MATTHAI 26
26
Jesuh An Rawinak
(Mar 14.1-2; Luk 22.1-2; Jhn 11.45-53)
1Jesuh nih hi bia vialte cu a chimh dih hna tikah a zultu pawl kha a thawh hna i, 2“Nan hngalh bantukin, hi hnu ni hnih ah, Lanhtak Puai kha a si cang lai, cun Mi Fapa cu vailam tahnak i khenhchih awkah tlaihter a si lai,” tiah a ti hna. #Exo 12.1-27
3Cun tlangbawi upa pawl le Judah mi upa hna kha Tlangbawi Ngan Kaiafas innpi ah cun an i pum i 4a thli tein Jesuh kha tlaih i thah ding kha khua an khang. 5“Puai chungah cun kan tuah lai lo, mizapi an i tuai sual lai,” an ti.
Jesuh Chiti A Thuh
(Mar 14.3-9; Jhn 12.1-8)
6Jesuh cu Bethani khua i thinghmui Simon inn i a um lioah khan, 7nu pakhat a ra i lungrang thawl khatte in zihmui a man a fak ngaingaimi kha a rak i put i rawl a ei lioah khan a lu ah a toih. #Luk 7.37-38 8A zultu hna nih khan cucu an hmuh tikah an thin a hung i, “Zeicahdah hi thil hi hitihin a sawksam ee? 9Hi zihmui hi tangka tampi ah zuar i tangka cu misifak hna kha pek khawh ding a si ṭung,” an ti. 10Jesuh nih an i ceihmi cu a theih i, “Zeicahdah hi nu hi nan hnahnawh? A ka tuahpiakmi hi thil ṭha le thil dawh pei a si hi. 11Misifak cu zungzal in pei nan sinah an um ko lai cu, kei cu zungzal in nan sinah ka um ṭung lai lo. #Deu 15.11 12Zihmui ka pum i a ka toih hi vui awk ca i a ka timhtuah pei a si cu. 13Hihi philh hlah u: hi thawngṭha hi vawlei cung khuazakip i an chimnak hmun paoh ah, a tuahmi thil hi amah philh lonak ah chim a si zungzal ve lai,” tiah a ti hna.
Judas A Hna A Tla
(Mar 14.10-11; Luk 22.3-6)
14Cun zultu pahleihnih lak i pakhat, Judas Iskariot timi kha, tlangbawi upa pawl sinah khan a va kal i 15“Jesuh cu nan kut chung i kan chanh hna ahcun zeidah nan ka pek lai?” tiah a va ti hna. Cucaah ngun tangka sawm thum kha an rel i an pek. #Zek 11.12 16Cu ri cun Judas nih khan Jesuh rawinak ding caan rem kha a bawh.
Jesuh le Zultu Hna Lanhtak Rawl An Ei
(Mar 14.12-21; Luk 22.7-14,21-23; Jhn 13.21-30)
17Thilnu Cawh Lo Changreu Puai a ni hmasa bik ah khan, a zultu kha Jesuh sinah cun an ra i, “Khuazei ah dah Lanhtak Puai Zanriah cu va tim u ti na kan duh?” tiah an ti. 18Annih cu, “Khua chung i mipa pakhat sinah va kal u law, kan Sayapa nih, ‘Ka caan a phan cang, ka zultu hna he na inn ah Lanhtak Zanriah ei kan duh,’ a ti tiah va chim u,” tiah a ti hna. 19A zultu pawl nih khan Jesuh nih a chimh hna bang cun Lanhtak Zanriah cu an timh.
