MATTHAI 4
4
Jesuh Tukforh Innak
(Mar 1.12-13; Luk 4.1-13)
1Cun Thlarau nih Jesuh cu, Satan nih rak tukforh awkah, ramlak ah a kalpi. #Heb 2.18; 4.15 2Ni sawm li le zan sawm li rawl loin a um hnuah Jesuh cu a rawl a ṭam ngaingai. 3Khuachia cu a sinah a ra i, “Nangmah cu Pathian Fapa na si ahcun, hi lung hi changreu ah canter hna ngat,” tiah a ti.
4Jesuh nih cun, “Cathiang nih pei,
‘Minung hi rawl lawngin
a nung kho lo,
sihmanhsehlaw Pathian nih
a chimmi bia paoh cu a nunnak
a si lai,’ a ti kha,”
tiah a ti. #Deu 8.3
5Khuachia nih cun Jesuh cu khua thiang ah khan a kalpi i biakinn parpahlek ah khan a chiah. 6Cun a thawh i, “Nangmah cu Pathian Fapa na si ahcun, vawlei ah khin vung zuang tuah; zeicahtiah Cathiang nih pei,
‘Pathian nih nangmah kong ah
a vancungmi kha nawl a pek hna i
annih nih an kut in an in cawi lai i
na ke cu lung ah naa khawng lai lo,’ a ti kha,” tiah a ti. #Slm 96.1-12
7Jesuh nih a thawh i,
“Cathiang nih pei,
‘Bawipa na Pathian cu
hneksak hlah,’ a ti ve kha,”
tiah a leh. #Deu 6.16
8Cun Khuachia nih cun Jesuh cu tlang sang ngaingaimi pakhat ah a kalpi i vawleicung ram vialte le an sunparnak vialte kha a hmuhsak i, 9“Na khuk naa bil i na ka biak ahcun hi vialte hi kan pek dih lai,” tiah a ti. 10Cun Jesuh nih a leh i, “Satan, va kal cang, Cathiang nih pei,
‘Bawipa na Pathian cu va bia law,
amah rian lawnglawng va ṭuan,’
a ti kha,”
tiah a ti. #Deu 6.13 11Cun Khuachia nih cun a kaltak i vancungmi kha an ra i an rung hramh.
Jesuh Nih Galilee Ah Rianṭuan Hram Aa Thawk
(Mar 1.14-15; Luk 4.14-15)
12Jesuh nih Johan kha thong ah an thlak ti a theih tikah Galilee ram ah khan lo diam in a kal. #Mat 14.3; Mar 6.17; Luk 3.19-20 13Nazareth khua ah khan um loin Kapernaum khua tu ah khan a um; Kapernaum khua cu Zebulun le Naftali phun hna ram chung i a ummi khua, Galilee Rili pawng i a ummi kha a si. #Jhn 2.2
14Cuti in a tuah cu profet Isaiah nih,
“Jordan tiva khattelei ral,
rili lei hoih ah a ummi,
15Zebulun le Naftali ram hna,
Jentail mi hna Galilee —
16Muihnak chung i a ummi
hna nih khan ceunak nganpi
an hmuh lai.
Thihnak ram mui chung i
a ummi hna cungah
ceunak a tlung lai,” a rak
timi kha tlinter awk caah a si. #Isa 9.1-2
17Cu caan thawk cun Jesuh nih, “Vancung Pennak a nai cang caah, nan sualnak kha mertak cang hna u,” tiah a chimh lengmang hna. #Mat 3.2
Jesuh Nih Ngatlai Pali A Auh Hna
(Mar 1.16-20; Luk 5.1-11)
18Jesuh cu Galilee Rili kam i aa chawh lengmang lioah khan ngatlaitu unau a hmuh hna i cu hna cu Simon (Peter timi kha) le a nau Andru kha an si; rili chungah cun sur in nga an rak chep len ko; 19annih cu Jesuh nih cun a hei auh hna i, “Ka zul u, mi tlaitu si awk kan cawnpiak hna lai,” tiah a ti hna, 20An sur cu an kaltak zau i amah cu an zulh.
21A hei kal deuh i unau Jeim le Johan, Zebedi fapa hna kha a hmuh hna. Annih cu an pa Zebedi he khan lawng chungah khan an rak um i an sur cu an rak timhtuah len ko. Jesuh nih cun a vun kawh hna i 22chikkhatte ah an lawng le an pa cu an kaltak hna i Jesuh cu an zulh.
Jesuh Nih A Cawnpiak Hna, A Chimh Hna I A Damter Hna
(Luk 6.17-19)
23Jesuh cu Galilee ram dihlak ah khan aa chawk i pumhnak inn ah khan a cawnpiak hna i pennak Thawngṭha kha a chimh hna i zawtnak le fahnak a ingmi a phunphun kha a damter hna. #Mat 9.35; Mar 1.39 24Amah thawng cu Siria ram zongah khan a thang dih i zawtnak a phunphun in a zawmi vialte hna le harnak a phunphun a ingmi hna kha amah sinah cun an ratpi hna: khuavang nih a tuahmi hna le mitlu a simi hna le a zengmi hna kha a damter dih hna. 25Galilee ram le Khua Pahra timi peng khan le Jerusalem khua le Judea ram le Jordan tiva khattelei ral ram in mi tampi an ra i amah kha an zulh.
Currently Selected:
MATTHAI 4: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006