JOSHUA 2
2
Jeriko Ah Ram Ngiatu Kha An Thlah Hna
1Cun Nun fapa Joshua nih Shittim in a thli tein mi pahnih ram ngiatu ah a thlah hna i, “Va kal u law ram kha va cuan tuah u, Jeriko ko kha,” tiah a ti. Cun an kal i Rahab a min a simi hlawhhlangnu inn ah an lut i khika ah an tlung. #Heb 11.31; Jei 2.25 2Cun Jeriko siangpahrang cu, “Zohhmanh, ram ngiatthlai awkah Israel mi tuzan ah hika ah an ra,” tiah an chimh. 3Cun Jeriko siangpahrang nih Rahab sinah cun mi a hei thlah hna i, “Na sinah a rami, na inn chungah a lutmi kha rak chuahpi hna; zeicahtiah ram vialte kha ngiatthlai awkah a rami an si,” tiah a ti. 4Sihmanhsehlaw minu nih cun mipa pahnih hna cu a rak lak hna i a rak thuh hna i, “Biatak a si, ka sinah mi cu an ra ko, sihmanhsehlaw khuazei in an rat cu ka hngal lo; 5cun kutka khar a si deng, mui ah khan, mi hna cu an chuak; khuazei ah dah mi hna cu an kal ka hngal lo; khulrang in dawi tuah hna u, nan phak ko hna lai,” tiah a ti. 6Sihmanhsehlaw inncung ah a kaipi hna i a tianmi khumkung lakah khan a thuh hna. 7Cucaah mi nih cun Jordan tiva lei lam ah khan ti tannak hmun tiangin an dawi hna i, a dawitu hna kha an chuah cangka tein kutka kha an khar.
8An ih hlanah, an sinah inncung ah cun nu cu a hung kai i 9mi hna sinah cun, “Bawipa nih hi ram kha an pek cang hna i nanmah kan in ṭihnak hna nih khan a kan nenh i hi ram chung ummi vialte kha nan hmaiah an ther dih cang, ti kha ka hngalh. 10Zeitintiah Izipt ram in nan chuah tikah zeitindah Bawipa nih nan hmaiah Rili Sen ti kha a carter i zeitindah Jordan tiva ral ah a ummi Amor mi siangpahrang pahnih Sihon le Og kha nan hrawh cikcek hna kha kan theih. #Exo 14.21; Nam 21.21-35 11Cun cucu kan theih cangka tein kan lung cu an ther i nanmah ruangah ahohmanh ralṭha an um ti lo; zeitintiah cunglei van le tanglei vawlei i Pathian a simi cu Bawipa nan Pathian kha a si. 12Cucaah atu cu, nan cungah zaangfahnak ka langhter cang bantukin, nannih zong nih ka pa innchungkhar cungah zaangfahnak nan langhter ve i, hmelchunhnak taktak nan ka pek i, 13cun ka pa le ka nu, ka ṭale le ka unau hna le anmah ta a simi vialte cu nan khamh hna i kan nunnak kha thihnak chungin nan kan chuah naklai, Bawipa min in ka sinah chiatser tuah u,” tiah a ti. 14Cun mi hna nih cun a sinah, “Kan nun ah nan nung ve lai! Hi kan rian hi na chim lo ahcun, Bawipa nih hi ram kha a kan pek tikah zaangfahnak te le zumh awk tlak tein kan in ti lai,” tiah an ti.
15Cun thlalangawng in hri in a vun thlak hna, zeitintiah a inn cu khua kulhnak ralhau chungah sak chih a si caah amah cu ralhau chungah khan a um. 16Cun anih nih, “An dawitu hna nih an in ton sualnak hna hnga lo, tlang ah hung kai u; cun an dawitu hna an kir hlantiang, ni thum in cuka ah cun hung i thup u; cu hnuah cun va lan te ko u,” tiah a ti hna. 17Mi hna nih khan, “Chiat na kan sertermi lawng hin cun mawhchiat kan si hnga lo. 18Zohhmanh, ram chungah kan rung luh tikah hi hri sen hi na kan chuahternak thlalangawng ah hin na rak hren lai, cun na inn chungah hin na pa le na nu, na ṭale le na pa innchungkhar vialte nan rak pumh hna lai. 19Na innka in khuachung lam ah ahohmanh an chuah ahcun a thi cu amah lu cungah a si lai i, kannih cu mawhchiat awk kan si lai lo; sihmanhsehlaw na inn chung i a ummi aho cung hmanh ah kut thlak a si ahcun, a thi cu kan lu cungah a si lai. 20Sihmanhsehlaw kan rian hi na chim ahcun, chiat na kan sertermi biakamnak ah hin kannih cu mawhchiat awk kan si hnga lo,” tiah an ti. 21Cun anih nih, “Nan bia bangin si ko seh,” tiah a ti. Cun a kalter hna i an kal; cun hri sen kha thlalangawng ah khan a hren.
22An kal i tlang ah cun an hung kal, a dawitu hna an kir hlantiang, khika ah ni thum an um; a dawitu hna nih khan lam thluanchuak in an kawl hna, sihmanhsehlaw zeihmanh an hmu lo. 23Cun mi pahnih hna kha tlang cung cun an rung ṭum ṭhan i tiva cu an tan i Nun fapa Joshua sinah khan an ra; cun an cung i thil a tlungmi vialte kha an chimh. 24Cun annih nih Joshua sinah, “Bawipa nih ram cu a dihlak in kan kut chungah a kan pek taktak ko cang; cu hleiah cu ram chung ummi vialte hna cu kanmah ruangah an therphang ko,” tiah an ti.
Currently Selected:
JOSHUA 2: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
