MATTHAI 5
5
Tlang Cung Cawnpiaknak
1Jesuh nih mi zapi kha a hmuh hna tikah tlang cungah a kai i cuka ah cun a ṭhu. A zultu hna kha amah velchum ah cun an i pum 2i a ka a pau i a cawnpiak hna:
Lunglawmhnak Taktak
(Luk 6.20-23)
3Mi chambau kan si ti aa hngalmi cu,
lunglawmmi nan va si dah!
Vancung Pennak cu nanmah ta a si.
4A ṭap a hrammi cu lunglawmmi
nan va si dah!
Pathian nih an hnemh hna lai. #Isa 61.2
5Nun a nemmi cu lunglawmmi
nan va si dah!
Pathian nih an kamhmi hna kha
nan co lai. #Slm 37.11
6Pathian duhnak tuah kha nan duhnak
ngan bik i a chiami cu
lunglawmmi nan va si dah!
Pathian nih nan duhnak cu
a tlinter lai. #Isa 55.1-2
7Midang cungah zaangfahnak
a ngeimi cu
lunglawmmi nan va si dah!
Pathian nih an zaangfah hna lai.
8Lungthin a thiangmi cu
lunglawmmi nan va si dah!
Pathian kha nan hmuh lai. #Slm 24.3-4
9Mi le mi karah remnak a sertu cu
lunglawmmi nan va si dah!
Pathian nih, ka fa, tiah an ti hna lai.
10Pathian nih tuah u, a timi
tuah ruangah hremnak a ingmi cu
lunglawmmi nan va si dah!
Vancung Pennak cu nanmah ta a si. #1Pet 3.14
11“Nannih cu ka zultu nan si ruangah mi nih an in nihsawh hna i an in hrem hna i lih a phunphun an in puh hna tikah, nan caah lunglawmh awk a va si dah! #1Pet 4.14 12Nan lung i lawm u law nan thanuam ko u, zeicahtiah vancung khua ah laksawng tampi chiahpiak nan si ko. Cu bantuk cun pei nan hlan i a rak ummi profet hna kha an rak hrem hna cu,” tiah a ti. #2Cha 36.16; Lam 7.52
Cite le Ceunak
(Mar 9.50; Luk 14.34-35)
13“Nannih cu vawlei cite nan si. Sihmanhsehlaw cite kha a alnak cu a loh ahcun, zeitindah alter khawh a si ṭhan ti lai? Santlaihnak kha a ngeih ti lo caah hlonh awk le lamh awk men a si ko cang. #Mar 9.50; Luk 14.34-35
14“Nannih cu vawlei ceunak nan si. Tlang cungah an tlakmi khua cu zeihmanh nih a phen kho lo. #Jhn 8.12; 9.5 15Ahohmanh nih meifar an van tikah kho an khuh bal lo, mei vannak tu ah khan an chiah tawn i inn chung i a ummi vialte kha a ceuh dih hna. #Mar 4.21; Luk 8.16; 11.33 16Cu bantukin nannih nan ceunak zong cu mi hmaiah a ceu awk a si, cuticun thil ṭha nan tuahmi kha an hmuh lai i vancung khua i a ummi nan Pa kha an thangṭhat lai. #1Pet 2.12
Phungbia Kong Cawnpiaknak
17“Moses Nawlbia hna le profet hna cawnpiaknak kha hrawh awkah a ra, tiah ka ruat hlah u. Annih kha hrawh awkah si loin, an cawnpiaknak kha tlinter awk tu ah ka ra. 18Mah hihi philh hlah u! Van le vawlei an hmunh chung paohpaoh cu Phungbia hi a deh pakhatte hmanh siseh, a rin pakhatte hmanh siseh a rawk lai lo — zeizong vialte hi a donghnak an phak hlanah cun an rawk lai lo. #Luk 16.17 19Cucaah cun ahohmanh nih nawlbia lak i a hme bik te hmanh kha zul loin a um i midang zong kha cu bantukin a cawnpiak hna ahcun, cu pa cu Vancung Pennak chungah a hme bik a si lai. Cun Nawlbia kha a zul i midang zong kha, cu bantukin zulh awk, tiah a cawnpiakmi hna cu, Vancung Pennak ah mi ngan a si lai. 20Cucaah Pathian nih tuah hna seh, ti an duhmi hna tuahnak ah, Phungbia cawnpiaktu saya hna le Farasi mi hna nakin nan fel deuh lo ahcun, Vancung Pennak chungah cun nan lut kho lai lo.
Thinhunnak Kong Cawnpiaknak
(Luk 12.57-59)
21“ ‘Lai va nawng hlah u, lai a nawngmi paoh cu biaceihtu hmaiah chuahpi a si lai, tiah hlanlio mi an rak ti tawn hna, ti kha nan theih. #Exo 20.13; Deu 5.17 22Asinain kei nih cun, ‘A u a nau cung i a thin a hungmi paoh cu biaceihtu hmaiah chuahpi nan si lai i a u siseh, a nau siseh, “Zei rua ram lo,” a timi paoh cu biaceihtu bu sinah chuahpi nan si lai; cun ahohmanh, a u siseh, a nau siseh, “Mihrut” a timi paoh cu hell mei chung i tlak awkah aa tlakmi nan si lai,’ kan ti hna. 23Cucaah Pathian sinah nan laksawng cu biakṭheng cung i pekchanh na zalh tikah khan, na unau pakhatkhat kha na cungah thinhunnak a ngei ti na hun hngalh ahcun, 24biakṭheng hmaiah cun na laksawng cu chia ta law khulrang in va kal law na unau he khan remnak va tuah, cu hnuah cun ra ṭhan law Pathian sinah na laksawng cu va pe.
