JOSHUA 9
9
Gibeon Nih An Hlen Hna
1Jordan tiva ral tlangram le rawnram Rili Ngan kam ram thluahmah in Lebanon tlang tiang i a ummi Hit mi hna le Amor mi hna le Kanaan mi hna le Periz mi hna le Hiv mi hna le Jebus mi hna siangpahrang vialte hna nih mah hi kong cu an theih tikah, 2Joshua le Israel cu doh awkah lung khat in an i pum.
3Sihmanhsehlaw Gibeon khuami hna nih Joshua nih Jeriko le Ai cungah a tuahmi kha an theih tikah, 4annih nih cun zer ngaiin an tuah; an kal i riahcaw an i rawnh i an laa hna kha sawngkhoi ṭet le a ṭet i a tlek i belhmi saphaw zucua kha an phorhter hna i, 5a ṭet i belhchommi kedan an i danh i hnipuan ṭet ṭiapṭuap an i aih; cun an riahcaw vialte cu a car i a buar dihmi an si. 6Cun Gilgal riahhmun ah khan Joshua le Israel mi hna sinah an va kal i, “Ram hla piin a rami kan si, cucaah kanmah he biakamnak ser u,” tiah an ti. 7Sihmanhsehlaw Israel mi hna nih cun Hiv mi hna sinah cun, “Kanmah lak i a ummi nan si sual men ko hnga; cu ti a si ahcun zeitindah nannih he biakamnak kan tuah khawh lai?” tiah an ti. #Exo 23.32; 34.12; Deu 7.2 8Annih nih Joshua sinah, “Na sal kan si ko hi ta,” tiah an ti. Cun Joshua nih annih cu, “Ahodah nan si, cun khuazei in dah nan rat?” tiah a ti hna. 9Annih nih, “Bawipa na Pathian min ruangah ram hlat piin na sal hna hi kan ra; zeitindah Izipt ram ah a tuahmi vialte le 10Amor mi hna siangpahrang pahnih Jordan tiva ral i a ummi, Heshbon siangpahrang Sihon le Bashan siangpahrang Og, Ashtaroth ah a ummi hna cung i a tuahmi vialte kha kan theih. #Nam 21.21-35 11Cun kan upa hna le kan ram minung vialte hna nih, ‘Lampi caah riahcaw i rawnh u law, va kal u law, va tong hna u, cun annih sinah, “Kannih cu nan sal kan si; ra u law, kanmah he biakamnak ser u,” tiah va ti hna u,’ tiah an kan ti. 12Kan riahcaw ca i kan changreu hna hi, nannih sin rat awk i kan inn in kan i thawh ni ah cun a lumte an si, sihmanhsehlaw atu cu, zohhmanh u, an car dih i an buar dih cang; 13hi saphaw zucua hna hi kan rak rawn hna ah cun a tharte an rak si; sihmanhsehlaw, zohhmanh u, atu an kak dih cang; cun hi kan hnipuan hna le kan kedan hna hi kan ratnak lam a hlat tuk caah an ṭet dih cang,” tiah an ti. 14Cucaah mi hna nih cun an hun phorhmi riahcaw cu an ei pi hna i Bawipa awka zeihmanh an ngai lo. 15Cun Joshua nih annih he remnak a ser i annih kha nunter dingah annih he biakamnak a ser; cun aa pummi hruaitu hna nih annih sinah chiat an ser.
16Annih nih an sin i biakamnak an ser hnu ni thum ah an pawng ummi an si le an lak i an i cawh kha an theih. 17Cun Israel mi cu an i thawh i an khua cu a ni thumnak ni ah an va phanh hna. An khua hna cu Gibeon, Khefirah, Beeroth le Kiriath-jearim an si. 18Sihmanhsehlaw Israel mi nih cun an that hna lo, zeicahtiah aa pummi hruaitu nih khan Bawipa Israel Pathian chalh in an sinah chiat an ser cang. Khi tikah aa pummi vialte nih cu hruaitu hna cungah khan an phunzai. 19Sihmanhsehlaw hruaitu vialte hna nih khan aa pummi vialte sinah, “Kannih nih Bawipa Israel Pathian chalh in annih sinah chiat kan ser cang i cucaah kan tawngh hna ahcun a ṭha hnga lo. 20Mah hihi an cungah kan tuah lai i nung ko hna seh, kannih nih an sin i chiat kan rak ser cangmi biakamnak ruangah khan kan cungah thinhunnak a tlung sual ai hnga,” tiah an ti. 21Cun hruaitu hna nih cun, “Nung ko hna seh,” tiah an ti hna. Cucaah hruaitu hna nih annih kongah an chim bang khan, annih cu aa pummi vialte caah, thinghlamtu le tithantu ah an cang.
22Joshua nih a kawh hna i annih cu, “Zeicahdah kan sinah nan um ko nain, ‘Nan sinin lam hlatpi i a ummi kan si,’ tiin nan kan hlen? 23Cucaah nannih cu chiatserhmi nan si cang i, a cheu cu thing hlamtu le ti thantu sal, ka Pathian inn caah nan si zungzal lai,” tiah a ti hna. 24Annih nih Joshua cu an leh i, “Bawipa na Pathian nih a sal Moses kha hi ram hi a dihlak in nanmah kha pek awk le nan hmai in hi ram chung i a ummi vialte kha hrawh awkah nawl a pek ti kha fiang tein na sal hna kha an kan chimh i, cucaah nanmah ruangah hin kan nunnak kongah kan thin a phan ngaingai caah mah hi kan tuah. 25Atu ah hin zohhmanh, na kut chungah kan um ko: na mithmuh ah a ṭha le a dik na ti bantukin kan cungah cun tuah ko,” tiah an ti. 26Cu bang cun an cungah a tuah i Israel mi hna kut chung khan a chuah hna i an that hna lo. 27Sihmanhsehlaw Joshua nih khi ni ah cun aa pummi ca le a thim laimi hmun i Bawipa biakṭheng caah annih cu nihin ni tiangin thing hlamtu le ti thantu ah a ser hna.
Currently Selected:
JOSHUA 9: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
