JOSHUA 11
11
Jabin Sinah Aa Ṭommi An Tei
1Cun hi kong cu Hazor siangpahrang Jabin nih a theih tikah, Madon siangpahrang Jobab le Shimron siangpahrang le Akhshaf siangpahrang le 2chaklei tlangram i a ummi siangpahrang hna le Khinneroth thlang Arabah i a ummi siangpahrang hna le rawnram i a ummi siangpahrang hna le nitlaklei Nafoth-dor i a ummi siangpahrang hna le 3nichuahlei le nitlaklei i a ummi Kanaan mi hna le, tlangram i a ummi Amor mi hna, Hit mi hna, Periz mi hna le Jebus mi hna le Hermon tang Mizpah ram i a ummi Hiv mi hna cu bia a cah hna. 4Cun an ralkap vialte hna le an rang le an rangleng tampi hna he tiah an ra chuak ciammam i, bu nganpi, an tam ning cu rili kam i thetse zat hrimhrim an si. 5Cun hi siangpahrang vialte hna nih cun an ralkapbu vialte cu an fonh hna i Israel mi kha doh awkah Merom ti ah cun an ra i an riak,
6Cun Bawipa nih Joshua cu a chawnh i, “Annih kha ṭih hna hlah, zeicahtiah thaizing atu tikah hin an dihlak in thah cia in Israel mi sinah ka pek hna lai; an rang cu an tha nan pheh hna lai i an rangleng cu mei in nan khangh hna lai,” tiah a ti. 7Cucaah Joshua le a ralkap vialte hna nih cun Merom ti pawngah cun duak tiah an va pauh hna i an nam colh hna. 8Cun Bawipa nih annih cu Israel mi kut chungah a pek hna i an thah hna i, Sidon Ngan le Misrefoth-maim tiang, cun nichuahlei ah Mizpah nelrawn tiang an dawi hna; pakhat hmanh an taan ti lo tiang an thah lengmang hna. 9Cun Bawipa nih a fial bantukin Joshua nih an cungah a tuah; an rang kha an tha an pheh hna i an rangleng kha mei in a khangh hna.
10Cun khi caan ah Joshua cu a let i Hazor kha a lak, an siangpahrang cu vainam in a thah; zeitintiah Hazor cu hmasa ah cun cu peng vialte hna lu cu a si. 11A chungah a ummi vialte cu vainam in an thah dih hna i an hrawh cikcek hna; thaw a chuahmi pakhat hmanh an zuah lo; Hazor cu mei in a khangh. 12Cun cu siangpahrang hna khua vialte le an siangpahrang hna cu Joshua nih a lak hna i vainam in a thah hna, a hrawh cikcek hna, Bawipa sal Moses nih nawl a rak pek bang khan. 13Mual cung i a ummi khua hna tu cu, Joshua nih a khanghmi Hazor dah ti lo cu, Israel mi nih an khang hna lo. 14Cun hi khua hranchaw vialte hna le saṭil hna cu Israel mi nih hranchaw ah an i lak dih; sihmanhsehlaw mi cu an hrawh dih hna hlantiang nam in an thah hna i thaw a chuahmi pakhat hmanh an ngan ta hna lo. 15Bawipa nih a sal Moses kha nawl a pek bangin Moses nih Joshua kha nawl a pek chin i cu bang cun Joshua nih a tuah; Bawipa nih Moses nawl a pekmi vialte kha pakhat hmanh a hrelhmi an um lo.
Joshua Nih Ram Cu A Tei Dih
16Cucaah Joshua nih cu ram vialte, tlangram le Negeb vialte le Goshen ram vialte le rawnram le Arabah le Israel tlangram le a rawnram cu, 17Seir lei i a hung kaimi Halak Tlang in Hermon Tlang tang i a ummi Lebanon nelrawn i a ummi Baal-gad tiangin a lak dih hna. Cun an siangpahrang vialte kha a lak hna i a tuk hna i a thah hna. 18Joshua nih cu siangpahrang hna he cun saupi an i do. 19Gibeon i a ummi Hiv mi hna dah ti lo cu Israel mi hna he remnak a tuahmi khua pakhat hmanh an um lo, an dihlak in raldohnak i an lakmi an si dih. 20Bawipa nih Moses nawl a pek bangin hrawh cikcek an si i zaangfahnak um loin hloh cikcek an si nakhnga, an lung ṭhawnter i Israel mi hna doh cu Bawipa tuahmi a si. #Deu 7.16
21Cun khi caan ah Joshua cu a ra i tlangram a simi Hebron, Debir, Anab le Judah tlangram vialte in le Israel tlangram vialte in Anak mi cu a hloh dih hna; Joshua nih an khua hna he a hrawh cikcek hna. 22Israel mi ram chungah Anak mi cu pakhat hmanh an tang lo; Gaza le Gath le Ashdod lawngah tlawmpal an tang. 23Cucaah Bawipa nih Moses sinah a rak chim cangmi vialte bantuk khan Joshua nih ram cu a ning piin a lak i an phun ning cio i phawtning khan Joshua nih Israel mi hna sinah ro caah a pek hna. Cun ram cu ral in aa din.
Currently Selected:
JOSHUA 11: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
