MATTHAI 16

Khuaruahhar Tuah An Fial

(Mar 8.11-13; Luk 12.54-56)

1Farasi mi le Sadusi mi tlawmpal kha Jesuh sinah cun an ra i amah kha foih an duh caah, vancung in a rungmi khuaruahhar kan hmuhsak tuah, an ti. #Mat 12.38; Luk 11.16 2Cun Jesuh nih cun, “Zanlei ah cun, ‘Van kam a sen, thaizing cu khua a ṭha lai,’ nan ti i 3zinglei ah cun, ‘Van kam a sen i khua a dawm, nihin cu ruah a sur lai,’ nan ti. Nikhua zeidah a lawh lai ti kha van nan zohnak in nan hngalh khawh, sihmanhsehlaw atu caan hmelchunhnak hi cu an sullam nan hngal kho hna lo. 4Tuchan mi hi mi ṭhalo le Pathian zei i a rel lomi nan si. Khuaruahharnak tuah nan ka fial, sihmanhsehlaw ka tuah lai lo. Khuaruahharnak tuahpiak nan si dingmi cu Jonah khuaruahharnak lawnglawng kha a si lai,” tiah a ti. #Mat 12.39; Luk 11.29

Cun lo diam in a kaltak hna.

Farasi Mi Le Sadusi Mi Thilnu

(Mar 8.14-21)

5A zultu pawl cu rili khattelei kamah lawngin an va kal ah khan changreu phorh an philh. 6Jesuh nih cun a thawh hna i, “Farasi mi hna le Sadusi mi hna thilnu kha i ralring u,” tiah a ti hna. #Luk 12.1

7Cu tikah anmah le anmah cu, “Hi bia a chim hi changreu kan i phorh lo caah a si,” tiah an i ceih. 8Jesuh nih an chimmi cu a hngalh i cucaah, “Changreu nan ngeih lo kong kha zeicahdah nan i ceih len ko? Nan zumhnak a va tlawm hringhran dah! 9Nan hngal kho bal rih lo maw? Changreu hlum nga in minung thong nga ka dangh hna ah khan, sei zeizat dah nan char kha nan hngal ti maw? #Mat 14.17-21 10Cun hlum sarih in thong li ka dangh hna ah khan tah sei zeizat dah nan char kha? #Mat 15.34-38 11Nannih kan chimhmi hna hi changreu kong a si lo tiah zeitindah nan hngalh khawh lo ee? Farasi mi le Sadusi mi hna thilnu cu i ralring tuah u,” tiah a ti hna.

12Khi tikah a zultu pawl nih khan, i ralring u, a kan timi hi changreu rawhnak thilnu kha si loin, Farasi mi hna le Sadusi mi hna cawnpiaknak kha a si, ti kha an hngalh.

Peter Nih Jesuh Kong A Phuan

(Mar 8.27-30; Luk 9.18-21)

13Jesuh cu Sisaria Filipi khua pawng ram ah khan a va kal i a zultu hna cu, “Mi nih Mi Fapa hi aho a si, an ka ti dah?” tiah a hal hna.

14Annih nih, “A cheu nih Tipil petu Johan a si, an in ti. A cheu nih, Elijah a si, an in ti, a cheu nih Jeremiah maw profet pakhatkhat dik a si, an in ti,” tiah an leh. #Mat 14.1-2; Mar 6.14-15; Luk 9.7-8

15Cun a thawh hna i, “Nannih tah, aho a si nan ka ti dah?” tiah a hal hna.

16Simon Peter nih a leh i, “A Nungmi Pathian Fapa, Messiah kha na si,” tiah a ti. #Mat 18.18; Jhn 20.23

17Jesuh nih cun, “Johan fapa Simon, mi vanṭha ngaingai na si! Zeicahtiah hi biatak cu minung sinin na hngalhmi a si lo i vancung i a ummi ka Pa nih an pekmi a si. 18Cucaah cun nang cu lung tum, Peter, na si, kan ti. Cun hi lungpi cungah hin ka Khrihfabu hram ka bunh lai i cucu thihnak hmanh nih a tei kho lai lo. 19Vancung Pennak hunnak tawhfung cu kan pek lai i vawlei cung i na hrenhmi cu vancung zongah hrenh a si lai i vawlei cung i na awnhmi cu vancung zongah awnh a si lai,” tiah a ti.

20Cun Jesuh nih Messiah a si cu ahohmanh chim hna hlah u, tiah a thlauh hna.

Temhnak le Thihnak A In Ding A Chimh Hna

(Mar 8.31—9.1; Luk 9.22-27)

21Cu caan thawk cun Jesuh nih a zultu hna cu, “Jerusalem ah ka kal lai i upa hna le tlangbawi ngan upa pawl hna le Phungbia cawnpiaktu saya hna nih harnak tampi an ka pek lai. An ka thah lai i ni thum ni ah nunter ṭhan ka si lai,” tiah fiang tein a chimh hna. 22Peter nih a dang deuh ah khin a hei i kalpi i a mawhchiat. “Bawipa, hi thil cu Pathian nih na cungah tlunter sawh hlah seh,” tiah a ti.

23Jesuh cu a hun i mer i Peter cu, “Satan, ka sinah um hlah. Na ruahnak hi Pathian ruahnak si loin minung ruahnak a si caah ka caah dawntu na si,” tiah a ti.

24Cun Jesuh nih a zultu cu a thawh hna i, “Ahohmanh nih zulh nan ka duh ahcun, nanmah le nanmah nan i philh i nan vailamtahnak nan i put i nan ka zulh a herh. #Mat 10.38; Luk 14.27 25Zeicahtiah ahohmanh, mah nunnak humhak a duhmi cu a nunnak kha a sung lai i keimah ruangah a nunnak a sungmi cu a nunnak a hmumi a si lai. #Mat 10.39; Luk 17.33; Jhn 12.25 26Mi nih hin vawlei pumpi hi co hmanh seh law, a nunnak a sungh ṭung ahcun zeital a miak hnga maw? A miak lai lo. A nunnak kha zeihmanh in a caw ṭhan kho lai lo. 27Mi Fapa hi ka Pa sunparnak in tuan ah ka vancungmi hna he ka ra lai i mi vialte kha an rian ṭuan ning cio in laksawng ka pek hna lai. #Mat 25.31; Slm 62.12; Rom 2.6 28Hihi philh hlah u. Mi Fapa cu Siangpahrang bantukin ka rat nan ka hmuh hlan cu a thi lo dingmi hika ah hin nan um,” tiah a ti hna.

Currently Selected:

MATTHAI 16: HCL06

Highlight

Copy

Compare