20Zanlei sang a hung si tikah Jesuh le a zultu hleihnih hna cu rawl ei awkah khan an ṭhu 21Rawl an ei lioah cun, “Nan lak i pakhat nih hin nan ka rawi lai,” tiah a ti hna. 22A zultu pawl cu an awlok a chong i pakhat hnu pakhat in, “Na ti duhmi cu kei cu ka si lo, a si lo mei?” tiah an ti duahmah cio. 23Jesuh nih cun, “Ka changreu ka hnimnak kheng i a changreu a hnim vemi nih hin a ka lei lai. #Slm 41.9 24Mi Fapa cu Cathiang nih a thi lai a tining khan a thi lai, sihmanhsehlaw Mi Fapa a rawitu caah cun ngaihchia a si ko. Cu pa cu chuak loin rak um seh law a caah a ṭha deuh hnga,” tiah a ti. 25Leitu Judas nih khan a hun i thawh i, “Saya, keimah na ka ti duhnak cu a si i mei?” tiah a hal. Jesuh nih cun, “Na chim ko cu ta,” tiah a leh.
Bawipa Zanriah
(Mar 14.22-26; Luk 22.14-20; 1Kor 11.23-25)
26Zanriah an ei lioah cun Jesuh nih khan changreu kha a lak i thla a cam dih in a cheu i a zultu kha a pek hna. “I lak u law ei u; hihi ka pum a si,” tiah a ti. 27Cun hrai kha a lak i Pathian sinah lawmhnak bia a chim dih in, annih cu a pek hna i, “Nan dihlak in ding u. 28Hihi ka thi a si, biakam fehternak thisen, sual ngaihthiamnak ca i mi tampi ca i thletmi cu a si. #Exo 24.8; Jer 31.31-34 29Hihi kan chimh hna: Ka Pa Pennak chungah nanmah he a thar in ka din ṭhan hlantiang hi mitsur hang hi ka ding ti lai lo,” tiah a ti. 30Cun hla an sa i Oliv tlang ah khan an kal.
Peter Nih A Hlawt Lainak
(Mar 14.27-31; Luk 22.31-34; Jhn 13.36-38)
31Jesuh nih annih cu a thawh hna i, “Cathiang nih, ‘Pathian nih tuukhal kha a thah lai i tuurun chung tuu kha an i ṭhek dih lai,’ a ti caah, tuzan hrimhrim ah hin nan dihlak in nan ka zamtak lai. #Zek 13.7 32Sihmanhsehlaw nunter ṭhan ka si tikah nan hmaiah Galilee ah ka rak kal chung lai,” tiah a ti hna. #Mat 28.16 33Peter nih khan Jesuh cu a hun thawh i, “Midang vialte nih in zamtak hna hmanh seh law, kei cu kan zamtak bal lai lo,” tiah a ti. 34Jesuh nih Peter cu, “Hihi va philh hlah: Tuzan i ar a khuan hlan ah amah cu ka hngal lo, tiah voi thum na ka ti lai,” tiah a ti. 35Peter nih cun, “Na sin i ka thih ve ding a si hmanh ah, amah cu ka hngal lo, kan ti bal lai lo,” tiah a leh. Cu bantuk cun zultu dang vialte zong nih khan an ti cio.
Gethsemane Dum Ah Thla A Cam
(Mar 14.32-42; Luk 22.39-46)
36Cun Jesuh cu Gethsemane an timi hmun ah khan a zultu hna he khan an kal i annih cu, “Khika i thla ka va cam kar ah khin, hika ah hin rak ṭhu u,” tiah a ti hna. 37Peter le Zebedi fapa pahnih hna kha aa kalpi hna. A ngaih a chia i a awlok a chong. 38Annih cu a thawh hna i, “Ka lungre a thei tuk hringhran i ka thi sual lai. Cucaah cun hika ah hin rak um u law hngilh lo tein rak ka hngak u,” tiah a ti hna. 39Hmailei ah khin tlawmpal a va kal i vawlei ah a bawk i, “Ka Pa, a si khawh ahcun hi hrai hi ka ṭhialpiak ko. Sihmanhsehlaw keimah duhmi cu si hlah seh, nangmah duhmi tu si ko seh,” tiah thla a cam.
