MARKA 15
15
Pilat Hmaiah Jesuh
(Mat 27.1-2,11-14; Luk 23.1-5; Jhn 18.28-38)
1A thaizing zingkate ah tlangbawi upa hna cu haotu upa hna le phungbia cawnpiaktu saya hna le biaceihtu vialte hna he khan hnawhsare in an i pum i khua an khang. Jesuh cu thir cikcin in an khih i an kalpi i Pilat kut chungah khan an pek. 2Pilat nih, “Judah mi siangpahrang cu na si maw?” tiah a hal. Jesuh nih, “Na chim bangin ka si,” tiah a leh. 3Tlangbawi upa hna nih khan Jesuh cu bia tampi an puh. 4Cucaah Pilat nih cun a hal ṭhan i, “Na let hna lai lo maw? An in puhmi hi a tam ṭung,” tiah a ti. 5Jesuh cu holh loin a um i Pilat cu a khuaruah a har.
Jesuh Thah Awk Bia An Khiah
(Mat 27.15-26; Luk 23.13-25; Jhn 18.39—19.16)
6An Lanhtak Puai paoh ah khan Pilat nih an duhmi thongtla pakhat kha a chuahpiak tawn hna. 7Cu lioah cun ral a thomi, midang hna he ral an thawhnak i lai a nawngmipa Barabbas kha thong chungah cun a um. 8Mizapi nih khan, voi dang i na kan tuahpiak tawnmi kha kan tuahpiak rih tuah, tiah an ra hal tikah, 9Pilat nih cun a rak thawh hna i, “Judah mi siangpahrang hi kan chuahpiak seh, ti nan ka duhmi cu a si maw?” tiah a rak hal hna. 10Jesuh ka kut chung i an ka pek hi, tlangbawi upa nih an nahchuah caah a si, ti kha Pilat nih ṭha tein a hngalh. 11Sihmanhsehlaw tlangbawi upa pawl nih cun mizapi kha, Barabbas na kan chuahpiak lai, tiah Pilat kha nan hal lai, tiah an forh hna. 12Pilat nih mizapi cu a thawh ṭhan hna i, “A si ahcun, Judah siangpahrang nan timi pa hi tah zeitindah ka tuah kun lai?” tiah a ti hna. 13“Vailam ah tah ko,” tiah an au. 14Pilat nih cun, “Zei sualnak dah a tuah?” tiah a ti. Sihmanhsehlaw fak chinchin in an au i, “Vailam ah tah ko,” an ti. 15Mizapi kha Pilat nih an lung ton a duh hna caah Barabbas cu a thlahpiak hna. Cun Jesuh cu fung in a tukter hna i vailam i tah awkah a pek hna.
Ralkap Nih Jesuh An Dehcawh
(Mat 27.27-31; Jhn 19.2-3)
16Ralkap nih Jesuh cu Mangki bawi inntual ah khan an luhpi i an hawidang zong kha an auh hna. 17Jesuh cu puan sen kha an aih i hling in an phiarmi bawiluchin kha a lu ah an chinh. 18Salaam kha an pek i, “Judah mi Siangpahrang hi saupi nung ko seh!” an ti. 19A lu ah cun fung in an tuk i an cil an chak i an khuk an i bil i a hmaiah cun an kun. 20Cu ti i an cawhdeh dih in puan sen kha an hawh i amah puan kha an aihter ṭhan. Cun vailam i tah awkah an chuahpi.
