sihmanhsehlaw pakhat hmanh
an i mer lo.
9Hranchaw cu an lak hna, ngun le sui
hranchaw hna cu;
Thil an rak khonmi cu dongh
a thiam lo,
minung nih an duhmi thil
man fak bikbik nih a phak lomi
rothil an si.
10An ramh hna, an rok hna, an hlih
cikcek hna!
An ralṭhatnak cu ti bantuk ah
a cang i an khuk cu a ther dih,
An kutke cu a tom dih hna i
an hmai cu a daang dih.
11Khuazei ah dah atu cu chiandeih
kua kha a um?
Chiandeih fa an bawhnak lungkua
kha khuazei ah dah a um?
Chiandeih a pa le a pi le an fale rual,
ṭihnak zeihmanh ngei loin an i
chawh thluaimai tawnnak hmun
kha khuazei ah dah a um?
12Kha chiandeih nih khan a fale caah
khan sa cu a seh i
Chiandeih pi caah khan sa cu
a thleh a baoh i
A kua cu hranchaw le a sehmi sa cun
a khahter.
13Nangmah cu kaan ralchanh, tiah
Bawipa nih a ti.
Naa porhlawtnak cu meikhu bangin
dih lakin ka chuahter lai i
Vainam nih na fale cu a thah hna lai.
Vawlei cungah hin sa seh awk
kan nganhpiak ti lai lo i
Na rawl ei thawng cu theih a si ti
lai lo.
Currently Selected:
NAHUM 2: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