25“Mi pakhatkhat nih taza an cuai i zung ah an chuahpi ahcun, a caan a um rih lio, zung nan phak hlanah khan, amah he cun remnak tuah i zuam; cuka na phak hnuah cun biaceihtu sinah khan hluai na si lai i biaceihtu nih cun palik sinah an chanh chin lai i thong ah an in thlak lai. 26Biangai tein kan chimh, dan an in tatmi a dongh tiang khitkhet na in hlantiang thong ah cun na um lai.
27“Nu le pa sualnak va tuah hlah, an ti tawn cu nan theih. #Exo 20.14; Deu 5.18 28Sihmanhsehlaw kei nih cun, ahohmanh nih nu kha sual duhnak lungthin he a zoh ahcun, cu pa cu a lung chungin a sual cang, tiah kan ti hna. 29Cucaah na orhlei mit nih an sualter ahcun, khoih law hlonh ko. Na pum dihlak hell chung tlak nakcun na pum cung thil pakhatkhat na sungh cu a ṭha deuh. #Mat 18.9; Mar 9.47 30Na orhlei kut nih an sualter ahcun tan law hlonh ko. Na pum a ningpi in hell chung i tlak nakcun na kutke pakhatkhat sungh cu a ṭha deuh vingvan. #Mat 18.8; Mar 9.43
Nupi Maknak Kong
(Mat 19.9; Mar 10.11-12; Luk 16.18)
31“Ahohmanh nih a nupi kha a mak ahcun maknak ca kha pe seh, tiah ti a si fawn. #Deu 24.1-4; Mat 19.7; Mar 10.4 32Sihmanhsehlaw kei nih cun, hitihin ka ti: Mipa nih a nupi kha, zumhawktlak loin a um ti ṭung lo i a mak ahcun, a nupi kha va a ngeih tikah vacung in pa a duhter a si, cucaah mipa kha a sual; cun amah a rak ṭhitu zong kha a sual ve ṭhiamṭhiam. #Mat 19.9; Mar 10.11-12; Luk 16.18; 1Kor 7.10-11
Biakam Kong
33“Bia nan i kammi kha i let hlah u, Bawipa sinah chiatser in nan i kam cangmi cu nan tuah hrimhrim awk a si, tiah hlanlio mi hna an rak ti hna kha nan theih. #Lev 19.12; Nam 30.2; Deu 23.21 34Sihmanhsehlaw atu cu hihi kan chimh hna: Biakamnak nan tuah tikah chiatser biahrennak zeihmanh tuah hlah u; vancung khua chalh in chiatser hlah u, zeicahtiah vancung khua cu Pathian ṭhutnak a si; #Jei 5.12; Isa 66.1; Mat 23.22 35vawlei chalh zongin chiatser hlah u, zeicahtiah vawlei cu Pathian ke chiahnak a si; Jerusalem khua chalh zongin chiatser hlah u, zeicahtiah Jerusalem khua cu Siangpahrang ngan khua a si. #Isa 66.1; Slm 48.2 36Nanmah lu chalh zongin chiatser hlah u, zeicahtiah nan samfa fa khat hmanh nan dumter kho in nan ranter kho lo. 37‘Asi,’ ‘Asilo,’ ti lawng kha chim ko u, cu pin cu Mi Ṭhalopa sinin a rami thil an si.
Teirul Chamnak Kong
(Luk 6.29-30)
38“Mit caah mit ve, ha caah ha ve, tiin an rak ti tawn kha nan theih. #Exo 21.24; Lev 24.20; Deu 19.1 39Sihmanhsehlaw kei nih cun, nan cung i ṭhat lonak a tuahtu hna kha lehrul hna hlah u, kan ti hna. Nan orhlei bel ah an in bengh hna ahcun khatlei zong kha i chit rih u. 40Cun nan angki chungnawh lak awkah taza an in cuai hna ahcun nan angki leng zong kha va pe rih hna u. 41Cun an uktu ralkap hna nih, an thil phorh kha, khan khat an in fial hna ahcun, khan hnih in va phorhpiak hna u. 42Mi nih thil an in hal hna tikah va pe hna u, an in cawi hna tikah va cawih hna u.
Nan Ral Va Daw Hna U
(Luk 6.27-28,32-36)
43“Nan hawi kha va daw hna u law nan ral kha va hua hna u, tiah an ti tawn kha nan theih. #Lev 19.18 44Sihmanhsehlaw kei nih cun, hitihin kan ti hna: nan ral kha va daw hna u law an hremtu hna kha thla va campiak hna u, 45Cuticun vancung khua i a ummi nan Pa fale cu nan si lai. Anih nih cun a ṭhami he a ṭha lomi he, an cungah a ni kha a tlanter i, ṭhatnak a tuahmi he ṭhat lonak a tuahmi he, an cungah a ruah kha a surter. 46Zeicahdah an dawtu hna lawng nan dawt hna tikah, Pathian nih laksawng an pek hna lai? Ngunkhuai khawltu hna hmanh nih cucu an tuah ko ṭung. 47Cun nan hawikom lawng kha nan chawnh hna ahcun, zeital a hlei in nan tuahmi a um maw? Pathian bia lo hmanh nih cucu an tuah ko ṭung. 48Vancung khua i a ummi nan Pa a tlin bantukin nannih zong nan tlin awk a si. #Lev 19.12; Deu 18.13
Currently Selected:
MATTHAI 5: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006