Vailam Ah An Tah
(Mat 27.32-44; Luk 23.26-43; Jhn 19.17-27)
21Lampi ah mipa pakhat a min Simon a simi, khuate lei in Jerusalem leiah a kalmi kha an ton. Amah cu Jesuh vailam tahnak thing kha an hnek i an putter. (Hi Simon hi Sairin khuami Alekzandar le Rufas pa kha a si). #Rom 16.13 22Jesuh cu Golgotha hmun kha an phakpi, Golgotha a sullam cu Luruh Hmun tinak a si. 23Mitsur zu, Mura an timi he an cawhmi kha an hun tuh i a ding duh lo. 24Cuticun vailam ah cun an khenh chih i a puan kha an i phaw i aho nih dah a zei zawn hi a co lai tinak caah, camcawh fung in an zuh. #Slm 22.18 25Vailam i an khenh chih kha zinglei suimilam pakua ah a si. 26Sual an phawtnak ca cu, “Judah mi hna Siangpahrang,” tiah an ṭial. 27Jesuh sinah cun a orhlei kamah pakhat, a kehlei kamah pakhat, mifir pahnih an tah ve hna. 28Cuticun Cathiang nih, “Misual hna sinah telh chih a si,” a timi cu a tling. #Isa 53.12
29Aa chawkmi hna nih khan Jesuh cu an lu an thinhnawh i an nihsawh: “Biakinn cu na ṭheh dih i ni thum chungah na sak dih ṭhan taktak hi ta! #Slm 22.7; 109.25; Mar 14.58; Jhn 2.19 30Atu cu nangmah kha vailam cung khan rung ṭum law i khamh tuah ngat,” an ti. 31Cu bantuk ṭhiamṭhiam in tlangbawi upa hna le Phungbia cawnpiaktu saya hna nih khan Jesuh cu an nihsawh i, “Midang khamh ṭung in amah vial aa khamh kho ṭung lo hi ta! 32Israel mi siangpahrang Messiah cu, atu hrimhrim ah hin vailam tahnak cung hin rung ṭum seh law pei kan hmuh hnga i kan zumh khawh hnga cu!” an ti. Cun a sin i vailam an tahmi pahnih hna zong nih khan an nihsawh ve.
Jesuh Thihnak
(Mat 27.45-56; Luk 23.44-49; Jhn 19.28-30)
33Chun ah cu ram cu a dihlak in muihnak nih suimilam pathum chung a khuh. 34Zanlei suimilam pathum ah Jesuh cu fak piin a au i, “Eloi, Eloi, lema sabakthani,” tiah a ti, a sullam cu, “Ka Pathian, ka Pathian, zeicahdah na ka kaltak,” ti a si. #Slm 22.1 35Cuka i a ummi a cheukhat nih cu ti i a au cu an theih i, “Ngai hmanh u, Elijah a auh cuh!” an ti. 36Pakhat pa cu a va tli i puanchia kha mitsur zu thor chungah khan a hnim i fung par ah a ṭemh i Jesuh cu a hmur ah khan a hun tuh. “Amah kha vailamtahnak cungin ṭhumh awkah Elijah kha a rung ṭum hnga maw, zoh hnik u sih,” tiah a ti. #Slm 69.21 37Jesuh cu fak piin a au i a cat.
38Biakinn chung i aa zarmi puan kha a lu in a taw tiang cheu hnih ah aa cheu. #Exo 26.31-33 39Vailamtahnak hmai i a dirmi ralbawipa nih khan, Jesuh a au le a cah kha a hmuh tikah, “Hi pa cu Pathian Fapa a si hrimhrim ko,” tiah a ti. 40Cuka ah cun nu tlawmpal an um i lamhlat nawn in an cuanh. Cu hna lakah cun Salome le. Mary Magdalin le Jeim ngakchia deuh le Joses i an nu Mary kha an um ve. 41Jesuh cu Galilee i an um lioah khan an rak zulh tawn i an rak bawmh tawn. Amah he Jerusalem ah a rami nu tampi zong cuka ah cun an um ve. #Luk 8.2-3
Jesuh Vuinak
(Mat 27.57-61; Luk 23.50-56; Jhn 19.38-42)
42Zanlei sang tlai nawn a si cang i Arimathea khuami Josef kha a ra phan. 43Amah cu biaceihtu bu chung i an upatmi pakhat a si ve i Pathian Pennak a rat lainak aa ruahchihmi a si. Cu ni cu cawnningani a si (cucu Sabbath ni a nizan kha a si). Cucaah Josef cu ralṭha ngaiin Pilat sinah khan a vung lut i Jesuh ruak kha a hal. 44Pilat nih Jesuh cu a thi cang, ti kha a theih tikah a khuaruah a har ngai. Ralbawipa kha a auh i Jesuh cu a thi cang maw, tiah a hal. 45Ralbawi chimmi bia kha a theih hnuah Pilat nih Josef cu, Jesuh ruak kha na lak khawh, tiah a ti. 46Josef nih cun khiangrang puan pakhat a cawk i a ruak cu a ṭhumh hnuah puan cun a zual i lung an vihmi thlan chungah a vui. Cun thlanka ah cun lung nganpi a khar. 47Mary Magdalin le Joses nu Mary nih khan cucu an zoh i Jesuh an phumnak hmun kha an hmuh.
Currently Selected:
MARKA 15: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006