JOSHUA 19
19
Simeon Comi Ram
1Camcawh fung pahnihnak cu Simeon caah a hung chuak, an innchungkhar ning cio ah Simeon phun caah cun; cun an vo cu Judah phun nih an comi chungah khan a si. 2Amah nih a comi hna cu Beersheba, Sheba, Moladah, #1Cha 4.28-33 3Hazar-shual, Balah, Ezem, 4Eltolad, Bethul, Hormah, 5Ziklag, Beth-markaboth, Hazar-susah, 6Beth-lebaoth, le Sharuhen khua pahleithum an khuate hna he; 7cu En-rimmon, Ether le Ashan khua pali an khuate hna he; 8cun hi khuapi hna velchum i a ummi khuate vialte, Ballath-beer, Negeb i Ramah tiangin. Mah hihi Simeon phun nih an innchungkhar ning cio ah an comi cu a si. 9Simeon phun nih an comi ram cu Judah ram chungah khan aa tel ve. Judah phun vo cu an caah a ngan tuk caah Simeon phun nih cun an comi ram chungah cun vo an co ve.
Zebulun Comi Ram
10Camcawh fung pathumnak cu Zebulun phun caah a hung chuak, an innchungkhar ning cio ah. An comi ram cu Sarid tiang a phan; 11cun an ramri cu nitlaklei ah a hung kal i Mareal ah a lan i Dabbesheth i a ummi tivate tiang a kal; 12cun Sarid in ramri cu khattelei kamah nichuahlei ah Khisloth-tabor ramri tiang a kal; 13khika in Daberath ah a kal i Jafia a hung phan; khika in nichuahlei kam zuahmah in a kal i Gath-hefer le Eth-kazin a phan cun Rimmon ah a va kal i Neah lei ah aa kuai; 14cun chaklei ah ramri cu aa mer i Hannathon ah a kal i Iftahel nelrawn ah a dong. 15Cun Kattath, Hahalal, Shimron, Idalah, le Bethlehem — khuapi hleihnih, an khuate hna he. 16Mah hihi Zebulun phun nih an innchungkhar ning cio in an comi vo cu a si — hi khua hna le an khuate hna cu.
Issakhar Comi Ram
17Camcawh fung palinak cu Issakhar caah a hung chuak, an innchungkhar ning cio ah Issakhar phun caah cun. 18Cun a ram chungah cun Jezreel, Khesulloth, Shunem, 19Hafaraim, Shion, Anaharath, 20Rabbith, Kishion, Ebez, 21Remeth, En-gannim, En-haddah le Beth-pazzez an um; 22ramri nih cun Tabor, Shahazumah, le Beth-shemesh zong a tongh hna i a ramri cu Jordan ah a dong — khua hleiruk, an khuate hna he. 23Mah hihi Issakhar phun nih an innchungkhar ning cio ah an comi vo cu a si — hi khua hna le an khuate hna he cun.
Asher Comi Ram
24Camcawh fung panganak cu Asher phun caah a hung chuak, an innchungkhar ning cio ah. 25A ram chungah cun Helkath, Hali, Beten, Akhshaf, 26Allam-melek, Amad, le Mishal an um; nitlaklei leiah Karmel le Shihor-libnath a hei tongh i 27nichuahlei ah aa mer, Beth-dagon ah a kal i Zebulun le Iftahel nelrawn tongh in chaklei ah Beth-emek le Neiel ah a kal; cun chaklei ah a lan i Jabul, 28Ebron, Rehob, Hammon, Kanah le Sidon Ngan tiang a kal; 29cun ramri cu Ramah leiah aa mer i kulhmi khuapi Tair a phan; cun ramri cu Hosah leiah aa mer i rili ah a dong; Mahalab, Akhzib, 30Ummah, Afek, le Rehob — khua kul le khua hnih, an khuate hna he, 31Mah hihi Asher phun nih an innchungkhar ning cio ah an comi ro cu a si — hi khua hna le an khuate hna he cun.
Naftali Comi Ram
32Camcawh fung paruknak cu Naftali phun caah a hung chuak, an innchungkhar ning cio in, Naftali phun caah cun. 33A ramri cu Helef le Zaanannim ah a ummi kuhthing le Adami-nekeb le Jabneel in a thawk i Lakkum tiang a kal, cun Jordan ah a dong; 34cun ramri cu nitlaklei ah Aznoth-tabor leiah aa mer i khika in Hukkok ah a kal i thlanglei ah Zebulun le nitlaklei ah Asher le nichuahlei ah Judah kha Jordan ah a pal pah hna. 35Kulhmi khua hna cu Ziddim, Zer, Hammath, Rakkath, Khinnereth, 36Adamah, Ramah, Hazor, 37Kedesh, Edrei, En-hazor, 38Ziron, Migdalel, Horem, Beth-anath, le Beth-shemesh an si — khua hlei kua, an khuate hna he. 39Mah hihi Naftali phun nih an innchungkhar ning cio in an comi vo cu a si — hi khua hna le an khuate hna cu.
Dan Comi Ram
40Camcawh fung pasarihnak cu Dan phun caah a hung chuak, an innchungkhar ning cio ah. 41Cun an comi ram chungah cun Zorah, Eshtaol, Ir-shemesh, 42Shaalabbin, Aijalon, Ithlah, 43Elon, Timnah, Ekron, 44Eltekeh, Gibbethon, Baalath, 45Jehud, Bene-berak, Gath-rimmon, 46le Mejarkon le Rakkon le Joppa changtu ram cu an i tel. 47Dan mi nih an ram cu an sungh tikah, Dan mi hna cu an hung kal i Leshem kha an hung doh i an tei. Vainam in an sam dih hnuah an lak i a chungah khua an sa i anmah thlatu Dan min chuankhan in Leshem cu Dan tiah an ti. #Biac 18.27-29 48Mah hihi Dan miphun nih an innchungkhar ning cio ah an comi vo cu a si — hi khua hna le an khuate hna cu.
49Cun ram cu an covo cio ah an i phawt dih tikah, Israel mi hna nih cun Nun fapa Joshua kha anmah lakah vo pakhat an pek. 50Bawipa nawl pek bangin a halmi hna khua, Efraim tlangram i a ummi Timnath-serah kha an pek; cu khua cu a ser ṭhan i a chungah khua a sa.
51Mah hna hi tlangbawi Eleazar le Nun fapa Joshua le Israel mi phun hna i an chung cio lu hna nih Shiloh ah Bawipa hmaiah tonnak thlam innka ah camcawhfung khiah in an phawtmi covo cu an si. Cuticun ram phawt cu an lim.
Currently Selected:
JOSHUA 19: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
