JOB 3
3
Job Nih Hrin A Si Ni Kha A Ṭah
1Hi hnuah hin Job nih a ka a pau i a chuah ni kha chiat a serh. #Jer 20.14-18 2Cun Job nih aa thawh i,
3“Ka chuah ni cu rawkral ko seh,
‘Fapa cu pawi a si cang,’ an ti zan
zong kha, rawkral ko seh.
4Kha ni kha muihnak si ko seh!
Cung um Pathian nih kawl hlah seh,
Ceunak zong nih ceuh hlah seh.
5Muihnak le muih khemkhumnak nih
kan ta a si, ti hna seh.
Minmei nih zel camcin seh law
chunmui nih ṭhih seh.
6Kha zan kha — a chahmi muihnak
nih tlai seh!
Kum chung lawmhnak ni hna lakah
i tel hlah seh,
Thla relnak zongah i tel hlah seh.
7Kha zan kha zan ṭhing si ko seh;
Lawmhnak thawng zeihmanh
leng hlah seh.
8Kha ni kha eihthiammi hna nih
chiatserh hna seh,
Limkeng, a ṭhanghter khomi hna nih
khan chiat cu serh hna seh.
9Kha zan i zinglei arfi hna cu
mui hna seh,
Ceunak kha i ruahchan awk
zeihmanh um hlah seh.
10Ngaihchiatnak le harnak
a ka phakter caah
A ka chuahtertu zan kha
chiatserh si ko seh.
11Zeicahdah ka chuah ah khan ka rak thih ko lo?
Paw chungin ka chuah ah khan
ka thaw a rak dongh ko lo?
12Zeicahdah phei cungah an rak
ka pom i
Ka dawp awkah hnuk an rak
ka hmuah?
13Kha lioah khan rak thi ning law,
atu cu kaa din diam cang hnga.
14Hlanlio siangpahrang inn hna a remh
ṭhantu siangpahrang hna le
bawi hna bang khan kaa hngilh
diam cang hnga.
15Cun an inn sui le ngun in a khahtertu
bawi hna sinah khan ka hei i din
diam cang ko hnga.
16Zeicahdah thla tling loin a chuakmi
ngakchia bantuk le
Ceunak a hmu bal lomi bawhte
bantukin ka rak loh ko lo?
17Khika ah cun miṭhalo hna nih harnak
tuah an ngol i
Retheimi hna cu an i din.
18Khika ah cun thongtla hmanh nih
dinhnak an hmuh i
Rianṭuan a hnektu hna aw kha
an thei ti lo.
19Khika ah mihme mingan an um ṭi i
sal cu a bawipa sinin a luat cang.
20“Harnak chungah a um i a lung
chungin a ngaih a chiami,
21Thihnak a duh nain a hmu kho lo i
Thuhmi chawhlawn nakin thihnak co
a duh deuhtu hna, #Biat 9.6
22Thlan an hmuh tik i aa lawm hringhran i
a tha a nuammi hna cu,
Zeicahdah ceunak pek an si ee?
23Pathian nih a velchum in a hren i
a lam a pitmipa sinah cun
Zeicahdah ceunak cu pek a si ee?
24Ka aihramnak cu ka rawl a si i
Ka hrum-ainak cu ti luan in a luang.
25Ka phanmi thil cu ka cungah
an tlung dih i
Ka ṭihmi thil nih an ka tlunhnawh.
26Ka thabat a dam lo i dai tein
ka um kho hlei lo;
Dinh ka hmu lo, harnak a dong lo,”
tiah a ti.
Currently Selected:
JOB 3: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006