ṬAHNAK HLA 3
3
Pathian Dawtnak Fek A Hmun
1Temhinnak a hngaltu cu
keimah ka si,
A thinhunnak fungfek cu ka in cang.
2Keimah hi a ka kalpi i
Ceunak a um lonak muihnak chung i
a ka kaltakmi cu ka si.
3Keimah lawng hi a kut in
a ka rialchih ko i
cuticun chun nitlak in a si ko.
4Ka tit le ka cuar cu sawng ṭiamṭuam
in a tuah dih hna i
ka ruh cu a khiah dih hna;
5Ka velchum in vampang kha
a chon hna,
ka hnulei he ka hmailei he,
6A thihnak a saupi cangmipa bantuk
khan a muimi hmun chungah
a ka hlonh.
7Ka luat khawh nakhnga lo vampang
chungah a ka erh i
hreng a ka khenh;
8Ka au i bawmhnak ka hal hmanh ah
ka thlacam cu a ka ngai duh lo.
9Ka lam ah cun lungtum a hronh hna i
ka lam cu a hnawhter.
10Vom bantukin a ka bawh i
Mi a bawh ziartu chiandeih bantukin
a ka bawh.
11Ka lam kha a kawiter, ka ke kha
a ka beiter i
cihai lileng in a ka kaltak.
12A likuk kha a za a sih i
Keimah cu cantiang hna ca hmuichon
ah a ka ser.
13A thalbawm chungin aa chuahmi thal
hna khan ka kal kha a chunh hna.
14Miphun vialte hna caah nihchuak ah
ka cang i,
Chun nitlak in an hla-eng sakhnawhmi
hmuichon ka si cang.
15A khami an in a ka khimter i
Anfangkha in a ka ritter.
16Lung cungah ka ha kha a ka
beuhpiak hna;
Vutcam a ka eiter i ngakṭahnak in
a ka hrem;
17Daihnak kha ka nunnak chungin
a chuak cang i
Nunnuamh kha zei a si ka philh cang.
18Khi tikah ka thazang a um ti lo, tiah
ka au i,
Cuticun Bawipa kaa ruahchannak
zong a lo ve.
19Ka temhnak le ka vahvaihnak
ka ruah ah hin
Anfangkha le hnitkha bantuk
an si ko.
20Cucu run ka hngalhpiak, maw run ka
ka hngalhpiak ko law,
run ka hlawm ko sawh.
21Hi vialte hi ka lung chungah
kaa chiah hna i
Cucaah ka ngan filfial ko lai:
22 Bawipa dawtnak a fekmi cu, a dong
hrimhrim lai lo,
A zaangfahnak zong a cat lai lo;
23Zing fate in an thar lengmang,
Zumhtlak a sinak cu a lianngan
hringhran.
24Ka ngeihmi dihlak cu Bawipa hi a si
ko, ka ti;
Cucaah amah cu lungsau in
ka ngan ko lai;
25 Bawipa cu amah aa bochanmi hna
vialte cungah a ṭha.
26Cucaah a kan khamhnak ding cu
lungsau in kan hngah awk a si.
27Cu lungsau cu kan no lio i
kan hngalh ah a ṭha bik.
28Harnak kan in tikah kanmah lawng
tein daite le lungsau in
kan ṭhut awk le
29Amah duhnak zulh in kan lu
kan khun awk a si.
Zeicahtiah ruahchan awk
a um kho rih ko.
30An kan tuk i an kan nihsawh zongah
kan i in awk a si ko.
31Zeicahtiah Bawipa nih cun a sal hna
cu zungzal in a hlaw hna lai lo.
32Fak piin dan a tat hna lai nain
A dawtnak a tam rup in an cungah
zaangfahnak a ngei lai;
33Minung hi a hrem hna le dan
a tat hna hi,
A duh taktak caah a tuahmi a si lo.