40Cun a ra kir i a zultu pathum hna cu an rak i hngilh kha a hmuh hna; cun Peter kha, “Suimilam pakhat hmanh hngilh loin nan ka hngak kho lo maw? 41Tukforhnak chungah nan luh nakhnga lo hngilh lo tein um u law thlacam tuah u. Thlarau nih cun a huam ko, sihmanhsehlaw titsa cu a der,” tiah a ti.
42Cun Jesuh cu a va kal ṭhan i, “Ka Pa, hi hrai hi din loin hrial khawh a si lo ahcun, nangmah duhnak bangin si ko seh,” tiah thla a cam. 43A zultu hna sinah khan a ra kir ṭhan i an rak i hngilh ṭhan; an mit a au in an au kho lo.
44Jesuh nih cun a kaltak ṭhan hna i a voi thumnak thla a cam ṭhan, a chim cia kha a chim ṭhan. 45Cun a zultu hna sinah khan a ra kir ṭhan i, “Nan i hngilh i nan i din ko rih maw? Zohhmanh u, Mi Fapa cu misual mi hna kut chung i chanhnak caan kha a phan cang. 46Tho u law, kal u sih. A ka rawitu kan sin a phan cang,” tiah a ti hna.
Jesuh Tlaihnak
(Mar 14.43-50; Luk 22.47-53; Jhn 18.3-12)
47Bia a chim lengmang lioah cun a zultu hleihnih lak i a rak i tel vemi Judas kha a ra phan. Tlangbawi upa pawl le Judah upa hna nih an thlahmi mi runpi kha nam le thingtan i put in aa ratpi hna. 48Rawitu nih cun mizapi cu hmelchunhnak a rak pek cia hna i, “Ka hnamhmi cu tlaih nan duhmi kha a si lai i nan tlaih colh lai,” tiah a ti hna. 49Judas nih cun a phak cangka tein Jesuh cu a hei fuh i, “Saya, na cungah daihnak um ko seh,” tiah a ti i a hnamh colh. 50Jesuh nih cun, “Ka kawi, khulrang in tuah ko kun,” tiah a leh. Cun an hung chuak i Jesuh cu an tlaih i fek tein an khih. 51Jesuh sin i a ummi pakhat nih khan a nam aa zuh i Tlangbawi Ngan sal hnakhaw kha pet lakin a tuk. 52Jesuh nih anih cu, “Na nam cu a kawng ah sawh ṭhan ko, zeicahtiah hriamnam a lami cu hriamnam in an thi lai. 53Ka pa kha bawmhnak ka hal khawh ko i khulrang in vancungmi ralkap bu hleihnih a run ka thlah khawh ko ti kha na hngal lo maw? 54Sihmanhsehlaw cu ti a si ahcun, zeitindah hi bantukin a si lai, tiah a rak chimtu Cathiang bia cu a tlin khawh kun hnga?” tiah a ti.
55Cun Jesuh nih mibupi cu a thawh hna i, “Kei cu damiah hei si ning law cu bang, zeicahdah tlaih awkah nam le thingtan he nan ka fuh? Nifate in pei Biakinn ah ka ṭhu i kan cawnpiak lengmang ko hna cu, nan ka tlaih ṭung lo. #Luk 19.47; 21.37 56Sihmanhsehlaw hi thil vialte hi bantukin a sinak cu profet nih Cathiang chungah an rak ṭialmi kha a tlinnak ding caah a si,” a ti.
Cun a zultu hna nih khan an dihlak in an zamtak i an le dih.
