JOSHUA 23
23
Joshua Rovuih Bia
1Caan saupi hnuah, Bawipa nih Israel mi hna cu an velchum i an ral hna sinin dinhnak a pek hna tik le Joshua cu a upat i a tar ngaingai tikah, 2Joshua nih Israel mi vialte an upa hna le an lu hna le an biaceihtu hna le an bawi hna kha a auh hna i annih cu, “Atu cu ka upa i ka tar ngaingai cang; 3cun nannih nih Bawipa nan Pathian nih hi miphun vialte hna cungah nan caah a tuahmi kha nan hmuh cang, zeitintiah nannih an dohpiaktu hna cu Bawipa nan Pathian kha a si. 4Zohhmanh u, nannih cu a tang rihmi miphun hna kha nan phun cio caah ro ah kan pek hna, ka tei ciami miphun vialte hna he, Jordan tiva thawk in nitlaklei ah Rili Ngan tiang. 5Bawipa nan Pathian nih nan hmaiah a dawi hna lai i nan mit hmuh phak lo tiang a ṭhawl hna lai; cun Bawipa nan Pathian nih bia an kam hna bangin an ram cu nan co lai. 6Cucaah Moses phungbia cauk chungah aa ṭialmi vialte kha zulh awk le tuah awkah fek tein um ko u; orhlei ah siseh; kehlei ah siseh pialtak hlah u. 7Nannih nih hika i nan lakah a tang rihmi miphun hna he hin i cawh lo le, an pathian hna min kha chim lo le, cu hna cun chiatser lo le, an rianṭuan lo le an hmaiah kun loin, 8nihin ni tiang nan tuah bangin Bawipa nan Pathian sinah i bek ko u. 9Zeitintiah Bawipa nih nan hmai in a ngan le a ṭhawngmi miphun hna kha a dawi hna i, nannih cu nihin ni tiangah ahohmanh nih an in celh hna lo. 10Bawipa nan Pathian nih bia an kam hna bangin amah cu an dohpiaktu hna kha a si caah, nan lak i mi pakhat nih thong khat kha a dawi hna. #Deu 3.22; 32.30 11Cucaah Bawipa nan Pathian cu dawt awkah i ralring ngaingai tuah u. 12Nan i mer i hika ah nannih lakah a tang rihmi miphun hna hi nan fonh hna i nan ṭhit nan lak hna i an nu hna kha nan ṭhit hna i annih nih an in ṭhit ve hna ahcun, 13Bawipa nan Pathian nih hi miphun hna hi nan hmai in a ṭhawl lan hna lai lo ti kha fiang tein hngal ko u; Bawipa nan Pathian nih an pekmi hna hi ram ṭha chung hin nan loh hlantiang nan caah rap le thang le, nan hnak i tuknak fung le nan mit chung i hling an si lai.
14“Cun, atu cu vawleicung vialte phung bangin ka kal ve cang lai. Nannih nih nan dihlak in, Bawipa nan Pathian nih nanmah kongah biakamnak a tuahmi thilṭha vialte lakah pakhat hmanh pakpalawng a can lo kha nan lungthin le nan ruahnak in nan hngalh; nannih caah a dihlak in a tling dih, pakhat hmanh a bau lo. 15Sihmanhsehlaw Bawipa nan Pathian nih nannih kongah biakamnak a tuahmi thilṭha vialte kha nan caah a tlin bantukte khan, Bawipa nan Pathian nih hi ram ṭha an pekmi hna chung hin an hrawh hna hlantiang Bawipa nih nan cungah thilṭhalo vialte kha a tlunter lai, 16Bawipa nan Pathian nih nawl an pekmi hna biakamnak kha nan buar i pathian dang hna kha nan kalhnawh i an rian nan ṭuan i an hmaiah nan kun ahcun, khi tikah Bawipa thinhunnak cu nan cungah a alh lai i an pekmi hna ram ṭha hin khulrang tein nan rawk lai,” tiah a ti hna.
Currently Selected:
JOSHUA 23: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
