ṬAHNAK HLA 1
1
Jerusalem A Rawk Cang
1Hmasa i minung a rak khat tawnmi
khua kha,
Zeitindah umhar in a ṭhut ko ee!
Hmasa i miphun hna lak i khua
lianngan a rak simi kha,
Zeitindah nuhmei ah a can;
Ram uktu bawinu a rak simi kha
hnekmi rianṭuantu ah a cang ko ee!
2Zan ah lunghno in a ṭap,
A bel ah a mitthli a luang;
Amah a dawtu hna lakah khan
A hnemtu pakhat hmanh an um lo;
A hawi vialte cu rawitu ah an cang
dih i a ral ah an i cang dih.
3Saltang harnak chungah le
A dong lo rian hrang ṭuannak
chungah Judah cu a lut cang,
Miphun hna lakah khua a sa i
dinhnak hmun a hmu lo;
Amah a harnak chungah khan
A dawitu hna nih khan an phak.
4Zion lei kalnak lam kha an ṭap,
zeitintiah a puai thiang ah khan
a rami an um lo;
A kutka vialte cu an rawk dih,
a tlangbawi hna cu an hrum an ai;
A ngaknu hna cu lamhlatpi ah
an hnuh hna i
Amah hrimhrim nih fak piin a in.
5A ral hna cu a bawi ah an cang,
A ral hna cu nuam tein an um,
Zeitintiah a tuahmi a ṭha lomi
rel cawk lo ruangah khan
Bawipa nih amah cu fak piin dan a tat;
A fano cu an lo dih,
Ral nih khan saltannak chungah
an kalpi hna.
6Zion fanu sinin lianhngannak vialte
a lo cang,
A bawi hna cu, ram ṭam awk hmu
kho loin a zam lengmangmi sakhi,
ba cikcek in sakap nih
an dawimi bantuk an si.
7Jerusalem nih hremnak a in lio caan
le a vahvaih lio caan kha
a hngalh camcin ko,
A mi hna cu an ral kut chungah
an tlak i
Annih bawmtu ahohmanh an um
lo lio caan kha, a philh kho lo.
A ral nih cun a hmuh i a ṭumchuknak
kha diriam in a nihsawh.
8Jerusalem cu fak piin a sual ko,
Cucaah puanchia thur bantuk ah
rel a si cang;
A rak upat tawntu vialte nih khan
zei ah an rel ti lo,
Zeicahtiah a taklawng in a um kha
an hmuh.
Cucaah a hrum a ai i ningzak in
mi hmai a zoh ngam ti lo.
9A hni ah thurhnawmhnak cu aa beh i
Hmailei a sicannak ding kha a ruat lo.
A tluknak cu zumh khawh lo tiangin
a si i
Amah hnemtu ah ahohmanh
an um lo.
Bawipa, a harnak hi nangmah nih
run zohpiak law,
Zeitindah a ral nih an tei kha
run hmuhpiak ko.
10A ro vialte kha tlaih awkah a ral nih
a kut kha a chuah;
Khi tikah khan, nangmah na mibu
chungah luh awk na thlauhmi
Jentail mi hna a hmunthiang chung i
an luh kha a hmuh hna.
11A mi vialte hna cu an hrum an ai,
Rawl kha heh tiah an hal;
An thazang kha hmuh ṭhan awkah
An rothil cu rawl ah an zuar hna.
“Maw Bawipa, run ka zoh law,
Zeitluk in dah zohchuk ka si kha
run ka hmu tuah,” tiah a ṭap.
12Lam i aa chawkmi hna nan caah,
Mah hihi zeihmanhlo maw a si ko?
A zoh tal cu ka zohpiak ko sawh u:
Ka lungfahnak bantuk lungfahnak hi
a um maw?
Bawipa nih a thinhun ni ah
zaangfahnak um loin
dan a ka tatnak hremnak
bantuk hi a um ti maw?
13Vancung in mei a run thlah i
Ka ruh chungah khan a vak dih;
Ka ke kha foih awkah sur a phah i
Hnulei ah a ka kirter ṭhan;
Ṭiaonak tahchunhnak caah a ka ser i
Chun nitlak zawtnak in a ka hrem.
14Ka palhnak cu ka cungah ṭem chih
an si i
Amah kut hrim nih ka velchum
in a ngerh hna;
A hngawngkual cu ka hngawng
ah khan a ka khinh i
A rih tuk caah ka tha nih a celh lo;
Cu ti i a ka khinh bu cun Bawipa nih
a ka kaltak i ka dir kho lo.
15Ka khua kulh chung i a ummi
miṭhawng vialte hna cu
Bawipa nih zeihmanh ah a rel hna lo;
Ka ralkap valno rual kha cil dih
awkah ralkap kha
a ka pumhhnawh luaimai hna.
Bawipa nih Judah fanu thiang cu,
Mitsur nennak chung i mitsur thei
bantukin a ke in a cil.
16Hi thil hna ruangah hin ka ṭap i
Ka mit cu mitthli in a luang;
Keimah hnemtu ding le ka thazang
hrimhtertu ding cu
lamhlapi lawngah an um.
Ka fapale hna cu lileng in an um,
Ral nih a tei hna caah.
17Zion nih a za a zao,
Sihmanhsehlaw a hnemtu ahohmanh
an um lo;
Bawipa nih Jakob innpa hna cu,
Amah ral ah nan cang lai,
tiah nawl a pek hna;
Jerusalem cu an lakah
Puanchia fihnung ah a cang cang.
18 Bawipa cu a ding ko;
A nawl a altu cu keimah ka si.
Ngai tuah u, nannih miphun
vialte hna, ngai tuah u law
ka lungfahnak hi ka zohpiak tuah u:
Ka ngaknu thiang hna le ka tlangval
hna cu saltannak chungah
an kal cang.
19A ka dawtu kha ka kawh hna,
Sihmanhsehlaw zumhawktlak
an si ti lo;
Khua chung i a ummi ka tlangbawi
hna le upa hna kha,
An thazang hrimh ṭhan awk caah
rawl an kawl nain,
Zeihmanh an hmu lo.
20Maw Bawipa, zeitluk in dah ka lungre
a theih hi run zoh tuah.
Ka lung si a vang i
Ka chungthin aa let dih,
Nangmah kha zeihmanh ruat loin
kan doh caah a si.
Vainam nih khualak lam ah ngakṭah
a ser hna i
Rai nih inn chungah ngakṭah
a ser hna.
21Hnemtu zeihmanh ngei loin
ka aihram len ko hi
ka theihpiak ko.
Ka ral vialte hna nih ka harnak hi
an theih tikah,
Nangmah tuahmi ah hin an i lawm;
Sihmanhsehlaw nangmah nih,
keimah bantuk an si ve naklai
ni bia na kammi kha
khulrang in tlunter ko.
22Ṭhat lonak an tuahmi vialte cu
na hmaika kha phan ko hna seh;
Ka ṭhat lonak vialte ruangah
nangmah nih
na ka hrem bantukin
Annih zong hrem ve ko hna;
Zeicahtiah ka aihramnak cu
a tam ko i
Ka lung cu a tha a ba ko.
Currently Selected:
ṬAHNAK HLA 1: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