34Ram chung i thongtlami hna
mi zeihmanh hi ke in lamh le
35Cung Nung Bik zeirello in um i
mi cu an hmuhtheih awk hnga
a simi chuh le
36Zung chung i biading merh hna hi
Bawipa nih a hnatlakpimi an si bal lo.
37Bawipa nih a thlauhmi thil cu
Aho nih dah tuah si seh tiah
nawl a pek khawh lai?
38A chia siseh a ṭha siseh,
Cung Nung Bik kaa chungin
a chuakmi an si lo maw?
39Zeicahdah minung, a thi khomi
minung nih hin, a phun a zai lai?
40Kannih nih kan lam kha zoh ṭhan hna
u si law, hneksak hna u si law
Bawipa sinah kir ṭhan u sih;
41Kannih nih, kan kut lawng kha
si loin, kan lung tu kha vancung
Pathian sinah hler u sih.
42Kanmah hrimhrim te hi a sual i
an dohtu cu kan si i
Nangmah nih na kan ngaihthiam
kho lo.
43Thinhun in naa mer i na kan dawi i
zaangfahnak um loin na kan thah;
44Khuadawm pinah khin,
kan thlacamnak nih a phak
lengah khin naa thup;
45Miphun hna lakah hlonhmi thil le
hmunthur bantukin na kan tuah.
46Kan ral hna nih an dihlak in an ka
an kan an hnawh i an kan nihsawh.
47Kan hmaiah sadawitu khanhawtnak
le khor le chiatnak le
rawhralnak kha an um.
48Ka mi hna hma ruangah
Ka mitthli tiva ti bangin a luang.
49-50Vancung i a ummi Bawipa nih khin
a run ka zoh i
Ka temhinnak kha a run ka hmuh ko
lioah hin
Ka mit cu a dong lomi mitthli in
a luang i
zeihmanh nih a hnem kho hna lo;
51Ka khuachung ngaknu vialte hna
nih an tonmi thil in Bawipa nih
a ka hrem.
52Zeiruanglo ah ka ral a simi hna nih
Va bantukin an ka dawi;
53Khor chungah cun an ka nam i
Ka cungah khor cu lung in an chinh;
54Ti nih ka lu a ka phum i
‘Ka donghnak a phan cang,’ tiah
ka ti.
55Sihmanhsehlaw maw Bawipa,
nangmah min cu
Khor tawne khan ka hun auh;
56Ka aw kha na theih;
‘Keimah chanh awkah ra tuah,’
tiah ka au tikah,
Na hna i cheh sawh hlah.
57Nangmah kha kan auh tikah
ka pawngah na um;
Nangmah nih, ‘Ṭih hlah,’ na ka ti.
58Bawipa, nangmah nih ka bia cu na ka
chimpiak i ka nunnak cu na tlanh;
59Maw Bawipa, nangmah nih ka cung i
dinlonak an tuahmi cu na hmuh i
Keimah lei ca ṭha in biakhiahnak kha
na tuah;
60Phuhlam an duhnak le
Keimah cung i rawinak an tuahmi
vialte cu na hmuh dih.
61Maw Bawipa, an ka zawmhtaihnak le
an ka rawinak liangluang hna le,
62Ka ral hna nih chun nitlak in
an ka congoihnak le
an ka thangchiatnak cu, na theih.
63Annih nih an ṭhut ah siseh,
an dir ah siseh,
zeitindah an ka thangchiat cu
zoh tuah.
64Maw Bawipa, an tuahmi ruangah
lehrul ko hna,
Annih nih hmuh awkah an i tlakmi cu
pe ko hna.
65Na lung kha zeitluk in dah a hah
khawh ti kha hmuhsak hna law
Annih zawnruahnak kha zeitluk
tlawm dah na ngeih ti kha
hngalhter ko hna.
66Maw Bawipa, thinhun in dawi hna law
na van tangin hlo hna.
Currently Selected:
ṬAHNAK HLA 3: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