Biaceihtu Bu Hmaiah An Chuahpi
(Mar 14.53-65; Luk 22.54-55,63-71; Jhn 18.13-14,19-24)
57Jesuh cu a tlaitu hna nih khan Tlangbawi Ngan Kaiafas inn ah khan an kalpi i cuka ah cun Phungbia cawnpiaktu saya hna le upa hna kha an rak i pum. 58Peter nih lamhlat nawn khin a zulh i Tlangbawi Ngan inntual tiang kha a va kal. Inntual chungah khan a va lut i zeitindah thil a hung umtuning a si lai ti hngalh duh ah ralveng pawl sinah khan a ṭhu. 59Tlangbawi upa pawl le biaceihtu pawl nih khan an thah khawhnak hnga, an dihlak in a sual an kawl, 60sihmanhsehlaw an hmu kho lo. Lihchimmi tehte tampi an hung chuak nain an hmu kho hlei lo. A donghnak ah pahnih an hung chuak i, 61“Hi pa nih hin ‘Pathian Biakinn hi ka ṭheh lai i ni thum chungah ka sak ṭhan dih lai,’ a ti,” tiah an ti. #Jhn 2.19
62Tlangbawi Ngan kha a hung dir i Jesuh cu, “Hi hna nih sual an in puhmi hi na let kho hna maw?” tiah a ti. 63Sihmanhsehlaw Jesuh cu dai tein a um ko. Cun Tlangbawi Ngan cu a hun i nolh ṭhan i, “A nungmi Pathian min chalh in, na chim hrimhrim lai, kan ti: Pathian fapa Messiah cu na si maw si lo, chim,” tiah a ti. 64Jesuh nih cun, “Na chim ko cu ta. Sihmanhsehlaw nan dihlak in hihi kan chimh hna: Atu ri hin cun Mi Fapa hi, Cung Nung Bik orhlei i a ṭhut le khuadawm cungin a rat kha nan hmuh lai,” tiah a leh hna. #Dan 7.13 65Cu bia a theih tikah cun Tlangbawi Ngan nih khan a puan kha a thleh i, “Cucu Pathian thangchiat a si. Tehte dang ahohmanh kan herh ti hna lo. Pathian thangchiatnak bia a chimmi cu nanmah nih nan theih ko cang. #Lev 24.16 66Zeitindah nan ruah?” tiah a ti. Annih nih, “A sual, thih awk a tlak,” tiah an leh.
67Cun a hmaiah cil an chak i an tuk; cun a bengtu hna nih khan an thawh i, #Isa 50.6 68“Messiah cu pei na si fam cu, ahodah an beng, kan chim tuah ngat?” an ti.
Peter Nih Jesuh A Hlawt
(Mar 14.66-72; Luk 22.56-62; Jhn 18.15-18,25-27)
69Peter cu lengah, inntual ah khan a ṭhu. Tlangbawi Ngan salnu pakhat kha a ra i, “Nangmah zong hi Galilee ram mi Jesuh sin i a rak um tawnmi na si ve ko,” tiah a ti. 70Sihmanhsehlaw an dihlak hmaiah cun Peter nih khan aa pheh. “Na chimmi kong hi ka hngal lo,” tiah a leh i 71tual kutka leiah khan a va chuak. Sinum ngaknu dang pakhat nih a rak hmuh ṭhan i, “Hi pa zong hi Nazareth khuami Jesuh sin i a rak ummi a si ve,” tiah cuka i a ummi kha a chimh hna. 72Peter nih aa pheh ṭhan i, “Cu pa cu ka hngal lo tiah chiatser in ka chim,” tiah a leh. 73Cu hnu tlawmpal ah cuka i a dirmi hna nih khan Peter cu an hei fuh i, “Phehthuh hau loin nang cu an sin i a rak i tel vemi na si hrimhrim ko. Na aw cawi nih an phuan,” tiah an ti. 74Cun Peter nih cun chiatser in, “Biatak ka chim lo a si ahcun Pathian nih dan ka tat seh. Cu pa cu ka hngal hrim lo,” tiah a ti. Cu caan te ah cun ar a hung khuang i 75Peter nih cun Jesuh nih, “Ar a khuan hlanah ‘Amah cu ka hngal lo,’ tiah voi thum na ka ti lai,” tiah a rak chimmi kha a lung ah a hung pem.
A chuak i fak piin a ṭap.
Currently Selected:
MATTHAI 26: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006